అప్పుడు... అమెరికన్‌లా మారిపోవాలనుకున్నా!

పసివయసులో ఎదుర్కొన్న వివక్ష ఎదిగేకొద్దీ ఆ అమ్మాయిలో పరిణతి తెచ్చిపెట్టింది. చదువుల్లో ప్రతిభ చూపుతూనే...మరొపక్క అలాంటి వివక్ష మరెవరూ ఎదుర్కోకూడదని నడుం కట్టింది. స్వచ్ఛంద సంస్థలతో కలిసి అడుగులు వేస్తూ వారి జీవితాల్లో వెలుగులు నింపుతోంది.ఆమె వేసిన అడుగులే ఈ రోజు ప్రతిష్ఠాత్మక ‘రోడ్స్‌’ అందించే ఉపకార వేతనాన్ని అందుకునేలా చేశాయి. ఆక్స్‌ఫర్డ్‌లో ఉచితంగా చదువుకునే అవకాశాన్నీ కల్పించాయి. తను మరెవరో కాదు...తెలుగు రాష్ట్రాలకు చెందిన ఎన్‌ఆర్‌ఐ శావర్ణి శంకా. ఆ వివరాలు ఆమె మాటల్లోనే...

అంతర్జాతీయంగా ప్రతిష్ఠాత్మకమైన రోడ్స్‌ స్కాలర్‌షిప్‌ ప్రోగ్రామ్‌కి అమెరికా మొత్తం మీద 32 మంది ఎంపికయ్యాం. అందులో నలుగురు ఇండో-అమెరికన్‌లు ఉంటే... తెలుగు మూలాలు ఉన్న అమ్మాయిని నేనొక్కదాన్నే. ఈ ఉపకార వేతనం కోసం సుమారు 2300 మంది దరఖాస్తు చేసుకున్నారు. ఇందులో భాగంగా ఆక్స్‌ఫర్డ్‌లో రెండేళ్ల పాటు నా చదువుకు అయ్యే ఖర్చుని ఆ సంస్థ భరిస్తుంది. రెండు మాస్టర్‌ డిగ్రీలను అందుకోవచ్చు. నేను పబ్లిక్‌ పాలసీ, రెఫ్యూజీ అండ్‌ ఫోర్స్‌డ్‌ మైగ్రేషన్‌ విభాగాల్లో ఎంఎస్‌ చేయాలనుకుంటున్నా. వ్యక్తిగతంగా సేవ చేస్తే కొంతమందికే అందుతుంది. అదే ప్రభుత్వ విధానాల్లో మార్పు తీసుకురాగలిగితే ఎక్కువ మందికి చేరుతుంది.
ప్రముఖలెందరో అందుకున్న అవార్డు...
ఈ స్కాలర్‌షిప్‌ అందుకోవడం అంత సులువేం కాదు. ఎందుకంటే... చదువుల్లో ప్రతిభతో పాటు నాయకత్వ లక్షణాలు, సామాజిక సేవాతత్త్వం వంటివీ అవసరం. ఈ లక్షణాలన్నీ ఉన్నాయని భావించి నేను చదువుతోన్న వేక్‌ఫారెస్ట్‌ యూనివర్సిటీ ఇందుకోసం నన్ను దరఖాస్తు చేయమంది. ప్రస్తుతం సీనియర్‌గా ఇక్కడే పాలిటిక్స్‌ అండ్‌ ఇంటర్నేషనల్‌ ఎఫైర్స్‌, స్పానిష్‌ ప్రధానాంశాలుగా చదువుతున్నా. మిడిల్‌ ఈస్ట్‌ అండ్‌ సౌత్‌ ఆసియా స్టడీస్‌నూ కొనసాగిస్తున్నా. బిల్‌క్లింటన్‌, బాబీ జిందాల్‌, సుసాన్‌ రైస్‌ వంటి ప్రముఖులెందరో ఈ ప్రతిష్ఠాత్మకమైన రోడ్స్‌ స్కాలర్‌షిప్‌ని అందుకున్నారు. ఇప్పుడు దీనికి నేను అర్హత సాధించడం ఎంతో గర్వంగా ఉంది.

నా గురించి...

అమెరికాలో స్థిరపడిన తెలుగు కుటుంబం మాది. నాన్న రామకృష్ణ సాఫ్ట్‌వేర్‌ ఇంజినీర్‌. అమ్మ అపర్ణ ప్లాంట్‌ సైంటిస్ట్‌గా పనిచేస్తోంది. రెండు దశాబ్దాలుగా ఇక్కడ ఉంటున్నా... మన సంప్రదాయాల్నీ, మూలాల్నీ మరిచిపోలేదు. అమ్మ ఇండియాలో ఫెమినైన్‌ హైజీన్‌ పేరుతో మహిళల రుతు శుభ్రత కోసం పనిచేస్తుంది. ఇక్కడ గార్డెన్‌ క్లబ్‌ని నిర్వహిస్తోంది.ముఖ్యంగా నాన్న ఇంట్లో తప్పనిసరిగా తెలుగు మాట్లాడాలనే నియమం పెట్టారు. దాన్ని ఇప్పటికీ కొనసాగిస్తున్నాం. చిన్నప్పటి నుంచి చదువుతోపాటు ఆటపాటల్లోనూ చురుగ్గా ఉండేదాన్ని. టెన్నిస్‌ ఆడటం అంటే నాకెంతో ఇష్టం. కర్ణాటక సంగీతంలోనూ ప్రవేశం ఉంది. చుట్టూ ఉన్నపరిస్థితులు సేవాభావాన్ని, నాయకత్వ లక్షణాల్ని పెంచితే...కుటుంబ సభ్యులు నాలో స్ఫూర్తిని నింపుతున్నారు.

తోటిపిల్లలు దూరం పెట్టారు...
అమ్మానాన్నలు ఉద్యోగ రీత్యా అమెరికాలో స్థిరపడ్డారు. నేను ఇక్కడే పుట్టి పెరిగా. అయినప్పటికీ నా రంగు, నేను తినే ఆహారం వంటి విషయాల్లో తేడాల్ని చూపిస్తూ చిన్నప్పుడు స్కూల్లో తోటి పిల్లలు నన్ను దూరం పెట్టేవారు. ఆ విషయం ఇంట్లో వాళ్లెవరికీ చెప్పేదాన్ని కాదు... అయితే, నేను అమెరికన్‌లా మారిపోవాలని చాలా ప్రయత్నించేదాన్ని. ఇందుకోసం చాలా తీవ్రంగా ఆలోచించేదాన్ని. కానీ ఎదిగే కొద్దీ నా ఆలోచనా విధానం తప్పని అర్థం చేసుకున్నా. నా మూలాల్ని కాపాడుకుంటూ నాలాగే ఉండాలనీ, అంతేకాదు...అలా ఎవరైతే వివక్షకి గురవుతున్నారో వారికి తోడుగా నిలబడాలని నిర్ణయించుకున్నా.
స్పానిష్‌ నేర్చుకుని...
హైస్కూల్‌ విద్యలో భాగంగా ఓ విదేశీ భాషను ఎంచుకోవాలి. అప్పుడు నేను స్పానిష్‌ని ఎంచుకున్నా. దానిమీద పట్టు తెచ్చుకునే ప్రయత్నంలో మధ్య అమెరికా దేశాల నుంచి వలస వచ్చిన స్పానిష్‌ కుటుంబాల పిల్లలకు ఇంగ్లిష్‌ నేర్పడం ప్రారంభించా. అప్పుడే వలసదారుల కష్టాలు అర్థమయ్యాయి. ఇక శరణార్థులది మరో పరిస్థితి. వారిలో కొందరికి ప్రభుత్వం దేశంలో ఆశ్రయం ఇచ్చినా... భాష తెలియక, సాయం చేసేవారు లేక అష్టకష్టాలు పడుతుంటారు. వారికి సాయం చేసేందుకు ఏర్పడ్డ వాలంటరీ ఆర్గనైజేషన్స్‌తో కలిసి పిల్లల ట్యూషన్‌ ఫీజుల కోసం నిధులు సేకరించేదాన్ని. వాటిల్లో సఫార్‌ ఒకటి. ఈ సంస్థ అరబిక్‌ మాట్లాడే దేశాల నుంచి వచ్చిన శరణార్థుల కోసం పనిచేస్తుంది. ఆయా దేశాల స్థితిగతుల్ని అర్థం చేసుకోవడం కోసం మొరాకో వంటి దేశాలకు వెళ్లివచ్చా. ఇవే కాదు...మరెన్నో వాలంటీర్‌ క్లబ్‌లూ నిర్వహిస్తున్నా. ఇవన్నీ నాకు ఈ ఉపకార వేతనం అందుకునేందుకు సానుకూల అంశాలుగా నిలిచాయి.

Tags :