క్రైయింగ్‌ క్లబ్‌

విడ్డూరం-ఆశ్చర్యం

క్రైయింగ్‌ క్లబ్‌

ఏడ్పిస్తాం రండి!

ఏడ్వటం ఒక యోగం.. ఏడ్వలేకపోవటం ఒక రోగం. ఇదేమీ నవ్వులాటగా అంటున్నది కాదు. దుఃఖం ద్వారా మనసులోని బాధను, ఒత్తిడిని వదిలించుకుంటున్నవారి మాట. సినిమాకు వచ్చినట్టుగానో, సంగీత కచేరికి వచ్చినట్టుగానో పనిగట్టుకొని మరీ వచ్చి నలుగురితో కలిసి కూర్చొని.. కలిసి ఏడుస్తూ.. ఆవేదనతోనే గుండె బరువు దించుకుంటున్న వారి మాట. విచిత్రంగా అనిపించినా జపాన్‌లో ఇలాంటి సామూహిక ఏడ్పు కార్యక్రమాలు బాగా ఆదరణ పొందుతున్నాయి. ‘రుయి-కత్సు’గా పేరొందిన ఈ ధోరణి ఎంతోమందికి సాంత్వన కలిగిస్తోంది.

మన జీవితంలో కన్నీళ్లకు ఎంతో ప్రాధాన్యముంది. అసలు మనిషి పుట్టేదే ఏడుపుతో. అంతెందుకు.. తీవ్రమైన సంతోషం కలిగినప్పుడూ కన్నీటితోనే ఆనందాన్ని వెలిబుచ్చుతాం. అయితే ఏడుపును పిరికితనానికి చిహ్నంగానో, నామోషిగానో భావించటం వల్ల ఇప్పుడు చాలామంది నలుగురిలో ఏడ్వటానికే ‘జంకు’తున్నారు. మనసులో చిక్కుకుపోయిన ఆవేదనను అలా మోస్తూనే జీవితాలను వెళ్ల్లదీస్తున్నారు. ఇలాంటి సందిగ్ధావస్థలోంచి బయటపడేసే మార్గంగా పుట్టుకొచ్చిందే రుయి-కత్సు.

చిత్రమైన ఆలోచన: వేడుకలకు జపాన్‌ పెట్టింది పేరు. టీ పోయటం, పువ్వులు పేర్చటాన్ని నేర్పించటం దగ్గర్నుంచి సమురాయ్‌, కరాటే శిక్షణ వంటి సంప్రదాయ కార్యక్రమాల వరకూ అన్ని వేడుకలతో మొదలవ్వాల్సిందే. ఇవి ఆయా పనులు చేయటానికి మనసు సిద్ధం కావటానికి తోడ్పడుతాయి. ఉద్యోగాన్వేషణ (షు-కత్సు), సంబంధాలను వెతకటం (కోన్‌-కత్సు), పిల్లలను నర్సరీలో చేర్చటం (హో-కత్సు) వంటి పనుల్లోనూ నలుగురి చేయి పడాల్సిందే. అక్కడ కత్సు అంటే పని అని అర్థం. ఇలాంటి పనుల ప్రేరణతోనే రుయి-కత్సు విధానం పురుడు పోసుకుంది. ఏడ్పు వచ్చేలా చేయటమే దీని ప్రత్యేకత. దీనికి బీజం వేసింది హిరోకి టెరయి అనే ‘విడాకుల పెద్ద మనిషి’. జపాన్‌లో పెళ్లి చేసుకునేటప్పుడే కాదు.. విడాకులు తీసుకునే సమయంలోనూ దంపతులు చిట్టచివరి సారిగా ఓ వేడుక చేసుకుంటారు. ఇలాంటి కార్యక్రమాలను నిర్వహించటమే హిరోకి టెరయ్‌ పని. విడాకులు తీసుకోవాలని అనుకుంటున్నవారికి కూడా సాయం చేస్తుంటాడు. ఎలాంటి గొడవలు లేకుండా శాంతియుతంగా విడిపోయేలా చూడాలన్నదే ఆయన ఉద్దేశం. ‘విడాకుల వేడుక’లో చాలామంది దంపతులు ఏడ్చేసేవారు. తాము విడిపోవాల్సి వచ్చినందుకు దుఃఖపడుతూ.. మనసులోని బాధను కొంతైనా దూరం చేసుకునేవారు. చిత్రంగా కొందరైతే తిరిగి కలిసి ఉండాలనీ నిర్ణయించుకునేవారు. ఇదే టెరయ్‌ని ఆలోచించేలా చేసింది. ఏడవడం ద్వారా మనసులోని బాధ, ఒత్తిడి తగ్గుతుందని.. భావోద్వేగాలు ఉపశమిస్తున్నాయని ఆయన గుర్తించారు. వైద్య గ్రంథాలు, పరిశోధన పత్రాలు కూడా దీన్ని బలపరుస్తున్నాయని తెలుసుకున్నారు. ఏడుపు ద్వారా ఒనగూడుతున్న ప్రయోజనాలను తెలుసుకొని చివరికి రుయి-కత్సు కార్యక్రమాలను ఆరంభించారు. లాఫింగ్‌ క్లబ్బుల మాదిరిగానే వీటిని ఒకరకంగా క్రైయింగ్‌ క్లబ్‌లనీ అనుకోవచ్చు. టెరయ్‌ మొదట్లో విడాకులు తీసుకోవాలని భావించేవారి కోసమే వీటిని ఆరంభించారు. తర్వాత ఇతరత్రా బాధలతో సతమతమవుతున్నవారూ వచ్చి చేరటంతో క్రమంగా విస్తరించింది.

కాదేదీ రోదనకనర్హం
బాధల్లో ఉన్నప్పుడు కుటుంబ సభ్యుల మధ్య, నలుగురి మధ్య ఏడ్వలేకపోతున్నవారిని ఒకదగ్గరకు చేర్చి ఏడ్పు వచ్చేలా చేయటమే క్రైయింగ్‌ క్లబ్‌ల పని. వీటిల్లో విషాద భరిత సినిమాలు చూపించొచ్చు. కష్టాలు కడగండ్లతో కూడిన కథలు వినిపించొచ్చు. ఆర్ద్రతతో నిండిన సంగీతం, కవిత్వం వినిపించొచ్చు. ఏది చేసినా తనివితీరా ఏడ్చి, కన్నీళ్లు తెప్పించేలా చూడటమే లక్ష్యం. ఇలా ఏడుస్తున్నప్పుడు ఓదార్చటానికి ప్రత్యేకంగా మనుషులూ ఉంటారు.

ప్రయోజనాలు ఎన్నెన్నో
అసలే బాధల్లో ఉంటే బలవంతంగా ఏడ్వటమెందుకని అనుమానం వస్తుండొచ్చు. దీంతో చాలా ప్రయోజనాలే ఉన్నాయి. ఏడ్చిన తర్వాత బాధ కరిగిపోతుంది. మనసు తేలికపడుతుంది. ఒత్తిడి తగ్గిపోతుంది. స్పష్టంగా ఆలోచించటానికి, పరిస్థితులను అర్థం చేసుకోవటానికి, సరైన నిర్ణయాలు తీసుకోవటానికీ మార్గం సుగమమవుతుంది.

-పున్న సుదర్శన్‌

Tags :

మరిన్ని

జిల్లా వార్తలు

వారెవ్వా! చదువు సుఖీభవ ఈ-నాడు మకరందం రయ్.. రయ్ సిరి విజేత ఈ తరం హాయ్! ఆహా హాయ్ బుజ్జీ స్థిరాస్తి రుచులు విహారి