ఉంగరాలు చెప్పే వూసులు విన్నారా?? - engagement rings types and their meanings in telugu
close
Published : 22/09/2021 20:29 IST

ఉంగరాలు చెప్పే వూసులు విన్నారా??

పెళ్లి.. సంప్రదాయ పద్ధతిలో వధూవరులుగా ముస్తాబై బంధుమిత్రుల సమక్షంలో వైవాహిక బంధంతో ఒక్కటయ్యే అపురూపమైన వేడుక. ఈ వేడుకకు తొలిమెట్టు.. నిశ్చితార్థం. 'వివాహ బంధంలో అడుగిడి నీతో జీవితాంతం కలిసి ఉంటా.. కష్టసుఖాలు పంచుకుంటా..' అంటూ ఒకరికొకరు బాసలు చేసుకునే అద్భుతమైన ఘట్టమిది. జీవిత భాగస్వాములు కానున్న ఇరువురూ ఒకరి చేతికి మరొకరు ఉంగరాలు తొడుగుతూ ఈ ప్రమాణాలు చేసుకోవడం ఆనవాయితీనే! అయితే ఇలా నిశ్చితార్థ వేడుకల్లో పెట్టే ఉంగరాల్లో ఉపయోగించే రాళ్ల ఆకృతి, రంగుల బట్టి వాటికి రకరకాల అర్థాలు ఉన్నాయంటున్నారు నిపుణులు. ఇంతకీ అవేంటో మనమూ ఓసారి తెలుసుకుందామా.. ఇంకెందుకాలస్యం.. రండి మరి..

ఈరోజుల్లో పెళ్లి, నిశ్చితార్థం.. ఇలా వేడుక ఏదైనా సరే.. వీలైనంత వైభవంగా జరిపించడానికే చాలామంది మొగ్గుచూపుతున్నారు. ఈ క్రమంలోనే ఖరీదైన ఉంగరాలను సైతం భాగస్వామికి బహుమతిగా ఇచ్చేందుకు ఉవ్విళ్లూరుతున్నారు. అయితే నిశ్చితార్థ వేడుకలో తొడిగే ఉంగరం ద్వారా కూడా వారు భాగస్వామికి తమ మనసులోని మాటను తెలియజేయవచ్చట! అందుకు తగిన రంగు లేదా ఆకృతిలో పొదిగిన రాళ్లు ఉన్న ఉంగరాన్ని ఎంచుకుంటే చాలంటున్నారు నిపుణులు. అర్థం కాలేదా?? అదేనండీ.. నిశ్చితార్థపు ఉంగరంలో ఉపయోగించే రాళ్ల ఆకృతి లేదా రంగుని బట్టి కూడా భాగస్వామికి మన మనసులో మాట తెలియజేయచ్చు. ఇంతకీ వాటిలో ఎన్ని రకాల ఆకృతులు ఉన్నాయి? ఏ రంగు రాయికి ఏ అర్థం ఉంటుంది?? చూద్దామా..

రాయి ఆకృతి ప్రకారం..

వజ్రాలంటే ఇష్టపడని అమ్మాయి ఉంటుందా చెప్పండి? ఆడపిల్లలకు, వజ్రాలకు ఉన్న అవినాభావ సంబంధం అలాంటిది మరి! అందుకే వజ్రంలాంటి అమ్మాయిల మనసు గెలుచుకునేందుకు చాలామంది నిశ్చితార్థపు ఉంగరంలో చిన్న వజ్రం అయినా ఉండేలా చూసుకుంటున్నారు. ఒకవేళ వజ్రం కాకపోయినా చక్కని రంగు రాళ్లు పొదిగిన ఉంగరాన్ని ఎంచుకుంటున్నారు. అయితే ఈ వజ్రం లేదా ఇతర రాళ్ల ఆకృతి బట్టి వాటికి కూడా రకరకాల అర్థాలు ఉంటాయి.

గుండ్రని ఆకృతి

సింపుల్‌గా ఉంటూనే క్లాసీగా కనిపించే ఉంగరాల్లో ఇదీ ఒకటి. రౌండ్ కట్ ఉన్న స్టోన్ లేదా వజ్రం ఉన్న ఉంగరం పెట్టడం ద్వారా 'నీ స్త్టెల్ ఎప్పుడూ ఎవర్‌గ్రీన్‌గా ఉంటుంది.. కాలం మారినా నీపై నాకున్న ప్రేమ మారదు.. ఎప్పటికీ అది శాశ్వతం..' అని చెప్పకనే చెబుతున్నట్లట!


అండాకృతి

సంప్రదాయబద్ధంగా కనిపించాలనుకునే మహిళలకు ఇది చక్కని ఎంపిక. ముఖ్యంగా చేతులు చిన్నవిగా ఉండి, చేతివేళ్లు కాస్త కురచగా ఉన్నవారికి ఈ తరహా ఉంగరం బాగా నప్పుతుంది. మీ భాగస్వామి ఈ ఉంగరం తొడిగారంటే దాని అర్థం.. 'కొత్త ఫ్యాషన్ ట్రెండ్స్ గురించి అందరికంటే ముందుగా తెలుసుకొని అనుసరించడంలో మీరు పర్ఫెక్ట్ అని..'


పియర్ ఆకృతి

ఈ ఆకృతిలో ఉన్న రాళ్లు లేదా వజ్రాన్ని పొదిగిన ఉంగరాన్ని చాలా తక్కువమంది ఉపయోగిస్తారు. నిశ్చితార్థ వేడుకలో మీ భాగస్వామి ఈ ఉంగరం మీకు తొడిగారంటే దానర్థం.. 'మీరు కేవలం మీ మనసు చెప్పింది మాత్రమే వింటారు.. చేస్తారు.. ఇతరుల మాటలు మిమ్మల్ని లేదా మీ మనసును ఏమాత్రం ప్రభావితం చేయలేవు..'


హృదయాకృతి

ప్రేమకు చిహ్నం అనగానే అందరికీ గుర్తుకొచ్చేది హృదయాకృతి. ఈ ఆకృతిలో ఉన్న స్టోన్ లేదా వజ్రాన్ని పొదిగిన ఉంగరం అంటే మహిళలందరికీ ఇష్టమే! ప్రతి చిన్న విషయాన్నీ ఎమోషనల్‌గా ఫీలయ్యే స్వభావం ఉన్న వారికి ఈ ఉంగరం ఎక్కువగా నప్పుతుందట! అంతేకాదు.. నిశ్చితార్థ వేడుకలో ఈ ఉంగరం మీ వేలికి తొడిగారంటే దానర్థం.. మీకు చక్కని ఆలోచనా సామర్థ్యం, నిశిత పరిశీలన ఉన్నట్లే!

ఇవే కాదు.. ప్రిన్సెస్ కట్, కుషన్ కట్, ఎమరాల్డ్ కట్, రేడియంట్ కట్.. ఇలా విభిన్న ఆకృతుల్లో పొదిగిన స్టోన్ లేదా వజ్రాలను సైతం ఎంగేజ్‌మెంట్ ఉంగరాల్లో ఉపయోగిస్తారు. నలుగురిలోనూ ప్రత్యేకంగా కనిపించేవారు, తమదైన వ్యక్తిత్వంతో ముందడుగు వేసేవారు.. ఇలా వధువు స్వభావం బట్టి ఆయా ఆకృతుల్లోని రాళ్లు లేదా వజ్రాలు పొదిగిన ఉంగరాలను తొడుగుతారు.

రంగు బట్టి..

నిశ్చితార్థపు ఉంగరంలో ఉపయోగించిన రాళ్లు లేదా వజ్రం ఆకృతి మాత్రమే కాదు.. వాటి రంగు ప్రకారం కూడా భాగస్వామి చేసే ప్రమాణం గురించి ఒక ప్రాథమిక అంచనా వేయచ్చు. ఎలా అంటారా??

డీప్ వైన్ రెడ్

ఈ రంగు ప్రశాంతతకు చిహ్నం. అంతేకాదు.. ఈ ఉంగరం పెట్టుకోవడం ద్వారా 'నిన్నెప్పుడు ప్రేమిస్తూనే ఉంటా.. సదా నిన్ను కాపాడుకుంటా..' అంటూ భాగస్వాములిద్దరూ ఒకరికొకరు ప్రమాణం చేసుకున్నట్లేనట!


ఆక్వా మెరైన్

చక్కని కమ్యూనికేషన్, ధైర్యానికి ఈ రంగు ప్రతీక. ఈ కలర్ స్టోన్ ఉన్న ఉంగరం పెట్టడం ద్వారా 'నీపై నాకున్న ప్రేమను రోజూ వ్యక్తపరుస్తూనే ఉంటా.. అది మాటల రూపంలో కావచ్చు.. చేతల రూపంలో కావచ్చు.. నీ పట్ల నాకున్న ప్రేమ వర్ణనాతీతం..' అని చెప్పినట్లే!


నీలిరంగు

ఈ రంగు రాచరికానికి ప్రతీక. ఈ కలర్ స్టోన్ పొదిగిన ఉంగరం పెట్టడం ద్వారా భాగస్వాములిరువురూ వైవాహిక జీవితంలో ఒకరి పట్ల మరొకరు నీతి, నిజాయతీలతో వ్యవహరిస్తామని ప్రమాణం చేసినట్లే!


ఎమరాల్డ్

ఆనందకరమైన వైవాహిక జీవితానికి సంకేతం.


గోల్డెన్ బ్రౌన్

భార్యాభర్తలిద్దరూ కలసి సంతోషంగా జీవిస్తామనే ప్రమాణానికి కట్టుబడి ఉంటామని ఒకరికొకరు బాస చేసుకున్నట్లు. అంతేకాదు.. ఇద్దరూ కలిసి సంతోషంగా సమయం గడిపేందుకు ఎక్కువగా ప్రయత్నిస్తారు. అందుకు వీలు కల్పించే ఏ ఒక్క అవకాశాన్నీ వారు వదులుకోరు.


మూన్‌స్టోన్ (తెలుపు రంగు)

ఈ స్టోన్ మొదట చూడడానికి తెల్లగా కనిపించినా కాస్త అటు ఇటూ తరచి చూస్తే అక్కడక్కడా నీలి రంగు చారల్లా కనిపిస్తూ ఉంటాయి. అంటే జీవితంలో ఎన్ని మార్పులు వచ్చినా నిన్ను కడదాకా ప్రేమిస్తూనే ఉంటా.. అని అర్థమట!

ఇలా ఉంగరంలో ఉన్న స్టోన్ కలర్ బట్టి కూడా భాగస్వామి మనలో గుర్తించిన లక్షణాలు, వైవాహిక జీవితం గురించి చేసే ప్రమాణాల గురించి ఒక అంచనా వేయచ్చంటున్నారు నిపుణులు.



మరిన్ని

వీటితో పిల్లలకు పాలివ్వడం ఎంతో సులువు!

పసి పిల్లలకు ఆరు నెలలు అంతకుమించి ఏడాది వరకు తల్లిపాలు పట్టడం తప్పనిసరి అంటూ నిపుణులు చెప్పడం మనకు తెలిసిందే. అయితే ఇటు కుటుంబంతో పాటు అటు వృత్తి ఉద్యోగాలకూ సమప్రాధాన్యమిచ్చే అమ్మలున్న ఈ రోజుల్లో ఏడాది వరకు బిడ్డకు తానే నేరుగా పాలివ్వడం అంటే అది కాస్త కష్టమనే చెప్పుకోవాలి. అలాగని బిడ్డలను అలా వదిలేసి తల్లులూ తమ వృత్తిపై దృష్టి పెట్టలేరు. అందుకే అటు నేటి తల్లుల బ్రెస్ట్‌ఫీడింగ్ పనిని సులభతరం చేస్తూ, ఇటు పిల్లలకు తల్లిపాలు అందుబాటులో ఉండేలా చేసేందుకు వివిధ రకాల బ్రెస్ట్‌ఫీడింగ్ గ్యాడ్జెట్లు ప్రస్తుతం మార్కెట్లోకొచ్చేశాయి.

తరువాయి

సైజ్‌ జీరో కాదు.. ఆరోగ్యం ముఖ్యం!

‘మనసులో కలిగే ఆలోచనల్నే శరీరం ప్రతిబింబిస్తుంది..’ అంటోంది ఫిట్‌నెస్‌ ఫ్రీక్‌ అంకితా కొన్వర్‌. సైజ్‌ జీరో గురించి ఆలోచిస్తూ బాధపడితే మరింత బరువు పెరుగుతామని, అదే ఆరోగ్యంపై దృష్టి పెడితే శరీరం, మనసు రెండూ మన అధీనంలో ఉంటాయని చెబుతోంది. ఆరోగ్యం, ఫిట్‌నెస్‌పై ఎక్కువ శ్రద్ధ పెడుతూ.. ఆ చిట్కాల్ని సోషల్‌ మీడియాలో పంచుకుంటూ అందరిలో స్ఫూర్తి నింపే ఈ మిసెస్‌ సోమన్‌.. తాజాగా బాడీ పాజిటివిటీ గురించి ఇన్‌స్టాలో మరో స్ఫూర్తిదాయక పోస్ట్‌ పెట్టింది. సైజ్‌ జీరో కంటే ఆరోగ్యమే ముఖ్యమంటూ ఆమె షేర్‌ చేసిన పోస్ట్‌ ప్రస్తుతం సామాజిక మాధ్యమాల్లో వైరల్‌గా మారింది.

తరువాయి

ఆఫీసులో కోపం కట్టలు తెంచుకుంటోందా? ఇలా చేసి చూడండి..!

ఉద్యోగినులకు ఇటు ఇంటి పనులు, అటు ఆఫీస్‌ ఒత్తిళ్లు సర్వసాధారణమే అయినా.. కొంతమంది వీటిని అదుపు చేసుకోలేక ఒక్కోసారి పని ప్రదేశంలోనే ఎదుటివారిపై విరుచుకుపడుతుంటారు. దీన్నే ‘వర్క్‌ప్లేస్‌ బర్నవుట్’గా పేర్కొంటున్నారు నిపుణులు. నిజానికి ఇలాంటి దీర్ఘకాలిక ఒత్తిడి ఆరోగ్యానికే కాదు.. కెరీర్ పైనా ప్రతికూల ప్రభావం చూపే అవకాశాలు ఎక్కువగానే ఉన్నాయంటున్నారు. అందుకే దీన్ని ఆదిలోనే గుర్తించి మేనేజ్‌ చేసుకోగలిగితే దీనివల్ల కెరీర్‌పై మచ్చ పడకుండా జాగ్రత్తపడచ్చంటున్నారు. మరి, అదెలాగో తెలుసుకుందాం రండి..

తరువాయి

బ్యూటీ & ఫ్యాషన్

మరిన్ని

ఆరోగ్యమస్తు

మరిన్ని

అనుబంధం

మరిన్ని

యూత్‌ కార్నర్

మరిన్ని

మంచిమాట


'స్వీట్' హోం

మరిన్ని

సూపర్‌ విమెన్

మరిన్ని