విడ్డూరం-ఆశ్చర్యం

కుకింగ్‌ రోబో 3.0.

ఆన్‌లైన్‌ వంటకాలతో మొహంమొత్తి ఉన్నవారికి...
అమ్మమ్మ వంటల్లాంటి కమ్మనైన రుచులని ఇంట్లోనే వండిపెడుతుంది..
ఇంటికి ఎంత పొద్దు పోయి వచ్చినా వేడివేడి వంటలు నోటికందేలా చేస్తుంది..
అంతేనా ‘నూనె పదార్ధాలు ఎక్కువగా తీసుకుంటున్నావ్‌...
ఈ సారి తేలికపాటివి తినమని’ హెచ్చరిస్తుంది..
ఈ పనులన్నీ చేసే నేస్తం ఎవరనుకుంటున్నారా?
కుకింగ్‌ రోబో 3.0. ఈ మెకానికల్‌ చెఫ్‌ గృహిణులకు ఎంతలా సహకరిస్తుందో మీరే తెలుసుకోండి...
ఎలా పనిచేస్తుంది?:
మనం ఏం కూర చేయాలనుకున్నామో వాటిని మన మొబైల్స్‌లోని మెకానికల్‌ చెఫ్‌ యాప్‌లో ప్రోగ్రామింగ్‌ చేయాలి. వెంటనే ఆ కూరకు అవసరమైన పప్పు, ఉప్పులతో పాటు కూరగాయలు, ఇతర పదార్థాలను ఏమేరకు వేయాలో డిస్‌ప్లేలో కనిపిస్తుంది. ఆ పొడులు, కూరగాయలు, నూనెలను ప్రత్యేకంగా అమర్చిన డబ్బాల్లో డిస్‌ప్లేలో పేర్కొన్న నంబర్ల వారిగా ఉంచాలి. ఆపై ‘ఓకే’ నొక్కితే చాలు. సాధారణ వంటకాలు తయారయ్యే సమయంలోనే వంట సిద్ధమవుతుంది. సాధారణ ఇండక్షన్‌ స్టౌవ్‌కు ఎంత విద్యుత్‌ అవసరమో అంతే విద్యుత్‌తో ఈ యంత్రం పని చేస్తుంది. సాంబారు సహా 150కిపైగా భారతీయ వంటకాలని ఈ యంత్రం వండేస్తుంది.
ఎవరు రూపొందించారు:
మనకెన్ని సదుపాయాలు వస్తున్నా.. ఇప్పటికీ స్త్రీల వంటింటి కష్టాలు ఏమాత్రం తగ్గలేదు. ఈ శ్రమకు చెక్‌ పెట్టాలనుకున్నాడు కొహన్‌ సుజయ్‌ అనే కృత్రిమమేధ నిపుణుడు. ‘భారతీయ వంటకాలన్నీ పోయటం, తిప్పటం, వేడి చేయటం(డ్రాపింగ్‌, స్టిర్రింగ్‌, హీటింగ్‌) అనే మూడు ప్రక్రియలతోనే తయారవుతాయి. ఈ ప్రక్రియలకు కృత్రిమ మేధస్సును జోడించి కుకింగ్‌ రోబోని తయారు చేశా’ అంటున్నారు కొహన్‌ సుజయ్‌. వంటల్లో వేసే నూనెలు, పొడులు, కూరగాయలన్నీ ముందుగా పొందుపరిచిన ప్రోగ్రామింగ్‌ సాయంతో గిన్నెల్లో పడుతూ ఉంటే మెకానికల్‌ చెఫ్‌ వంట చేసేస్తుంది.
ఆఫీసులో ఉంటూ ఇంట్లో వండేసుకోవచ్చు...
మనం ఇంట్లో లేకున్నా ముందుగా నిర్ణయించిన ప్రోగ్రామింగ్‌ సాయంతో వంటను వండుకోవచ్చు. మన అమ్మమ్మ లేదా అత్తమ్మలు రుచిగా చేసే వంట విధానాన్ని కూడా ప్రోగామింగ్‌ చేసి పెడితే ఆ రుచికరమైన వంటనే మీకు అందిస్తుంది. రోబో హ్యాండ్‌ను సిలికాన్‌ రబ్బర్‌తో, పొడులు, కూరగాయాలు ఉంచే డబ్బాలు బీపీఏ ప్లాస్టిక్‌ ఫ్రీతో తయారు చేయటం ఆరోగ్యంపై ఎటువంటి దుష్ప్రభావం పడకుండా చేస్తుంది. బియ్యం, లేదా కందిపప్పు తదితరాలను కడిగేందుకు వీలుగా వాషర్‌ కూడా ఈ యంత్రంలో అదనపు సదుపాయం. ఫ్రెషర్‌ కుక్కింగ్‌ కూడా మెకానికల్‌ చెఫ్‌కు సాధ్యం.
తక్కువ ధరలతో అందుబాటులో
ప్రస్తుతం ఏ కుకింగ్‌ రోబో యంత్రాన్నైనా కొనుగోలు చేయాలంటే లక్షల వ్యవహారం. అది కూడా భారతీయ వంట గది పరిమాణంలో ఏమాత్రం ఇమడని ఆ యంత్రానికి భిన్నంగా మెకానికల్‌ చెఫ్‌ తయారైంది. ఒక స్టౌవ్‌ ఉంచగదగిన స్థలంలోనే మెకానికల్‌ చెఫ్‌ పట్టే వీలుంది. తక్కువ శక్తితో పని చేసే వీలుండటంతో ధరలు కూడా వేలల్లో ఉండేలా చేయాలన్నది మా లక్ష్యం. ఆన్‌లైన్‌ ఫుడ్‌ సదుపాయం ఉండి కూడా తమదైన ఆరోగ్యకరమైన వంటకాలు, అదనపు శ్రమ లేకుండా వంట సిద్ధం కావటం మెకానికల్‌ చెఫ్‌ ప్రత్యేకత.

కె.ముకుంద, ఈనాడు డిజిటల్‌, బెంగళూరు

Tags :

మరిన్ని

జిల్లా వార్తలు

చదువు సుఖీభవ మకరందం ఈతరం ఆహా హాయ్ బుజ్జీ స్థిరాస్తి కథామృతం రుచులు దేవతార్చన

విడ్డూరం-ఆశ్చర్యం

మరిన్ని

App