తెలుగు వనితలు వెలుగయ్యారు

ప్రపంచం భయం గుప్పిట్లో ఉన్నప్పుడు వాళ్లు మాత్రం యోధుల్లా ముందుకొచ్చారు... పగలు, రాత్రి అనే తేడా లేకుండా... తోటి వారికి సేవలు అందించి మానవత్వం గొప్పదనాన్ని చాటిచెప్పారు... ఎర్రనిఎండలో కాలిబాటన కిలోమీటర్ల కొద్దీ నడిచి ప్రజలకు సేవలు అందించిన అధికారులూ, పోలీసులూ.. ప్రాణాలకు తెగించి కొవిడ్‌ రోగులని కాపాడిన వైద్యులు... ఎన్నోవేలమందిలో స్ఫూర్తిని నింపారు...

అస్లీ మా... తస్లీమా

కరోనావేళ ఆకలి వేసిన వాళ్లకు అమ్మైంది. అవసరంలో ఉన్న అభాగ్యులకు చిరునామా అయ్యింది.. ములుగు సబ్‌రిజిస్ట్రార్‌గా పనిచేస్తోన్న తస్లీమా. భేషజాలు పక్కనపెట్టి ఆకలితో అలమటిస్తున్న వారి కోసం కఠినమైన దారుల్లో కాలినడకనే కిలోమీటర్ల కొద్దీ ప్రయాణించి ఆహారపదార్థాలు, మందులు అందించారామె. వలసకూలీలకు స్వయంగా వండిపెట్టారు. కొవిడ్‌ భయంతో.. చనిపోయిన వారికి అంతిమ సంస్కారాలు చేయడానికి ఎవరూ ముందుకు రాకపోవడంతో ఆమే ముందుండి దహససంస్కారాలు చేసి అందరితోనూ శెభాష్‌ అనిపించుకున్నారు. తస్లీమా రెండేళ్ల వయసులోనే తండ్రిని కోల్పోయారు. తల్లి వ్యవసాయ పనులకి వెళ్లి ఆమెను చదివించారు. వ్యవసాయం మీద ఉన్న గౌరవంతో ఇప్పటికీ తస్లీమా వారాంతాల్లో వ్యవసాయ పనులు చేస్తుంటారు. తండ్రి స్ఫూర్తితో సర్వర్‌ అనే ట్రస్టుని స్థాపించి.. పేదవిద్యార్థులకు అండగా ఉంటున్నారు.

జనం మెచ్చిన కలెక్టరమ్మ...

అమ్మ పెడితేగానీ అన్నం తినను... అని బిడ్డ మారాం చేస్తే ఏ తల్లి మనసైనా కరిగిపోతుంది. కానీ ఆ కలెక్టరమ్మ మాత్రం కరోనా మహమ్మారిపైన యుద్ధం చేసే క్రమంలో మమకారం కంటే కూడా బాధ్యత ముఖ్యం అనుకున్నారు. విశాఖకు చెందిన కోరాటి రోషిణి అపరంజి అసోంలోని జోర్హాట్‌ జిల్లా కలెక్టర్‌. కొవిడ్‌ ప్రారంభం నుంచీ లాక్‌డౌన్‌, క్వారంటైన్‌ నిబంధనల్ని కఠినంగా అమలు చేస్తూ... జిల్లా వాసుల్ని కాపాడుతూ వచ్చారు. రోషిణి చిన్నబ్బాయికి రెండేళ్లు. వీరికి తోడుగా ఆమె తల్లిదండ్రులూ ఉంటారు. వాళ్లంతా కింది అంతస్తులో ఉంటే, ఈమె ఒక్కరే పైఅంతస్తులో ఉండేవారు. పిల్లాడు అమ్మ కావాలంటూ మారాం చేసినా గుండెను రాయి చేసుకుని అలాగే మెట్లపైనుంచి వెళ్లిపోయేవారు. దాదాపు నాలుగు నెలలు తర్వాత పరిస్థితి అదుపులోకి వచ్చాకే బిడ్డను దగ్గరకి తీసుకున్నారు.

‘పోస్టు’ ఆగలేదు

కొవిడ్‌ సమయంలో సమస్త సేవలు నిలిచిపోయిన క్షణాన పదిహేడువేలమంది పోస్టల్‌సైన్యాన్ని ముందుకు నడిపించి అవసరంలో ఉన్న ఎంతోమందికి అండగా నిలిచారు చీఫ్‌ పోస్ట్‌మాస్టర్‌ జనరల్‌ కన్నెగంటి సంధ్యారాణి. లాక్‌డౌన్‌ సమయంలో ఒకరికొకరు ఎదురుపడటానికి కూడా సంకోచించిన సమయంలో కూడా పోస్టల్‌ సిబ్బంది ఎంతో ధైర్యంతో ముందుకు వచ్చారు. ప్రభుత్వం అందించే పింఛన్లు, కరోనా ఆర్థికసాయాన్ని సకాలంలో అందించి ప్రజలకు ఏ ఇబ్బంది రాకుండా చొరవ తీసుకున్నారామె. కొవిడ్‌ రోగులు.. వైద్య సిబ్బంది కోసం మెడికల్‌ కిట్లు, పీపీఈ కిట్లు, వ్యాధినిరోధక శక్తిని పెంచే సిట్రస్‌ పండ్లని ప్రజలకు అందించి అందరి మన్ననలు పొందారు.

అమెరికాలో మన డాక్టర్‌...

మాజీ ప్రధాని... తెలుగింటి ముద్దుబిడ్డ పీవీ నరసింహారావు గారాలపట్టి డాక్టర్‌ విజయాసోమరాజు. ఇన్‌ఫెక్షియస్‌ డిసీజెస్‌ విభాగంలో అపారమైన అనుభవం ఉన్న డాక్టర్‌ విజయ అమెరికాలోని విస్కన్‌సిన్‌ రాష్ట్రంలోని రాక్‌కౌంటీ నగరంలో డాక్టర్‌గా విధులు నిర్వహిస్తున్నారు. కొవిడ్‌ వేళ అమెరికాలోని ఆసుపత్రులు కిటకిటలాడుతున్న సమయంలో రోజుకు పదమూడుగంటలపాటు పనిచేసి ఒక్కరు కూడా ఇన్‌ఫెక్షన్‌తో మృత్యువు బారిన పడకుండా అనేక జాగ్రత్తలు తీసుకున్నారామె.

క్వారెంటైన్‌లోనూ విధులు...

లాక్‌డౌన్‌ నిబంధనల అమలులో అలుపెరగకుండా పనిచేశారు పోలీసు సిబ్బంది. చిన్నా పెద్దా అంతరం లేకుండా విభాగంలోని అందరూ నిరంతరం దీన్లో భాగమయ్యారు. ఆ సమయంలో ఎందరో కొవిడ్‌ బారినపడ్డారు కూడా. వారిలో తెలంగాణకు చెందిన అదనపు డీజీపీ స్వాతి లక్రా ఒకరు. ‘కొవిడ్‌ రాకుండా ఎన్నో జాగ్రత్తలు తీసుకున్నా. కానీ విధుల్లో భాగంగా నిత్యం ఎందరినో కలవాల్సి వచ్చేది. దాంతో ఎప్పుడు కొవిడ్‌ వచ్చినా ఎదుర్కోవాలని ముందుగానే మానసికంగా సిద్ధమయ్యా’ అని చెబుతారు స్వాతి. లక్షణాల్ని ముందుగానే గ్రహించి పరీక్ష చేయించకుని పాజిటివ్‌గా నిర్ధారణ అయ్యాక స్వీయ క్వారెంటైన్లోకి వెళ్లారు. ఆ సమయంలోనూ ఫోన్‌ద్వారా కింది అధికారులకు ఆదేశాలిచ్చేవారు.

మన ఆల్‌ ఉమెన్‌ టీం!

ప్రతిరోజూ వందలాది నమూనాలు... ఎందులో వైరస్‌ దాగి ఉందో తెలియదు. నెగటివ్‌ వచ్చిన ప్రతిసారీ ఊపిరిపీల్చుకోవడం, పాజిటవ్‌ వస్తే గుండెలు చిక్కబట్టుకోవడం... ఇదీ కొవిడ్‌ల్యాబ్‌లో నిత్యం ఉండే సమరం. ఈ యుద్ధంలో గెలుపు సాధించారు వరంగల్‌ కొవిడ్‌ ల్యాబ్‌కి సారథ్యం వహించిన ఆల్‌ఉమెన్‌ టీం. డాక్టర్‌ సంధ్య నేతృత్వంలోని మహిళా బృందం కొవిడ్‌ నిర్థారణ కోసం సీసీఎంబీ, జాతీయ వైరాలజీ సెంటర్‌కు వెళ్లి ప్రత్యేకంగా శిక్షణ తీసుకున్నారు. వందలాది కొవిడ్‌ రోగులకు పరీక్షలు నిర్వహించి ఎందరికో ధైర్యాన్ని అందించారు. నమూనాలు సేకరించడం వాటిని రికార్డుల్లో నమోదు చేయడం వంటి పనులతో 24 గంటలూ ల్యాబుల్లో గడిపారు వీరంతా.

కృతజ్ఞత ర్యాలీ...

కొవిడ్‌ పైన పోరాటంలో డాక్టర్లు ముందు వరుసలో ఉంటూ వచ్చారు. ప్రతిచోటా వారికీ జనాలు జేజేలు పలికారు. ఓ ప్రవాస భారతీయ వైద్యురాలికి అమెరికాలో వినూత్న రీతిలో కృతజ్ఞతలు తెలిపారు స్థానికులు. డాక్టర్‌ ఉమారాణి మధుసూదన... సౌత్‌విండ్‌సర్‌(కటెక్టికట్‌)లోని ఓ స్థానిక ఆసుపత్రిలో వైద్యురాలు. కొవిడ్‌ ప్రారంభంలో రోజుకు 12 గంటలకుపైనే విధులు నిర్వహిస్తూ వచ్చారామె. కొన్నిసార్లు ఆసుపత్రిలోనే వారంపాటు ఉండిపోయేవారు. అలా ఎన్నో ప్రాణాల్ని నిలబెట్టారామె. ఆ డాక్టరమ్మ సేవలకు కృతజ్ఞతగా ఏప్రిల్‌లో వినూత్నంగా కారు ర్యాలీ నిర్వహించారు స్థానికులు. ఆమె ఇంటి ముందు నుంచి రోగుల బంధువులు వంద వాహనాల్ని హారన్లు మోగించుకుంటూ ర్యాలీగా పోనిచ్చారు.

Tags :