పర్యావరణానికి బి‘గ్రేట్‌’

అవీ ఇవీ...

పర్యావరణానికి బి‘గ్రేట్‌’

సాధారణంగా మాల్‌ అనగానే ఫుడ్‌కోర్టులు, దుకాణాలు, మరెన్నో జనాకర్షక ఏర్పాట్లు గుర్తొస్తాయి.. కదా! బెంగళూరులోని ఒరాయన్‌ మాల్‌ కూడా అలాంటిదే. కానీ ఇప్పుడది మరో ప్రత్యేకతతో అందరినీ ఆశ్చర్యపరుస్తోంది.
ఒరాయన్‌ మాల్‌ను బ్రిగేడ్‌ గ్రూప్‌ నిర్వహిస్తోంది. భారత సిలికాన్‌ వ్యాలీలోనే అత్యంత సుందరమైన, సదుపాయాలతో కూడిందిగా ఈ మాల్‌ ప్రసిద్ధి చెందింది. ఇందులో రెండువందల దుకాణాలు, ప్రఖ్యాత కంపెనీల ఆఫీసులున్నాయి. ఇంకా పండ్ల, పూల, కూరగాయల దుకాణాలు, రెస్టారెంట్లు, ఆహార సరఫరా కేంద్రాలు అనేకం ఉన్నాయి. వీటి నుంచి రోజూ 300 నుంచి 350 కిలోల వరకు వ్యర్థాలు వెలువడుతుంటాయి. కుళ్లిపోయిన కూరగాయలు, పండ్లు, హోటళ్లలో మిగిలిపోయిన ఆహార పదార్థాలు, మటన్‌, ఎగ్గ్‌ షెల్స్‌ వంటివి వస్తుంటాయి. వీటిని రోజూ కార్పొరేషన్‌ బండి వచ్చి తీసుకెళుతుండేది. ఎప్పుడైనా రాకపోతే మాత్రం ఆ రోజంతా మాల్‌తో పాటు, పరిసరాలన్నీ దుర్వాసనతో నిండిపోయేవి. సరిగ్గా ఇక్కడే ఆ గ్రూప్‌ అధినేత జయశంకర్‌ను కొత్తగా ఆలోచించేలా చేసింది. భారీఎత్తున పోగవుతున్న ఈ వ్యర్థాలను సేంద్రియ ఎరువులుగా మారిస్తే...? వెంటనే కార్యాచరణకు దిగారు. రోజూ పోగయ్యే వ్యర్థాలను సెల్లార్‌కు తరలించారు. అక్కడే వ్యర్థాలను కంపోస్ట్‌ ఎరువుగా మార్చే కేంద్రాన్ని నెలకొల్పారు. నెలకు ఆరు టన్నుల ఎరువులను తయారు చేస్తున్నారు.

రైతులకు చేరువవుతోంది ఇలా...!
ఇలా ఇక్కడ తయారైన ఎరువులను మండ్యా, మైసూరు చుట్టుపక్కలగల గ్రామాల రైతులకు, తోట నిర్వహిస్తున్న రైతులకు పంపిణీ చేస్తున్నారు. ఒక కేజీ ఎరువు తయారీకి మాల్‌కు రూ.7.30 ఖర్చవుతుంటే, రైతులకు రూ.1.30లకు ఇస్తున్నారు.
అక్కడితో ఆగలేదు: ఈ ప్రాజెక్టు విజయవంతం కావడంతో గ్రూప్‌ ఆధ్వర్యంలో ఉన్న అన్ని అపార్ట్‌మెంట్లు, విల్లాలు, మాల్స్‌లో ఈ ఎరువుల తయారీని చేపట్టారు. ఆ ఎరువులను అక్కడే తోటలు, లాన్స్‌కు ఉపయోగిస్తున్నారు. భారీ మొత్తంలో తయారు చేస్తున్న కేంద్రాల నుంచి రైతులకు పంపుతున్నారు.
అంతేనా?: ఒరాయన్‌ మాల్‌కు రోజుకు వేలాదిమంది సందర్శకులు వస్తుంటారు. వారి ఇళ్లు, అపార్టుమెంట్లలో కూడా ఇలా సేంద్రియ ఎరువులు తయారుచేసుకోవాల్సిందిగా ప్రోత్సహిస్తున్నారు. ఆసక్తి ఉన్నవారికి శిక్షణ ఇస్తున్నారు. ఎవరు ఆహ్వానించినా అక్కడకు వెళ్లి సేంద్రియ ఎరువుల తయారీపై అవగాహన కల్పించి వస్తున్నారు.