విడ్డూరం-ఆశ్చర్యం

e వ్యర్థం... వృథా కాదు!

మన చేతి వేళ్లు నాట్యమాడిన చరవాణి కొన్ని సంవత్సరాలకు చేరుతుంది చెత్తకుండీ! మన ఒడిలో కొలువు తీరిన ల్యాప్‌టాప్‌ కొద్ది రోజులకు పడుతుంది మూలకు! మనకు వినోదాన్ని పంచిన ఎల్‌ఈడీ టీవీ.. ఠీవీ కాలక్రమేణా తగ్గుతుంది! ఇలా ఊరంతా ఈ-వ్యర్థాల పోగులు పడతాయి... నిజానికి ఇదంతా ఎందుకూ పనికి రాని చెత్తే  ఇందులో రీసైక్లింగ్‌కు పనికి వచ్చేది కొంతే! కానీ ఓ వ్యక్తి ఈ చెత్తతోనే కళకు ప్రాణం పోస్తున్నారు కళాఖండాలను సృష్టిస్తున్నారు.. ఆయనే... విశ్వనాథ్‌ మల్లబడి.
విశ్వనాథ్‌ వయస్సు 57 సంవత్సరాలు. ఈయన బెంగళూరులో విప్రోలో సీనియర్‌ కన్సల్‌టెంట్‌గా పనిచేస్తున్నారు.  ప్రవృత్తి మాత్రం ఈ-వ్యర్థాలకు ప్రాణంపోయడమే! ఓ వైపు వృత్తిగతంగా తీరిక లేకుండా ఉంటూనే.. తనకు దొరికే ఆ కాస్త సమయాన్ని ఈ వ్యర్థాల సేకరణ కోసం వెచ్చిస్తున్నారు. నగరంలో ఉన్న ఏ స్క్రాప్‌ డీలర్‌ వద్ద ఏ అమూల్య ఈ వ్యర్థముందో అన్న రీతిన ఉత్సాహంగా వెతుకుతుంటారు. అలా దొరికిన వాటితో ఏదో ఓ ఆకృతికి రూపం పోస్తుంటారు.
చెత్తతో శిల్పాలు చెక్కినారు! పనికిరాని మదర్‌బోర్డులు, సీపీయూలు, కెపాసిటర్లు, ల్యాప్‌టాప్‌, ఎల్‌ఈడీ తెరలు.. ఇలా ఏ ఈ చెత్తైనా ఈయన చేతిలో పడితే శిల్పంగా మారిపోతుంది. గడియారాలు, అలంకరణ కోసం వేలాడదీసే వస్తువులు, రోబో ఆకృతులు, శిల్పాలు ఇలా.. ఓ ఆరు సంవత్సరాలుగా ఈ కళలో ఆయన లీనమవుతున్నారు. మొదట ఈ వ్యర్థాలను చూడగానే ఏ వస్తువు ఎలా తయారు చేయొచ్చో.. ఓ అంచనాకు వస్తారీయన. ప్రతీసారి కొత్తగా.. కళాత్మకంగా ఆలోచించే ప్రయత్నం చేస్తుంటారు.
నమ్ముకుంటారు.. అమ్ముకోరు  ఈయన తను తయారు చేసిన ఆకృతులను ఎవరికీ అమ్మనంటారు. కేవలం ఆయన అభిరుచికి తగ్గట్లుగా ఆయన కోసమే తయారు చేసుకుంటానంటారు. తను మొట్టమొదట ఈ వ్యర్థంగా మారిన నోకియా ఫోనుతో ఓ సాలీడు ఆకృతిని తయారు చేశారు. అప్పుడు తాను చాలా ఆనందించానంటారు. ఇక అప్పటి నుంచి ఇలా తయారు చేస్తూనే ఉన్నారు. కొన్ని కొన్ని సర్క్యూట్‌ బోర్డుల్లో బంగారాన్ని సైతం వాడతారంట. ఇలాంటి బోర్డులతో ఆకృతులు చేస్తే మరింత అందాన్ని సంతరించుకుంటాయంటారు ఆయన.  ఈ స్ఫూర్తి ఇతరుల్లోనూ రగిలించేందుకు ఈయన తనవంతుగా వర్క్‌షాపులు, సెమినార్లూ నిర్వహిస్తుంటారు. ఇలా అందరూ.. తనలా ఈ వ్యర్థాలను ఏదో ఒకలా తిరిగి వాడితే.. పర్యావరణానికి ఎంతో కొంత మేలు జరుగుతుందంటారీయన.
‘పాత ఫోన్లు.. లాండ్‌ ఫోన్ల పరికరాలు ఇలా ఏదీ వ్యర్థం కాదు.. అసలు నా దృష్టిలో పనికిరానిది అనేది ఏదీ ఉండదు.  కొన్ని సంవత్సరాలుగా నేను దాదాపు టన్ను వరకు ఈ వ్యర్థాలను సేకరించాను. వాటిని వేరు చేశాను. అందులోంచి సేకరించిన వస్తువులతో నేను పలు ఆకృతులు చేస్తుంటా’ అంటున్నారు విశ్వనాథ్‌. ఇలా పర్యావరణ పరిరక్షణకూ తనవంతు సాయం చేస్తున్నారు.

Tags :

మరిన్ని

జిల్లా వార్తలు

చదువు సుఖీభవ మకరందం ఈతరం ఆహా హాయ్ బుజ్జీ స్థిరాస్తి కథామృతం రుచులు దేవతార్చన

విడ్డూరం-ఆశ్చర్యం

మరిన్ని

App