ఆ సంఘటనలే గుర్తొస్తున్నాయి!

నా వయసు 22. రెండేళ్ల కిందట నాకో ప్రమాదం జరిగింది. అప్పుడు నా ఆరోగ్యం కూడా బాగాలేదు. ఆపైన యాక్సిడెంట్‌ జరగడంతో మానసికంగా షాక్‌లోకి వెళ్లిపోయా. ఏ పని మీదా దృష్టి పెట్టలేకపోయా. మానసిక నిపుణులు సూచించిన మందులు కొన్నాళ్లు వాడి మధ్యలోనే మానేశా. దాంతో కొద్దిరోజుల తరువాత భయంగా అనిపించడం, విపరీతమైన ఒత్తిడి.. లాంటి సమస్యలు మళ్లీ మొదలయ్యాయి. దీనికి పరిష్కారం ఏంటి?

- ఓ సోదరి

మూలిగే నక్క మీద తాటిపండు పడ్డట్లు... ఆరోగ్యం బాగాలేనప్పుడే మీరు తీవ్రమైన ప్రమాదానికి గురవడం బాధాకరం. ఆ సంఘటనతో మీరు తీవ్రమైన భయాందోళనలకు గురయ్యారు. ఫలితంగా మానసికంగానూ దెబ్బ తిన్నారు. కొన్నాళ్లపాటు మందులు వాడటంవల్ల మీలోని భయాందోళనలూ, ఒత్తిడి తగ్గాయి. వాటిని మానేయడంతో మళ్లీ మొదలయ్యాయి. దీన్ని వైద్య పరిభాషలో ‘పోస్ట్‌ ట్రమాటిక్‌ స్ట్రెస్‌ డిజార్డర్‌’ అని అంటారు. దీనిలో ఏమవుతుందంటే... భయంకరమైన సంఘటనలు జరిగిప్పుడు, ప్రమాదాలకు గురైనప్పుడు మనసు ఆ దృశ్యాలను తట్టుకోలేక తీవ్రమైన ఆందోళనకు లోనవుతుంది. ఆ తరువాత తీవ్రత కాస్త తగ్గినప్పటికీ దాని ప్రభావం చాలాకాలంపాటు ఉంటుంది. ఆ దృశ్యాలు, సంఘటనలు పదే పదే గుర్తుకు వస్తుండటంతో ఆందోళన పెరగడం, నిద్రపట్టకపోవడం, దేనిమీదా ఏకాగ్రత పెట్టలేకపోవడంలాంటి సమస్యలు మొదలవుతాయి. మందులు మానడంవల్ల ఈ సమస్య రాలేదు. భయం కలిగించే సంఘటనలు పదే పదే మనసులో మెదులుతుండటంవల్ల మీకు తెలియకుండానే ఒత్తిడి, భయానికి లోనవుతున్నారు. మీరు మరోసారి సైకియాట్రిస్ట్‌ను సంప్రదించండి. ఆందోళన తగ్గడానికి కొంతకాలంపాటు మందులు వాడాల్సి ఉంటుంది. స్ట్రెస్‌ వల్ల వచ్చే ఆలోచనలు తగ్గించుకోవడానికి కౌన్సెలింగ్‌ అవసరమవుతుంది. అలాగే భవిష్యత్తులో అనుకోకుండా ఎదురయ్యే తీవ్ర సంఘటనలను తట్టుకునేలా స్ట్రెస్‌ మేనేజ్‌మెంట్‌, డీసెన్సిటైజేషన్‌ థెరపీలు ఇస్తారు.