అమెరికా అధ్యక్షులు మెచ్చిన ద్రాక్షరత్న

ఆదర్శం

అమెరికా అధ్యక్షులు మెచ్చిన ద్రాక్షరత్న

నారు పోసిన వారు... నీరు పోయరా?
ఒట్టి నీరే కాదు... నీటికి మట్టి కలిపి మరీ పోశారు... చింతల వెంకట్‌రెడ్డి.
వరిగింజల్లో ఏ-విటమిన్‌ను తీసుకొచ్చారు. దేశవిదేశాల్లో పేరు, పేటెంట్‌ సాధించారు. హైదరాబాద్‌ నగరం ఆల్వాల్‌ ప్రాంతానికి చెందిన వెంకట్‌రెడ్డి ద్రాక్ష పంటలో అనేక ప్రయోగాలు చేసి ద్రాక్షరత్నగానూ కీర్తిగడించారు. వ్యవసాయంలో ఆయన చేసిన ప్రయోగాలు, ప్రతిభను గుర్తించిన కేంద్ర ప్రభుత్వం ఈ ఏడాది పద్మశ్రీ ప్రకటించింది.
కష్టపడిన వారికే వాటిని గట్టెక్కడం ఎలాగో తెలుస్తుంది. ద్రాక్షను సాగుచేసి మొదట్లో నష్టపోయిన వెంకట్‌రెడ్డి... తర్వాత ప్రయోగాల బాట పట్టి సత్ఫలితాలు అందుకున్నారు. ఒకప్పుడు హైదరాబాద్‌ నగర పరిసరాలు పచ్చటి పందిళ్లతో ద్రాక్ష సాగుతో కళకళలాడేది. క్రమంగా వాతావరణ పరిస్థితులు అనుకూలించకపోవడం, తెగుళ్ల బెడద, స్థిరాస్తి వ్యాపారం జోరందుకోవడంతో ద్రాక్ష కనుమరుగైంది. మిగతా రైతులు ఈ పంటను వదిలేసినా... నాలుగు దశాబ్దాల నుంచి ద్రాక్ష సాగులో అద్భుతాలు సృష్టిస్తూనే ఉన్నారు వెంకట్‌రెడ్డి. ఆయన పండించిన ద్రాక్ష పండ్లను ఇద్దరు అమెరికా అధ్యక్షులు రుచి చూశారు. 2001లో హైదరాబాద్‌కు వచ్చిన అప్పటి అమెరికా అధ్యక్షులు బిల్‌ క్లింటన్‌, 2006లో వచ్చిన జార్జిబుష్‌కు థామ్సన్‌ ఫ్లేమ్‌, బ్లాక్‌ సీడ్‌లెస్‌ ద్రాక్ష పండ్లను అందజేశారు.
ద్రాక్షరత్న అయ్యారిలా: తండ్రి ముత్యంరెడ్డి నుంచి వచ్చిన వందెకరాల పొలంలోకి దిగారు వెంకట్‌రెడ్డి. తమ పొలం పక్కన ద్రాక్ష సాగు చేసి అధిక దిగుబడులు సాధిస్తున్న ఆదినారాయణ రాజు వద్ద మెలకువలు తెలుసుకొన్నారు. సోదరుడు శంకర్‌రెడ్డితో కలిసి ద్రాక్ష సాగు చేపట్టారు. రసాయన ఎరువులతో నష్టాలు చవిచూసిన ఆయన.. సహజ సిద్ధంగా పోషకాలను తయారు చేస్తే బాగుంటుందనుకున్నారు. చెట్ల మధ్య పెరిగిన గడ్డిని తొలగించకుండా అలాగే వదిలేశారు. వానా కాలంలో ఏపుగా పెరిగి ఎండా కాలంలో ఎండి, మళ్లీ వర్షాకాలంలో ఆ గడ్డి కుళ్లిపోయేది. అక్కడికి వానపాములు వచ్చేవి. అలా ద్రాక్ష చెట్టుకు కావాల్సిన ఎరువు లభించేది. భూమిలోపల నుంచి తీసిన మట్టిని ఎండబెట్టి పలు దఫాలుగా నీటితో కలిపి పంటలకు వేసి అధిక దిగుబడులు సాధించారు. 1990లో ద్రాక్షరత్న బిరుదు అందుకున్నారు.
విటమిన్‌-ఏ ‘వరి’ంచేలా: అల్వాల్‌, కుందన్‌పల్లిలోని పొలాల్లో సేంద్రియ పద్ధతిన వరి సాగు చేశారు. వరికి నీటిలో ఎర్ర మట్టి కలిపి అందించారు. ఆ వరిలో విటమిన్‌-ఏ ఉందని వ్యవసాయ విశ్వవిద్యాలయం పరిశోధకులు నిర్ధారించారు. ఈ బియ్యంపై నివేదికను అంతర్జాతీయ వ్యవసాయ పరిశోధన సంస్థకు పంపారు. 60 దేశాలు ఈ బియ్యానికి పేటెంట్‌ కల్పించాయి.
సమస్యకు ‘యంత్ర’ మంత్రం: నాట్లు వేసేందుకు సొంతంగా ఓ యంత్రం తయారు చేసుకున్నారు. ఒక చోట వేసిన నారుని మరో చోట నాటడం వల్ల వేళ్లు తెగి, అవి మళ్లీ భూమిలోకి వెళ్లి పిలకలు వేసేందుకు చాలా సమయం వృథా అవుతుంటుంది. అదే ఒకటే విత్తును విత్తితే ఎక్కువ పిలకలు వస్తాయి. అందుకే ఒక్కొక్క గింజను నాటేందుకు యంత్రం తయారు చేశారు. ఈ యంత్రంతో వరి విత్తనాలే కాదు గోధుమ, సజ్జ, మొక్కజొన్న, పెసలు, మినుములు అన్ని రకాల విత్తనాలు నాటుకోవచ్చు. ఇలా వెంకట్‌రెడ్డి వ్యసాయంలో చేసిన ప్రయోగాలకు పద్మశ్రీ ఆయన్ను వరించింది. మట్టిని నమ్ముకొని మట్టితోనే గుర్తింపు తెచ్చుకున్న పుడమి పుత్రుడు వెంకట్‌రెడ్డి. తనకు అవార్డు రావడం సంతోషాన్నిచ్చిందని, తన ప్రయోగాలు రైతులందరికీ ఉపయోగపడినప్పుడు ఇంకా ఆనందపడతానని ‘న్యూస్‌టుడే’తో చెప్పారు.

- మడూరి రవిందర్‌, తిరునగరి రమణయ్య, అల్వాల్‌, కీసర

Tags :

మరిన్ని

జిల్లా వార్తలు

వారెవ్వా! చదువు సుఖీభవ ఈ-నాడు మకరందం రయ్.. రయ్ సిరి విజేత ఈ తరం హాయ్! ఆహా హాయ్ బుజ్జీ స్థిరాస్తి రుచులు విహారి