తల్లిపాల కోసం ఇల్లిల్లూ తిరిగా!

ప్రసవం కష్టమైంది.. తన బిడ్డను కళ్లారా చూసుకోకుండానే కనుమూసిందా తల్లి. మరి ఆ పాప ఆకలి తీర్చేదెవరు? ఆ సమయంలో అమ్మపాలతో ఆ చిన్నారి కడుపు నింపిందామె. ఆ ఒక్క పాపకే కాదు అవసరంలో ఉన్న వందలాది చిన్నారులకు తల్లిపాలను అందిస్తూ ప్రాణం పోస్తోంది ఐశ్వర్య..
లాక్‌డౌన్‌ సమయంలో ప్రపంచవ్యాప్తంగా అందరూ ఇళ్లకే పరిమితమై ఉంటే ఐశ్వర్య మాత్రం తన లక్ష్యానికి క్షణం కూడా విరామం ఇవ్వలేదు. పుట్టుకతోనే తల్లిని కోల్పోయిన పసికందులెందరికో తల్లిపాలను అందించి వారి ఆకలిని తీర్చింది. ఐశ్వర్య ఇద్దరు బిడ్డల తల్లి. భర్తతో మనస్పర్థలు వచ్చి విడిపోయింది. ఓ ప్రైవేటు కాలేజీలో ఇంగ్లిష్‌ లెక్చరర్‌గా పనిచేస్తోంది. ఒంటి చేత్తో సంసారాన్ని నడుపుతూనే మహిళల కోసం పనిచేసే ఓ స్వచ్ఛంద సంస్థలో సభ్యురాలైంది. సామాజిక మాధ్యమాల వేదికగా నిపుణుల సాయంతో స్త్రీల సమస్యలకు పరిష్కారాలు అందించే ఆ ఎన్జీవో .. తల్లిపాలపై కూడా ఓ కార్యక్రమం నిర్వహించింది. ఐశ్వర్యకు ఈ అవగాహన కార్యక్రమం బాగా నచ్చేసింది. అందరి స్త్రీల మాదిరిగానే తనలోనూ అంతవరకూ తల్లిపాల పట్ల కొన్ని అపనమ్మకాలు, అపోహలు ఉండేవి. ఆ రోజుతో అవన్నీ పటాపంచలయ్యాయి. అదే సమయంలో కోవై ప్రభుత్వాసుపత్రిలో ఓ హ్యూమన్‌ మిల్క్‌ బ్యాంకును చూశానని ఐశ్వర్య స్నేహితురాలు ఆమెకు చెప్పింది. వెంటనే ఆసుపత్రికెళ్లి ఆ బ్యాంకు గురించి ఆరా తీసింది. అక్కడ భద్రపరిచిన పాలను ఐసీయూలో ఉంటూ తల్లికి దూరమైన పసికందులకు అందిస్తారని తెలుసుకుంది. అప్పటికప్పుడు తన లక్ష్యం పట్ల స్పష్టత తెచ్చుకుంది ఐశ్వర్య.

అపోహలు తొలగించి..
ప్రసవం కష్టమైంది.. తన బిడ్డను కళ్లారా చూసుకోకుండానే ఆ తల్లి కన్నుమూసింది. మరి పొత్తిళ్లలోని ఆ పసిపాపకు పాలిచ్చే వారెవరు? తల్లికి టీబీ ఉండటంతో ఆమెని పాపకు పాలివ్వొద్దని చెప్పారు డాక్టర్లు. మరి ఆ చిట్టి తల్లి ఆకలి తీరేదెలా? ఇలాంటి ఎన్నో ప్రశ్నలకు ఐశ్వర్య నేతృత్వంలో ‘ఉయిర్‌ తుళి ప్రాజెక్ట్‌’ సమాధానం చెబుతోంది. ‘మా ఎన్జీవోలో అయిదువేలమంది మహిళా సభ్యులున్నారు. వాళ్లలో బాలింతలని ఎంచుకుని.. మీ బిడ్డకు ఇవ్వగా మిగిలిన పాలను మరొక చిన్నారికి ఇచ్చి వాళ్ల ప్రాణాలను నిలబెట్టమని అడిగాను. ఈ ప్రాజెక్టుకు ‘ఉయిర్‌ తుళి’ అనే పేరు పెట్టా. తమిళంలో దీనికి అర్థం ప్రాణాన్ని నిలిపే పాలచుక్క అని. పాలను దానం చేస్తే తమ బిడ్డకు పాలు సరిపోతాయా? అనే సందేహాన్ని చాలామంది మహిళలు వ్యక్తం చేశారు. మరేం ఫర్వాలేదు. తిరిగి పాలు ఉత్పత్తి అవుతాయని చెప్పి వాళ్లలో ఉన్న అపోహలను పోగొట్టడానికి చాలా కష్టమైంది. అలా కొందరు తల్లులు పాలను ఇవ్వడానికి ముందుకొచ్చారు. అప్పుడు నేను వాళ్లకు పాల పంపింగ్‌ మిషన్‌, స్టెరిలైజేషన్‌ చేసిన స్టోరేజ్‌ బ్యాగులనీ ఇచ్చేదాన్ని. ఆ తల్లులు తమ పాలను ఫ్రీజర్‌లో ఉంచేవారు. తిరిగి వాటిని నేను తీసుకుని కూలర్‌బాక్సుల్లో ఉంచి, ప్రభుత్వాసుపత్రిలోని తల్లిపాల బ్యాంకుకు చేర్చడం మొదలుపెట్టా. 250 ఎమ్‌ఎల్‌ పాలుపట్టే ఈ బ్యాగులను ఒకసారే వినియోగించగలం. ఇవి కొనడానికి కొందరు దాతలు చేయూతనందిస్తున్నారు’ అంటూ ఐశ్వర్య వివరించారు. ప్రస్తుతం వందల లీటర్ల పాలని సేకరిస్తూ ఐసీయూలో ఉన్న వందలాది శిశువుల ప్రాణాలు కాపాడుతోంది.

ప్రతి చుక్క.. అమృతమే
‘ఓసారి గోపిశెట్టిపాళ్యం నుంచి ఫోన్‌. మా పాప కోసం దాచిన పాలను వచ్చి తీసుకెళ్లమని చెప్పింది ఓ తల్లి. అక్కడకు వెళ్లిన తరువాతే తెలిసింది.. ఆ పాప చనిపోయిందని. మరొకసారి ‘ప్రసవంలో తల్లి చనిపోయింది.. ఆ పాపాయికి పాలు అందించగలరా’ అని ఓ నర్సు ఫోన్‌. ఇలాంటివే ఎన్నో అనుభవాలు. మరోపక్క ఫేస్‌బుక్‌, ట్విటర్‌లో ఉయిర్‌ తుళి సేవలు చూసిన చాలామంది తల్లులు మా గ్రూపులో చేరుతూనే ఉన్నారు. ’ అని చెబుతోంది ఐశ్వర్య.

Tags :