తిండి లేక కేవలం ఉప్పు, రోటీలతోనే సరిపెట్టుకునేవాళ్లం..! - bharti singh opens up about her struggles while growing up
close
Updated : 20/07/2021 18:14 IST
Facebook Share Twitter Share WhatsApp Share Telegram Share Link Share

తిండి లేక కేవలం ఉప్పు, రోటీలతోనే సరిపెట్టుకునేవాళ్లం..!

భారతీ సింగ్‌... బుల్లితెర ‘కామెడీ క్వీన్‌’గా మనందరికీ బాగా తెలిసిన పేరు. సందర్భానికి తగ్గట్టుగా కామెడీ పంచులు వేస్తూ అందరినీ కడుపుబ్బా నవ్వించడంలో ఆమె సిద్ధహస్తురాలు. ‘ద గ్రేట్‌ ఇండియన్‌ లాఫ్టర్‌ ఛాలెంజ్‌’, ‘కామెడీ సర్కస్‌’, ‘ద కపిల్‌ శర్మ షో’ తదితర టీవీ షోలతో తనకంటూ ఓ ప్రత్యేక గుర్తింపు తెచ్చుకుందీ లాఫ్టర్‌ క్వీన్.

ఆర్థిక సమస్యలు చుట్టుముట్టాయి!

అయితే ఎప్పుడూ నవ్వుతూ, పక్కవారికి ఆనందం పంచే ఈ కమెడియన్‌ వెనక ఎవరికీ కనిపించని కన్నీళ్లు కూడా ఉన్నాయట. తన రెండేళ్ల వయసున్నప్పుడే తండ్రి చనిపోవడంతో ఆర్థిక సమస్యలు తన కుటుంబాన్ని చుట్టుముట్టాయంటోందీ కామెడీ క్వీన్‌. ఈ నేపథ్యంలో పొట్టకూటి కోసం తీవ్రంగా ఇబ్బందులు పడ్డామంటూ ఇటీవల ఓ సందర్భంలో తన కన్నీటి గాథను పంచుకుంది.

పరాఠాలతోనే కడుపు నింపుకొనేవాళ్లం!

‘నా రెండేళ్ల వయసులోనే నాన్న చనిపోయారు. నేను ఆయన ముఖాన్ని కూడా సరిగా చూడలేకపోయాను. దీంతో నాకు అమ్మ, అక్కే ఆధారమయ్యారు. వారు ఓ గార్మెంట్‌ ఫ్యాక్టరీలో దుప్పట్లు కుట్టే పనికి చేరారు. ఆ జీతంతోనే కుటుంబాన్ని నెట్టుకొచ్చారు. దీంతో పాటు అమ్మ ఇతరుల ఇళ్లలో వంట పనులకు కూడా వెళ్లేది. ఆ సమయంలో మేం బ్లాక్‌ టీ, పరాఠాలతోనే కడుపు నింపుకొనేవాళ్లం. కొన్నిసార్లయితే కేవలం రోటీలు, ఉప్పుతోనే సరిపెట్టుకునేవాళ్లం’..

21 ఏళ్ల పాటు!

‘ఫ్యాక్టరీ నుంచి ఇంటికి వచ్చాక కూడా అమ్మ, అక్క దుప్పట్లు కుట్టే పనుల్లో నిమగ్నమయ్యేవారు. ఆ సమయంలో కుట్టు మిషన్ల నుంచి పెద్ద ఎత్తున శబ్దం వెలువడేది. ఒకటి కాదు...రెండు కాదు సుమారు 21 ఏళ్ల పాటు నేను ఆ కుట్టు మిషన్ల శబ్దాల మధ్యనే గడిపాను. జీవితంలో మళ్లీ ఆ దీన పరిస్థితి రాకూడదని ఆ భగవంతుడిని కోరుకుంటున్నాను’.

అమ్మను అసభ్యంగా తాకేవారు!

‘ఇక మాకు అప్పిచ్చిన వాళ్లు అమ్మతో ఎంతో నీచంగా ప్రవర్తించేవారు. ఎప్పుడంటే అప్పుడు ఇంటికి వచ్చేవారు. కొందరు అమ్మ చేయి పట్టుకుని అసభ్యంగా ప్రవర్తించేవారు. మరికొందరు ఆమె భుజంపై చేతులు వేసేవారు. ‘నాకు భర్త లేడు...చిన్న పిల్లలున్నారు.. మీకు సిగ్గుగా అనిపించడం లేదా?.. ఇంత నీచంగా ప్రవర్తిస్తారా?’ అని అమ్మ వారితో తగవులాడేది. అయితే వాళ్లు అమ్మతో అసభ్యంగా ప్రవర్తిస్తున్నారని చిన్న పిల్లలమైన మాకు అప్పుడు అర్థమయ్యేది కాదు.’

ఆ కూపన్లు దాచి పండ్లు కొనేదాన్ని!

‘నాకు షూటింగ్‌, ఆర్చరీలోనూ ప్రావీణ్యముంది. సినిమా ఇండస్ట్రీలోకి రాకముందు జాతీయ స్థాయి రైఫిల్‌ షూటింగ్‌ పోటీల్లోనూ పాల్గొన్నాను. సాధారణంగా అథ్లెట్లు సన్నగా, నాజూగ్గా ఉంటారు. కానీ 12 ఏళ్ల వయసులో ఎంతో బొద్దుగా ఉన్నప్పటికీ షూటింగ్‌ పోటీల్లో పాల్గొన్నాను. అందుకే కొందరు స్నేహితులు అప్పుడప్పుడు ఈ విషయాన్ని గుర్తు చేస్తుంటే నాకు కూడా ఆశ్చర్యంగా ఉంటుంది. ఇక షూటింగ్ శిక్షణ సమయంలో ప్రభుత్వం మాకు ఉచితంగా ఆహార వసతి కల్పించేది. ఇందులో భాగంగా 5 రూపాయల కూపన్లను రోజుకు మూడు చొప్పున అందించేది. అయితే నేను మాత్రం రోజూ ఒక కూపన్‌ మాత్రమే వినియోగించుకునేదాన్ని. దాని ద్వారా వచ్చిన గ్లాస్‌ జ్యూస్‌ తాగి గంటల పాటు షూటింగ్‌ ప్రాక్టీస్‌ చేసేదాన్ని. దాచిపెట్టుకున్న కూపన్లతో నెలాఖరులో ఇంటికి పండ్లను తీసుకెళ్లేదాన్ని’ అని అప్పటి అనుభవాలను గుది గుచ్చిందీ బుల్లితెర బ్యూటీ.

అదే నా ప్రార్థన!

‘ది కపిల్‌ శర్మ షో’ ద్వారా తన పాపులారిటీని మరింత పెంచుకున్న భారతి ప్రస్తుతం ఈ షో తర్వాతి సీజన్‌ కోసం సిద్ధమవుతోంది. ‘ఇప్పటికీ నాకు పెద్దగా కోరికలేమీ లేవు. అయితే ఇప్పటివరకు నేను సంపాదించుకున్నవేవీ దూరం కాకూడదని ఆ దేవుడిని ప్రార్థిస్తున్నాను. ఇప్పటికీ మేమంతా సాధారణ జీవితమే గడుపుతున్నాం. రోటీల్లోకి ఉప్పు బదులు కూరగాయలు, పప్పులు వాడుతున్నాం. ఇప్పటికీ కూరగాయలు కొనడానికి వెళ్లినప్పుడు కాస్త కొత్తిమీర ఎక్కువగా వస్తే అమ్మ ఎంతో సంతోషిస్తుంది’ అని చెప్పుకొచ్చిందీ కామెడీ క్వీన్.


మరిన్ని

సైజ్‌ జీరో కాదు.. ఆరోగ్యం ముఖ్యం!

‘మనసులో కలిగే ఆలోచనల్నే శరీరం ప్రతిబింబిస్తుంది..’ అంటోంది ఫిట్‌నెస్‌ ఫ్రీక్‌ అంకితా కొన్వర్‌. సైజ్‌ జీరో గురించి ఆలోచిస్తూ బాధపడితే మరింత బరువు పెరుగుతామని, అదే ఆరోగ్యంపై దృష్టి పెడితే శరీరం, మనసు రెండూ మన అధీనంలో ఉంటాయని చెబుతోంది. ఆరోగ్యం, ఫిట్‌నెస్‌పై ఎక్కువ శ్రద్ధ పెడుతూ.. ఆ చిట్కాల్ని సోషల్‌ మీడియాలో పంచుకుంటూ అందరిలో స్ఫూర్తి నింపే ఈ మిసెస్‌ సోమన్‌.. తాజాగా బాడీ పాజిటివిటీ గురించి ఇన్‌స్టాలో మరో స్ఫూర్తిదాయక పోస్ట్‌ పెట్టింది. సైజ్‌ జీరో కంటే ఆరోగ్యమే ముఖ్యమంటూ ఆమె షేర్‌ చేసిన పోస్ట్‌ ప్రస్తుతం సామాజిక మాధ్యమాల్లో వైరల్‌గా మారింది.

ఆరోగ్యమస్తు

మరిన్ని

అనుబంధం

మరిన్ని

యూత్ కార్నర్

మరిన్ని

'స్వీట్' హోం

మరిన్ని

సూపర్ విమెన్

మరిన్ని

బ్యూటీ & ఫ్యాషన్

మరిన్ని