తానన తన తననా..

విడ్డూరం-ఆశ్చర్యం

తానన తన తననా..

అక్కడ సాహిత్యం ఉండదు.. సంగీతమే

ఈ వేళలో నువ్వు ఏం చేస్తూ ఉంటావో!
లాలలలా.. లాల... లాలలలా లాల!
బంతీ చామంతి ముద్దాడుకున్నాయి లే!
పీపీ... పీపీపి.. పిపీపి.. పిపిపీ!

... ఇలా పాటలో సాహిత్యం వినేవారు అరవైశాతం అయితే... లలలా... పిపీపీలు హమ్‌ చేసేవాళ్లు ముప్పై శాతం మంది. వీరందరికీ సాహిత్యంతో పనిలేదు. సంగీతమే ముఖ్యం. వాయిద్యమే వేదం. అనుభవంలో ఈ విషయాన్ని తెలుసుకున్న శ్రీనివాస్‌ బాగి. ‘మహాగీత’ మ్యూజిక్‌ కంపెనీ ద్వారా గాత్రం లేకుండా వాద్య పరికరాల్లో పలికించిన పాటలను శ్రోతలకు అందిస్తున్నారు. సంగీతాభిమానులను రాగాల పల్లకిలో ఊరేగిస్తున్నారు.
నిద్రలేచేది పాటలతోనే
మధ్యతరగతి కుటుంబానికి చెందిన శ్రీనివాస్‌కు చిన్నప్పుడే నాన్న చనిపోయారు. వారికున్న పేపర్‌ ఏజెన్సీని అన్నయ్య, అమ్మ చూసుకునేవారు. అప్పుడు అమ్మ తనని నిద్ర లేపడానికి పాటలు ప్లే చేసేది. రేడియో, దూరదర్శన్‌ పాటలు, సంగీతం వినిపించి అతన్ని నిద్రలేపేది. దీంతో శ్రీనివాస్‌కు బాల్యం నుంచి సంగీతంపై అభిరుచి పెరిగింది. అలా ‘మ్యూజిక్‌ టుడే’ ఏజెన్సీ వస్తే... అన్నయ్య దాన్ని నిర్వహించే బాధ్యతలు శ్రీనివాస్‌కు అప్పగించారు. పాత పాటలు మళ్లీ పాడించి రికార్డ్‌ చేసి అందిస్తే బాగుంటుందన్న ఆలోచన వచ్చింది. అలా బాలకృష్ణప్రసాద్‌తో పాడించిన సాయిబాబా పాటలను ఇప్పటికీ శ్రోతలు ఆదరిస్తున్నారు.
హైదరాబాద్‌లోనే స్టూడియో
ప్రతి రికార్డింగు కోసం చెన్నై వెళ్లి రావడం కష్టమై.. హైదరాబాద్‌లోనే రికార్డింగ్‌ థియేటర్‌ తెరిచారు. బాలసుబ్రహ్మణ్యం పాడిన ‘కొండలలో నెలకొన్న కోనేటి రాయుడు వాడు’, వాణి జయరాం ఆలపించిన ‘చిన్నారి జోలలు’ బాగా ప్రాచుర్యంలోకి వచ్చాయి. అయితే ఆశించిన స్థాయిలో డబ్బు రాలేదు. నష్టాలొచ్చాయి. ప్రముఖ గాయనీ, గాయకులతో పాడించడం బాగా ఖర్చుతో కూడుకున్న వ్యవహారం అయిపోయింది. ఏం చేయాలో తోచలేదు. అప్పుడే ఈ మ్యూజిక్‌ ఆల్బమ్స్‌ గురించి తెలుసుకున్నారు. రాగాలను శ్రోతల దాకా మోసే బోయిగా మారాలనుకున్నారు.
సాహిత్యం లేని పాటలు
సాహిత్యంతో ఉన్న పాటలు వినేవారు 60 శాతం మంది అయితే... 30శాతం మంది సంగీతాన్నే ఆస్వాదిస్తుంటారని అర్థమైంది. మరో 10 శాతం మంది అవీ, ఇవీ రెండు ఇష్టపడతారని తేలింది. ఇక తనకు ఇదే సరైన మార్గం అనుకొని... సాహిత్యంలేని సంగీతాన్ని అందించడం మొదలుపెట్టారు. మొదట ఆదరణ పొందిన పాటలను మంచి సంగీత విద్యాంసులతో వాయించి అందించేవారు. వీటికి పేటెంట్‌ సమస్యలు వస్తుండటంతో... సొంతంగా సంగీతంతోనే కొన్ని ఆల్బమ్స్‌ రూపొందించడం ప్రారంభించారు. రాగాల గురించి కొంత అధ్యయనం చేశాడు. ఏ రాగం మనసుకు ఎలాంటి ప్రయోజనం ఇస్తుందో తెలుసుకున్నారు. శ్రోతల నాడి గుర్తించారు. ఈ పరిజ్ఞానంతో ‘మ్యూజిక్‌ ఫర్‌ పీస్‌’, ‘వెల్‌నెస్‌ ఆఫ్‌ మెలోడి’, ‘మ్యూజిక్‌ ఫర్‌ సౌండ్‌ స్లీప్‌’ వంటి సంగీత ఆల్బమ్స్‌ తీసుకొచ్చారు. కేవలం రాగాలతోనే వీనుల విందు చేస్తున్నారు.

- వసంత్‌ ఘంటసాల

‘‘ఇలా సంగీత ఆల్బమ్స్‌ హాలీవుడ్‌లో ఎప్పటి నుంచో ఉన్నాయి. ఇప్పుడిప్పుడే వీటికి ఇక్కడ ఆదరణ పెరుగుతోంది. ‘మహాగీత’ రూపొందించిన ఆల్బమ్స్‌కు మార్కెట్లో మంచి ఆదరణ లభిస్తోంది. క్యాసెట్లు, సీడీలు ఎవరూ కొనడం లేదు. అందుకే నేను పెన్‌డ్రైవ్‌లో, ఆన్‌లైన్‌లో వీటిని అందిస్తున్నాను. అమృత వర్షిణి, సుద్ద సారంగ్‌ రాగాలను కలిపి మా అబ్బాయికి... ‘అమృత సారంగ్‌’ అని పేరు పెట్టా. రాగాలంటే నాకు అంతిష్టం.’’
- శ్రీనివాస్‌ బాగి

Tags :

మరిన్ని

జిల్లా వార్తలు

చదువు సుఖీభవ ఈ-నాడు మకరందం రయ్.. రయ్ సిరి ఈ తరం హాయ్! ఆహా హాయ్ బుజ్జీ స్థిరాస్తి రుచులు

విడ్డూరం-ఆశ్చర్యం

మరిన్ని

రుచులు

App