ఒక్కసారిగా విమానం ఊగిపోయింది!

చిక్కని చీకట్లో... మిణుకుమిణుకు నక్షత్రాలు ఎప్పుడూ చూసేవే.. కానీ భూగోళపు ఒక కొనపై ఉండి అనంతాకాశాన్ని వీక్షించడం అనే అనుభూతి మాటల్లో చెప్పలేనిది. మళ్లీమళ్లీ సాధ్యం కానిది.. ఈ అందమైన జ్ఞాపకాన్ని మూటగట్టుకోవడానికి పెద్ద సాహసమే చేసి ప్రపంచ రికార్డు సృష్టించారు పైలట్‌ తన్మయి పాపగారి. ఉత్తరధ్రువం మీదుగా బోయింగ్‌ విమానాన్ని నడిపి 16 వేల కిలోమీటర్ల సుదీర్ఘ ప్రయాణం చేసిన ఆమె తన అనుభవాలని వసుంధరతో పంచుకున్నారు...
ఎయిర్‌ ఇండియా పైలట్‌గా 15 ఏళ్ల అనుభవం నాది. పుట్టిపెరిగిందంతా హైదరాబాద్‌లోనే. శ్రీనగర్‌కాలనీలో ఉండేవాళ్లం. దగ్గర్లోని హైదరాబాద్‌ ఫ్లైయింగ్‌ క్లబ్‌ నుంచి విమానాలు ఎగిరినప్పుడల్లా ఎప్పటికైనా వాటిని నడపగలనా అనుకునేదాన్ని. ఆ ఆసక్తే నన్ను ఈ రంగంలో అడుగుపెట్టేలా చేసింది. ఇంటర్‌ వరకు హైదరాబాద్‌లోనే చదువుకున్నా. ఆ తర్వాత ముంబయి ఫ్లైయింగ్‌ క్లబ్‌లో చేరి శిక్షణ తీసుకుని పైలట్‌ అయ్యా. ఎయిర్‌బస్‌ 310 ఫ్లైట్‌లో ఆఫీసర్‌గా కెరీర్‌లో అడుగుపెట్టిన నేను, ప్రస్తుతం బోయింగ్‌ 777 విమానానికి కమాండర్‌గా బాధ్యతలు నిర్వహిస్తున్నా. మావారు సుమిత్‌ డ్రోలియా కూడా బోయింగ్‌ కమాండర్‌గా పనిచేస్తున్నారు. మాకు ఇద్దరు అమ్మాయిలు. ఇక మేం చేసిన ఉత్తర ధ్రువం ప్రయాణం విషయానికొస్తే...
16 వేల కిలోమీటర్ల దూరం.. 17 గంటల నాన్‌స్టాప్‌ ప్రయాణం... అదికూడా ప్రతికూల వాతావరణ పరిస్థితులు ఉండే ఉత్తరధ్రువం మీదుగా బోయింగ్‌ విమానాన్ని శాన్‌ఫ్రాన్సిస్కో నుంచి బెంగళూరుకి నడపాలి. ఆ బాధ్యతని నేనూ, మా కెప్టెన్‌ జోయాసింగ్‌తో పాటూ మరో ఇద్దరు మహిళా పైలట్లు తీసుకున్నాం. ఎంతో అనుభవం ఉన్నవాళ్లకే దక్కే ఈ అవకాశం ప్రభుత్వ చొరవతో మాకు దక్కింది. దాన్ని ఏ ఆటంకాలు లేకుండా విజయవంతంగా పూర్తిచేయాలనుకున్నాం. ఈ ప్రయాణం ఎంత క్లిష్టతరంగా ఉంటుందో మాకు తెలుసు. అందుకే అక్కడి వాతావరణ పరిస్థితులతోపాటు, అవి మా ఆరోగ్యంపై చూపించే ప్రభావం వరకూ అన్నింటికీ సిద్ధపడ్డాం. పోలార్‌ బ్రీతింగ్‌ వంటి అంశాల్లో కఠినమైన శిక్షణ తీసుకున్నాం. ఉత్తరధ్రువంలో భిన్నమైన వాతావరణ పరిస్థితులుంటాయి. ముఖ్యంగా సోలార్‌ రేడియేషన్‌ ప్రభావం వల్ల ఇక్కడ విమానం నడపడం కష్టమవుతుంది. కమ్యునికేషన్‌లోనూ ఇబ్బందులు తలెత్తుతాయి. ఎలాంటి పరిస్థితులున్నా, మాతోపాటూ ప్రయాణిస్తున్న 235 మంది ప్రయాణీకులూ, 12 మంది క్యాబిన్‌ క్రూ బాధ్యత కూడా మాదేకాబట్టి ఎన్నో జాగ్రత్తలు తీసుకున్నాం. ధైర్యంతో ముందడుగు వేశాం. ఎన్ని జాగ్రత్తలు తీసుకున్నా ప్రయాణం మధ్యలో మంచు, శీతగాలుల ప్రభావంతో విమానం మూడు నాలుగుసార్లు కుదుపులకు గురయ్యింది. కాసేపటికే ధైర్యంగా విమానాన్ని మా నియంత్రణలోకి తీసుకొచ్చాం. ఉత్తర ధ్రువంపైన మొత్తం మూడుగంటల ప్రయాణం అంతా సజావుగా పూర్తిచేశాం. ఇంతవరకూ అసాధ్యం, కష్టం అనుకున్న ప్రయాణాన్ని మేం సాధ్యం చేసి చూపించాం.

చిమ్మచీకట్లో కాక్‌పిట్‌ అద్దాల్లోంచి ఆకాశాన్ని చూసిన ఆ దృశ్యాన్ని నా జీవితంలో మర్చిపోలేను. మొత్తం దూరాన్ని మేం నలుగురం ఇద్దరిద్దరం ఎనిమిది గంటల చొప్పున నడిపాం. మా సాహసయాత్రలో తామూ భాగస్వాములు కావాలని చాలామంది టికెట్లు ముందుగానే బుక్‌ చేసుకున్నారు. వారంతా చిన్నపిల్లల్లా కేరింతలు కొడుతుంటే మాకూ చాలా సంతోషంగా అనిపించింది. అలాగే ఈ అద్భుతమైన, సాహసోపేతమైన రికార్డును సాధించి మహిళలందరినీ గర్వపడేలా చేయడం చాలా ఆనందంగా ఉంది.

Tags :