ఆ పేరు వింటే భయపడుతోంది!

అవీ ఇవీ...

ఆ పేరు వింటే భయపడుతోంది!

మా పాప వయసు పదేళ్లు. సున్నిత మనస్కురాలు. భయం ఎక్కువ. ఈ కరోనా వైరస్‌ వార్తలు వస్తున్నప్పటి నుంచి తనలో భయం మరింత పెరిగింది. ఆ వైరస్‌ వల్ల తనకు లేదా మాకు ఏమైనా జరుగుతుందేమోనని అనుకుంటోంది.. దీన్ని పోగొట్టేదెలా?

- ఓ సోదరి

పాప సున్నిత మనస్కురాలని మీరే అంటున్నారు.. ఇలాంటి పిల్లలు భవిష్యత్తులో తమకు ఏదో అవుతుందని చెడుగానే ఆలోచిస్తారు. వారి మానసిక స్థితి ఎలా ఉంటుందంటే.. ఎప్పుడూ ప్రతికూల ఆలోచనలతో నిండిపోతుంది. ఈ వార్తలన్నీ చూసి ఆ వ్యాధి వస్తే చనిపోతామనే నిర్ణయానికి వచ్చేసింది. అదే అమ్మానాన్నలకు వస్తే తనని ఎవరు చూసుకుంటారనే అభద్రత ఆమెలో కనిపిస్తుంది. అందుకే అంతలా భయపడుతోంది. టీవీల్లో చూడటం, ఇంట్లో అమ్మానాన్న, చుట్టుపక్కలవారు, స్నేహితులు... ఇలా అందరూ దాని గురించే మాట్లాడుతూ ఉండటం వల్ల తెలియకుండానే తనలో మరింత భయం పెరిగిపోయి ఉంటుంది.
భయం పోయేదెలా..
ఆమె ముందు భయం కలిగించే వార్తలు, సన్నివేశాల గురించి ఇంట్లో పదేపదే ప్రస్తావనకు తీసుకురాకుండా జాగ్రత్తపడండి. అలాగే ఇంటి వాతావరణం ఆహ్లాదంగా ఉండేలా చూడండి. ఆ వైరస్‌ గురించి అంతగా భయపడాల్సిన అవసరం లేదని ... వైరస్‌ సోకిన రోగులకు వైద్యం అందించడానికి మనవద్ద నిష్ణాతులైన వైద్యసిబ్బంది ఉన్నారని చెప్పి ధైర్యం నింపండి. కొన్ని కోట్ల మంది జనాభాలో అతితక్కువ మంది మాత్రమే దీని బారిన పడుతున్నారని, అందులోనూ జాగ్రత్తలు తీసుకోనివారినే ఆ వైరస్‌ ఇబ్బంది పెడుతుందని చెప్పండి. తగినన్ని జాగ్రత్తలు తీసుకుంటే ఎలాంటి వైరస్‌ దరి చేరదని చిన్నారికి వివరించండి. వ్యక్తిగత, పరిసరాల పరిశుభ్రత, ఇంట్లోనే ఉండటం, బయటకు వెళ్లినప్పుడు సామాజిక దూరం పాటిస్తూ మాస్క్‌ ధరించడం, పోషకాహారం తీసుకోవడం వల్ల ఆ మహమ్మారి మన దరి చేరదని వివరించండి. తనతో కాస్త ఎక్కువ సమయాన్ని గడుపుతూ భయాన్ని తగ్గించండి. పాప ఆ విషయం ఎక్కువగా ఆలోచించకుండా ఉండేందుకు తన మనసును ఇతర వ్యాపకాల మీదకు మళ్లించండి. చిన్న చిన్న పనులు అప్పజెప్పండి. వాటిని పూర్తి చేసేలా చూడండి. అవసరమైతే మీవంతు సహకారం అందించండి.

డాక్టర్‌ మండాది గౌరీ దేవి, చైల్డ్‌ సైకియాట్రిస్ట్‌

Tags :

మరిన్ని

జిల్లా వార్తలు

వారెవ్వా! చదువు సుఖీభవ ఈ-నాడు మకరందం రయ్.. రయ్ సిరి విజేత ఈ తరం హాయ్! ఆహా హాయ్ బుజ్జీ స్థిరాస్తి రుచులు విహారి