సూరతనాలు!

అవీ ఇవీ...

సూరతనాలు!

లక్షన్నర అన్నార్థుల రోటీ బ్యాంక్‌!

సంకల్పం దృఢంగా ఉంటే ఇంట్లో ఉంటూనే సాయం చేయొచ్చు. మంచి మనసుంటే మాతృమూర్తిలా మారి సేవలు అందిచవచ్చు. అందుకు సాక్ష్యం సూరత్‌ మహిళలు. లాక్‌డౌన్‌ సమయంలో ‘రోటీ బ్యాంక్‌’ ద్వారా రోజుకి లక్షన్నర మంది ఆకలి తీరుస్తున్నారు.

‘లాక్‌డౌన్‌తో లక్షల మంది కార్మికులు రోడ్డున పడ్డారు. వాళ్లకు తిండి దొరకడం లేదు. మీ ఇంట్లో రోటీలు చేసేటప్పుడు నాలుగైదు ఎక్కువ చేసివ్వగలరా?’ ఒక స్వచ్ఛంద సంస్థలో పనిచేసే వ్యక్తి అడిగినప్పుడు ప్రీతి శుక్షా సంతోషంగా సరేనంది. ‘ఒక్క రోజేంటి? రోజూ చేసి పెడతా’ అంది. తను చేయడమే కాదు.. అపార్ట్‌మెంట్‌లోని అందరికీ ఈ విషయం చెప్పింది. ఆమెను మెచ్చుకోవడమే కాదు.. ఇరుగుపొరుగూ తనతో చేయి కలిపారు. అలా ‘రోటీ బ్యాంక్‌’ పురుడు పోసుకుంది. ఇప్పుడు గుజరాత్‌, సూరత్‌ నగరంలోని వందల హౌసింగ్‌ సొసైటీల్లో రోటీ బ్యాంక్‌ క్రతువు నిరంతరాయంగా కొనసాగుతోంది. చల్లని మనసున్న ఎందరో గృహిణులు తమ వంటింట్లో రోజుకి లక్షన్నర చపాతీలను తయారు చేసి ఇస్తున్నారు. ఉపాధి, తిండి కరవై అలమటిస్తున్న వలస కూలీల ఆకలి తీరుస్తున్నారు. ఒక్కో హౌసింగ్‌ సొసైటీలోని మహిళలు మూడు నుంచి ఐదు వందల దాకా చపాతీలు తయారు చేస్తుంటే వీటిని సేకరించే బాధ్యత అపార్ట్‌మెంట్‌లోని ఓ మహిళ తీసుకుంటోంది. స్థానిక ఎన్జీవోలు ఈ ఆహారాన్ని శుభ్రంగా ప్యాక్‌ చేసి, కవర్లలో సర్ది వలస కూలీలు, అన్నార్థులకు అందిస్తున్నాయి. శ్రమకోర్చి ఆహారం చేసిపెట్టడమే కాదు.. మంచి మనసున్న తల్లులు ఆ రోటీల అడుగున పది, యాభై, వంద రూపాయలు పెడుతూ శ్రామికులకు ఆర్థికంగానూ ఎంతో కొంత చేయూతనిస్తున్నారు. భరత్‌ షా, రాంజీ చందర్‌ అనే ఇద్దరు గుజరాతీలు ఈ సత్ప్రయత్నాన్ని ప్రారంభించగా.. గాయత్రి అనే సమాజ సేవకురాలు హౌసింగ్‌ సొసైటీలు, అన్నార్థుల మధ్య వారధిలా పని చేస్తోంది. లాక్‌డౌన్‌లో పిల్లలు, పెద్దలు అంతా ఇంటికే పరిమితమైపోయారు. శ్రమ రెట్టింపైన ఈ సమయంలోనూ పెద్దమనసుతో కూలీల గురించి ఆలోచిస్తున్న ఆ తల్లుల కష్టం అమూల్యమైంది. ‘మేం వాళ్ల కోసం కేటాయిస్తోంది కొద్ది సమయం, కొద్ది ఖర్చు మాత్రమే. కానీ ఈ ఆపత్కాలంలో బడుగుల ఆకలి తీర్చుతున్నామనే సంతృప్తి మమ్మల్ని మరింత ఉత్సాహంగా పని చేయిస్తోంది’ అంటున్నారు కొందరు మాతృమూర్తులు. సూరత్‌లో వస్త్ర, డైమండ్‌, భవన నిర్మాణ రంగాల్లో దాదాపు పదిహేను లక్షలమంది శ్రామికులు పనిచేస్తున్నారు. లాక్‌డౌన్‌ వల్ల అత్యధికులు ఉపాధి కోల్పోయారు.

Tags :

మరిన్ని

జిల్లా వార్తలు

వారెవ్వా! చదువు సుఖీభవ ఈ-నాడు మకరందం రయ్.. రయ్ సిరి విజేత ఈ తరం హాయ్! ఆహా హాయ్ బుజ్జీ స్థిరాస్తి రుచులు విహారి