గర్ల్‌ ట్రైబ్‌ ఇక్కడ వేధింపులు ఉండవ్‌!

‘గర్ల్‌ ట్రైబ్‌’... ఈ ఆన్‌లైన్‌ గ్రూప్‌ మహిళలకు మాత్రమే! అరవైవేలమంది సభ్యులుగా ఉన్న వేదికపై మహిళలంతా ఒకరికొకరు అండగా ఉంటారు.. తమ కెరీర్లు, వ్యాపారాలు, కష్టసుఖాల గురించి నిస్సంకోచంగా చర్చించుకుంటారు. అయితే ఎక్కడా ట్రోలింగులు, కించపరచడాలు... లైంగిక వేధింపులు ఎదురుకావు. దీని రూపకర్త ‘మిస్‌ మాలిని’ ఇలాంటి వేదికని ప్రారంభించడానికి కారణమేంటో తెలుసుకుందాం...

‘మిస్‌ మాలిని’గా అంతర్జాల ప్రపంచానికి తెలిసిన ఆమె అసలు పేరు మాలినీ అగర్వాల్‌. ఫోర్బ్స్‌ మెచ్చిన వ్యాపారవేత్త. బ్లాగర్‌, రచయిత మాత్రమే కాదు డ్యాన్సర్‌ కూడా. అలహాబాద్‌లో పుట్టిన మాలిని దిల్లీ విశ్వవిద్యాలయంలో ఇంగ్లిష్‌ లిటరేచర్‌ పూర్తిచేసింది. తర్వాత తన కలలని నిజం చేసుకోవడానికి రెండే సూట్‌కేసులతో ముంబయిలో అడుగుపెట్టింది. ఆరుగురు అమ్మాయిలతో కలిసి ఒక ఇంట్లో అద్దెకు ఉండేది. డ్యాన్సర్‌గా ఎదగాలని ముంబయి వచ్చిన మాలినికి ఎఫ్‌ఎంలో ఆర్జేగా పనిచేసే అవకాశం వచ్చింది. ‘మాలినీస్‌ ముంబయి’ పేరుతో ముంబయి ప్రేక్షకుల కోసం బాలీవుడ్‌ ప్రముఖులని ఇంటర్వ్యూ చేసేది. మరోపక్క మిడ్‌-డే పత్రికలో కాలమిస్ట్‌గా కూడా సేవలు అందించేది. తనకున్న డ్యాన్స్‌ పరిజ్ఞానం వల్ల ఎమ్‌టీవీ, వీ ఛానెల్స్‌లో కొన్ని విభాగాలకు హెడ్‌గా కూడా పనిచేసింది. ఇన్ని చేసినా మనసులో ఒక కోరిక ఉండేది. ముంబయిలో తాను తెలుసుకున్న విశేషాల గురించీ, ఎక్కడెక్కడ నుంచో ఇక్కడకు వచ్చి తమ కలలని నెరవేరవేర్చుకోవాలనుకొనే మిలీనియల్స్‌ గురించి తన బ్లాగ్‌లో రాయాలనుకుంది. అలా 2008లో ‘మిస్‌ మాలిని’ పేరుతో ఒక బ్లాగ్‌ని ప్రారంభించింది. ఆ తర్వాత కాలంలో ఆ బ్లాగ్‌ కాస్తా జనాదరణ పొందిన బాలీవుడ్‌ వెబ్‌సైట్‌గా మారిపోయింది. ఆదాయాన్ని కూడా తెచ్చిపెట్టింది. యువవ్యాపారవేత్తగా ఫోర్బ్స్‌ ఆమెని మెచ్చుకుంది. అలా మాలినీ అగర్వాల్‌ కాస్త మిస్‌ మాలినిగా గుర్తింపుని పొందింది. ఇవన్నీ చేస్తున్న క్రమంలోనే అంతర్జాల ప్రపంచంలో ఎదురైన కొన్ని సవాళ్లు ఆమెని ఆలోచింప చేశాయి.
చాలామంది మహిళలు అంతర్జాల వేదికలపై మనసు విప్పి మాట్లాడాలంటే భయపడతారు. కారణం... ఆ మాటలు ఎక్కడ ట్రోలింగ్‌కు గురవుతాయో తెలియదు. ఎవరు ఎలాంటి కామెంట్లు పెడతారోననే భయం. ఫొటోలని మార్ఫింగ్‌ చేసి లైంగిక వేధింపులకు పాల్పడే అవకాశమూ ఉంది. ఒక మహిళగా వీటిపై మాలినీకి కొన్ని దృఢమైన అభిప్రాయాలు ఉన్నాయి. ఆ క్రమంలోనే 2018లో మహిళలకు ఒక సురక్షితమైన వేదికని రూపొందించాలనే ఉద్దేశంతో ఫేస్‌బుక్‌లో 100 మంది అమ్మాయిలతో ‘గర్ల్‌ ట్రైబ్‌’ పేరుతో ఒక గ్రూప్‌ని మొదలుపెట్టింది.
ఈ గ్రూపులో ట్రోలింగులు, నెగెటివ్‌ కామెంట్లు, లైంగిక వేధింపులు వంటివి లేకుండా జాగ్రత్త పడింది. చూస్తుండగానే ఆ గ్రూప్‌లో 60,000 మంది మహిళలు సభ్యులుగా చేరారు. ‘సామాజిక మాధ్యమాలు వచ్చిన కొత్తలో నెట్‌వర్కింగ్‌, స్నేహాలు వీటికే ప్రాధాన్యం ఉండేది. కానీ ప్రస్తుతం అలా లేదు. లైక్స్‌, ఫాలోవర్స్‌ సంస్కృతి పెరిగింది. దాంతో ఒకరినొకరు దూషించుకోవడం మొదలైంది. ట్రోలింగ్‌, కామెంట్లు, లైంగిక హింస విస్తరించింది. ఈ ఇబ్బందుల్లేకుండా మహిళల్లో మానసిక ఒత్తిడిని తగ్గించేందుకు ఓ సురక్షితమైన వేదికను ఏర్పాటు చేయాలని అనుకున్నా. అందుకోసమే ఒక్కో ప్రొఫైల్‌ని పరీక్షించి వారి వివరాలు తెలిశాకే గ్రూప్‌లో సభ్యులుగా చేర్చేవాళ్లం. ఇలా జల్లెడ పట్టడానికి ప్రత్యేకంగా ఒక బృందాన్ని ఏర్పాటు చేశాను. ఇక్కడ మహిళలు ఒకరితో ఒకరు నిస్సంకోచంగా తమ అభిప్రాయాలని పంచుకోవచ్చు. తమ కష్టసుఖాలు కలబోసుకోవచ్చు. ఈ గ్రూప్‌కి వచ్చిన ఆదరణ వల్ల ‘గర్ల్‌ ట్రైబ్‌’ అనే యాప్‌ని కూడా ప్రారంభించా’ అంటోంది మాలిని.
గర్ల్‌ ట్రైబ్‌ గ్రూపులో.. లైక్స్‌, ఫాలోవర్స్‌, కామెంట్లు వంటివి ఉండవు. ఇక్కడ ఎవరైనా సభ్యులు అర్థవంతమైన చర్చ లేవదీస్తే వారికి పాజిటివ్‌ పాయింట్స్‌ అందుతాయి. తోటి సభ్యులని ప్రోత్సహిస్తే గుడ్‌వైబ్స్‌ పాయింట్లుగా అందుతాయి. వీటిని వాడుకుని గర్ల్‌ ట్రైబ్‌ స్టోర్‌ నుంచి నచ్చిన ఉత్పత్తులని కొనుగోలు చేసుకోవచ్చు. ఇతరులకు ఎంత ఎక్కువ మేలు చేస్తే అన్ని పాయింట్లు అందుతాయన్న మాట. ‘స్త్రీకి స్త్రీయే శత్రువు అనేది పాత సామెత. ఆడవాళ్లు ఒకరికొకరు సహకరించుకుంటే ఎంత ఎదుగుతారో చూపించాలనుకున్నా’ అందుకే ఈ ప్రయత్నం అంటోంది మాలిని.