ఆ వాకిట్లోకి వనమొచ్చింది!

ఆదర్శం

ఆ వాకిట్లోకి వనమొచ్చింది!

పట్నవాసికి పచ్చదనమంటే ఇష్టమున్నా
ఏం చేయగలడు?
వాకిట్లో వీలుండదు..
పెరట్లో స్థలం ఉండదు..
ఉన్న కాసింత స్థలంలో ఒకట్రెండు పూల మొక్కలు పెంచితేనే గొప్ప!
అయితే మియావకి పద్ధతిలో తన ఇంటి ఆవరణలో అద్భుతం చేశాడు హైదరాబాద్‌ వాసి విక్రమ్‌ పర్యాద. తనకున్న కొద్దిపాటి స్థలాన్ని పచ్చదనంతో నింపేశాడు
తాండూరుకు చెందిన విక్రమ్‌ ప్రస్తుతం హైదరాబాద్‌లో స్థిరపడ్డాడు. చిన్నప్పటి నుంచీ ప్రకృతి ప్రేమికుడైన ఆయన తన ఇంటి దగ్గరున్న కాస్త స్థలంలో ఓ వనాన్ని సృష్టించాలనుకున్నాడు. తక్కువ స్థలంలో ఎక్కువ మొక్కలు నాటే పద్ధతుల గురించి అన్వేషించాడు. అప్పుడే మియావకి పద్ధతి గురించి తెలుసుకున్నాడు. ఇప్పటికే ఈ విధానాన్ని అనుసరిస్తున్నవారు ఉన్నారు. వారి ప్రసంగాలు, సందేశాల ద్వారా విక్రమ్‌ అనేక విషయాలు తెలుసుకున్నాడు. అలా తన ఇంటి ముందున్న ఖాళీ స్థలంలో సుమారు 30 మొక్కలు నాటాడు. మునగ, కరివేపాకు, జమ్మి, నిమ్మ, ఉసిరి, వేప లాంటివే కాకుండా, రామ్‌ఫల్‌, లక్ష్మణ్‌ఫల్‌, జామ, సీతాఫలం వంటి పండ్ల జాతి మొక్కలను ఏర్పాటుచేశాడు. ఇప్పుడా మొక్కలన్నీ.. మానులయ్యాయి. విక్రమ్‌ ఇంటిని నందనవనంగా తీర్చిదిద్దాయి.
* ఏం చేశాడంటే...: విక్రమ్‌ ఇంటి ప్రాంగణంలో 110 చదరపు అడుగుల స్థలం ఉంది. మియావకి విధానంలో మొక్కల పెంపకం కోసం ముందుగా నేలను సిద్ధం చేశాడు. నేలను ఒక మీటర్‌ లోతు వరకూ తవ్వి.. అందులో వర్మీ కంపోస్టు, కొబ్బరి పిప్పి, తౌడు మిశ్రమాన్ని వేసి పూడ్చేశాడు. అందులో మొక్కలను నాటాడు. వర్మీ కంపోస్టు మొక్క ఎదిగేందుకు దోహద పడితే, తౌడు వేర్లను బలంగా చేస్తుంది. కొబ్బరి పిప్పి నీటి వినియోగాన్ని తగ్గిస్తుంది. మొక్కలు నాటిన తర్వాత 8 నుంచి 12 అంగుళాల వరకు ఎండుటాకులు, గడ్డి వేశాడు. దీన్ని మంచింగ్‌ అంటాం. ఇలా చేయడం వల్ల.. సూర్యుని వేడి నేరుగా నేలను తాకదు. నేలలో ఉన్న అవసరమైన బ్యాక్టీరియా చనిపోదు. ఆ బ్యాక్టీరియా నేల చుట్టూ వ్యాపిస్తుంది. కొన్నాళ్లకు ఈ ఎండుటాకులే కుళ్లి ఎరువుగా తయారవుతుంది. అంతేకాదు, మొక్కలకు తేమ అందుతుంది. ఈ విధానాలతో విక్రమ్‌ చేసిన వన యజ్ఞం ఫలించింది. మొక్కలు చిక్కగా, బలంగా పెరిగాయి.
మియావకి పద్ధతిలో చిన్న వనాన్ని సృష్టించాక ఇంటి ఆవరణం పచ్చదనంతో నిండిపోయింది. చిన్న చిన్న పక్షులు, పిచ్చుకలతో ఆహ్లాదకరమైన వాతావరణం ఏర్పడింది. వాటికి ఆవాసంగానూ ఉపయోగపడుతుంది. నేను పెంచుకున్న మొక్కల ద్వారా సహజసిద్ధమైన పండ్లు, కూరగాయలూ లభిస్తున్నాయి. దీనికి నేనెక్కువగా ఖర్చు చేసిందీ లేదు. సుమారు రూ.8వేలు ఖర్చయ్యాయంతే.. సంప్రదాయ తోటని సృష్టించడం కంటే చాలా తక్కువ. పెద్దగా నిర్వహణా అవసరం లేదు.

మనం అడవిని పెంచుదామా?

పట్టణీకరణ రోజురోజుకీ పెరిగిపోతుంది. ఒకప్పుడు విస్తారంగా ఉన్న అడవులు నానాటికీ తగ్గిపోతున్నాయి. ఫలితం భూతాపం పెరిగి మనిషి మనుగడకే ప్రమాదం వాటిల్లుతోంది. ఈ ప్రకృతి మనకెంతో ఇచ్చింది. అందుకు కొంతైనా తిరిగిచ్చేయాలి.. అందుకు అడవులు పెంచడమే ఏకైక మార్గం. వనాన్ని ఆవిష్కరించడమంటే మాటలా? ఎంతో స్థలం, మరెన్నో వనరులు కావాలి. అయితే పట్టెడంత స్థలంలో చిట్టడవిని సృష్టించే పద్ధతి ఒకటుంది. అదే మియావకి విధానం. జపాన్‌కి చెందిన వృక్ష శాస్త్రవేత్త అకీరా మియావకి దీనిని ప్రవేశపెట్టారు. తక్కువ స్థలంలో ఎక్కువ మొక్కలు పెంచడం ఇందులో ప్రత్యేకత. పదడుగులు చాలు.. పాతిక మొక్కలు నాటడానికి. వాటిని చెట్లుగా పెంచడానికి. అంతేకాదు తక్కువ కాలంలో సేంద్రియ పద్ధతిలో సహజ సిద్ధమైన ఎన్నో చెట్లు పెంచొచ్చు.

* నాలుగు పొరలు...
30 చదరపు అడుగుల స్థలం ఉంటే చాలు మియావకి విధానంలో అడవినే సృష్టించొచ్చు. దీనికోసం నాలుగు అంచెలుంటాయి. మొదటి అంచెను స్రబ్‌ లేయర్‌ అంటారు. ఇందులో మల్లె, నిమ్మ వంటి చిన్న మొక్కలు పెంచుతారు. రెండోది సబ్‌ ట్రీ లేయర్‌. ఇందులో కరివేపాకు, సీతాఫలం, దానిమ్మ, గోరింటాకు, బత్తాయి చెట్లు పెంచుతారు. మూడోది ట్రీ లేయర్‌. బాగా ఎత్తు పెరిగే మునగ, మామిడి, సపోట, వెలగ వంటి చెట్లు పెంచుతారు. చివరి లేయర్‌లో వేప, పనస, అల్లనేరేడు వంటి వృక్ష జాతులుంటాయి. ఈ విధానంలో ఒక చెట్టు నీడలో మరో చెట్టు పెరుగుతుందన్నమాట. మొదటి రెండేళ్లు తగు జాగ్రత్తలు తీసుకుంటూ, రోజుకు రెండు సార్లు తగినన్ని నీళ్లు పెడితే చాలు చిన్నపాటి అడవి తయారవుతుంది. 100 చదరపు మీటర్ల విస్తీర్ణంలో ఏకంగా 300 చెట్లు పెంచేయొచ్చు.

- నిఖిల్‌ గెంటిల, హైదరాబాద్‌

Tags :

మరిన్ని

జిల్లా వార్తలు

వారెవ్వా! చదువు సుఖీభవ ఈ-నాడు మకరందం రయ్.. రయ్ సిరి విజేత ఈ తరం హాయ్! ఆహా హాయ్ బుజ్జీ స్థిరాస్తి రుచులు విహారి