ఆ ఇంటికన్నా రోడ్డే నయమనుకున్నా..

అర్ధరాత్రి ఆ స్త్రీ తన ఇంటికంటే రోడ్డే పదిలం అనుకుంది! తన ముగ్గురు పసిపిల్లలనీ ఆ ఇంట్లోనే వదిలిపెట్టి ఒంటరి ప్రయాణం మొదలుపెట్టింది.. ఆరోజు ఆమె చేసిన ధైర్యం ఈ రోజు వేలాదిమంది తల్లీపిల్లలకు తోడూ-నీడైంది... ఒంటరి మహిళల్లో షబ్నమ్‌రామస్వామి నింపుతున్న స్ఫూర్తి వెనుక ఉన్న కథ ఇది..

కాజీ షబ్నమ్‌ తండ్రి ఆర్మీలో డాక్టర్‌. పశ్చిమ్‌బెంగాలోని కట్నా ఆమె స్వస్థలం. తండ్రి ఉద్యోగరీత్యా షబ్నమ్‌ ఎన్నో ఊళ్లు తిరగాల్సి వచ్చింది. అలా ఎన్నో సంస్కృతులనీ, భాషలనీ తేలిగ్గానే అర్థం చేసుకుంది. తల్లిదండ్రుల తొందరతో పదహారేళ్లకే వివాహబంధంలోకి అడుగుపెట్టింది. భర్త వయసు 36. వయసుభేదం మాత్రమే ఆమె సమస్య కాదు. అతను పెట్టే శారీరక హింసకు ఏం చేయాలో పాలుపోలేదు. పుట్టింటివాళ్ల నుంచి సాయం ఆశించినా ఫలితం దక్కలేదు. ఇన్ని కష్టాల మధ్యనే ముగ్గురు పిల్లల తల్లికూడా అయ్యింది. ‘ప్రాణాలు తీసుకోవచ్చు... కానీ పిల్లల సంగతేంటి? అని ఆలోచించా. ఒక నీడ కోసం ఆ ఇంట్లో ఉండేదాన్ని. కానీ అలాంటి ఇంటి కంటే... రోడ్డే నయమని. పిల్లల్ని వదిలేసి ఒక రోజు అర్ధరాత్రి కట్టుబట్టలతో... బయటకు వచ్చా’ అనే షబ్నమ్‌ కొన్నాళ్లపాటు స్థానిక రైల్వే స్టేషన్‌లో తలదాచుకుంది. షబ్నమ్‌ ఇంగ్లిష్‌ బాగా మాట్లాడుతుంది. దాంతో ఓ చిన్న ఉద్యోగం సంపాదించింది. ఆ తర్వాత నైట్‌ కాలేజీలో చేరి చదువుకుంటూ.. భర్త నుంచి పిల్లలని తన దగ్గరకు తెచ్చుకుంది. పరిస్థితులు కాస్త చక్కబడ్డాక తనకిష్టమైన ఇంటిరీయర్‌ డిజైనింగ్‌ కోర్సును చదివి స్టూడియోను ప్రారంభించింది. ఆ సమయంలోనే సినీ దర్శకుడు జుగ్ను రామస్వామిని పెళ్లిచేసుకుని షబ్నమ్‌ రామస్వామిగా మారింది. ఇద్దరూ కలిసి గ్రామాల్లో గృహహింస, వేధింపులకు గురవుతున్న మహిళలకు ఆర్థిక చేయూత నిచ్చేందుకు కాంతాకుట్టుపనిలో వారికి శిక్షణ ఇచ్చారు. కాంతా కోఆపరేటివ్‌ సొసైటీని ఏర్పాటు చేశారు. పన్నెండు మంది మహిళలతో మొదలైన ఈ సొసైటీ నేడు 1500మంది సభ్యులతో ఆర్థికంగా పుంజుకుంది. అమెరికా, ఆస్ట్రేలియా లాంటి దేశాలకు ఇక్కడ మహిళలు తయారుచేసిన ఉత్పత్తులు ఎగుమతవుతున్నాయి. ‘జాగృతి పబ్లిక్‌ స్కూల్‌’, ‘ప్రగతి శిక్షానికేతన్‌’ పేరుతో పేదపిల్లల కోసం రెండు స్కూళ్లను ప్రారంభించింది. ప్రస్తుతం ఈ స్కూళ్లలో 1400 మంది చదువుతున్నారు. గృహహింసకు గురవుతూ బయటకు చెప్పలేక మౌనంగా ఉంటున్న మహిళల కోసం ఆమె ప్రత్యేకంగా ఓ బృందాన్ని ఏర్పాటు చేసికి వారికి అండగా ఉంటున్నారు.