ప్రకృతితో కొత్తబాటలు...

తలపండిన రైతులే వ్యవసాయం నష్టం అనుకుంటున్న వేళ....ఓ పక్క కాలేజీకి వెళ్తూనే ప్రకృతి వ్యవసాయం చేసి ఎకరాకు 45 బస్తాలు పండిస్తోంది శ్రీవనిత. ‘ప్రకృతి ఒడిలో’పేరుతో ఓ యూట్యూబ్‌ ఛానెల్‌ స్టార్ట్‌ చేసి నవతరంలో స్ఫూర్తిని నింపుతున్న ఆమె ఉపరాష్ట్రపతి వెంకయ్యనాయుడు చేతుల మీదుగా అవార్డుని అందుకోవడం విశేషం...
మార్పు కోరుకోవడం కాదు...ఆ దిశగా మొదటి అడుగు మనమే వేయాలంటోంది పెద్దపల్లి జిల్లా ముత్తారం మండలంలోని హరిపురం గ్రామానికి చెందిన శ్రీవనిత.

‘పంట దిగుబడి కోసం...అమ్మానాన్నలు రసాయనిక ఎరువులు, పురుగు మందులు వాడటం ఏళ్లుగా చూస్తూనే ఉన్నా. దీనివల్ల ఏటికేడు పరిస్థితి మరింత దిగజారిపోయింది. భూమి చౌడు బారిపోయింది. ఇదంతా నాకెందుకో సరైన పద్ధతి కాదనిపించింది. అసలు పూర్వీకులు ఎలా పండించేవారు అని ఆసక్తి కొద్దీ తెలుసుకోవడం మొదలుపెట్టా. ఇప్పుడు విత్తనాల దగ్గర్నుంచి ఎరువుల వరకూ అన్నింటా రసాయనాల ప్రభావమే అని తెలిసి బాధేసింది. ఆ విషయమే నాన్నతో, ఇతర రైతులతో మాట్లాడా. వాళ్లంతా రసాయనాలు వాడకుండా ప్రకృతి విధానంలో సాగు చేస్తే...దిగుబడులు రావని చెప్పేవారు. కానీ ఆ దిశగా అడుగులు వేయాలని బలంగా అనుకున్నా. క్రమంగా ప్రకృతి సాగుకు అయ్యే ఖర్చు, రైతులకు అయ్యే పెట్టుబడులపై సమగ్ర అధ్యయనం చేసేందుకు ప్రకృతి సేద్యం తరగతులకు హాజరయ్యేదాన్ని. జీవామృతం, ఘనజీవామృత వినియోగం వంటి పద్ధతుల ద్వారా చీడ పీడలు నివారించవచ్చని తెలుసుకున్నా. ఇదంతా కాలేజీకి వెళ్లొస్తూ సెలవురోజుల్లో చేసేదాన్ని. క్రమంగా అమ్మానాన్నలు తిరుపతిరెడ్డి, పుష్పలతతో కలిసి వెళ్లి పొలం పనులు చేసేదాన్ని. కాస్త పట్టు వచ్చి, నమ్మకం కుదిరాక ప్రకృతి విధానంలో దేశీయ వరిసాగు చేయాలని నిర్ణయించుకున్నా. ఆ విషయం తెలిసి అంతా ఎందుకు నీకంత శ్రమ, నష్టాల బారిన పడతావు జాగ్రత్త అని హెచ్చరించారు. కానీ అవేవీ పట్టించుకోలేదు. ఎందుకంటే ఏదైనా స్వయంగా చూస్తేనే కదా లోటుపాట్లు తెలిసేది. అలా వరితో మొదలుపెట్టి ఎనిమిదేళ్లుగా పసుపు, మునగ, దేశీయ వరి రకాలయిన నవారా, రక్తశాలీ, కాలబట్టి, చిట్టి ముత్యాలు వంటివి సాగు చేస్తున్నా. ఏటికేడు భూసారాన్ని పెంచుకోవడంతో పాటు అధిక దిగుబడులను సాధించగలుగుతున్నా. ప్రస్తుతం ఎకరానికి నలభైఐదు బస్తాలు అందుకుంటున్నా’ అంటారు శ్రీవనిత.

నలుగురికీ దారి చూపిస్తూ... తాను ప్రకృతి వ్యవసాయం చేయడమే కాదు...నలుగురికీ దారి చూపించాలనుకుంది వనిత. అందుకే ‘ప్రకృతి ఒడిలో’ పేరుతో యూట్యూబ్‌ ఛానెల్‌ ఏర్పాటు చేసి అవగాహన కల్పిస్తోంది. ఇలా ఇందులో 250కిపైగా వీడియోలను అప్‌లోడ్‌ చేసింది. 10 మంది సాప్ట్‌వేర్‌ ఉద్యోగులతో పాటు పదుల సంఖ్యలో స్థానికులను ఈ దిశగా నడిపించడంలో విజయం సాధించింది వనిత. అంతేకాదు తాను పండించే పంట ఉత్పత్తులతో పాటు వరి వంగడాలను సామాజిక మాధ్యమాల ద్వారా నామమాత్రపు రుసుముకే అందిస్తోంది. ఈ మధ్యే ముప్పవరపు ఫౌండేషన్‌, రైతునేస్తం సంస్థలు సంయుక్తంగా అందించిన పురస్కారాన్ని ఉపరాష్ట్రపతి వెంకయ్యనాయుడు చేతులమీదుగా అందుకుంది.

- ఎం. గణేష్‌కుమార్‌, ఈనాడు డిజిటల్‌, పెద్దపల్లి

Tags :