ఫియట్‌ ఆమె చెబితేనే రైట్‌ రైట్‌!

కోఠి ఉమెన్స్‌ కాలేజీలో బీఏ చదివిన ఆ యువతి... ఇప్పుడు ‘ఫియట్‌ క్రైష్లర్‌ ఆటోమొబైల్స్‌’కి చీఫ్‌ ఇన్‌ఫర్మేషన్‌ ఆఫీసర్‌. హైదరాబాద్‌లో స్కూల్‌కి నడిచి వెళ్లిన ఆ అమ్మాయి ఫియట్‌ని ఆధునిక కార్ల తయారీవైపు నడిపిస్తోంది. ఆ సంస్థ అమెరికా, ఆసియా-పసిఫిక్‌ వ్యవహారాలకు ఆమె రథ సారథి. ఆ అరుదైన ఘనత సాధించిన తెలుగు వనిత... మమత చామర్తి. ఆమె ప్రస్థానమిది..
అమెరికాలో అది నా మొదటి ఉద్యోగ ప్రయత్నం. మావారికి ఆరోజు ఆఫీసులో ముఖ్యమైన పని ఉంది. మా పెద్దబ్బాయికి నాలుగు నెలలు. తెలిసిన వాళ్లెవరూ లేక, నాతోనే తీసుకెళ్లా. ఒళ్లోనే నిద్రపుచ్చి ఇంటర్వ్యూకి కూర్చున్నా. అవతల ఉన్నదీ ఓ మహిళే. ఆమె అడుగుతున్న ప్రశ్నలకు తడుముకోకుండా సమాధానాలు చెబుతున్నా. అంతలోనే వాడు నిద్రలేచి ఏడుపు మొదలుపెట్టాడు. ఆమెకు సారీ చెప్పా. ‘నేనూ ఓ అమ్మనే’ అని చెప్పి తన నంబరిచ్చి తర్వాత ఫోన్‌ చేయమన్నారు. ఫోన్లో మరికొన్ని ప్రశ్నలు అడిగి ఉద్యోగం ఇస్తున్నట్టు చెప్పారు. అలా 1996లో కాంట్రాక్ట్‌ ఉద్యోగి(సాఫ్ట్‌వేర్‌ ప్రోగ్రామర్‌)గా కార్ల తయారీ కంపెనీ క్రైష్లర్‌లో చేరా. మూడేళ్లకు అక్కడే శాశ్వత ఉద్యోగినయ్యా. నిజానికి నాది కంప్యూటర్స్‌ నేపథ్యం కాదు. కోఠి ఉమెన్స్‌ కాలేజీలో బీఏ(సైకాలజీ, సోషియాలజీ, ఇంగ్లిష్‌), ఉస్మానియాలో ఎం.ఎ. ఇంగ్లిష్‌ చేశా. మావారు గోపాల్‌ మెకానికల్‌ ఇంజినీర్‌. అమెరికాలో ఫోర్డ్‌లో ఉద్యోగం వచ్చింది. నేను 1995లో అమెరికా వెళ్లినపుడు కంప్యూటర్స్‌ రంగంలో అవకాశాలు ఉండటంతో ఆ కోర్సులు చేసి ఉద్యోగం సంపాదించా.
* క్రైష్లర్‌లో పనిచేసినపుడు చీఫ్‌ ఇన్‌ఫర్మేషన్‌ ఆఫీసర్‌గా ‘సూ అంగర్‌’ ఉండేవారు. ఆవిడే నాకు మార్గదర్శి. ఎప్పటికైనా ఆవిడలా సీఐఓ అవ్వాలని లక్ష్యం పెట్టుకున్నా. కంపెనీ ఐటీ వ్యూహంలో ఆమెకు నేను సలహాదారుగా ఉండేదాన్ని. అప్పటివరకూ వాహన రంగంలో మెకానికల్‌ విభాగానికే ప్రాధాన్యం ఉండేది. 2000 సంవత్సరం తర్వాత సాఫ్ట్‌వేర్‌ ప్రధానంగా కంపెనీలు తమ వ్యూహాల్ని మార్చుకోవాల్సి వచ్చింది. ఆ మార్పు సాఫీగా సాగేలా చూసుకోవడం నా విధి. అదే సమయంలో క్రైష్లర్‌లో డైమ్లర్‌ అనే సంస్థ విలీనమైంది. వాటి అనుసంధానం చేసే బాధ్యత నాకు అప్పగించారు. ఆ ప్రయత్నంలో నా కమ్యూనికేషన్స్‌ నైపుణ్యాలూ, సైకాలజీ నేపథ్యం బాగా పనికొచ్చాయి.
* క్రైష్లర్‌లో దాదాపు పదేళ్లు పనిచేశాక మరో రెండు కంపెనీలకు మారా. వాటిలో జర్మనీకి చెందిన జెడ్‌.ఎఫ్‌. ఆటోమొబైల్స్‌ ఒకటి. ఆ కంపెనీని మెకానికల్‌ నుంచి సాఫ్ట్‌వేర్‌ ప్రధానమైనదిగా మార్చాలనుకున్నారు. చీఫ్‌ డిజిటల్‌ ఆఫీసర్‌గా ఆ బాధ్యతల్ని నన్ను చూడమంటూ కంపెనీ సీఈఓ అడిగారు. డెట్రాయిట్‌లోని కుటుంబానికి దూరంగా జర్మనీలో ఉంటూ నాలుగేళ్లపాటు పనిచేశా. జెడ్‌.ఎఫ్‌.ని సాఫ్ట్‌వేర్‌ ప్రధాన కంపెనీగా మార్చడంపైన ఉద్యోగుల్లో భయాలు ఉండేవి. ప్లాంట్‌లో సాధారణ ఉద్యోగులతో కలిసి పనిచేసి వారి భయానికి కారణాలు తెలుసుకున్నా. వాటికి పరిష్కారాల్ని ఉద్యోగులకు చూపించా. దాంతో అంతా సవ్యంగా నడిచింది. క్రైష్లర్‌(ఇప్పుడు ఫియట్‌ క్రైష్లర్‌ ఆటోమొబైల్స్‌)లో సీఐఓగా చేరమని 2019లో పిలుపొచ్చినపుడు సంతోషంగా తిరిగి వచ్చి చేరా. కార్ల తయారీ రంగంలో ఎఫ్‌సీఏ ప్రపంచంలో నాలుగో అతిపెద్ద సంస్థ. ఇటీవల కనెక్టడ్‌, ఎలక్ట్రిఫికేషన్‌, అటానమస్‌, షేరింగ్‌ మొబిలిటీ... మాటల్ని వాహనరంగంలో వింటున్నారుగా. కంపెనీలోని వివిధ విభాగాల్ని సమన్వయ పరుస్తూ వాటిని నిజరూపంలోకి తేవడమే ప్రస్తుతం నా బాధ్యత. మొత్తంగా కారుని ‘స్మార్ట్‌ ఫోన్‌ ఆన్‌ వీల్స్‌’గా మార్చే ప్రయత్నం చేస్తున్నాం.

హైదరాబాద్‌లో డిజిటల్‌ హబ్‌

* మన కంఫర్ట్‌ జోన్‌ వదిలి పనిచేస్తే విజయం దానంతట అదే వస్తుంది. నేను ఈ స్థాయిలో ఉండటానికి కారణం అమ్మ. ఆమె మాకోసం త్యాగాలు చేసింది. నాన్న వ్యాపారంలో నష్టపోయినపుడు ఇంటి బాధ్యతను తీసుకుంది. హైదరాబాద్‌ నుంచి ఓ పల్లెకు బదిలీ అయితే మా కోసం ఉద్యోగం వదులుకుంది. ఉపాధి కోసం నల్లకుంటలో డేకేర్‌ సెంటర్‌ని ప్రారంభించింది.
* రూ.1100 కోట్లతో హైదరాబాద్‌లో ఎఫ్‌సీఏ గ్లోబల్‌ డిజిటల్‌ హబ్‌ ఏర్పాటుచేయనున్నాం. దీనిద్వారా 2021లో వెయ్యి మందికి ఉపాధి దొరుకుతుంది. దీని నిర్వహణ బాధ్యత నాదే. జెడ్‌.ఎఫ్‌.లో ఉన్నపుడూ ఆ సంస్థ సాంకేతికత అభివృద్ధి కేంద్రాన్ని 2017లో హైదరాబాద్‌లో ప్రారంభించాం. దానిద్వారా మూడేళ్లలో 3000 మందికి ఉపాధి కల్పించాం.

Tags :