యువరాణి మెచ్చింది... మా సైట్‌ క్రాష్‌ అయ్యింది!

ముంబయిలో పుట్టి పెరిగిన అనితా డోంగ్రే... అదే నగరం నుంచి కార్పొరేట్‌, వ్యాపార, సినీ రంగాల్లో రాణిస్తున్న మహిళల గురించి విన్నప్పుడల్లా తానూ వాళ్లలా ఎందుకు కాకూడదనుకునేది. కానీ, అంతలోనే ఆమెకు తన కుటుంబం గుర్తొచ్చేది. సింధీ మహిళలు బయటకు వెళ్లి పనిచేసే సంప్రదాయం లేదు. కానీ అనిత ఆకాంక్ష ముందు ఆ ఆంక్షలు నిలువలేకపోయాయి. ఈరోజు దేశం గర్వించదగ్గ ఫ్యాషన్‌ డిజైనర్‌ అయ్యింది. భారత్‌లోనే కాదు లండన్‌, ప్యారిస్‌, న్యూయార్క్‌... ఎక్కడికెళ్లినా ఆమె దుస్తులు కనిపిస్తాయి.
అనిత తల్లి పుష్ప సవ్లానీ. ఇంటిపట్టునే ఉంటూ కుటుంబ సభ్యుల బాగోగులు చూసుకునేది. తీరిక వేళల్లో పిల్లలందరికీ ఆమే బట్టలు కుట్టేది. కుట్టు మిషను మీద ఆమె రంగురంగుల దుస్తుల్ని చకాచకా కుట్టడం అనితను అమితంగా ఆకర్షించేది. వారి కుటుంబానికి వస్త్ర తయారీ వ్యాపారం ఉంది. దీంతో అనిత ఆలోచనలు వాటిచుట్టూనే తిరిగేవి. ముంబయిలోని ప్రఖ్యాత ఎస్‌ఎన్‌డీటీ కాలేజీలో డిజైనింగ్‌ కోర్సు చేసి రెండేళ్లపాటు ఓ సంస్థలో ఫ్యాషన్‌ డిజైనర్‌గా పనిచేసింది. ఆరుగురు తోబుట్టువుల్లో ఆమే పెద్ద. దాంతో తల్లిదండ్రులు ఆమె కెరీర్‌ని జాగ్రత్తగా గమనించేవారు. తన వ్యాపార ఆలోచనని చెప్పినప్పుడు అంగీకరించలేదు. కానీ తన ఇష్టాన్నీ, లక్ష్యాన్నీ స్పష్టంగా వివరించడంతో చివరకు మనసు మార్చుకున్నారు. ఇంట్లోనే రెండు కుట్టు మిషన్లు పెట్టుకుని చెల్లి మీనా సాయంతో దుస్తులు కుట్టి వాటిని బొటీక్‌లకు అందించేది అనిత. ప్రధానంగా బాలీవుడ్‌ తారలు ఎక్కువగా వెళ్లే ‘సాక్స్‌’ అనే బొటీక్‌కు దుస్తులు ఇచ్చేది. అనిత దుస్తులు తీసుకువెళ్లడంలో కాస్త ఆలస్యమైనా ‘స్టాక్‌ అయిపోయింది మేడమ్‌... ఎప్పుడొస్తున్నారు’ అంటూ ఫోన్‌చేసేవాళ్లు యజమానులు.

కార్పొరేట్‌ కంపెనీ తరహాలో...
వ్యాపారం బాగా నడుస్తున్నా డిజైనర్‌గా గుర్తింపు ఉండటంలేదన్న అసంతృప్తి అనితలో మొదలైంది. ‘పార్టీవేర్‌ కంటే కూడా, కార్పొరేట్‌, వ్యాపార రంగాల్లో ఉన్న మహిళలకు ఆఫీస్‌వేర్‌లా ఉపయోగపడే దుస్తుల్ని అందుబాటు ధరల్లో అందించేవాళ్లం. వాటికి మా లేబుల్‌ పెడతానని చెప్పినప్పుడు మాత్రం బొటీక్‌ యజమానులు అంగీకరించలేదు. ‘వీటికి ఎంబ్రాయిడరీ వర్క్‌ ఏం లేదుగా లేబుల్‌ ఎందుకు’ అన్నారు. అప్పుడే ఎంత కష్టమైనా సొంత బ్రాండ్‌ తేవాలనుకున్నా’ అని చెప్పే అనిత... తన పేరుమీదే ‘ఏఎన్‌డీ’ డిజైన్స్‌ను 1999లో ప్రారంభించి సొంత దుకాణాన్ని తెరిచింది. తరచూ ఐరోపా, అమెరికా వెళ్తూ ఫ్యాషన్లనో మార్పుల్ని గమనించి తన డిజైన్లలో తగిన మార్పులు చేసేది. అవి చూసి స్నేహితురాళ్లంతా ఆమెతోనే డిజైన్‌ చేయించుకునేవారు. క్రమంగా అనిత డిజైన్‌ చేసిన వస్త్రాలకు డిమాండ్‌ పెరగడంతో... తన వ్యాపారాన్ని ఒక కార్పొరేట్‌ వ్యవస్థలా మార్చాలనుకుంది. బ్యాంకింగ్‌ రంగంలో అనుభవం ఉన్న తమ్ముడు ముఖేష్‌ని సీఈఓగా నియమించి, తాను క్రియేటివ్‌ హెడ్‌గా ఉంది.
ఒకటే బ్రాండు ఎన్నో లేబుళ్లు...
2015లో సంస్థ పేరుని ‘హౌస్‌ ఆఫ్‌ అనితా డోంగ్రే(హెచ్‌ఓఏడీ)’గా మార్చి మరిన్ని కొత్త లేబుల్స్‌ తెచ్చింది అనిత. ఖరీదైన డిజైనర్‌ దుస్తులకీ, తక్కువ ధరలో దొరికే వస్త్రశ్రేణికీ మధ్య ఉండే వినియోగదారుల్ని లక్ష్యంగా పెట్టుకుందామె. 2016లో బ్రిటన్‌ యువరాణి కేట్‌ మిడిల్‌టన్‌ భారత పర్యటనలో అనిత డిజైన్‌ చేసిన డ్రెస్‌ను ఎంతో ఇష్టంగా వేసుకుంది. ‘తర్వాత అలాంటి డ్రెస్‌ కొనడానికి మా వెబ్‌సైట్‌కి ఒకేసారి వేలల్లో వచ్చారు. దాంతో సైట్‌ క్రాష్‌ అయిపోయింది. ఊహించని స్పందన అది. దాంతో రాత్రికి రాత్రి ఆ డ్రెస్‌ తయారీకి ఒక టీమ్‌ని ఏర్పాటుచేశాం. ఆర్డర్లన్నీ తీసుకుని, కొనుగోలుదారులకు సకాలంలో అందించాం’ అని చెబుతారామె. ఈ సంస్థకు ఏఎన్‌డీ(వెస్టర్న్‌ వేర్‌), గ్లోబల్‌ దేశీ(భారతీయ డిజైన్లకు గ్లోబల్‌ రూపం) పింక్‌ సిటీ(రాజస్థాన్‌ సంప్రదాయ దుస్తులు)... ఇలా విభిన్నమైన కేటగిరీలు ఉన్నాయి. వీటితోపాటు బ్రైడల్‌ కేటగిరీలో దుస్తులూ, ఆభరణాలూ... పురుషులకీ ప్రత్యేక విభాగం తీసుకొచ్చారు. వీరి సిబ్బంది తరచూ ద్వితీయశ్రేణి నగరాల్లోని దుకాణాలకు వెళ్లి అమ్మాయిలు ఎలాంటి దుస్తులు కోరుకుంటున్నారో తెలుసుకుంటారు. దానికి తగ్గట్టు మార్పులు తెస్తారు.

అనితా డోంగ్రే ఫౌండేషన్‌ ఆధ్వర్యంలో మహారాష్ట్రలోని గ్రామీణ గిరిజన స్త్రీలకు, గుజరాత్‌లోని ‘సేవ’ స్వచ్ఛంద సంస్థ ద్వారా సుమారు 600 మంది నిరుపేద మహిళలకు డిజైనర్‌ దుస్తుల్ని కుట్టడంలో శిక్షణ ఇచ్చి ఉపాధి కల్పిస్తున్నారు. సంప్రదాయ వస్త్రకళల్ని బతికించడానికి గ్రామీణ కళాకారులతో పనిచేస్తున్న అనిత... పర్యావరణానికి హానిచేయని ఫ్యాషన్లపైనా దృష్టి పెడుతున్నారు. దీనికోసమే ‘గ్రాస్‌రూట్‌’ లేబుల్‌ తెచ్చారు. అనిత సంస్థ ప్రత్యక్షంగా 2700 మందికీ, పరోక్షంగా వేలమంది కళాకారులకూ ఉపాధి కల్పిస్తోంది. భారత్‌తోపాటు లండన్‌, ప్యారిస్‌, న్యూయార్క్‌, సిడ్నీ... ఇలా ప్రపంచ వ్యాప్తంగా వెయ్యి దుకాణాలున్న ఈ కంపెనీ టర్నోవర్‌ ఏడాదికి రూ.800 కోట్లు.

Tags :