అమ్మ..పిల్లలు..ఓ రోబో!

పిల్లల అవసరాలని అమ్మకంటే బాగా ఎవరు అర్థం చేసుకుంటారు? టెక్నాలజీని అమితంగా ప్రేమించే తన కొడుక్కి పాఠాలు చెబుతున్నప్పుడు డింపుల్‌ వర్మ మదిలో మెదిలిన ఆలోచనే ‘విజ్‌రోబో’.. రోబోటిక్‌ ల్యాబులు, క్లబ్‌లు, కిట్స్‌ సాయంతో రేపటి తరం పిల్లలకు అవసరం అయిన కృత్రిమమేథ, ఐవోటీ పాఠాలను తేలిగ్గా చెప్పేస్తున్నారీమె...

సాయంత్రం అయితే తన ఇద్దరు పిల్లలని పక్కన కూర్చోబెట్టుకుని అర్థం కాని లెక్కలు, సైన్స్‌ పాఠాల్ని అరటిపండు వలిచినంత తేలిగ్గా చెబుతుంది డింపుల్‌వర్మ. కంప్యూటర్స్‌ సైన్స్‌ చదివిన డింపుల్‌కి ఈ పనంటే చెప్పలేనంత ఆసక్తి. ఇక ఆమె భర్త నవీన్‌... ఐటీ ఉత్పత్తుల అమ్మకాలు చేసేవాడు. ఇంట్లో టెక్నాలజీని ప్రోత్సహించే వాతావరణం ఉండటంతో వీళ్ల అబ్బాయి ఆర్యమన్‌ రోబోటిక్స్‌పై విపరీతమైన ప్రేమ పెంచుకున్నాడు. తొమ్మిదేళ్లకే రోబోటిక్స్‌ తయారీలో ఎన్నో అవార్డులు గెల్చుకున్నాడు. వరల్డ్‌ రోబోటిక్‌ ఛాంపియన్‌గానూ ఎదిగాడు. అతని ప్రతిభను గుర్తించి నాసా ‘యంగ్‌ సైంటిస్ట్‌’ ప్రోగ్రామ్‌లో భాగంగా ప్రత్యేకంగా ఆహ్వానించింది. అహ్మదాబాద్‌ స్పేస్‌ అప్లికేషన్‌ సెంటర్‌లో మెంటార్‌గానూ పనిచేస్తున్నాడు. కొడుకు సాధించిన విజయాలన్నీ డింపుల్‌ ఆత్మవిశ్వాసాన్ని పెంచాయి. అలాగే అతనికి పాఠాలు చెబుతున్నప్పుడు ఆమె మదిలో ఓ ఆలోచన వచ్చింది. ఈ విజయాలని తన కొడుకు సాధించినప్పుడు ఇతర పిల్లలు సాధించడం కూడా పెద్ద కష్టమేం కాదు. కావాల్సినదల్లా సరైన శిక్షణ. అది తనే ఎందుకు ఇవ్వకూడదు అనుకుంది. అలా భర్తతో కలిసి నాలుగేళ్ల క్రితం తన సొంతూరు లుథియానా కేంద్రంగా ‘విజ్‌రోబో’ సంస్థను రూ.10లక్షల పెట్టుబడితో ప్రారంభించింది. సైన్స్‌, లెక్కల్ని రోబోటిక్స్‌ సాయంతో తేలిగ్గా అర్థమయ్యేలా చేయడమే ఈ విజ్‌రోబో లక్ష్యం. అందుకు తగ్గట్టుగా పంజాబ్‌లో మొదటిసారిగా రోబోటిక్స్‌ క్లబ్‌లని ఏర్పాటు చేశారు వీళ్లు. ఇక్కడే రోబోటిక్స్‌ తయారీలో శిక్షణ, వర్క్‌షాప్‌లు నిర్వహించేవారు. ఐఓటీ, ఆర్టిఫిషియల్‌ ఇంటిలిజెన్స్‌పైనా తరగతులు ఉండేవి. వీటికి ఆదరణ పెరగడంతో ‘షాంఘై రోబోటిక్స్‌’ అనే అంతర్జాతీయ సంస్థతో ఒప్పందం చేసుకుని దేశవ్యాప్తంగా ఉన్న స్కూళ్లలో రోబోటిక్స్‌ ల్యాబ్‌లని ప్రారంభించింది డింపుల్‌. నీతి ఆయోగ్‌- అటల్‌ ల్యాబ్స్‌ సాయంతో పిల్లలు నూతన ఆవిష్కరణలు చేసే దిశగా వారిని ప్రోత్సహిస్తోంది. మరింత ఎక్కువమంది పిల్లల్లో సైన్స్‌ పట్ల ఇష్టాన్ని పెంచేందుకు వయసుల వారీగా రోబోటిక్స్‌ కిట్స్‌ని తయారీచేసి ఇంటికే అందించే ఏర్పాట్లు చేసింది. ఆన్‌లైన్‌ కోర్సుల సాయంతో ఇంట్లోనే పిల్లలు రోబోటిక్స్‌, ఐఓటీ, ఆర్టిఫిషియల్‌ పాఠాల్ని అధ్యయనం చేసేలా ఏర్పాటు చేసింది. ‘ఇంతవరకూ మేం పదివేలమంది పిల్లలకు రోబోటిక్స్‌లో శిక్షణ ఇచ్చాం. ప్రపంచవ్యాప్తంగా జరుగుతున్న రోబోటిక్స్‌ పోటీల్లో ఈ మా పిల్లలే ముందుంటున్నారు. నిజానికి మొదట్లో పిల్లల తల్లిదండ్రులు, విద్యాసంస్థలతో మాట్లాడినప్పుడు
ఆర్టిఫిషియల్‌ ఇంటిలిజెన్స్‌, రోబోటిక్స్‌ వంటివాటిపై ప్రత్యేకంగా శిక్షణ ఇస్తాం అంటే... దాన్నో ఎక్స్‌ట్రా యాక్టివిటీగా భావించేవారే తప్ప రేపటి తరానికి అవసరం అయిన చదువుగా భావించేవారు కాదు. కానీ ఇప్పుడు పరిస్థితి మారిందనుకోండి. ప్రస్తుతం వివిధ సంస్థలు ఇచ్చిన ఫండింగ్‌తో మేం దేశమంతా విస్తరించాలని చూస్తున్నాం’ అంటోంది డింపుల్‌.

Tags :

మరిన్ని

జిల్లా వార్తలు

చదువు సుఖీభవ ఈ-నాడు మకరందం రయ్.. రయ్ సిరి ఈ తరం హాయ్! ఆహా హాయ్ బుజ్జీ స్థిరాస్తి రుచులు

మరిన్ని

రుచులు

App