తన కష్టం ఎవరికీ వద్దని...

ఓ విజేత కథ

కుటుంబానికి అండగా ఉంటాడనుకున్న భర్త వేధింపుల పాలుచేస్తే... కుంగిపోలేదామె. ధైర్యంగా పోరాడింది. పరిస్థితులని చక్కదిద్దుకుంటూ పోలీస్‌ అధికారిణి అయ్యింది. అంతర్జాతీయ క్రీడాకారిణిగా రాణించి వందల బంగారు పతకాలని సొంతం చేసుకుంది. అంతటితో ఆగిపోకుండా ఖాళీ సమయాల్లో కుట్టు పనిచేస్తూ ఆ వచ్చిన డబ్బుతో అనాథలకు అండగా ఉంటోంది కర్నూలు జిల్లాకు చెందిన ఏఎస్సై నేమిపాటి లక్ష్మీదేవి..
‘ఆరడుగుల బుల్లెట్‌’.. లక్ష్మీదేవిని పోలీసు శాఖలోని ఆమె సహోద్యోగులంతా ఇలానే అభిమానంగా పిలుచుకుంటారు. అలా పిలవడానికి కారణం ఉంది. ధైర్యానికి చిరునామాగా ఉండే లక్ష్మీదేవి జిల్లా ఆర్మ్‌డ్‌ రిజర్వ్‌డ్‌ బాంబ్‌ స్క్వాడ్‌ విభాగంలో 16 ఏళ్లపాటూ పనిచేశారు. ప్రస్తుతం టూటౌన్‌ కమాండ్‌ కంట్రోల్‌ రూమ్‌లో ఏఎస్సైగా విధులు నిర్వహిస్తున్నారు. తన కెరీర్‌లో ఎంతో మంది స్త్రీల జీవితాలకు న్యాయం చేసిన లక్ష్మీదేవి ఒకప్పుడు స్వయంగా గృహహింస బాధితురాలే ఇక్కడ చెప్పుకోవలసిన విషయం. కర్నూలులోని బొల్లవరం గ్రామం లక్ష్మీదేవి సొంతూరు. హైస్కూల్‌ రోజుల నుంచే క్రీడాకారిణిగా రాణిస్తున్న ఆమెకు చిన్నవయసులోనే పెళ్లికావడంతో చదువు, ఆటలను పక్కన పెట్టి కుటుంబానికే పరిమితం అయ్యారామె. కానీ కొన్నేళ్లకే భర్త నిజస్వరూపం బయటపడింది. అతని నుంచి కుటుంబానికి సహకారం లేకపోగా వేధింపులు ఎక్కువవ్వడంతో పిల్లలతో పుట్టింటికి వచ్చేశారు. చుట్టుముట్టిన ఆర్థిక ఇబ్బందుల్ని అధిగమించడానికి ఆత్మవిశ్వాసంతో ముందడుగు వేశారు. తనెంతో ఇష్టపడే ఆటలనే తన జీవితానికి ఊతంగా మలుచుకున్నారు. 1991లో క్రీడా కోటాలో పోలీసు శాఖలో కొలువు సాధించారు. భర్త ఓ ప్రమాదంలో మరణించడంతో కుటుంబ బాధ్యతలు పూర్తిగా భుజాలపై వేసుకున్న లక్ష్మీదేవి... మరోవైపు కబడ్డీలో అంతర్జాతీయ క్రీడాకారిణిగా రాణించారు. పోలీసు శాఖలో కొలువు సాధించాక అంతర్జాతీయ స్థాయిలో అథ్లెటిక్స్‌, వెయిట్‌ లిఫ్టింగ్‌, షాట్‌పుట్‌, హేమర్‌ త్రో, డిస్కస్‌త్రోలో పతకాలు సాధించి శెభాష్‌ అనిపించుకున్నారు. ఇప్పటివరకు 139 బంగారు పతకాలతో సహా 236 పతకాలు సాధించారు.
తీరిక సమయంలో టైలరింగ్‌, పెళ్లిళ్లలో మెహెందీ పెడుతూ ఆ వచ్చే డబ్బుతో అనాథలకు సాయం చేస్తున్నారు లక్ష్మీదేవి. కర్నూలు జిల్లా గోనెగండ్ల మండల పరిధిలోని గంజళ్ల గ్రామానికి చెందిన అంధుడు నగేష్‌ను తన సొంత ఖర్చుతో చదివించి డిగ్రీ పూర్తిచేసేలా చేశారు. అనాథ పిల్లలు చదువుకోవడానికి కావాల్సిన సాయం చేస్తున్నారు. మహిళలు ఆర్థికంగా నిలదొక్కుకోవాలన్న లక్ష్యంతో ఆత్మకూరు, కర్నూలు ప్రాంతాల్లోని మహిళలకు టైలరింగ్‌లో, మగ్గం వర్కులో నైపుణ్యాలు ఇచ్చి వాళ్లు ఆర్థికంగా స్థిరపడేలా చేశారు. పదవీవిరమణ వరకు నాకిష్టమైన క్రీడల్లో పాల్గొంటూనే ఉంటాను. ఆ తర్వాత ఓ అనాథశ్రమం నిర్వహించాలనేది నా లక్ష్యం అని చెబుతున్నారు లక్ష్మీదేవి.

- యడ్లపాటి బసవ సురేంద్ర, ఈనాడు డిజిటల్‌, కర్నూలు

Tags :

మరిన్ని

జిల్లా వార్తలు

చదువు సుఖీభవ ఈ-నాడు మకరందం రయ్.. రయ్ సిరి ఈ తరం హాయ్! ఆహా హాయ్ బుజ్జీ స్థిరాస్తి రుచులు

మరిన్ని

రుచులు

App