ఆఫీసు భయాన్ని జయించండిలా!

అవీ ఇవీ...

ఆఫీసు భయాన్ని జయించండిలా!

క్యాబిన్‌ ఫీవర్‌

* రోజూ ఆఫీసుకి వెళ్లినప్పుడు సెలవు దొరికితే బాగుండు అనిపించేది. ఇప్పుడు నెలన్నరగా ఇంట్లోనే ఉంటున్నా. ఒకటే రకం పని బోర్‌గా ఉంటోంది. అసహనం, చిరాకు పెరుగుతున్నాయి. ఏదో తెలియని భయమూ వెంటాడుతోంది. నిద్ర, తిండి.. దేనికీ వేళలు పాటించడం లేదు.

- శిల్ప, ఐటీ ఉద్యోగిని ●

* కొన్నాళ్లు వర్క్‌ఫ్రంహోం చేశా. ఇప్పుడు ఆఫీసు పనిలేక ఇంట్లో ఖాళీగా కూర్చుంటే వెలితిగా ఉంది. కోపంతోపాటు ఎక్కువగా ప్రతికూల ఆలోచనలు వస్తున్నాయి. చిన్న చిన్న విషయాలకే అరుస్తున్నానని పిల్లలు, మా ఆయన నాపై ఫిర్యాదు చేస్తున్నారు.

- మల్లిక, ఉద్యోగిని

కార్యాలయం కానరాదు.. సహోద్యోగుల జాడ లేదు... యాభై రోజులుగా ఇంటికే పరిమితం... నాలుగ్గోడల మధ్య బందీ అయ్యామనే భావన... పైపెచ్చు ఇంటి పనిభారం రెట్టింపైంది. ఇరుక్కుపోయామనే బాధ పెరుగుతోంది... ఇదీ మహిళా ఉద్యోగుల పరిస్థితి... దీన్నే ‘క్యాబిన్‌ ఫీవర్‌’ అంటున్నారు నిపుణులు. ఇది మానసిక ఒత్తిడిగా మారకముందే బయటపడాలట. అదెలానో తెలుసుకుందాం..

ఆఫీసు, ఇల్లు, ఉద్యోగ విధులంటూ నిత్యం తీరిక లేకుండా ఉండే మహిళ ఒక్కచోటనే ఉండాల్సి రావడంతో ఇంట్లోనే బందీనైపోయాననే భావనలో కూరుకుపోతోంది. పదేపదే అదే తలచుకుంటూ బాధల్లో మునిగిపోతోంది. ప్రతి ఉద్యోగి విధి నిర్వహణలో మూడురకాల రకాల ప్రయోజనాలు ఆశిస్తారు. అవి.. పరిస్థితులు తన అధీనంలో ఉండటం, ఇతరులతో కలివిడిగా ఉండటం, చేసే పని నుంచి ప్రతిఫలం పొందడం. లాక్‌డౌన్‌తో ఇంట్లోనే ఉండాల్సి రావడంతో మహిళా ఉద్యోగులకు ఇవి కరవైపోతున్నాయి. ప్రస్తుతం కొద్దిపాటి కార్యకలాపాలు కొనసాగిస్తున్న సంస్థలు ఎక్కువగా పురుషులను విధులకు పిలుస్తున్నాయి. దీంతో తమ ప్రాధాన్యం తగ్గిపోతుందని భావించే ఉద్యోగినులూ లేకపోలేదు. మరోవైపు ఇంటిపట్టునే ఉండటంతో పనిభారం పెరుగుతోంది. పనిమనుషులు దొరక్క ఇబ్బంది పడుతున్నారు. వెరసి క్యాబిన్‌ ఫీవర్‌ బాధితులు పెరిగిపోతున్నారు. నిజానికి ఇదేం మానసిక జబ్బు కాదు. అలాగని తీసిపారేయలేం. దీర్ఘకాలం కొనసాగితే మానసిక సమస్యగా పరిణమించవచ్ఛు బాధ, నిరాశా దృక్పథం తీవ్ర ఒత్తిళ్లకు దారి తీయొచ్ఛు

బయట పడదామిలా...

మనసుంటే మార్గముంటుంది. క్యాబిన్‌ ఫీవర్‌ నుంచి బయటపడే దారులెన్నో ఉన్నాయి.

● ఫర్నిచర్‌, ఎలక్ట్రానిక్‌ ఉపకరణాలు, అలంకరణ వస్తువులు ఎప్పుడూ ఒకేచోట ఉంటే కొత్తదనం ఏముంటుంది? వాటి స్థానం మార్చి అందంగా కనిపించేలా సర్దండి. మీలో ‘ఫీల్‌ గుడ్‌’ రసాయనాలు విడుదలై కొద్దికాలంపాటు ఆనందంలో ముంచెత్తకపోతే అడగండి.

* ఎప్పుడూ ఇంట్లో ఉండటం ఎవరికైనా బోర్‌ కొడుతుంది. ఇంటిముందు అటూఇటూ పచార్లు చేయండి. స్వచ్ఛమైన గాలి పీల్చుకోండి. వరండా, టెర్రస్‌, పార్కింగ్‌ స్థలం.. కుదిరినచోట తేలికపాటి వ్యాయామాలు చేయండి. కసరత్తుల వల్ల శరీరంలో విడుదలయ్యే ఎండార్ఫిన్లు మానసిక సంతోషాన్నిస్తాయి.

* వినోదం కోసం ఎక్కువగా టీవీ, ఫోన్లపై ఆధారపడొద్ధు కుటుంబ సభ్యులతో కలిసి బోర్డ్‌ గేమ్‌లు ఆడటం, పుస్తకాలు చదవడం, ఒకరికొకరు చదివి వినిపించుకోవడం.. మిమ్మల్ని హుషారుగా మార్చేస్తాయి.

* కొత్త వంటకాలు, కొత్త క్రాఫ్ట్స్‌ చేయడం మొదలుపెట్టండి. యూట్యూబ్‌లో వెతికితే బోలెడన్నీ వీడియోలు. వీటిపై మనసు పెడితే చెడు ఆలోచనలు రావు.

* కష్టకాలంలో సన్నిహితులతో మాట కలిపితే ఒంటరి భావన దరి చేరదు. కజిన్స్‌, బంధువులు, స్నేహితులతో గ్రూప్‌ వీడియో కాల్స్‌ ద్వారా ముచ్చటించొచ్ఛు స్నేహితులతో కలిసి సినిమాలు చూసేలా వర్చువల్‌ యాప్స్‌/వెబ్‌సైట్లు అందుబాటులో ఉన్నాయి.

* పని ఉన్నా, లేకపోయినా ప్రతిదానికీ వేళలు పాటించాలి. అతి నిద్ర, తక్కువ నిద్ర.. రెండూ మంచివి కావు. సమయానికి నిద్రపోవాలి.

* ‘మనం ఇంట్లో చిక్కుకుపోలేదు. బయట పరిస్థితులేం బాగా లేవు. ఇంట్లో భద్రంగా ఉన్నాం’ అనుకుంటే సగం భారం తీరుతుంది. ప్రతికూల ఆలోచనలు దూరమవుతాయి.●

లక్షణాలు

* చిరాకు, నిరాశ

* ఏకాగ్రత కోల్పోవడం

* అసహనం, భయం

* నిద్ర మత్తు, బద్ధకం

* కోపం, జిహ్వచాపల్యం

Tags :

మరిన్ని

జిల్లా వార్తలు

చదువు సుఖీభవ ఈ-నాడు మకరందం రయ్.. రయ్ సిరి ఈ తరం హాయ్! ఆహా హాయ్ బుజ్జీ స్థిరాస్తి రుచులు

అవీ ఇవీ...

మరిన్ని

రుచులు

App