మేమున్నాం...మీరు ఒంటరి కాదు!

విడాకులూ, అకాల మరణం... కారణంఏదైనా భర్త దూరమైన ఒంటరి మహిళల్ని సమాజమూ ఎడం పెడుతుంది. మరోవైపు పిల్లల పెంపకం, ఆర్థిక అవసరాలు... వీటన్నింటినీ ఒక్కరే చూసుకోవాల్సిన పరిస్థితి. ఊహించని ఈ పరిణామాలతో బతుకు బండి గాడి తప్పిందని ఆందోళన చెందుతారు చాలామంది. ‘ది విలేజ్‌’ సంస్థతో అలాంటి ఒంటరి మహిళల గుండెల్లో ధైర్యం నింపడంతోపాటు వారి ముఖాల్లో చిరునవ్వుల్నీ తీసుకొస్తున్నారు కొచ్చికి చెందిన లైలా జాఫర్‌. ఈ సంస్థ గురించి ఆమె ఏం చెబుతారంటే...
ఒంటరి మహిళల జీవితం కత్తిమీద సామే. తప్పు ఎవరిదైనా బాధితులు మాత్రం వీళ్లే అవుతున్నారు. ముఖ్యంగా విడాకులు తీసుకుని ఒంటరివాళ్లైతే చాలా ఒత్తిళ్లు ఉంటాయి. కొందరి విషయంలో జీవిత భాగస్వామితోపాటు కుటుంబ సభ్యులూ, స్నేహితులూ దూరమైపోతున్నారు. ఈ పరిణామాలతో విసుగెత్తుపోయి ఎక్కడ నుంచీ మద్దతు దొరక్క కొందరు కుంగుబాటుకు లోనైతే, ఇంకొందరు ఆత్మహత్యల వరకూ వెళ్తున్నారు. ఇలాంటివారికి ఆసరాగా నిలిచి వారి జీవితాల్లో మార్పు తెచ్చే ఉద్దేశంతో ఏడాది కిందట ‘ది విలేజ్‌- సపోర్ట్‌ గ్రూప్‌ ఫర్‌ సింగిల్‌ పేరెంట్స్‌’ సంస్థను ప్రారంభించా. ఇది మొదలుపెట్టడానికి అసలు కారణం నా వ్యక్తిగత అనుభవమే. దుబాయిలో న్యాయవాదిగా పనిచేస్తుండేదాన్ని. ఆ సమయంలో నా భర్త ఇండియాలో వేరే మహిళతో సంబంధం పెట్టుకున్నాడని తెలిసింది. దీంతో మా మధ్య స్పర్థలు వచ్చాయి. అయిదేళ్ల బాబుమీద వీటి ప్రభావం ఉండకూడదనే ఉద్దేశంతో విడిపోవాలని నిశ్చయించుకున్నా. ఇవన్నీ కలలో కూడా ఊహించని పరిణామాలు. ఆ సమయంలో నాకూ నా బిడ్డకూ ఎవరైనా ఆసరా ఇస్తారేమోనని ఆశగా ఎదురుచూశా. కుటుంబం, స్నేహితులూ, సమాజం... ఎవరూ స్పందించలేదు. దాదాపు రెండేళ్లపాటు వేచిచూశాక నాది అత్యాశేనని అర్థమైంది. ‘ఉన్నత చదువులు చదువుకుని, న్యాయవాద వృత్తిలో ఉన్న నేనే ఇన్ని ఒడుదొడుకుల్ని ఎదుర్కొంటే సామాన్య మహిళల పరిస్థితి ఏంటి’ అనిపించింది. అప్పుడే ‘నేనే ఆ మార్పు ఎందుకు తీసుకురాకూడదూ’ అనుకున్నా. బ్రిటన్‌, దుబాయిలలో ఒంటరి మహిళలకు ఆసరాగా చాలా సంస్థలు పనిచేస్తున్నాయి. వాటి పనితీరుని అధ్యయనం చేశాక అదే తరహాలో పనిచేసేలా ‘ది విలేజ్‌’ను ప్రారంభించా.
ఎలాంటి సందేహమైనా...
ఒంటరి మహిళల కోసం ఒక వేదికంటూ లేకపోవడం వెనక సామాజిక కోణమూ ఉంది. ఇలాంటివాళ్లు తాముగా ముందుకు వచ్చి తమ కష్టాలూ, సమస్యల్ని ఎవరితోనూ చెప్పుకోవడానికి ఇష్టపడరు. ముఖ్యంగా వ్యక్తిగత, కుటుంబ విషయాలుసమాజానికి తెలియకపోవడమే మంచిదనుకుంటారు. నేనూ అంతే, విడాకులు తీసుకున్నపుడు ఆ విషయాలను ఎవరితోనూ పంచుకోవడానికి ఇష్టపడలేదు. అయితే కాలం మారుతోంది, ఆలోచనలూ మారతాయి అనిపించింది. ఎక్కువ మందిని సులభంగా చేరడానికి వీలుగా ఇన్‌స్టాగ్రామ్‌ వేదికగా- ది విలేజ్‌ ఫర్‌ సింగిల్‌ పేరెంట్స్‌- పేరుతో ఖాతా తెరిచాను. ‘ది విలేజ్‌’ అని పేరు పెట్టడానికి కారణం... పల్లెటూళ్లో ఉండే ఆప్యాయతలూ, అనురాగాలూ, ఆదరణా మా నుంచీ పొందవచ్చని చెప్పడానికే. దీన్ని ప్రారంభించినప్పుడు కూడా మనవాళ్లు తమ సమస్యల్ని చెబుతారా అన్న సందేహం ఉండేది. కానీ నాలానే చాలామంది ఆసరా కోసం ఎదురుచూస్తున్నారని త్వరగానే అర్థమైంది. ఒంటరి తల్లులు ప్రధానంగా తమ పిల్లల లీగల్‌ కస్టడీకి సంబంధించిన ప్రశ్నలు అడుగుతుంటారు. ఇన్‌స్టాలో చురుగ్గా ఉంటూ వారికి వెంటనే జవాబులు ఇస్తుంటా. ఇంకా కొందరు ఒత్తిడి, కుంగుబాటుకి గురవుతుంటారు. అలాంటివారికి మానసిక నిపుణులతో కౌన్సెలింగ్‌ ఇప్పిస్తుంటా. ఆర్థిక, ఆదాయ పన్నులకు సంబంధించిన సందేహాల్నీ నివృత్తి చేస్తుంటాం. ఇవన్నీ ఉచితంగానే చేస్తాం. కొన్నిసార్లు నిపుణులతో వెబినార్లూ, పాడ్‌కాస్ట్‌లూ నిర్వహిస్తుంటాం.
వాట్సాప్‌ గ్రూప్‌లో...
మమ్మల్ని సంప్రదించేవారిలో నెలల నుంచి టీనేజీ వయసున్న పిల్లల తల్లుల వరకూ అందరూ ఉంటారు. నా ప్రయత్నాన్ని ప్రోత్సహిస్తూ మరో ముగ్గురు వ్యక్తులు మా సంస్థలో బోర్డు సభ్యులుగా చేరారు. వీరు కూడా నాలానే వ్యక్తిగతంగా ఇలాంటి సమస్యల్ని ఎదుర్కొన్నవారే. ఒంటరి తల్లులకే కాకుండా ఈ మధ్యే అలాంటి తండ్రులకూ మా సేవలు అందించడం మొదలుపెట్టాం. భవిష్యత్తులో పిల్లలూ, తల్లులకు ఉద్యోగావకాశాలు చూపే దిశగానూ అడుగులు వేయాలని చూస్తున్నాం. దీనికోసం వెబ్‌సైట్‌నీ ప్రారంభించనున్నాం. ఆ తర్వాత యాప్‌కూడా తెస్తాం. ఆన్‌లైన్లోనే కాదు ఆఫ్‌లైన్లోనూ సేవలు అందించాలనే ఆలోచనా ఉంది. కేరళతోపాటు చెన్నై, హైదరాబాద్‌, దిల్లీల నుంచి ఎక్కువ మంది మమ్మల్ని సంప్రదిస్తున్నారు. మాకు ఒక వాట్సాప్‌ గ్రూప్‌ కూడా ఉంది. అక్కడా ఎవరైనా తమ సందేహాల్ని అడగొచ్చు. మా గ్రూప్‌లో సమస్యల్నే కాదు, సంతోషాల్నీ పంచుకుంటాం.

-తమ్మా తేజస్విని ఈనాడు జర్నలిజం స్కూల్‌

తండ్రి పేరు చెప్పాలా?

ఒంటరి మహిళలు తల్లిపాత్రతో పాటు తండ్రి పాత్రనీ పోషించాలి. ఇంటి మంచి చెడ్డా చూసుకోవాలి. మరోవైపు కెరీర్‌... అన్నింటా ఒంటరి పోరాటమే. ఇలాంటి వారికి విదేశాల్లో మద్దతుగా అనేక సంస్థలు ఉంటాయి. మన దగ్గరా అలాంటివి రావాలి. స్కూలు, పాస్‌పోర్ట్‌ కేంద్రాలు, ప్రభుత్వ కార్యాలయాల్లో తండ్రి గురించి పిల్లల ముందే పదే పదే అడుగుతుంటారు. కాస్తయినా సానుభూతి చూపరు. చుట్టాల్లోనూ ఇదే తీరు. అందుకే ఒంటరి తల్లులు సామాజికంగా దూరమైపోతున్నారు. దాంతో కొత్త సమస్యలు వస్తాయి. ఈ పరిస్థితిలో మార్పురావాలంటే ప్రతీచోటా తండ్రి గురించి కచ్చితంగా చెప్పాలన్న నిబంధనని మార్చాలి. అందుకోసమూ మేం ఉద్యమిస్తున్నాం.

Tags :