పోషకాల జీవగర్ర

కలోంజి, నల్లజీలకర్ర, ఉల్లివిత్తనాలు... పేరేదైనా వీటి వల్ల కలిగే లాభాలు బోలెడు. రోగనిరోధకతను పెంచే వీటితో కలిగే లాభాలు తెలుసుకుందాం..

ఈ విత్తనాల పొడిని బ్రెడ్‌, బిస్కట్లు, రొట్టెలు, ఇడ్లీ, టీ, సూప్స్‌ల్లో వేసుకుని తీసుకుంటారు. ఉత్తర భారతంలో వాడే పాంచ్‌ పూరణ్‌ మసాలాల్లో దీన్నీ వాడతారు. వేయించిన పొడిని పప్పులు, కూరల్లో వేసుకోవచ్ఛు

ఖనిజాలు మెండు: కలోంజి విత్తనాల పొడి రుచి వైవిధ్యంగా ఉంటుంది. ఉల్లి, మిరియాల రుచిని తలపిస్తుంది. వీటిలో క్యాల్షియం, మెగ్నీషియం, పొటాషియం, ఫాస్ఫరస్‌, సోడియం, జింక్‌, మాంగనీస్‌, కాపర్‌, ఐరన్‌ ఖనిజ పోషకాలుంటాయి. ఈ విత్తనాల్లోని థైమో క్వినోన్‌ బయోయాక్టివ్‌ కాంపోనెంట్‌గా పనిచేస్తుంది. ఇది చాలా రకాల అనారోగ్య సమస్యల నుంచి ఉపశమనాన్నిస్తుంది.

* హానికారక బ్యాక్టీరియా, సూక్ష్మజీవుల నుంచి జీర్ణాశయాన్ని కాపాడతాయివి. శక్తిమంతమైన యాంటీబ్యాక్టీరియల్‌గా పనిచేస్తాయి. వీటి వాడకం వల్ల ఎలాంటి దుష్ప్రభావాలు ఉండవు. క్షయ, మలేరియా, మూత్రపిండాల్లో రాళ్లు, మూత్రపిండాల జబ్బులకు వీటిని మందుగా వాడతారు.

* గర్భిణులకు చక్కటి ఆహారం. వీటిలోని థైమో క్వినోన్‌ పాల ఉత్పత్తిని పెంచుతుంది.

* ఇన్సులిన్‌ ఉత్పత్తిని పెంచి మధుమేహాన్ని అదుపులో ఉంచుతాయి.

* తేనె, కలోంజీ విత్తనాల పొడి, వెల్లుల్లిని కలిపి ఔషధంగా తయారుచేస్తారు. దీన్ని వాడితే జలుబు, దగ్గు తగ్గుతాయి.

జాగ్రత్త: చాలా ఎక్కువ మోతాదులో వీటిని తీసుకోకూడదు.

- డాక్టర్‌ జానకీ శ్రీనాథ్‌ పోషకాహార నిపుణులు

Tags :