ఈ ‘స్వర్ణ’ కుమారి వరల్డ్‌ నంబర్‌ వన్! - deepika kumari becomes world no 1 after winning triple gold at world cup
close
Updated : 28/06/2021 21:08 IST
Facebook Share Twitter Share WhatsApp Share Telegram Share Link Share

ఈ ‘స్వర్ణ’ కుమారి వరల్డ్‌ నంబర్‌ వన్!

మరో పాతిక రోజుల్లో ప్రతిష్ఠాత్మక ఒలింపిక్స్ ప్రారంభం కానున్నాయి. టోక్యో వేదికగా జరిగే ఈ అంతర్జాతీయ క్రీడల కోసం క్రీడా ప్రపంచంతో పాటు భారత క్రీడాభిమానులు కూడా ఎంతో ఆసక్తిగా ఎదురుచూస్తున్నారు. ఇలాంటి సమయంలో ఒలింపిక్స్‌ పతకంపై ఆశలు రేకెత్తిస్తూ ఆర్చరీ ప్రపంచకప్‌లో హ్యాట్రిక్‌ స్వర్ణాలు సొంతం చేసుకుంది భారత అగ్రశేణి క్రీడాకారిణి దీపికా కుమారి. ఒకే ప్రపంచకప్‌లో మూడు బంగారు పతకాలు సొంతం చేసుకుని...ఈ ఘనత సాధించిన తొలి భారత ఆర్చర్‌గా చరిత్ర సృష్టించింది. అంతేకాదు.. వరల్డ్‌ ఆర్చర్‌ ర్యాంకింగ్స్‌లో అగ్రస్థానం కైవసం చేసుకుంది. తద్వారా టోక్యో విమానం ఎక్కేముందు కొండంత ఆత్మవిశ్వాసం సొంతం చేసుకుంది.

పెళ్లి రోజుకు మూడు రోజుల ముందే!

గతేడాది జూన్‌ 30న ఏడడుగులు నడిచి ఒకటయ్యారు దీపికా కుమారి- అతాను దాస్. ఈ క్రమంలో ప్రపంచకప్‌లో జంటగా బంగారు పతకం సాధించి తమ మొదటి పెళ్లి రోజును మరింత చిరస్మరణీయంగా మార్చుకున్నారీ లవ్లీ కపుల్‌. ప్యారిస్‌లో జరుగుతున్న ప్రపంచకప్‌ పోటీల్లో మిక్‌్కడ్‌ విభాగంలో జోడీగా బరిలోకి దిగిన దీపిక-అతాను మొదట వెనకబడినా ఆ తర్వాత పుంజుకొంది. అదే దూకుడును కొనసాగిస్తూ పసిడి పతకం సాధించింది.

ఒకే రోజు మూడు స్వర్ణాలు!

అంతకుముందే మహిళల రికర్వ్‌ టీం విభాగంలో అంకితా భకత్‌, కోమలికా బారితో కలిసి స్వర్ణం గెల్చుకుంది దీపిక. ఆ తర్వాత మహిళల వ్యక్తిగత విభాగంలోనూ విజయ దుందుభి మోగించి వరుసగా మూడో పసిడిని ముద్దాడింది. ఈ క్రమంలోనే వరల్డ్‌ నంబర్‌ వన్‌ ఆర్చర్‌గా అవతరించింది. ‘ప్రపంచకప్‌లో మొత్తం 3 బంగారు పతకాలు గెలవడం నాకిదే మొదటిసారి. ఎంతో సంతోషంగా ఉంది. అయితే మున్ముందు ఎన్నో కీలకమైన పోటీలు ఉన్నాయి. టోక్యో ఒలింపిక్స్‌కు కనీసం నెల రోజుల సమయం కూడా లేదు. పైగా ఈ అంతర్జాతీయ క్రీడల్లో ఆర్చరీ విభాగంలో భారతదేశం ఇప్పటివరకు ఒక్క పతకం కూడా గెలవలేదు. అప్పటివరకు నా ఫాంను ఇలాగే కొనసాగిస్తూ మెరుగ్గా రాణిస్తూనే ఉండాలని కోరుకుంటున్నా’ అని ఈ సందర్భంగా చెప్పుకొచ్చిందీ స్టార్ ఆర్చర్.

2012లోనే అగ్రస్థానం!

చిన్న వయసు నుంచే ఆర్చరీలో ఆరితేరి.. అంతర్జాతీయ స్థాయిలో పతకాలు సాధిస్తోంది దీపిక. రాంచీలోని అతి సామాన్య కుటుంబంలో జన్మించిన ఆమె.. ప్రారంభంలో ఇంట్లోనే వెదురుతో తయారుచేసుకున్న విల్లు, బాణాలతో సాధన చేసేది. 2006లో జంషెడ్‌పూర్‌లోని టాటా ఆర్చరీ అకాడమీలో చేరిన తర్వాత మాత్రమే ప్రొఫెషనల్ ఆర్చర్లు ఉపయోగించే విల్లు, బాణాలను ఉపయోగించడం మొదలుపెట్టింది. జూనియర్ స్థాయి నుంచే తనదైన ప్రతిభతో బాణంలా దూసుకెళ్లిన దీపిక.. అబ్బురపరిచే విజయాలు సాధిస్తూ వస్తోంది. ఈ క్రమంలోనే 2009లో క్యాడెట్ వరల్డ్ ఆర్చరీ ఛాంపియన్‌షిప్‌ను సాధించిన రెండో భారతీయురాలిగా నిలిచింది దీపిక. 2010 కామన్వెల్త్ క్రీడల్లోనూ తన సత్తా చాటి రెండు స్వర్ణాలను కైవసం చేసుకుంది. ఇక 2012లో జరిగిన ఆర్చరీ వరల్డ్‌కప్ వ్యక్తిగత విభాగంలో ఛాంపియన్‌గా నిలిచింది. అదే ఏడాది మహిళల రికర్వ్ విభాగంలో నంబర్ వన్ ర్యాంకుకి చేరుకుంది.

ఒలింపిక్స్‌లో నిరాశే!

ఈ దూకుడుతోనే 2012 లండన్ ఒలింపిక్స్‌కి సైతం అర్హత సాధించడంతో ఆమెపై అంచనాలు భారీగా పెరిగిపోయాయి. దీంతో దేశానికి కచ్చితంగా పతకం తీసుకొస్తుందనుకున్నారంతా. అయితే దీనికి భిన్నంగా తొలి రౌండ్లోనే నిష్ర్కమించింది దీపిక. ఫలితంగా తీవ్ర నిరాశలో కూరుకుపోయి తన ఫామ్‌ని పూర్తిగా కోల్పోయింది. మొదటి ర్యాంకు నుంచి పంతొమ్మిదో స్థానానికి పడిపోయింది. ఆ తర్వాత మళ్లీ పుంజుకొని, ఆత్మవిశ్వాసాన్ని కూడగట్టుకొని తన సత్తాను మరోసారి నిరూపించడం ప్రారంభించింది. ప్రపంచకప్‌ లాంటి ప్రతిష్ఠాత్మక ఈవెంట్లలో ఎన్నో పతకాలు గెల్చుకుంది. అదే ఆత్మవిశ్వాసంతో 2016 రియో ఒలింపిక్స్‌కు వెళ్లిన ఆమెను దురదృష్టం మళ్లీ వెక్కిరించింది. 

మనసిచ్చిన వాడిని మనువాడి!

ఇక ఆర్చరీ క్రీడలోనే రాణిస్తోన్న మరో క్రీడాకారుడు అతాను దాస్‌ను ప్రేమించి పెళ్లి చేసుకుంది దీపిక. మిక్స్‌డ్‌ విభాగంలో జోడీగా పలు టోర్నీల్లో పతకాలు సాధించిన వీరిద్దరూ 2018లోనే నిశ్చితార్థం చేసుకున్నారు. ఈ క్రమంలో గతేడాది టోక్యో ఒలింపిక్స్‌ వాయిదా పడిన వెంటనే జూన్‌ 30 న రాంచీ వేదికగా వైవాహిక బంధంలోకి అడుగుపెట్టారు.

టోక్యో ఫ్లైట్‌ ఎక్కనున్న ఏకైక ఆర్చర్!

వివిధ ప్రతిష్ఠాత్మక పోటీల్లో దేశానికి పతకాల పంట పండించింది దీపిక. తన అద్భుతమైన విజయాలకు గుర్తింపుగా అర్జున, పద్మశ్రీ పురస్కారాలు అందుకుంది. డోలా బెనర్జీ తర్వాత దీపిక మాత్రమే ఆర్చరీలో వరల్డ్‌ నంబర్‌వన్‌ ర్యాంక్‌ను సొంతం చేసుకుంది. ఒలింపిక్స్‌ పోటీల కోసం టోక్యో ఫ్లైట్‌ ఎక్కనున్న ఏకైక ఆర్చర్‌ సైతం తనే కావడం గమనార్హం. ఈ క్రమంలో ఈసారి ఎలాగైనా ఒలింపిక్‌ పతకంతో తిరిగి రావాలనుకుంటోందీ స్టార్‌ ప్లేయర్.


మరిన్ని

ఇంటి పేరుతో కాదు... ఇది నా స్వయంకృషి...!

నాన్న ప్రముఖ నటుడు దగ్గుబాటి వెంకటేశ్‌. ఇక తాత, పెదనాన్న, అన్న... ఇలా ఆ ఇంట్లో వాళ్ల పేర్లు చెప్పక్కర్లేదు. వారి పేర్లు ఉపయోగించుకుంటే బోలెడు గుర్తింపు. కానీ ఆమె మాత్రం... తన అభిరుచి, సృజనాత్మకత, శ్రమలనే పెట్టుబడిగా గుర్తింపు సాధించాలనుకుంది. తనే వెంకటేశ్‌ పెద్ద కుమార్తె ఆశ్రిత. తన లక్ష్యం దిశగా కృషి చేస్తూ... ఇన్‌స్టాగ్రాం, యూట్యూబ్‌ల్లో లక్షల్లో అభిమానుల్ని సంపాదించుకుంది. ఇటీవల ఇన్‌స్టాగ్రాంలో ఎక్కువ సంపాదిస్తున్న సెలబ్రిటీల జాబితాను హోపర్‌డాట్‌కాం సంస్థ విడుదల చేసింది. అందులో ఆశ్రిత అంతర్జాతీయంగా 377, ఆసియాలో 27వ ర్యాంకులు సాధించింది. ఈ సందర్భంగా వసుంధర ఆమెతో ముచ్చటించింది.

‘స్పెల్లింగ్స్‌’ చెప్పి సెన్సేషనయ్యారు!

పిల్లల్లో ఇంగ్లిష్‌ నైపుణ్యాలను పరీక్షించడానికి అమెరికాలో ఏటా నేషనల్‌ స్పెల్లింగ్‌-బీ పోటీలు నిర్వహిస్తోన్న సంగతి తెలిసిందే. ఎంతో ప్రతిష్ఠాత్మకంగా జరిగే ఈ పోటీల్లో వేలాదిమంది చిన్నారులు పాల్గొంటారు. తల్లిదండ్రులు కూడా తమ పిల్లలను ఈ పోటీలకు అన్ని రకాలుగా సిద్ధం చేస్తూ ప్రోత్సహిస్తుంటారు. ఇక ఈసారి నిర్వహించిన స్పెల్లింగ్‌-బీ పోటీల్లో లూసియానాకు చెందిన 14 ఏళ్ల జైలా అవంత్‌ గార్డే విజేతగా నిలిచింది. దీంతో 93 ఏళ్ల ఈ కంటెస్ట్‌ చరిత్రలో ఈ ట్రోఫీ నెగ్గిన మొదటి ఆఫ్రికన్‌ అమెరికన్‌గా, రెండో నల్లజాతీయురాలిగా చరిత్ర సృష్టించిందీ యంగ్‌ గర్ల్‌.

కథ చెబుతాను... ఊ కొడతారా..!

రాత్రయిందంటే చాలు.. బామ్మ చెప్పే నీతికథలు వింటూ నిద్రలోకి జారుకోవడం మనందరికీ చిన్ననాటి ఓ మధుర జ్ఞాపకం! అప్పుడంటే చాలావరకు ఉమ్మడి కుటుంబాలు కాబట్టి ఇది వర్కవుట్‌ అయింది.. ఇప్పుడు వృత్తి ఉద్యోగాల రీత్యా చాలామంది ఇంట్లో పెద్దవాళ్లు, కన్న వాళ్ల నుంచి దూరంగా వచ్చేస్తున్నారు. దీంతో పిల్లలు వాళ్ల గ్రాండ్‌పేరెంట్స్‌ని, వాళ్లు చెప్పే బోలెడన్ని కథల్ని మిస్సవుతున్నారు. ఇలాంటి అనుభవమే తన చెల్లెలికీ ఎదురైందంటోంది 18 ఏళ్ల ప్రియల్ జైన్‌. అది చూసి ఆలోచనలో పడిపోయిన ఆమె.. నీతి కథలు చెప్పే ఓ ప్లాట్‌ఫామ్‌కు శ్రీకారం చుట్టింది. చిన్నారులకు బామ్మ దగ్గర లేని లోటుని తన వెబ్‌సైట్ తీరుస్తుందంటోన్న ఈ యంగ్‌ ఆంత్రప్రెన్యూర్‌ కథేంటో మనమూ తెలుసుకుందాం రండి..

చిన్నప్పటి కల.. ఇలా సాధించేసింది!

ఆడవారు అనుకుంటే ఏదైనా సాధిస్తారు... వారికి కావల్సిందల్లా కాసింత ప్రోత్సాహం. ఎవరి సహకారం ఉన్నా, లేకున్నా తల్లిదండ్రులు, తోడబుట్టిన వారి సహకారం మాత్రం ఉంటే చాలు... అమ్మాయిలకు అసలు తిరుగుండదు. అన్నింటా విజయాలే సాధిస్తారు. పలువురికి ఆదర్శంగా నిలుస్తారు. అందుకు తాజా ఉదాహరణే 24 ఏళ్ల మావ్యా సూదన్‌. జమ్మూకశ్మీర్‌లోని ఓ మారుమూల గ్రామానికి చెందిన ఈ యువతి ఇటీవల ఇండియన్‌ ఎయిర్‌ ఫోర్స్‌ ఫైటర్‌ పైలట్‌గా నియమితురాలైంది. ఈ నేపథ్యంలో దేశం మొత్తంమీద ఈ అవకాశం దక్కించుకున్న 12 వ మహిళగా, మొదటి కశ్మీరీ మహిళగా గుర్తింపు పొందిందీ యంగ్‌ సెన్సేషన్.

ఆరోగ్యమస్తు

మరిన్ని

అనుబంధం

మరిన్ని

'స్వీట్' హోం

మరిన్ని

వర్క్ & లైఫ్

మరిన్ని

సూపర్ విమెన్

మరిన్ని

బ్యూటీ & ఫ్యాషన్

మరిన్ని