Inspiration: ఊరికి ఊతంగా నిలిచింది!
close
Published : 10/05/2021 07:12 IST
Facebook Share Twitter Share WhatsApp Share Telegram Share Link Share

Inspiration: ఊరికి ఊతంగా నిలిచింది!

‘ఊతకర్రల సాయం లేనిదే కాలు కూడా కదపలేవు... ఓ మనిషి ఆసరా లేనిదే ఎక్కడికీ వెళ్లలేవు.. సర్పంచ్‌గా ఊరినేం ఉద్దరిస్తావ్‌?’  అంటూ వెక్కిరించిన వారి నోళ్లను మూయించిందామె. అంతే కాదు వారి చేతే ‘శెభాష్‌ కవిత’ అనిపించుకుంది.
హెగావ్‌, వాల్గడ్‌ గ్రామాలకు చెందిన యువ సర్పంచ్‌ 34 ఏళ్ల కవితా భోండ్వే... ఇంటర్‌ చదివిన ఈమె తొమ్మిదేళ్లుగా మహారాష్ట్ర, నాసిక్‌ జిల్లా, దిండోరి తాలుకాలోని రెండు గ్రామాలకు సర్పంచ్‌గా సేవలందిస్తోంది.
ఎన్నికైన వెంటనే రహదారుల నిర్మాణం, మంచినీటి సరఫరా, పేదలకు పక్కా ఇళ్లు లాంటి వాటిపై దృష్టిపెట్టింది. అయితే ఆమె మొదటిసారి సర్పంచ్‌గా పోటీ చేసినప్పుడు చాలారకాల హేళనలు, వివక్షను ఎదుర్కొంది. తన వైకల్యాన్నీ వెక్కిరించినా బాధపడలేదామె. తనేంటో గ్రామాభివృద్ధిలో చేసిన కృషి ద్వారా నిరూపించింది. ఆ సమయంలో సోదరుడు, తండ్రి ఆమెకు అండగా నిలబడ్డారు.
కవిత తండ్రి పుందలిక్‌ భోండ్వే పదిహేనేళ్లుగా గ్రామ పంచాయతీ సభ్యుడిగా ఉన్నారు. చదువుకోని కారణంతో చాలారకాల ఇబ్బందులను ఎదుర్కొన్న ఆయన తన కూతురిని సర్పంచ్‌ చేయడం ద్వారా గ్రామాభివృద్ధి జరుగుతుందని ఆకాంక్షించాడు.
2011లో తొలిసారిగా కవిత సర్పంచ్‌గా నిలబడింది. పాతికేళ్ల యువతి అందునా దివ్యాంగురాలు సర్పంచ్‌గా ఎన్నికవడం గ్రామంలో కొందరికి నచ్చలేదు. కానీ పోటీచేసిన మొదటిసారే కాకుండా తను చేసిన అభివృద్ధి పనులతో రెండోసారి కూడా విజయం సాధించింది.
ఆమె సర్పంచ్‌గా ఎన్నికైన ఈ తొమ్మిదేళ్లలో రెండు గ్రామాల్లో  చాలా మార్పులు చోటు చేసుకున్నాయి. ప్రధాన్‌ మంత్రి ఆవాస్‌ యోజన పథకంలో భాగంగా కాంక్రిట్‌ రోడ్లను వేయించింది. పేదలకు ఇళ్లు వచ్చేలా చేసింది. గ్రామ పంచాయతీ వ్యవహారాల్లో గణనీయమైన మార్పులను తీసుకువచ్చింది. తాగుబోతుల ఆగడాలకు అడ్డుకట్ట వేసింది. స్వయంసహాయక మహిళా బృందాలను ఏర్పాటు చేసింది. అమ్మాయిలు చదువుకునేలా ప్రోత్సహిస్తోంది. తాజాగా ‘జనజాగృతి’ అనే కార్యక్రమం ద్వారా కొవిడ్‌ బారిన పడకుండా ఎలా ఉండాలో ప్రజల్లో అవగాహన కల్పిస్తోంది. ప్రతి ఒక్కరూ మాస్కులు ధరించేలా, సామాజిక దూరం పాటించేలా చూస్తోంది. మాస్కు లేకపోతే జరిమానా విధిస్తోంది. ఈ రెండు గ్రామాల్లో పారిశుద్ధ్యానికి పెద్ద పీట వేస్తోంది. సేవ చేయాలనే గట్టి కోరిక ఉంటే చాలు.. వైకల్యం అడ్డుకాదని నిరూపిస్తోందీ సర్పంచ్‌.


మరిన్ని

ఆరోగ్యమస్తు

మరిన్ని

అనుబంధం

మరిన్ని

యూత్ కార్నర్

మరిన్ని

'స్వీట్' హోం

మరిన్ని

వర్క్ & లైఫ్

మరిన్ని

సూపర్ విమెన్

మరిన్ని

బ్యూటీ & ఫ్యాషన్

మరిన్ని