చెల్లెళ్ల సుసాగు!

ఇంట్లో ఒక్క ఆడపిల్ల ఉంటేనే మహాలక్ష్మి అని మురిసిపోతాం..
మరి దాదాపు వెయ్యిమంది అక్కాచెల్లెళ్లు కలిసి ఉంటే?
అవును ఈ ‘చిరుధాన్యాల చెల్లెళ్లు’ రెండువేల ఎకరాల భూమిలో ప్రకృతి వ్యవసాయం
చేస్తూ సంపదని సృష్టిస్తున్నారు.. సుసాగు పేరుతో కొత్త పుంతలు తొక్కుతూ శెభాష్‌ అనిపించుకుంటున్నారు...

అధిక దిగుబడి ఆశ.. కనీసం పెట్టిన పెట్టుబడి అయినా చేతికొస్తుందన్న ఆలోచన రైతుల్ని రసాయనిక ఎరువుల సాగు దిశగా నడిపించాయి. అందుకే మారుమూల పల్లెలు, గిరిజన ప్రాంతాలన్న తేడా లేకుండా గత కొన్నేళ్లుగా ఈ తరహా వ్యవసాయం సాగిపోతోంది. దీన్ని మార్చాలంటే మహిళలే నడుం కట్టాలని ఆలోచించింది శారదా వ్యాలీ డెవలప్‌మెంట్‌ సంస్థ. అది శారదానదీ పరివాహక ప్రాంత అభివృద్ది, కోసం పనిచేస్తుంది. ఈ సంస్థ మహిళా రైతులకు అవగాహన కల్పిస్తే...వారు అద్భుతాలు చేయగలరని నమ్మింది. అప్పుడే కేంద్ర ప్రభుతం దేశవ్యాప్తంగా రైతు ఉత్పత్తిదారుల సంఘాలను ఏర్పరుస్తోంది. ఆ క్రమంలోనే అనకాపల్లి మండలంలోని మహిళా రైతుల్ని చైతన్యపరిచి ఓ సంఘంగా ఏర్పాటు చేసిందా సంస్థ. దానిలో మామిడిపాలెంలో బవులువాడ, మామిడిపాలెం, బవులువాడ, మార్టూరు, సీహెచ్‌.ఎన్‌ అగ్రహారం, దిబ్బపాలెం, తుమ్మపాల వంటి 32 గ్రామాలకు చెందిన 960 మంది మహిళా రైతులు సుసాగు చిరుధాన్య ఉత్పత్తిదారుల సంఘంగా ఏర్పడ్డారు. ఇదే చిరుధాన్యాల చెల్లెళ్ల సంఘం.

ఉమ్మడి సేద్యంతో ఊళ్లన్నీ...
మహిళలకు ఆ ఎన్జీవో ప్రకృతి వ్యవసాయ విధానంలో శిక్షణ అందించింది. వీరంతా ముందడుగు వేసి దాదాపు రెండు వేల ఎకరాలను ప్రకృతి వ్యవసాయంలోకి తీసుకువచ్చారు. ఈ చెల్లెళ్ల ఉత్సాహాన్ని చూసిన నాబ్‌ కిసాన్‌ ఫైనాన్స్‌ లిమిటెడ్‌ సంస్థ ఇరవై ఏడు లక్షల రూపాయల్ని రుణంగా అందించింది. ఆ డబ్బుతో మహిళంతా కలిసి ఉమ్మడి సేద్యం ప్రారంభించారు. విత్తనాలు పంచుకుంటూ, కొత్త సాగు పద్ధతులు ఎప్పటికప్పుడు నేర్చుకుంటూ ఒకరికొకరు తోడుగా నిలబడ్డారు. ఈ భూమిలో రాగులు, జొన్నలు, సామలు, గంట్లు, కొర్రలు వంటివాటి చిరుధాన్యాల సాగుతో పాటు, అంతర, విరామ పంటలు అంటూ చాలా ప్రయోగాలే చేశారు. ఇవే కాకుండా మిరియాలు, పసుపు, అల్లం వంటి వాణిజ్య పంటల్నీ పండిస్తున్నారు.

ప్రేమ్‌జీ ఫౌండేషన్‌ అండగా...
వీరి ప్రయత్నం చూసిన అజిమ్‌ ప్రేమ్‌జీ ఫౌండేషన్‌ కోటిరూపాయల నిధుల్ని మంజూరు చేసింది. నిజానికి తొలి ఏడాది నష్టాలతోనే సాగింది సాగు. అయినా మహిళలు వెనగడుగు వేయలేదు. ఇతరుల అపోహలను దూరం చేస్తూ అప్పటివరకూ ఎనిమిది క్వింటాళ్లు వచ్చే పంట...ఇప్పుడు పదిహేను క్వింటాళ్ల వరకూ వస్తోంది. ‘కష్టానికి తగిన ఫలితం వచ్చింది: రసాయన ఎరువులకు అలవాటుపడడంతో ఆరంభంలో కాస్త భయపడ్డాం. కానీ మా కష్టానికి తగ్గ ఫలితం ఇప్పుడు అందుకుంటున్నాం. రెట్టింపు దిగుబడితో రెట్టింపు ఆదాయం పొందుతున్నాం’ అంటోంది కూతంగిపుట్టుకి చెందిన కిల్లో సుశీల. వారికి ప్రకృతి సహకరించింది. పండిన పంటను ప్రాసెస్‌ చేసి జంతికలు, న్యూట్రిషన్‌ బార్‌లు వంటి చిరుతిళ్లు రూపంలోకి మారుస్తారు. వీటిని దగ్గర్లోని విశాఖపట్టణంలోని అపార్ట్‌మెంట్‌లు, షాపులకు అమ్ముతారు.

-లక్ష్మణ్‌, సత్యనారాయణ, పెదబయలు

Tags :

మరిన్ని

జిల్లా వార్తలు

చదువు సుఖీభవ ఈ-నాడు మకరందం రయ్.. రయ్ సిరి ఈ తరం హాయ్! ఆహా హాయ్ బుజ్జీ స్థిరాస్తి రుచులు

మరిన్ని

రుచులు

App