ఒక ముద్దు.. ఒక హగ్గు.. అన్యోన్యత పెరగడానికి కావాల్సినవెన్నో! - daily habits for a strong everlasting marriage in telugu
close
Updated : 13/06/2021 19:05 IST
Facebook Share Twitter Share WhatsApp Share Telegram Share Link Share

ఒక ముద్దు.. ఒక హగ్గు.. అన్యోన్యత పెరగడానికి కావాల్సినవెన్నో!

‘నీకన్నా నా సంపాదన ఎక్కువ.. కాబట్టి నువ్వు నా చెప్పుచేతల్లో ఉండాల’న్నట్లుగా ప్రవర్తిస్తుంటుంది అన్విత. అది తన భర్త ఆకాశ్‌కు నచ్చదు.. దాంతో రోజూ ఇంట్లో గొడవలే!
భార్యను బానిసలా చూసే మగాళ్లు మన చుట్టూ చాలామందే ఉంటారు. వినోద్‌ కూడా అలాంటివాడే! తన భర్త ప్రవర్తనతో రెండేళ్లుగా విసిగిపోయిన రంజని ఇక నా వల్ల కాదని ఈ మధ్యే పుట్టింటికి వెళ్లిపోయింది.
అన్యోన్య దాంపత్యమంటే ఇలా అహం, ఆధిపత్యం కాదు.. ఆప్యాయత, అనురాగం అంటున్నారు రిలేషన్‌షిప్‌ నిపుణులు. కానీ నేటి యువ జంటల్లో ఇది కొరవడుతోందని చెబుతున్నారు. నిజానికి దంపతుల్లో ఇలాంటి పొరపచ్ఛాలు, గొడవలు, కసుర్లు-విసుర్లు ఉన్నా.. అవి కొంత సమయానికే పరిమితం కావాలని.. అప్పుడే ఆలుమగల అనుబంధం దృఢమవుతుందని సలహా ఇస్తున్నారు. ఈ క్రమంలో ఇద్దరూ రోజూ కొన్ని నియమాల్ని పాటిస్తూ.. వాటిని అలవాట్లుగా మార్చుకుంటే భార్యాభర్తల అనుబంధాన్ని నిత్యనూతనం చేసుకోవచ్చని చెబుతున్నారు. మరి, ఏంటా రిలేషన్‌షిప్‌ చిట్కాలు? మనమూ తెలుసుకుందాం రండి..


ఆరోగ్యంతో అన్యోన్యత!
వృత్తిరీత్యా, వ్యక్తిగతంగా.. ఇలా కారణమేదైనా చాలామందిలో ఒత్తిడి, ఆందోళనలు రోజురోజుకీ పెరిగిపోతున్నాయి. చాలామంది దంపతుల్లో గొడవలు, పొరపచ్ఛాలకు ఇవే కారణమంటున్నారు నిపుణులు. అందుకే వీటికి చెక్‌ పెట్టాలంటే ముందుగా మానసిక ఆరోగ్యాన్ని పెంపొందించుకోవాల్సి ఉంటుందని చెబుతున్నారు. అయితే ఎవరైతే రోజూ అన్ని పోషకాలతో కూడిన సమతులాహారం తీసుకుంటారో వారు మానసికంగా దృఢంగా ఉన్నట్లు ఓ బ్రిటిష్‌ అధ్యయనం రుజువు చేస్తోంది. అంతేకాదు.. ఇలాంటి ఆహారంతో శక్తిస్థాయులు కూడా పెరిగినట్లు.. ఇది అంతిమంగా సానుకూల దృక్పథాన్ని రెట్టింపు చేసినట్లు ఆ అధ్యయనం చెబుతోంది. ఇలా మనలో పాజిటివిటీ ఉంటే ఎదుటివారి ఆలోచనల్నీ మనం సానుకూలంగానే అర్థం చేసుకోవచ్చు. సో.. దంపతులిద్దరూ ఇలా మానసిక ఆరోగ్యాన్ని పెంపొందించుకుంటూ, సానుకూల దృక్పథంతో ఉంటే ఇక వారి మధ్య ప్రేమ తప్ప మరే ఆలోచన ఉండదని చెప్పకనే చెబుతోందీ అధ్యయనం! 


వాటిని నోట్‌ చేయాల్సిందేనట!
అన్యోన్య దాంపత్య బంధంలో ఎప్పుడూ ప్రేమే కాదు.. చిలిపి తగాదాలూ ఉండాల్సిందేనంటున్నారు నిపుణులు. అయితే గొడవ పడడం, ఆపై ఎవరిది తప్పైతే వారు సారీ చెప్పుకోవడంతో పరిస్థితి సద్దుమణుగుతుంది. దీంతో ఆ తగాదా గురించి మర్చిపోతుంటారు దంపతులు. అయితే ఇలాంటి చిన్న చిన్న గొడవల్ని మాటలతోనే ఆపేయకుండా.. పేపర్‌పై పెట్టమంటోంది నార్త్‌వెస్ట్‌ యూనివర్సిటీ జరిపిన ఓ అధ్యయనం. ఎందుకంటే గొడవపడే సమయంలో తమదే తప్పైనా సరే.. దాన్ని ఒప్పుకునే స్థితిలో వారు ఉండరు.. తమదే కరక్ట్‌ అన్నట్లుగా మాట్లాడతారు. అదే కాసేపయ్యాక తప్పెవరిదో తెలుసుకుంటారు. కాబట్టి ఇలాంటి గొడవలకు అక్షర రూపమిస్తే ఇద్దరి మధ్య గొడవలకు అసలు కారణమేంటి? అందులో ఎవరి తప్పుంది? వంటి విషయాలన్నీ అవగతమవుతాయి. తద్వారా ఆ తప్పు మళ్లీ చేయకుండా జాగ్రత్తపడచ్చు. అంతేకాదు.. ఇలా గొడవ పడే దంపతులు తమ తగాదాల్ని నోట్‌ చేసుకోవడం వల్ల వారి భాగస్వాముల్ని మరింత బాగా అర్థం చేసుకోగలరంటోందీ అధ్యయనం! కాబట్టి ఇకపై జరిగే గొడవల్ని అలా వదిలేయకుండా డైరీలో నోట్‌ చేసుకొని మీ మధ్య అన్యోన్యతను రెట్టింపు చేసుకోండి.


ఒక ముద్దు.. ఒక హగ్గు!
భార్యాభర్తల బంధం ఒక భావోద్వేగపూరిత సంబంధం. ఇలా ఇద్దరి మధ్య ఎమోషన్స్‌ ఎప్పటికీ ముడిపడి ఉండాలంటే వారి రొటీన్‌లో రోజూ కౌగిలింతలు, ముద్దులు ఉండాల్సిందేనంటున్నారు నిపుణులు. ఇలా ఒకరినొకరు కౌగిలించుకునే క్రమంలో శరీరంలో ఆక్సిటోసిన్‌ అనే లవ్‌ హార్మోన్‌ విడుదలవుతుంది. ఇది దంపతులిద్దరినీ ఎమోషనల్‌గా కలిపి ఉంచుతుంది. ఇక ఒకరినొకరు ముద్దు పెట్టుకున్నప్పుడు శరీరంలో ఆక్సిటోసిన్‌, డోపమైన్‌, సెరటోనిన్‌.. అనే ఫీల్‌గుడ్‌ హార్మోన్లు విడుదలవుతాయి. ఇవి ఇద్దరిలో ఉన్న ఒత్తిడిని దూరం చేసి వారి మధ్య అనుబంధాన్ని మరింతగా పెంచుతాయి. కాబట్టి దంపతులిద్దరూ ఎంత బిజీగా ఉన్నా సరే.. రోజూ ముద్దులు, కౌగిలింతలకు కాస్త సమయం కేటాయించాలంటున్నారు నిపుణులు.


మీ ప్రశ్న.. వారి సమాధానం!
దంపతులిద్దరూ కలిసి ఎంత సమయం గడిపితే వారి మధ్య అనుబంధం అంతలా దృఢమవుతుందన్న విషయం తెలిసిందే! అయితే ఇందుకోసం ప్రత్యేకంగా ఇద్దరూ కూర్చొనే మాట్లాడుకోవాల్సిన అవసరం లేదు.. ఇంటి పని చేస్తూ, వంట పని చేస్తూ, భోంచేసేటప్పుడు.. ఇలా సమయం వృథా కాకుండా కూడా ఒకరితో ఒకరు సమయం గడపచ్చు. అయితే ఈ క్రమంలో ఒకరికొకరు రోజుకో ఆసక్తికరమైన ప్రశ్నను సంధించుకోవాలంటున్నారు నిపుణులు.
ఇందులో భాగంగా.. ‘నాలో నీకు నచ్చిన, నచ్చని అంశాలేంటి?’, ‘నేను నీకిచ్చిన తొలి పుట్టినరోజు కానుకేంటి?’.. వంటి ప్రశ్నలు అడగచ్చు. ఆలోచించాలే కానీ.. ఇలాంటి ప్రశ్నలకు తావే ఉండదు. పైగా ఇలా ఒకరి గురించి మరొకరు సమాధానం రాబట్టే క్రమంలో మధ్యమధ్యలో జోక్స్ వేసుకోవచ్చు.. సరదాగా నవ్వుకోవచ్చు.. ఇలా సరదాగా సాగే సంభాషణ ఇద్దరి మనసుల్ని మరింత దగ్గర చేస్తుందనడంలో సందేహమే లేదు.


వారానికో అరగంట..!
వైవాహిక బంధం శాశ్వతమైనది.. సుఖదుఃఖాల్లో జీవితాంతం ఒకరికొకరు జంటగా ఉండాల్సిన అందమైన బంధం. అలాంటి బంధంలో ఇద్దరి మధ్య ఎలాంటి దాపరికాలు, అనుమానాలకు తావుండకూడదు. అదే సమయంలో భవిష్యత్‌ ప్రణాళికల విషయంలోనూ ఇద్దరికీ ఒక స్పష్టత ఉండాలి. ఇలా జరగాలంటే కలిసి నిర్ణయాలు తీసుకోవాల్సిందే అంటున్నారు నిపుణులు! అయితే కొంతమంది దంపతులు ఒకరినొకరు సంప్రదించకుండా సొంత నిర్ణయాలు తీసుకుంటుంటారు. ఇలాంటప్పుడు ఇద్దరి మధ్య పొరపచ్ఛాలు రావడం, అది చినికి చినికి గాలివానలా మారి వారి బంధంలో చిచ్చుపెట్టడం.. వంటివి మనం చూస్తూనే ఉంటాం. కాబట్టి ఇలాంటి పరిస్థితి రాకూడదంటే వారానికోసారి ఓ అరగంట సమయం కేటాయించుకొని భార్యాభర్తలిద్దరూ వ్యక్తిగత ప్రణాళికలు, కుటుంబ ప్రణాళికల గురించి మాట్లాడుకోవాలి. ఈ క్రమంలో గత వారంలో అనుకున్న పనులు పూర్తయ్యాయా? వచ్చే వారం ఇంకా ఎలాంటి విషయాల గురించి ప్లాన్ చేసుకోవాలి.. మొదలైన వాటి గురించి మాట్లాడుకుంటే అన్ని విషయాల్లో ఇద్దరికీ ఒక స్పష్టమైన అవగాహన ఏర్పడడంతో పాటు ఇద్దరి మధ్య అనుబంధమూ రెట్టింపవుతుంది.
ఏంటీ.. ఇవన్నీ చదువుతుంటే మీ దాంపత్య బంధంలో మీరు పాటించే అలవాట్లు, నియమాలు గుర్తొస్తున్నాయా? అయితే మీ అనుభవాల్ని మాతో పంచుకోండి.. ఇలా మీరు పంచుకునే ఆలోచనలు, ఇచ్చే సలహాలు మరెన్నో జంటలకు ఉపయోగపడచ్చు.


మరిన్ని

దాని గురించి పుట్టిన వెంటనే తెలిసిపోతుందట!

తల్లిపాలు అందుతున్న పాపనో.. బాబునో.. అమ్మకు దగ్గరగా తీసుకువెళ్లండి.. వారంతట వారే తల్లి స్తన్యాన్ని అందుకోవడానికి ప్రయత్నిస్తుంటారు. రొమ్ముని అందుకొని తాగేంతవరకు తమ ప్రయత్నాన్ని కొనసాగిస్తుంటారు. అయితే ఈ లక్షణం చిన్నారుల్లో ఎప్పుడు మొదలవుతుందో తెలుసా? అమ్మపేగు తెంచుకొన్న మరుక్షణమే తల్లిపాల కోసం ఆరాటపడుతుంటారు. ఇంకా వూహ సైతం తెలియని వారు తమ తల్లిని గుర్తుపట్టడం మాత్రమే కాదు.. పాలు ఎక్కడ నుంచి వస్తాయో కూడా తెలుసుకొంటారు. మరి దీనికి కారణం ఏమిటి? చిన్నారులు ఇలా చేయడం మంచిదేనా? అది వారి ఆరోగ్యాన్ని మెరుగుపరుస్తుందా? వంటి విషయాలు తెలుసుకొందాం రండి..

ఆరోగ్యమస్తు

మరిన్ని

యూత్ కార్నర్

మరిన్ని

'స్వీట్' హోం

మరిన్ని

వర్క్ & లైఫ్

మరిన్ని

సూపర్ విమెన్

మరిన్ని

బ్యూటీ & ఫ్యాషన్

మరిన్ని