ఏనుగుల మల్టీ స్పెషాలిటీ ఆసుపత్రి

విడ్డూరం-ఆశ్చర్యం

* సికిందర్‌కి ఏం ఫర్వాలేదండీ... కాలికి కట్టుకట్టాము. త్వరలోనే తగ్గిపోతుంది. దూకుడు తగ్గడానికి ఆహారంలో ఈ మందు కూడా కలిపివ్వండి...
* మల్లిక్‌ కడుపులో గడ్డ పెరుగుతోంది.. ఓ వారం రోజులు ఇదిగో ఈ మందు పట్టండి. ఉదయం, సాయంత్రం ఇస్తే తగ్గిపోతుంది... ప్రస్తుతం ఓ నాలుగు రోజులు ఇక్కడే ఉంచండి... ఇదంతా ఆసుపత్రిలో డాక్టర్లు చెప్పిన విషయాలే...

సికిందర్‌, మల్లిక్‌... వైద్యం కోసం వచ్చిన రోగులే... కానీ మనుషులు మాత్రం కాదు. అవి ఏనుగులు. ఎంత గజరాజులైనా అవీ జీవాలే కదా! వాటికీ వ్యాధుల బాధలు తప్పదు. కానీ వాటికోసం ప్రత్యేకంగా వైద్యశాలలు మాత్రం ఉండవు. ప్రస్తుతం వాటికోసం సకల సౌకర్యాలున్న ఓ ప్రత్యేక ఆసుపత్రి ఉత్తరప్రదేశ్‌లో ఏర్పాటుచేశారు.

సాధారణ పశువైద్యశాలల్లో చిన్న జంతువులకు సంబంధించిన శారీరక ఇబ్బందులకు వైద్యం చేస్తుంటారు. అక్కడ అందుకు అవసరమైన పరికరాలుంటాయి. ఆగ్రా కేంద్రంగా పనిచేసే వన్యప్రాణి సంరక్షణ సంస్థకు మధుర ఫరా బ్లాక్‌లో ఏనుగుల అభివృద్ధి, సంరక్షణ కేంద్రం (ఈసీసీసీ) ఉంది. ఇక్కడకు వివిధ కారణాలతో అనేక ఏనుగులను తెస్తుంటారు. రిజర్వు ప్రాంతాల్లో ఎక్కడైనా ఏనుగు గాయపడినా, ప్రమాదంలో ఉన్నా సాధారణంగా అటవీశాఖ దృష్టికి వస్తాయి. అంతే కాకుండా కొన్ని సంస్థలు, సర్కస్‌ కంపెనీలు పెంచుతున్న ఏనుగులు గాయపడుతుంటాయి. ఇలాంటివన్నీ ఈసీసీసీకి వస్తుంటాయి. వీటికోసం అన్ని సౌకర్యాలతో ఓ ఆసుపత్రిని నిర్మించాలని ఎప్పటి నుంచో ప్రతిపాదన ఉంది. దాన్ని ఇటీవల కార్యరూపంలోకి తీసుకొచ్చారు. దీంతో భారతదేశంలోనే తొలిసారిగా ఏనుగుల కోసం ప్రత్యేక మల్టీ స్పెషాలిటీ ఆసుపత్రి ఆవిర్భవించింది.

ఏనుగులకు వచ్చే వ్యాధులు, వాటికి తగిలే గాయాలను కూడా దృష్టిలో పెట్టుకుని ఈ ఆసుపత్రిలో అన్ని సౌకర్యాలను ఏర్పాటు చేశారు. అధునాతన థర్మల్‌ ఇమేజింగ్‌, అల్ట్రాసోనోగ్రఫీ, హైడ్రోథెరపీ, ట్రాంక్విలైజేషన్‌ వంటివి ఇక్కడ ఉన్నాయి. ఏనుగులకు తగిలిన గాయాలను కచ్చితంగా నిర్ధరించే సదుపాయాలు ఇప్పటి వరకు దేశంలో ఎక్కడా లేవు. ఇక్కడ వాటిని వైర్‌లెస్‌ డిజిటల్‌ ఎక్స్‌రే సాయంతో గుర్తిసారు. అంతర్గత గాయాలకు లేజర్‌ ట్రీట్‌మెంట్‌ సదుపాయం కూడా ఉంది. ఏనుగుల దంతాలకు వచ్చే వ్యాధులను కచ్చితంగా నిర్ధరించే డెంటల్‌ ఎక్స్‌రే కూడా ఇక్కడ ఏర్పాటుచేశారు. ఇంకా వాటి రక్తాన్ని పరీక్షించే ల్యాబ్‌, డిజిటల్‌ వేయింగ్‌ మెషిన్లున్నాయి.
బయటివారు, ఏనుగుల సంరక్షకులు, బయటి నుంచి వచ్చే వారు ఇక్కడ జరిగే వైద్యాన్ని ప్రత్యక్షంగా చూడొచ్చు. దీనికోసం ఒక అబ్జర్వేషన్‌ డెక్‌ను ఇక్కడ ఏర్పాటుచేశారు. 12000 చదరపు అడుగుల స్థలంలో ఉన్న ఈ ఆసుపత్రి వన్యప్రాణి విభాగానికి ఓ ఆభరణం వంటిదని చెప్పకతప్పదు.

Tags :

మరిన్ని

జిల్లా వార్తలు

వారెవ్వా! చదువు సుఖీభవ ఈ-నాడు మకరందం రయ్.. రయ్ సిరి విజేత ఈ తరం హాయ్! ఆహా హాయ్ బుజ్జీ స్థిరాస్తి రుచులు విహారి