చదివి ఏం చేస్తావనిహేళన చేసేవారు...

ఆమె పేరు జరీన్‌ బేగం యూసప్‌ఖాన్‌. వయసు 24 ఏళ్లు. నివసించేది థానేకి సమీపంలోని ముంబ్రా ప్రాంతం. తండ్రి, ఇద్దరు సోదరులు కలిసి మెకానిక్‌ షెడ్‌లో పని చేసి ఆ కుటుంబాన్ని పోషిస్తారు. ఈమెకు ఓ తోబుట్టువు. డిగ్రీ చదువుతోంది. తల్లి గృహిణి. మొత్తం ఈ ఆరుగురూ నివసించేది ఓ చిన్న గదిలో. అటువంటి పేద కుటుంబంలో పుట్టిన జరీన్‌బేగం ఇప్పుడు వార్తలకెక్కింది. తనలాంటివారెందరికో స్ఫూర్తిగా నిలిచింది. ఇంతకీ ఆమె సాధించిన విజయమేంటంటే... ఛార్టెడ్‌ అక్కౌంటెన్సీ (సీఏ) ఇంటర్మీడియెట్‌ పరీక్షల్లో ఈ ఏడాది అత్యధిక శాతం మార్కులతో దేశంలోనే మొదటి ర్యాంకును సాధించడమే.  పెద్ద చదువులు చదివి ఏం చేద్దామనుకుంటున్నావని హేళన చేసినవారందరికీ సమాధానంగా తానేంటో నిరూపించి చూపించింది జరీన్‌.
తెల్లవారిందంటే చాలు. ఉన్న ఆ ఒక్క గదీ... సందడిగా మారుతుంది. ఎవరికివాళ్లు నిద్ర లేచి పనుల్లోకి వెళతారు. ఓవైపు తల్లి రోటీ చేస్తూ ఉంటుంది. ఆ సమయంలో జరీన్‌బేగం తన చదువును వాయిదా వేసేది. రాత్రి అందరూ నిద్రలోకి జారుకున్న తర్వాత చిన్న లైట్‌ వెలుతురులో పుస్తకం ముందు కూర్చునేది. అలా తెల్లారేవరకు చదువుతూనే ఉండేది. డిగ్రీ అయ్యేంతవరకు జరీన్‌కు అసలు... సీఏ గురించి తెలీదు.  తోబుట్టువు ఇచ్చిన సలహా మేరకు సీఏ కోర్సుకు దరఖాస్తు చేసుకుంది. అంత సులువుగా పూర్తయ్యే కోర్సుకాదని తెలుసుకున్న ఈమె పీజీ చేయడానికి రెండేళ్లపాటు విరామం కూడా తీసుకుంది. గతేడాది నవంబరులో సీఏ ఇంటర్‌ పరీక్షలకు హాజరైంది. తాజాగా విడుదలైన పరీక్షా ఫలితాల్లో మొత్తం 700కు 461 మార్కులు సాధించి దేశంలోనే మొదటి ర్యాంకులో నిలిచింది జరీన్‌ బేగం.
నా కుటుంబమే నా బలం...
ఆర్థిక ఇబ్బందులెన్నెదురైనా నా చదువెక్కడ ఆగిపోతుందో అని అమ్మ ఏదీ మావద్ద చెప్పేది కాదు.. అంటోంది జరీన్‌. ‘నాన్న, అన్నయ్యలు చదువులో నన్ను ప్రోత్సహించేవారు.   నేను డిగ్రీ, పీజీలో మొదటిర్యాంకు తెచ్చుకున్నప్పుడు మా బంధువులు, తెలిసినవారందరూ ‘చదివి, ఏం చేస్తావు’ అని హేళన చేసేవారు. ఈ మాటలు నాలో మరింత పట్టుదలను పెంచాయి. అందుకే కష్టమని తెలిసినా సీఏ కోసం నావంతు కృషి చేశా. రోజుకి 10 నుంచి 16 గంటలు చదివేదాన్ని. ఫరీదాబాద్‌లోని ఓ ఇనిస్టిట్యూట్‌ ద్వారా ఆన్‌లైన్‌ కోచింగ్‌ తీసుకున్నా. గతేడాది మేలో జరగాల్సిన ఈ పరీక్షలు కొవిడ్‌ కారణంగా నవంబరులో జరిగాయి. దాంతో అన్నింటినీ రివైజ్‌ చేసుకుంటూ ఉండేదాన్ని. ఫలితాల్లో మంచిమార్కులు వస్తాయని తెలుసు. అయితే  దేశంలోనే మొదటి వ్యక్తిగా నిలుస్తానని అనుకోలేదు. ఆన్‌లైన్‌లో పరీక్షా ఫలితాలు చూసి నన్ను నేనే నమ్మలేకపోయా. తెలిసినవారందరూ అభినందిస్తుంటే అమ్మానాన్న చాలా సంతోషపడటం నాకు గర్వంగా ఉంది. ఆడపిల్ల అయితేనేం అనుకున్నది సాధించి చూపెడుతుందనేదానికి నేనే సాక్ష్యం. ప్రస్తుతం ఆర్టికల్‌షిప్స్‌నకు దరఖాస్తు చేస్తున్నా.  ఈ ఏడాదిలో జరిగే చివరి పరీక్షకు సిద్ధమవుతున్నా’ అని చెబుతోందామె.

Tags :

మరిన్ని

జిల్లా వార్తలు

చదువు సుఖీభవ ఈ-నాడు మకరందం రయ్.. రయ్ సిరి ఈ తరం హాయ్! ఆహా హాయ్ బుజ్జీ స్థిరాస్తి రుచులు

మరిన్ని

రుచులు

App