సూపర్‌ పోలీస్‌... సీమ!

దిల్లీ ప్రజలే కాదు... పోలీసులు సైతం హెడ్‌ కానిస్టేబుల్‌ సీమా ధాకాని నువ్వు ‘సూపర్‌ కాప్‌’వి అంటూ పొగడ్తలతో ముంచెత్తుతున్నారు. పొగడటమే కాదు... అసిస్టెంట్‌ సబ్‌ఇన్‌స్పెక్టర్‌గా పదోన్నతి కూడా అందించారు. ఇంతకీ సీమ ఏం సాధించిందనే కదా మీ సందేహం. దిల్లీలోని సమయ్‌పుర్‌బద్లీ పోలీస్‌స్టేషన్‌లో హెడ్‌కానిస్టేబుల్‌గా పనిచేస్తున్న ఆమె కేవలం మూడంటే మూడు నెలల్లో 76 మంది తప్పిపోయిన చిన్నారులని వెతికిపట్టుకుని వాళ్ల తల్లిదండ్రుల కళ్లల్లో వెలుగులు నింపింది. లాక్‌డౌన్‌ సమయంలో రైళ్లు తిరగకపోయినా సరే ఎంతో శ్రమకోర్చి.. పంజాబ్‌, పశ్చిమబెంగాల్‌ వంటి ప్రాంతాల్లో ప్రయాణం చేసి పిల్లలని వెతికిపట్టుకుంది. వాస్తవానికి దిల్లీలో గతకొన్నేళ్లుగా పిల్లల మిస్సింగ్‌ కేసులు ఎక్కువ కావడంతో అధికారులకు అది పెద్ద తలనొప్పిగా మారింది. దాంతో పోలీసులు ఈ ఏడాది ఆగస్టులో ఒక ప్రోత్సాహక పథకాన్ని ప్రవేశపెట్టారు. తప్పిపోయిన పిల్లలని వెతికి తెచ్చిన పోలీసులకు... నిబంధనలకు అతీతంగా ఓటీపీ (అవుట్‌ ఆఫ్‌ టర్న్‌) ప్రమోషన్‌ని అందిస్తారు. ఈ అవకాశాన్ని సద్వినియోగం చేసుకుని పదోన్నతి అందుకున్న తొలిమహిళ సీమాధాకా. యూపీకి చెందిన ఈమె రైతు కూతురు. వివాహం అయిన తర్వాత దిల్లీలో స్థిరపడింది. ఆమెకు ఎనిమిదేళ్లబాబు కూడా ఉన్నాడు.