17 ఎకరాలు.. 100 పంటలు

ఆదర్శం

17 ఎకరాలు.. 100 పంటలు

17 ఎకరాలు.. 100 పంటలు

టమాటాల ధర తగ్గిపోయింది..
ఏం ఫర్లేదు.. వంకాయలు విరగ్గాశాయిగా!
పత్తి రేటు తేలిపోతోంది..
దిగులొద్దు.. మిర్చి..
ఘాటు మీదుందిగా!
కంది రేటు కిందమీదయింది..
కంది పోతేనేం..
వంద పంటలున్నాయి!
ఇదేదో ప్రకటన అనుకోకండి. సమీకృతసాగులో విజయం సాధించిన ఒక రైతు ఆత్మవిశ్వాసమిది.
ఆధునిక పద్ధతుల్లో.. సేంద్రియ విధానంలో.. 17 ఎకరాల్లో 100 రకాల పంటలు పండిస్తూ.. వాహ్‌ అనిపించుకుంటున్న రైతు కథ ఇది.
పంటను నమ్ముకుని.. తెగుళ్ల బారిన పడకుండా కాపాడుకొని.. ప్రకృతి పరీక్షలను దాటుకొని.. దిగుబడి తగ్గితే తట్టుకొని.. గిట్టుబాటు రాకుంటే మొత్తుకొని.. దళారుల చేతుల్లో చిక్కుకొని.. ఉస్సూరుమనే సాధారణ రైతు ఎలా ఉంటాడు?
పంటను కాదనుకుంటాడు. పొలానికి పోనంటాడు. పట్టణంలో ఏదో ఒకటి చేసుకొని బతుకుతానంటాడు. ఖమ్మం జిల్లా రఘునాథపాలెం మండలం చిమ్మపూడి గ్రామానికి చెందిన మారం కరుణాకర్‌రెడ్డీ అలాగే చేశాడు. 17 ఎకరాల ఈ ఆసామి. ఏళ్లకేళ్లు సాగు చేసినా చివరికి మిగిలిందేం లేదు. అందుకే పొలాన్ని కౌలుకిచ్చి ఊరు వదిలాడు. చిన్నవో పెద్దవో కాంట్రాక్టు పనులు చేసుకున్నాడు. కానీ, మట్టిని నమ్ముకున్న ఆ రైతన్న పొలానికి దూరంగా ఉండలేకపోయాడు. మళ్లీ ఊరిబాట పట్టాడు. ఈసారి తన పొలంలో బంగారం పండించాలని గట్టిగా అనుకున్నాడు. అందుకు తగ్గట్టుగా సన్నద్ధమయ్యాడు. ఈసారి తన ఆలోచనలే కాదు... వ్యూహాలనూ మార్చుకున్నాడు.
సమగ్ర అధ్యయనం...
మళ్లీ చిమ్మపూడి చేరుకున్న కరుణాకర్‌.. పంటల సాగుపై మరింత పట్టు సాధించాడు. తెలుగు రాష్ట్రాలతో పాటు తమిళనాడు, కర్ణాటక, మహారాష్ట్రల్లో పర్యటించి సాగు విధానాలను అధ్యయనం చేశాడు. సేంద్రియ సాగుపై అవగాహన పెంచుకున్నాడు. ఆ పరిజ్ఞానంతో తన వ్యవసాయ క్షేత్రాన్ని ఒక అధ్యయన కేంద్రంగా తీర్చిదిద్దాడు. మూస పద్ధతులు వదిలిపెట్టి.. ఆధునిక సాంకేతిక విధానాలు ఒడిసిపట్టాడు. సమీకృత సాగు విధానంతో ముందడుగు వేశాడు. అంతర పంటలతో ఏడాదిపొడవునా పొలం పనులు సాగించాడు. కాలాలకు అతీతంగా రకరకాల దిగుబడులు సాధించాడు. ఓ పక్క ఆకుకూరలు. మరో వైపు కాయగూరలు.. పూలు, పండ్లు, తృణ ధాన్యాలు, పప్పు దినుసులు.. ఇలా అన్ని రకాలు పండిస్తున్నాడు. ఒక పంట ముగిసే లోగా మరో పంట చేతికొచ్చేలా.. ప్రణాళికతో ముందుకెళ్లాడు. ఫలితం.. ధరల పతనం, పెరగడం వంటి అంశాలను అధిగమించాడు. పక్షం రోజులు తిరిగే సరికి ఏదో ఒక పంట చేతికి రావడంతో నిరంతరం నాలుగు రూపాయలు కళ్లజూసేవాడు.

మా పంట.. మా అమ్మకం..

ఆరోగ్యకరమైన పంటలను పండించడం ఒక ఎత్తయితే వాటిని వినియోగదారులకు అందజేయడం మరో ఎత్తు. దళారుల ప్రమేయం లేకుండా వినియోగదారులపై భారం పడకుండా నాణ్యమైన ధరలకు వీటిని విక్రయిస్తున్నారు. తనలాంటి రైతు మిత్రులు సతీష్‌రెడ్డి, కాకి భాస్కర్‌, రాంరెడ్డి తదితరులను కూడగట్టి ఎస్తా సొసైటీ ఏర్పాటు చేసుకున్నారు. ‘సాగు క్షేత్రం నుంచి వంట ఇంటికి’ అనే నినాదంతో ఖమ్మం పట్టణంలో ‘క్రాప్‌ టు కిచెన్‌’ దుకాణాలు ఏర్పాటు చేశారు. ఏ రోజు కోసిన కూరగాయలు ఆ రోజునే విక్రయిస్తారు. కూరగాయల నాణ్యత, ధర తెలుసుకున్న వినియోగదారులు ‘క్రాప్‌ టు కిచెన్‌’ దుకాణాలకు క్యూ కడుతున్నారు. రోజూ 500 మందికిపైగా వినియోగదారులు సేంద్రియ ఉత్పత్తులను సరసమైన ధరలకు కొనుగోలు చేస్తున్నారు. త్వరలోనే మరో దుకాణం ప్రారంభించనున్నారు. సాగుబడి లాభసాటిగా ఎలా సాగించాలో చూపించిన కరుణాకర్‌ రెడ్డి రైతులందరికీ ఆదర్శం.

నీటిని ఒడిసిపట్టి..
17 ఎకరాల్లో రకరకాల పంటలు పండించాలంటే అందుకు తగ్గ నీటి వసతి ఉండాలి. రూ.25 లక్షలు ఖర్చుపెట్టి.. పదిహేను ఎకరాల్లో బిందు, తుంపర సేద్యాన్ని చేపట్టాడు. పరిమిత జలవనరులతో పైరు కళకళలాడేలా చేశాడు. మల్చింగ్‌ విధానంతో కలుపు సమస్యనూ అధిగమించాడు. పొలంలో 1.25 లక్షల లీటర్ల సామర్థ్యం కలిగిన నీటి కుంట (ఫారంపాండ్‌) ఏర్పాటు చేసి పంట పొలానికి దూరంగా ఉన్న బోర్లు, బావుల నుంచి నీటిని తరలిస్తున్నాడు. పొలంలో పడిన వర్షం చినుకు బయటకు పోకుండా అక్కడే ఇంకేలా ఏర్పాట్లు చేసుకున్నాడు. పొలంలో కందకాలు, ఇంకుడు గుంతల తవ్వించాడు. భూగర్భ జలాల మట్టం పడిపోకుండా జాగ్రత్త పడ్డాడు.

అంతటా పంటలే..

కరుణాకర్‌రెడ్డి పొలంలో యాపిల్‌ బేర్‌, థాయ్‌జామ, కివీ, సీతాఫలం, సపోట, దానిమ్మ, నేరేడు, మామిడి, లోగన్‌, స్టార్‌ ఫ్రూట్ ఇలా 60 రకాల పండ్ల్ల చెట్లు ఈ పొలంలో ఉన్నాయి. 17 ఎకరాల్లో విస్తరించి ఉన్న పండ్ల చెట్ల మధ్యలో అంతరపంటలుగా ఆకుకూరలు, కాయగూరలు కలిపి 40 రకాల వరకూ వేశారు. సపోట చెట్ల మధ్య అంతర పంటగా కంది సాగుచేస్తునారు. మూడు రకాల మొక్కజొన్నలు, పప్పు దినుసులు, మిర్చి, పుదీన, పుచ్చ, తర్భూజ తదితర పంటలు సాగుచేస్తున్నారు. 17 ఎకరాల్లో సెంటు భూమి కూడా ఖాళీ లేకుండా పచ్చదనం పరిచేశారు. కేఎన్‌ బయోసైన్సెస్‌ సంస్థతో ఒప్పందం కుదుర్చుకుని 50 శాతం రాయితీతో విత్తనాలు, సేంద్రియ ఎరువులు పొందుతున్నారు.

సేంద్రియ విధానం
పొలంలోని నీటి కుంటలో చేపలను పెంచుతున్నారు. ఆవుపేడ, గోమూత్రం, బెల్లం వంటి పలు రకాల పదార్థాలతో తయారు చేసిన జీవామృతాన్ని చేపలకు ఆహారంగా అందిస్తున్నారు. జీవామృతంతోపాటు, చేపల విసర్జితాలతో కలిసిన నీటిని పంటలకు మళ్లిస్తున్నారు. తెగుళ్లు, పురుగుల నివారణకు వివిధ రకాల ఆకులను నీటిలో ఊరవేసి దశపత్ర కషాయాన్ని తయారు చేసి ఎరువుగా వినియోగిస్తున్నారు. సేంద్రియ ఎరువులు వాడటం వల్ల పెట్టుబడి కూడా బాగా తగ్గించుకున్నారు. ఎకరా విస్తీర్ణంలో రసాయన ఎరువుల వినియోగానికి రూ.10 వేల నుంచి రూ.15 వేలు వెచ్చించాల్సి వస్తే.. ఇప్పుడు ఆ ఖర్చు 25 శాతానికి పడిపోవడం విశేషం. అంతేకాదు సేంద్రియ పద్ధతులు పాటించి పురుగుమందు అవశేషాలు లేని పంటలను అందిస్తున్నారు.

- సింగంశెట్టి వెంకన్న, వాసిరెడ్డి శ్రీహరి, ఈనాడు, ఖమ్మం

Tags :

ఆదర్శం

మరిన్ని