వారి మరణం కలచి వేసింది.. అందుకే ఈ సేవ! - 66 year old nurse from mysuru comes back from retirement to help covid patients
close
Updated : 29/06/2021 18:47 IST

వారి మరణం కలచి వేసింది.. అందుకే ఈ సేవ!

Image for Representation

ఉద్యోగ విరమణ పొందిన చాలామంది తమ విశ్రాంత జీవితాన్ని ప్రశాంతంగా గడపాలనుకుంటారు. కుటుంబ సభ్యులు, స్నేహితులు, సన్నిహితులతో ఎక్కువగా కాలక్షేపం చేయాలనుకుంటారు. అయితే ఉద్యోగ విరమణ అనేది వృత్తికి మాత్రమే.. సేవకు కాదంటున్నారు 66 ఏళ్ల ఏఎస్‌ గీత. మైసూర్‌కు చెందిన ఆమె నర్సుగా ఇప్పటికే రిటైరయ్యారు. కానీ కొవిడ్‌ రోగుల కోసం మళ్లీ సేవామూర్తిగా మారారు. అందరి చేతా ‘కొవిడ్‌ వారియర్‌’గా మన్ననలు అందుకుంటున్నారు.

ఇంట్లో ఆక్సిజన్‌ కాన్సన్‌ట్రేటర్ల బ్యాంకు!

ఫ్రంట్‌లైన్ వారియర్లుగా కొవిడ్‌ను కట్టడి చేసేందుకు శాయశక్తులా ప్రయత్నిస్తున్నారు వైద్య సిబ్బంది. వైరస్‌తో తమ ప్రాణాలకు ముప్పు పొంచి ఉన్నా విధి నిర్వహణకే కట్టుబడుతున్నారు. ఈ క్రమంలో నర్సుగా ఉద్యోగ విరమణ పొందినప్పటికీ తన సేవా దృక్పథాన్ని కొనసాగిస్తున్నారు మైసూరుకు చెందిన గీత. కొద్ది రోజుల క్రితం తనకు బాగా పరిచయమున్న ఇద్దరు వ్యక్తులు ఆక్సిజన్‌ కొరతతో కన్నుమూయడం ఆమెను బాగా కలచివేసింది. అప్పుడే మరొకరు అలా బలికాకూడదనుకున్నారు. అందుకే ఓ స్వచ్ఛంద సంస్థ సహాయంతో తన ఇంటిని ఆక్సిజన్‌ కాన్సన్‌ట్రేటర్ల బ్యాంకుగా మార్చేశారు. చుట్టుపక్కల గ్రామాల్లో ఇవి అవసరమైన వారికి క్షణాల్లో అందజేస్తున్నారు. అదేవిధంగా తనకున్న పరిజ్ఞానంతో కరోనా రోగులకు అవసరమైన మందులు అందిస్తున్నారు. సేవ చేస్తున్నారు. కొవిడ్‌ బాధితుల కుటుంబ సభ్యులకు కౌన్సెలింగ్‌ ఇస్తూ వారిలో ధైర్యం నింపుతున్నారు.

100 కిలోమీటర్లు ప్రయాణించి..!

‘నాకు బాగా తెలిసిన ఇద్దరు వ్యక్తులు ఆక్సిజన్‌ కొరతతో కన్నుమూశారు. వీరే కాదు చామరాజనగర్‌ జిల్లాలోని కొన్ని మారుమూల గ్రామాల్లో చాలామంది ఇలాగే ప్రాణాలు కోల్పోతున్నారని తెలిసింది. ఇది నా మనసును బాగా కలచివేసింది. కరోనా బాధితులకు నేను ఏవిధంగా సహాయపడగలను? అని తీవ్రంగా ఆలోచించాను. అప్పుడే నా సోదరుడు ‘స్వామి వివేకానంద యూత్‌ మూమెంట్‌ (SVYM )’ గురించి సమాచారమిచ్చాడు. వారి సహాయంతో కొన్ని పోర్టబుల్‌ ఆక్సిజన్‌ కాన్సన్‌ట్రేటర్లను ఇంట్లో తెచ్చిపెట్టుకున్నాను. కాల్‌ వచ్చిన మరుక్షణమే SVYM సిబ్బంది సహాయంతో ఆటోరిక్షాలో కాన్సన్‌ట్రేటర్లను బాధితుల దగ్గరికి చేరుస్తున్నాను. ఈ క్రమంలో కొన్నిసార్లు 100 కిలోమీటర్లు కూడా ప్రయాణం చేయాల్సి వస్తోంది.’

ఇంట్లో 96 ఏళ్ల అమ్మ ఉంది!

‘నాకున్న ఇబ్బందుల కారణంగా ఎలాంటి ఆర్థిక సహాయం చేయలేకపోవచ్చు. కానీ నా వృత్తిలోనే సేవాభావం ఉంది. అందుకే ఉద్యోగ విరమణ పొందినా ఆపత్కాలంలో నాకు చేతనైన సహాయం చేస్తున్నాను. మా ఇంట్లో అందరూ వయసు పైబడిన వారే. మా అమ్మకు 96 ఏళ్లు. కరోనా కారణంగా నా వల్ల వారికి ఏమైనా అవుతుందేమోనన్న భయం వెంటాడుతోంది. అలాగని సామాన్య ప్రజలు ఇబ్బందుల్లో ఉన్నప్పుడు నేను ఇంట్లో కూర్చోలేను. అయితే వైరస్‌ నుంచి నన్ను నేను రక్షించుకునేందుకు అవసరమైన జాగ్రత్తలన్నీ తీసుకుంటున్నాను’ అని చెబుతున్నారీ కరోనా వారియర్‌.

మా పోరాటానికి ఆమె స్ఫూర్తి!

‘కరోనా వారియర్‌గా గీత అందిస్తున్న సహాయ సహకారాల వల్లే కరోనాపై మా పోరాటం కొనసాగుతోంది. 66 ఏళ్ల వయసులో ఆమె అందిస్తోన్న సేవలు మాలాంటి ఎంతోమందికి స్ఫూర్తినిస్తున్నాయి’ అని SVYM నిర్వాహకులు గీతపై ప్రశంసలు కురిపిస్తున్నారు.

మరిన్ని

నారీ... వ్యాయామ దారి!

ఇంట్లో పనే ఎక్సర్‌సైజు... ఒక గృహిణి అభిప్రాయం. ఆఫీసుకెళ్లొచ్చే సరికే టైం అయిపోతుంది. మళ్లీ జిమ్‌కు వెళ్లే తీరిక ఎక్కడిది? ఒక ఉద్యోగిని ఆవేదన. జిమ్‌ కెళ్లినా అక్కడ మగవాళ్లతో పాటు చేయలేం... ఇదో యువతి సమస్య... ఆరోగ్యాన్ని కాపాడుకోవాలనే ఆలోచన ఉంటే మార్గాలు బోలెడు ఉన్నాయంటున్నారు...జీరోసైజ్‌ లేదా సన్నగా, నాజూగ్గా ఉండాల్సిన అవసరం సినీతారలు, మోడల్స్‌కు మాత్రమే. మేమెందుకు నోరు కట్టేసుకోవాలి, కసరత్తులంటూ చెమటోడ్చాలి అనే భావన చాలా మంది మహిళల్లో ఉండేది. గృహిణులకు ఇంటిపనే సరిపోతుందిలే’ అనే అపోహ ఉండేది. ఇప్పుడు మహిళలకూ ఉద్యోగ, ఉపాధి అవకాశాలు పెరగటంతో జీవనశైలిలో మార్పులు వచ్చాయి.

తరువాయి

చదువుల రాణి.. పసిడి కొల్లగొట్టింది..!

సాధారణంగా చదువులో ముందున్న వారు ఆటల్లో వెనకబడతారు.. అదే ఆటల్లో ముందున్న వారు చదువులో రాణించరు.. అంటుంటారు. కానీ చదువులో, ఆటల్లో.. రెండింట్లోనూ సత్తా చాటే వారు చాలా అరుదుగానే ఉంటారు. ఆస్ట్రియా సైక్లిస్ట్‌ అన్నా కిసెనోఫర్‌ కూడా అలాంటి మహిళే! వృత్తిరీత్యా గణిత విద్యావేత్త అయిన ఆమె.. అండర్‌ డాగ్‌గా టోక్యో ఒలింపిక్స్‌ బరిలోకి దిగింది. అందరి అంచనాల్ని తలకిందులు చేస్తూ ఫైనల్‌ ఫేవరెట్‌ను చిత్తు చేసి పసిడి పతకాన్ని కొల్లగొట్టింది. ఫలితంగా 125 ఏళ్లలో సైక్లింగ్‌ విభాగంలో ఒలింపిక్స్‌ పతకం గెలుచుకున్న తొలి ఆస్ట్రియా అథ్లెట్‌గా చరిత్ర సృష్టించింది. దీంతో ఆమె పేరు ప్రపంచమంతా మార్మోగిపోతోంది.

తరువాయి

సైకిల్‌ తొక్కితే రాళ్లు విసిరారు.. చంపేస్తామన్నారు!

అఫ్గానిస్థాన్‌కు చెందిన ఆమె చిన్నతనంలోనే సైకిల్‌ నేర్చుకుంది. అందులోనే జీవితాన్ని వెతుక్కోవాలనుకుంది. కానీ అక్కడి తాలిబన్లు, మత ఛాందసవాదులు ‘ఆడపిల్లలు సైకిల్‌ తొక్కడమేంటి?’ అంటూ ఆమె ఆశయానికి అడ్డుపడ్డారు. ధైర్యం చేసి సైకిల్‌తో రోడ్డుపై కొస్తే రాళ్లు విసిరారు. చంపేస్తామని బెదిరించారు. అందుకే ఉన్న వూరును విడిచిపెట్టి ప్రాణాలు అరచేతిలో పెట్టుకుని ఫ్రాన్స్‌కు వలస వెళ్లిపోయింది. అక్కడే తన సైక్లింగ్‌ లక్ష్యానికి మెరుగులు దిద్దుకుంది. ప్రతిష్ఠాత్మక ఒలింపిక్స్‌లో శరణార్థుల జట్టు తరఫున పాల్గొనే సువర్ణావకాశం సొంతం చేసుకుంది. ఆమే 24 ఏళ్ల మసోమా అలీ జాదా.

తరువాయి

సృజనాత్మక పరిష్కారానికి అరుదైన పురస్కారం!

యూరోపియన్‌ ఇన్వెంటర్‌ అవార్డ్‌.. వివిధ రంగాల్లో ఆవిష్కరణలు చేసి ఓ సరికొత్త ట్రెండ్‌ క్రియేట్‌ చేసిన వారికి ఏటా అందించే ప్రతిష్ఠాత్మక పురస్కారమిది! ఐరోపాతో పాటు ఇతర దేశాల వారు చేసిన అద్భుత ఆవిష్కరణల్ని గుర్తించి.. వాటి సృష్టికర్తలకు బహూకరించే ఈ పురస్కారం ఈసారి భారత సంతతికి చెందిన రసాయన శాస్త్రవేత్త సుమితా మిత్రాను వరించింది. ‘నాన్‌ యూరోపియన్‌ పేటెంట్‌ ఆఫీస్‌ కంట్రీస్‌’ విభాగం కింద యూరోపియన్‌ పేటెంట్‌ ఆఫీస్‌ (EPO) ఆమెకు ఇటీవలే ఈ అవార్డు అందించింది. దంత వైద్యంలో భాగంగా ఆమె చేసిన ఓ అసాధారణ ఆవిష్కరణతో ఎంతోమంది దంత సమస్యలకు పరిష్కారం దొరికినట్లయింది. ఈ నేపథ్యంలోనే ఈ అరుదైన అవార్డు అందుకున్న సందర్భంగా ఈ ఇండో-అమెరికన్‌ గురించి కొన్ని విశేషాలు మీకోసం..

తరువాయి

బ్యూటీ & ఫ్యాషన్

మరిన్ని

ఆరోగ్యమస్తు

మరిన్ని

అనుబంధం

మరిన్ని

యూత్‌ కార్నర్

మరిన్ని

మంచిమాట


'స్వీట్' హోం

మరిన్ని

వర్క్‌ & లైఫ్

మరిన్ని