దైవం మానుల రూపేణ

విడ్డూరం-ఆశ్చర్యం

దైవం మానుల రూపేణ

చిక్కటి అడవి అది. అందులో ఊడలు విరబోసుకున్న మర్రి మానులు, వేళ్లూనుకున్న వేప చెట్లు, ఏళ్లుగా పాతుకుపోయిన మద్ది, చింత, తుమ్మ, రావి ఇలా రకరకాల జాతుల చెట్లు ఎన్నో ఉన్నాయి. ఇన్ని ఉన్నా.. పక్కపక్కనే ఉన్న రెండు టేకు చెట్లు మాత్రం ప్రత్యేకం. వాటి వయసు వందేళ్ల పైమాటే! అయితే గొప్పేంటి? అంటారా. ఎత్తు రమారమి 60 అడుగులు. అందులో వింతేంటి?అంటారా. అడవిలో పుట్టి.. అడవిలో పెరిగిన ఈ చెట్లకు పేర్లున్నాయి. ఆసక్తిగా ఉంది కాదా! పేర్లు వింటే ఇంకా ఆశ్చర్యపోతారు. వీటిలో ఒకటి రాముడు. మరొకటి లక్ష్మణుడు. రాముడి ఎత్తు అరవై అడుగులైతే. లక్ష్మన్న ఎత్తు 55 అడుగులు. వీటి కాండం చుట్టుకొలత దాదాపు 5 మీటర్లుండటం విశేషం. ఈ పేర్లు ఎవరు? ఎప్పుడు? ఎందుకు? పెట్టారో తెలియదు. కానీ, పక్కపక్కనే ఏపుగా పెరిగిన ఈ రెండు మానులను దైవాలుగా భావిస్తారు స్థానికులు. వర్షాకాలం వస్తూనే చుట్టుపక్కల గ్రామాల నుంచి రైతులు రామలక్ష్మణుల దగ్గరికి వచ్చి.. ప్రత్యేక పూజలు చేస్తారు. వర్షాలు సమృద్ధిగా కురవాలని మొక్కులు చెల్లిస్తారు. శ్రావణ మాసంలో ఆ చెట్ల నీడలో వనభోజనాలు చేస్తారు. ఈ చెట్లను కొట్టేందుకు ఎవరూ సాహసించరు. గతంలో ఈ చెట్లను నరకడానికి ప్రయత్నించిన వాళ్లు అనారోగ్యం పాలయ్యారనీ, నేలపై పడిన కొమ్మలను తీసుకున్న వ్యక్తికీ ఇబ్బందులు తప్పలేవనీ.. అందుకే వీటికి ఏ హానీ తలపెట్టమని స్థానికులు చెబుతారు. ఇంతకీ ఈ కల్పతరువులు ఎక్కడున్నాయో చెప్పలేదు కదూ! జయశంకర్‌ భూపాలపల్లి జిల్లా కమలాపూర్‌ శివారులోని అటవీ ప్రాంతంలో ఈ మానులు కొలువుదీరి ఉన్నాయి.

- సోగాల స్వామి, భూపాలపల్లి

Tags :

మరిన్ని

జిల్లా వార్తలు

వారెవ్వా! చదువు సుఖీభవ ఈ-నాడు మకరందం రయ్.. రయ్ సిరి విజేత ఈ తరం హాయ్! ఆహా హాయ్ బుజ్జీ స్థిరాస్తి రుచులు విహారి