ఫుడ్ డెలివరీ గర్ల్‌గా మారి తనే ఇంటికి పెద్ద కొడుకైంది! - amid covid lockdown odisha girl joins as food delivery agent to support family
close
Updated : 15/06/2021 14:33 IST
Facebook Share Twitter Share WhatsApp Share Telegram Share Link Share

ఫుడ్ డెలివరీ గర్ల్‌గా మారి తనే ఇంటికి పెద్ద కొడుకైంది!

Image for Representation

డాక్టర్‌ కావాలనుకున్న ఆమె ఆశయానికి కరోనా అడ్డుకట్ట వేసింది. ఉన్నత చదువులు చదవాల్సింది పోయి ఉపాధి కోసం వెంపర్లాడేలా చేసింది. కుటుంబ పోషణ కోసం ఫుడ్ డెలివరీ గర్ల్‌గా మారి తనే ఇంటికి పెద్ద కొడుకు అయింది.
ఆశయాన్ని పక్కనపెట్టి!
కరోనా కారణంగా ఎన్నో కుటుంబాలు రోడ్డున పడ్డాయి. లాక్‌డౌన్‌తో ఎంతోమంది ఉద్యోగాలు, ఉపాధి కోల్పోయారు. దీంతో చాలామంది విద్యార్థులు తమ చదువులను పక్కనపెట్టి పనుల్లోకి వెళుతున్నారు. తమ కుటుంబానికి ఆర్థిక చేయూతనివ్వడం కోసం వివిధ రకాల ఉపాధి మార్గాలను ఎంచుకుంటున్నారు. ఒడిశాలోని కటక్‌కు చెందిన 18 ఏళ్ల విష్ణుప్రియ స్వెయిన్‌ది కూడా ఇదే పరిస్థితి. ప్రస్తుతం 12వ తరగతి చదువుతోన్న ఆమె ఎలాగైనా డాక్టర్‌ కావాలని కలలు కంది. కానీ కరోనా కారణంగా.. డ్రైవర్‌గా పనిచేస్తోన్న తన తండ్రి ఉద్యోగం పోవడం, పూట గడవడం కూడా కష్టం కావడంతో తన ఆశయాన్ని పక్కన పెట్టేసింది. ముగ్గురు కూతుళ్లలో పెద్దమ్మాయి అయిన ఆమె కుటుంబ బాధ్యతలను తన భుజాలకెత్తుకుంది.


తండ్రి బైక్‌ నడపడం నేర్చుకుని!
ఈ క్రమంలో తన తండ్రి దగ్గరున్న బైక్‌ నడపడం నేర్చుకున్న విష్ణుప్రియ.. ఆ తర్వాత జొమాటో ఫుడ్‌ డెలివరీ కంపెనీలో డెలివరీ ఏజెంట్‌గా చేరింది. కటక్‌ జిల్లాలో జొమాటోలో పనిచేస్తోన్న ఏకైక ఫుడ్‌ డెలివరీ గర్ల్ తనే కావడం విశేషం. 
‘ప్రస్తుతం నేను ఇంటర్‌ చదువుతున్నాను. డాక్టర్‌గా పేదలకు సేవ చేయాలన్నది నా కల. అయితే కరోనా కారణంగా మా కుటుంబం ఆర్థిక ఇబ్బందుల్లో చిక్కుకుంది. అందుకే ఇలా డెలివరీ గర్ల్‌గా విధులు నిర్వర్తిస్తున్నాను. నాకు తెలిసి ఏ పనీ తక్కువ కాదు. కష్టాల్లో ఉన్న నా కుటుంబానికి ఆర్థికంగా తోడు నిలవాలనే ఈ ప్రయత్నమంతా. అమ్మానాన్న ఆనందంగా ఉండాలి. నా ఇద్దరు చెల్లెళ్ల చదువులు కూడా కొనసాగాలి. ప్రస్తుతానికి ఇవే నా లక్ష్యాలు’ అంటోంది విష్ణుప్రియ.
నైట్‌షిఫ్టుల్లో కష్టమే కానీ..!
నిత్యం బైక్‌పై తెలియని అడ్రస్‌లు వెతుక్కుంటూ ప్రయాణించడం, ప్రత్యేకించి అర్ధరాత్రి వేళల్లో ఫుడ్‌ డెలివరీలు చేయాలంటే అబ్బాయిలే ఎన్నో ఇబ్బందులు ఎదుర్కొంటారు. అలాంటిది పగలు ఆన్‌లైన్‌ క్లాసులకు హాజరవుతూనే రాత్రివేళల్లో ఫుడ్‌ డెలివరీ గర్ల్‌గా విధులు నిర్వర్తిస్తోంది విష్ణుప్రియ.


‘వీలైనంత వరకు పగటి వేళల్లోనే డ్యూటీకి వెళతాను. అయితే అప్పుడప్పుడూ ఆన్‌లైన్‌ క్లాసులుండడంతో నైట్‌షిఫ్టుల్లో పనిచేయాల్సి వస్తోంది. రాత్రివేళల్లో విధులు అంటే కొంచెం కష్టంగానే ఉంటోంది. అయితే ఇప్పటివరకు ఎలాంటి ఇబ్బందులు, ప్రమాదకర సంఘటనలు ఎదురుకాలేదు’ అని చెబుతోందీ డేరింగ్‌ గర్ల్.
ఆమె నా పెద్ద కొడుకు!
ఇలా ఇంటి బాధ్యతలను భుజాలకెత్తుకున్న విష్ణుప్రియకు టైలరింగ్‌ పనులు చేస్తూ తోడుగా నిలుస్తోంది ఆమె తల్లి. ‘మాకు ముగ్గురూ ఆడపిల్లలే. ఇంతకుముందు నా పెద్ద కూతురు పిల్లలకు ట్యూషన్లు చెప్పేది. అంతో ఇంతో ఆదాయం వచ్చేది. కానీ కరోనా కారణంగా పిల్లలు కూడా రావడం మానేశారు. దీంతో ఇలా ఫుడ్‌ డెలివరీ గర్ల్‌గా చేరాల్సి వచ్చింది. ఇలా కూతురే కొడుకులా ఇంటి బాధ్యతల్ని మోస్తోంది. అందుకే తనని మా పెద్ద కొడుకులా భావిస్తున్నాం’ అని ఆ మాతృమూర్తి చెప్పుకొచ్చింది.


మహిళల సంఖ్య పెరుగుతోంది!
సాధారణంగా ఫుడ్ డెలివరీ చేసే వారిలో మగవాళ్లే ఎక్కువగా కనిపిస్తుంటారు. అయితే గత కొన్నేళ్లుగా ఈ విధులు నిర్వర్తిస్తున్న అమ్మాయిల సంఖ్య కూడా క్రమంగా పెరుగుతోంది. విష్ణుప్రియలా మరెంతోమంది అమ్మాయిలు, మహిళలు స్విగ్గీ, జొమాటో లాంటి సంస్థల్లో డెలివరీ గర్ల్స్‌గా చేరుతున్నారు. ఈ క్రమంలో ఈ రంగంలో మహిళల సంఖ్య క్రమంగా పెరుగుతోందని చెప్పచ్చు. ఒక నివేదిక ప్రకారం 2018 నాటికి దేశ వ్యాప్తంగా సుమారు 40 వేల మంది మహిళలు వివిధ ఫుడ్‌ డెలివరీ సంస్థల్లో డెలివరీ ఎగ్జిక్యూటివ్‌లుగా పనిచేస్తున్నారు. 2019 జూన్‌ చివరి నాటికి ఆ సంఖ్య 67,900కు చేరుకుంది. కరోనా పరిస్థితులు రాకపోయి ఉంటే 2021 నాటికి ఈ సంఖ్య 75 వేలకు చేరేదని ఆ రిపోర్టు అంచనా వేసింది. ౯-౫ జాబ్స్‌తో పోల్చితే పని వేళల్లో ఎక్కువ సౌలభ్యం, మంచి జీతం ఉండడంతో ఎక్కువమంది మహిళలు ఈ ఉద్యోగాలను ఎంచుకుంటున్నట్లు నివేదికలు చెబుతున్నాయి.


మరిన్ని

ఇంటి పేరుతో కాదు... ఇది నా స్వయంకృషి...!

నాన్న ప్రముఖ నటుడు దగ్గుబాటి వెంకటేశ్‌. ఇక తాత, పెదనాన్న, అన్న... ఇలా ఆ ఇంట్లో వాళ్ల పేర్లు చెప్పక్కర్లేదు. వారి పేర్లు ఉపయోగించుకుంటే బోలెడు గుర్తింపు. కానీ ఆమె మాత్రం... తన అభిరుచి, సృజనాత్మకత, శ్రమలనే పెట్టుబడిగా గుర్తింపు సాధించాలనుకుంది. తనే వెంకటేశ్‌ పెద్ద కుమార్తె ఆశ్రిత. తన లక్ష్యం దిశగా కృషి చేస్తూ... ఇన్‌స్టాగ్రాం, యూట్యూబ్‌ల్లో లక్షల్లో అభిమానుల్ని సంపాదించుకుంది. ఇటీవల ఇన్‌స్టాగ్రాంలో ఎక్కువ సంపాదిస్తున్న సెలబ్రిటీల జాబితాను హోపర్‌డాట్‌కాం సంస్థ విడుదల చేసింది. అందులో ఆశ్రిత అంతర్జాతీయంగా 377, ఆసియాలో 27వ ర్యాంకులు సాధించింది. ఈ సందర్భంగా వసుంధర ఆమెతో ముచ్చటించింది.

‘స్పెల్లింగ్స్‌’ చెప్పి సెన్సేషనయ్యారు!

పిల్లల్లో ఇంగ్లిష్‌ నైపుణ్యాలను పరీక్షించడానికి అమెరికాలో ఏటా నేషనల్‌ స్పెల్లింగ్‌-బీ పోటీలు నిర్వహిస్తోన్న సంగతి తెలిసిందే. ఎంతో ప్రతిష్ఠాత్మకంగా జరిగే ఈ పోటీల్లో వేలాదిమంది చిన్నారులు పాల్గొంటారు. తల్లిదండ్రులు కూడా తమ పిల్లలను ఈ పోటీలకు అన్ని రకాలుగా సిద్ధం చేస్తూ ప్రోత్సహిస్తుంటారు. ఇక ఈసారి నిర్వహించిన స్పెల్లింగ్‌-బీ పోటీల్లో లూసియానాకు చెందిన 14 ఏళ్ల జైలా అవంత్‌ గార్డే విజేతగా నిలిచింది. దీంతో 93 ఏళ్ల ఈ కంటెస్ట్‌ చరిత్రలో ఈ ట్రోఫీ నెగ్గిన మొదటి ఆఫ్రికన్‌ అమెరికన్‌గా, రెండో నల్లజాతీయురాలిగా చరిత్ర సృష్టించిందీ యంగ్‌ గర్ల్‌.

కథ చెబుతాను... ఊ కొడతారా..!

రాత్రయిందంటే చాలు.. బామ్మ చెప్పే నీతికథలు వింటూ నిద్రలోకి జారుకోవడం మనందరికీ చిన్ననాటి ఓ మధుర జ్ఞాపకం! అప్పుడంటే చాలావరకు ఉమ్మడి కుటుంబాలు కాబట్టి ఇది వర్కవుట్‌ అయింది.. ఇప్పుడు వృత్తి ఉద్యోగాల రీత్యా చాలామంది ఇంట్లో పెద్దవాళ్లు, కన్న వాళ్ల నుంచి దూరంగా వచ్చేస్తున్నారు. దీంతో పిల్లలు వాళ్ల గ్రాండ్‌పేరెంట్స్‌ని, వాళ్లు చెప్పే బోలెడన్ని కథల్ని మిస్సవుతున్నారు. ఇలాంటి అనుభవమే తన చెల్లెలికీ ఎదురైందంటోంది 18 ఏళ్ల ప్రియల్ జైన్‌. అది చూసి ఆలోచనలో పడిపోయిన ఆమె.. నీతి కథలు చెప్పే ఓ ప్లాట్‌ఫామ్‌కు శ్రీకారం చుట్టింది. చిన్నారులకు బామ్మ దగ్గర లేని లోటుని తన వెబ్‌సైట్ తీరుస్తుందంటోన్న ఈ యంగ్‌ ఆంత్రప్రెన్యూర్‌ కథేంటో మనమూ తెలుసుకుందాం రండి..

చిన్నప్పటి కల.. ఇలా సాధించేసింది!

ఆడవారు అనుకుంటే ఏదైనా సాధిస్తారు... వారికి కావల్సిందల్లా కాసింత ప్రోత్సాహం. ఎవరి సహకారం ఉన్నా, లేకున్నా తల్లిదండ్రులు, తోడబుట్టిన వారి సహకారం మాత్రం ఉంటే చాలు... అమ్మాయిలకు అసలు తిరుగుండదు. అన్నింటా విజయాలే సాధిస్తారు. పలువురికి ఆదర్శంగా నిలుస్తారు. అందుకు తాజా ఉదాహరణే 24 ఏళ్ల మావ్యా సూదన్‌. జమ్మూకశ్మీర్‌లోని ఓ మారుమూల గ్రామానికి చెందిన ఈ యువతి ఇటీవల ఇండియన్‌ ఎయిర్‌ ఫోర్స్‌ ఫైటర్‌ పైలట్‌గా నియమితురాలైంది. ఈ నేపథ్యంలో దేశం మొత్తంమీద ఈ అవకాశం దక్కించుకున్న 12 వ మహిళగా, మొదటి కశ్మీరీ మహిళగా గుర్తింపు పొందిందీ యంగ్‌ సెన్సేషన్.

ఆరోగ్యమస్తు

మరిన్ని

అనుబంధం

మరిన్ని

'స్వీట్' హోం

మరిన్ని

వర్క్ & లైఫ్

మరిన్ని

సూపర్ విమెన్

మరిన్ని

బ్యూటీ & ఫ్యాషన్

మరిన్ని