సినిమాలకే కాదు... సాహసాలకూ సై!
close
Updated : 17/07/2021 05:09 IST
Facebook Share Twitter Share WhatsApp Share Telegram Share Link Share

సినిమాలకే కాదు... సాహసాలకూ సై!

ఒకప్పటిలా కాదిప్పుడు! హీరోలతో పోటీపడుతూ నాయికా ప్రాధాన్యమున్న సినిమాలొస్తున్నాయి. దాంతో అమ్మాయిలూ ఫైట్లూ, స్టంట్లూ, కొండలు ఎక్కడం వంటివి చేసేస్తున్నారు. అయితే కొందరు హీరోయిన్లు సినిమాల్లోలా ఉత్తుత్తి సాహసాలకే పరిమితం కావట్లేదు. నిజ జీవితంలోనూ చేసి ఔరా అనిపిస్తున్నారు. కొందరు సేవనూ జోడిస్తున్నారు.


వాటర్‌ స్పోర్ట్స్‌ ఇష్టం

మల్టీ టాలెంటెడ్‌ కథానాయిక రెజీనా. తెలుగు, తమిళం రెండిట్లోనూ ఉనికిని చాటుకుంటోంది. ఫిట్‌నెస్‌కు ప్రాధాన్యమిచ్చే రెజీనాకు సాహసాలన్నా ఇష్టమే. ముఖ్యంగా వాటర్‌ స్పోర్ట్స్‌. చెన్నైలో ఈ ఏడాది నిర్వహించిన ‘స్టాండప్‌ పెడల్‌ రేస్‌’లో మొదటి బహుమతి గెలుచుకుంది. ఈ ఏప్రిల్‌లో పారా అథ్లెట్‌ల కోసం నిధులు సేకరించడానికి చెన్నై నుంచి పుదుచ్చేరికి 140కి.మీ. సైక్లింగ్‌ చేసింది. గత ఏడాది ఉత్తరాఖండ్‌లో ‘వైల్డ్‌ వారియర్‌ హిమాలయన్‌ అడ్వెంచర్‌ రేస్‌’ 30 ఫర్‌ 30 ఛాలెంజ్‌ను నిర్వహించారు. రెజీనా ఇందులో పాల్గొంది. హీమోఫీలియా, క్యాన్సర్‌లపై అవగాహన కల్పించడం ఈ కార్యక్రమ ఉద్దేశం. అంతేకాదు దీని ద్వారా వచ్చిన నిధులతో 30 మంది పిల్లలకు సాయమందిస్తారు. దీనిలో భాగంగా మౌంటెన్‌ బైకింగ్‌, హైకింగ్‌, ఇంకా నీటిలో ప్రయాణం చేయాల్సి ఉంటుంది. గతంలోనూ బెంగళూరులో వరల్డ్‌ వారియర్‌ డూవాత్లాన్‌లో పాల్గొంది. ఈమెకు సర్ఫింగ్‌ అన్నా చాలా ఇష్టమట. కేరళలోని సర్ఫింగ్‌ స్కూల్లో శిక్షణ కూడా తీసుకుంటోంది.


1168 అడుగుల ఎత్తు నుంచి...

త్రిష... తెలుగుతోపాటు తమిళంలోనూ అగ్ర కథానాయిక. టాప్‌ హీరోలందరితో నటించింది. ఈమెకు ప్రయాణాలంటే పిచ్చి. ఏమాత్రం ఖాళీ దొరికినా విదేశాలకు చెక్కేస్తుంది. బంగీ జంప్‌, స్కైడైవింగ్‌ వంటి సాహస క్రీడలను ప్రయత్నిస్తుంది. ఓసారి కెనడాలో 1168 అడుగుల ఎత్తు నుంచి బంగీ జంప్‌ చేసి అందర్నీ ఆశ్చర్యపరిచింది. పది నిమిషాలపాటు గాల్లోనే ఉండి, కింద స్టేడియంలో జరుగుతున్న బేస్‌బాల్‌ మ్యాచ్‌నూ వీక్షించింది. అది తన జీవితంలో ఓ మధురానుభూతి అంటోంది. అంతేకాదు.. ఓ తమిళ సినిమా కోసం స్కూబా డైవింగ్‌నూ నేర్చుకుంది. తను ఇప్పటిదాకా చేసిన వాటిలో స్కైడైవింగ్‌ త్రిషకు బాగా నచ్చిన అడ్వెంచరట. ఏడాదికోసారైనా తప్పక చేస్తానని చెబుతోంది.


ఫార్ములా వన్‌లో శిక్షణ...

మెంటల్‌ మదిలో సినిమాతో టాలీవుడ్‌లోకి ఎంట్రీ ఇచ్చింది నివేదా పేతురాజ్‌. తర్వాత చిత్రలహరి, బ్రోచేవారెవరురా సినిమాల్లో నటించిన ఆమె ఇప్పుడు ఫార్ములా వన్‌ రేసర్‌గా సర్టిఫికెట్‌ అందుకుని వార్తల్లో నిలిచింది. పాఠశాల రోజుల్లోనే స్పోర్ట్స్‌ కార్లపై మనసు పారేసుకున్న నివేదా.. ఎంతో ఇష్టంగా ఈ రంగంలో శిక్షణ తీసుకుంది. 2015లోనే ఓ స్పోర్ట్‌కారు కూడా కొంది. అంతేకాదు... యూఏఈలో అప్పట్లో డాడ్జ్‌ ఛాలెంజర్‌ కారు కొన్న రెండో మహిళగానూ గుర్తింపు పొందింది. ప్రస్తుతం లెవల్‌ వన్‌ కంప్లీట్‌ చేసి తర్వాత లెవల్‌ పూర్తి చేయడంపై దృష్టి సారించానని చెబుతోంది.


ప్రకృతితో ప్రయాణం...

కరోనా వచ్చాక జీవితంలో ఎన్నో మార్పులు వచ్చాయి. తనూ దీనికి మినహాయింపేం కాదంటోంది తమన్నా. లాక్‌డౌన్‌లో కుకింగ్‌, వర్కవుట్ల వీడియోలు చేసిన తమన్నా ఒత్తిడి తగ్గించుకునేందుకు ప్రకృతిలో విహరించాలనుకుంది. అందుకు ట్రెక్కింగ్‌ను  ఎంచుకుంది. దీని గురించి చెబుతూ ‘నేచర్‌తో ప్రేమలో పడ్డానంటూ ‘తమన్నా స్పీక్స్‌’ ఇన్‌స్టా ఖాతాలో ఓ వీడియో షేర్‌ చేసింది. మహారాష్ట్రలోని థానేలో ఉన్న పాపులర్‌ ట్రెక్కింగ్‌ డెస్టినేషన్‌ అసంగావ్‌ మహులీ పోర్టుని సందర్శించింది. అక్కడి అటవీ ప్రాంతంలో ట్రెక్కింగ్‌ చేసింది ఈ మిల్కీ బ్యూటీ. అప్పటి నుంచి వీలైనప్పుడల్లా ట్రెక్కింగ్‌కి వెళ్తోంది.


21 కిలోమీటర్లు ర్యాఫ్టింగ్‌

అందాల రాక్షసి లావణ్య త్రిపాఠి... ఫిట్‌నెస్‌ విషయంలో ఫర్‌ఫెక్ట్‌గా ఉంటుంది. హైకింగ్‌ అంటే ఆసక్తి అని చెప్పిన ఈ భామ... ఈ ఏడాది నిహారిక కొణిదెల దంపతులు, ఇతర స్నేహితులతో కలిసి రివర్‌ ర్యాఫ్టింగ్‌ చేసింది. ‘ఇది నిహారిక ఆలోచన... విషయం చెప్పగానే వెంటనే ఓకే చెప్పేశా. నా స్నేహితులతో కలిసి గడిపిన గొప్ప సమయం ఇది. నాకు వాటర్‌ స్పోర్ట్స్‌ అంటే ఇష్టం. మెరైన్‌ డ్రైవ్‌ నుంచి రిషికేశ్‌ వరకూ 21 కిలోమీటర్లు ప్రయాణించా. ప్రకృతిని ఆస్వాదిస్తూ హిమాలయ పర్వత శ్రేణుల్ని చూస్తూ చేసిన ఈ ప్రయాణం అద్భుతమైన ఆనందాన్ని ఇచ్చింది’ అని చెబుతోంది లావణ్య. తాజాగా ఆమె ముస్సోరీకి సమీపంలోని ఓ పర్వత గ్రామంలో వాళ్ల కుటుంబం కోసం కొంత వ్యవసాయ భూమిని కొని నేచర్‌ కేఫ్‌ పేరుతో పర్యావరణ హిత ఇంటిని నిర్మించనుంది.


సైకిల్‌ యాత్రతో సేవ...

నటిగా, దర్శకురాలిగా, నిర్మాతగా.... గుర్తింపు తెచ్చుకున్న మంచు లక్ష్మి గురించి ప్రత్యేకంగా చెప్పనక్కర్లేదు. ఆమెకు సాహసాలంటే మక్కువ. ఆ ఇష్టంతోనే గతంలో ఓ రియాల్టీషోనూ ప్రేక్షకుల ముందుకు తీసుకొచ్చారామె. యోగ, మెడిటేషన్‌ వంటివి చేస్తూ ఎప్పుడూ ఫిట్‌గా ఉండాలని ప్రయత్నించే ఆమె గతేడాది లాక్‌డౌన్‌ కాలంలో సైక్లింగ్‌పై మనసు పారేసుకున్నారు. కేవలం సరదాగా దాన్ని తొక్కడమే కాదు... ఛారిటీ కోసం ఏకబిగిన ఐదుగంటల పాటు వంద కిలోమీటర్లు ప్రయాణించారు. దివ్యాంగుల కోసం పనిచేసే ఆదిత్య మెహతా ఫౌండేషన్‌ కోసం నిధులు సేకరించారు.


ఎముకలు కొరికే చలైనా వెనుకాడదు

మోసగాళ్లు చిత్రంతో తెలుగు సినీపరిశ్రమకు పరిచయమైన యువ కథానాయిక  రుహీ సింగ్‌. ఆమెకు నటనే కాదు.. సాహస క్రీడలంటే మహా ఇష్టం. కశ్మీర్‌లో ఇటీవల నిర్వహించిన స్కీయింగ్‌ పోటీల్లో ప్రథమ బహుమతి గెలుచుకుంది. ట్రెక్కింగ్‌, స్కూబా డైవింగ్‌, పారాసెయిలింగ్‌, స్కీయింగ్‌ లాంటి క్రీడలంటే చెవి కోసుకుంటుంది. ఆ ఆసక్తితోనే సినిమా షూటింగుల్లో ఎంత బిజిగా ఉన్నప్పటికీ ప్రత్యేకంగా సమయం కేటాయించి మరీ శిక్షణ తీసుకుంది. గత ఐదేళ్లలో ఎన్నో సాహస క్రీడల్లో పాల్గొంది. కాలంతో సంబంధం లేదు.. అది మండు వేసవైనా..ఎముకలు కొరికే చలి అయినా.. వీలుచిక్కినప్పుడల్లా పర్వత ప్రాంతాలకు పయనమవుతుంది రుహీ. ఒంటరిగా లాంగ్‌ రైడ్‌లకు వెళ్లడమంటే ఆమెకు ఎంతో ఇష్టం. కొత్తవారిని కలుస్తూ...వారి సంస్కృతి సంప్రదాయాలు, జీవన విధానాల గురించి తెలుసుకోవడమంటే సరదా. దీనివల్ల మానసిక ప్రశాంతత లభిస్తుందని అంటోంది రుహీ సింగ్‌.


డైవింగ్‌ అంటే మక్కువ

యువకుడు సినిమాతో తెలుగు చిత్రసీమకు పరిచయమైన భూమికకు సాహస క్రీడలంటే మక్కువ. వీలు చిక్కినప్పుడల్లా ట్రెక్కింగ్‌ చేస్తుంటుంది. సముద్రంలో డైవింగ్‌ చేస్తూ ఆ వీడియోలను సామాజిక మాధ్యమాల్లో అప్పుడప్పుడు పంచుకుంటుంది. ఎత్తైన ప్రాంతం నుంచి రోప్‌ సహాయంతో కిందకి దూకడమంటే మహా సరదా.  ఇటీవల భూమిక పోస్టు చేసిన డైవింగ్‌ వీడియో సామాజిక మాధ్యమాల్లో వైరల్‌ అయ్యింది. సాహస క్రీడల వల్ల ఆనందంతోపాటు మానసికస్థైర్యం పెంపొందుతుందని చెబుతుంది ఈ ముంబయి భామ. ‘‘ సక్సెస్‌కు షార్ట్‌కట్స్‌ ఉండవు. శక్తినంత కూడగట్టుకొని పని చేస్తేనే విజయం నీ సొంతమవుతుంది’’ అంటూ రీల్‌ లైఫ్‌లోనే కాకుండా రియల్‌ లైఫ్‌లోనూ ఓ చక్కని సందేశమిస్తోందండోయ్‌.


మరిన్ని

ఇంటి పేరుతో కాదు... ఇది నా స్వయంకృషి...!

నాన్న ప్రముఖ నటుడు దగ్గుబాటి వెంకటేశ్‌. ఇక తాత, పెదనాన్న, అన్న... ఇలా ఆ ఇంట్లో వాళ్ల పేర్లు చెప్పక్కర్లేదు. వారి పేర్లు ఉపయోగించుకుంటే బోలెడు గుర్తింపు. కానీ ఆమె మాత్రం... తన అభిరుచి, సృజనాత్మకత, శ్రమలనే పెట్టుబడిగా గుర్తింపు సాధించాలనుకుంది. తనే వెంకటేశ్‌ పెద్ద కుమార్తె ఆశ్రిత. తన లక్ష్యం దిశగా కృషి చేస్తూ... ఇన్‌స్టాగ్రాం, యూట్యూబ్‌ల్లో లక్షల్లో అభిమానుల్ని సంపాదించుకుంది. ఇటీవల ఇన్‌స్టాగ్రాంలో ఎక్కువ సంపాదిస్తున్న సెలబ్రిటీల జాబితాను హోపర్‌డాట్‌కాం సంస్థ విడుదల చేసింది. అందులో ఆశ్రిత అంతర్జాతీయంగా 377, ఆసియాలో 27వ ర్యాంకులు సాధించింది. ఈ సందర్భంగా వసుంధర ఆమెతో ముచ్చటించింది.

‘స్పెల్లింగ్స్‌’ చెప్పి సెన్సేషనయ్యారు!

పిల్లల్లో ఇంగ్లిష్‌ నైపుణ్యాలను పరీక్షించడానికి అమెరికాలో ఏటా నేషనల్‌ స్పెల్లింగ్‌-బీ పోటీలు నిర్వహిస్తోన్న సంగతి తెలిసిందే. ఎంతో ప్రతిష్ఠాత్మకంగా జరిగే ఈ పోటీల్లో వేలాదిమంది చిన్నారులు పాల్గొంటారు. తల్లిదండ్రులు కూడా తమ పిల్లలను ఈ పోటీలకు అన్ని రకాలుగా సిద్ధం చేస్తూ ప్రోత్సహిస్తుంటారు. ఇక ఈసారి నిర్వహించిన స్పెల్లింగ్‌-బీ పోటీల్లో లూసియానాకు చెందిన 14 ఏళ్ల జైలా అవంత్‌ గార్డే విజేతగా నిలిచింది. దీంతో 93 ఏళ్ల ఈ కంటెస్ట్‌ చరిత్రలో ఈ ట్రోఫీ నెగ్గిన మొదటి ఆఫ్రికన్‌ అమెరికన్‌గా, రెండో నల్లజాతీయురాలిగా చరిత్ర సృష్టించిందీ యంగ్‌ గర్ల్‌.

కథ చెబుతాను... ఊ కొడతారా..!

రాత్రయిందంటే చాలు.. బామ్మ చెప్పే నీతికథలు వింటూ నిద్రలోకి జారుకోవడం మనందరికీ చిన్ననాటి ఓ మధుర జ్ఞాపకం! అప్పుడంటే చాలావరకు ఉమ్మడి కుటుంబాలు కాబట్టి ఇది వర్కవుట్‌ అయింది.. ఇప్పుడు వృత్తి ఉద్యోగాల రీత్యా చాలామంది ఇంట్లో పెద్దవాళ్లు, కన్న వాళ్ల నుంచి దూరంగా వచ్చేస్తున్నారు. దీంతో పిల్లలు వాళ్ల గ్రాండ్‌పేరెంట్స్‌ని, వాళ్లు చెప్పే బోలెడన్ని కథల్ని మిస్సవుతున్నారు. ఇలాంటి అనుభవమే తన చెల్లెలికీ ఎదురైందంటోంది 18 ఏళ్ల ప్రియల్ జైన్‌. అది చూసి ఆలోచనలో పడిపోయిన ఆమె.. నీతి కథలు చెప్పే ఓ ప్లాట్‌ఫామ్‌కు శ్రీకారం చుట్టింది. చిన్నారులకు బామ్మ దగ్గర లేని లోటుని తన వెబ్‌సైట్ తీరుస్తుందంటోన్న ఈ యంగ్‌ ఆంత్రప్రెన్యూర్‌ కథేంటో మనమూ తెలుసుకుందాం రండి..

చిన్నప్పటి కల.. ఇలా సాధించేసింది!

ఆడవారు అనుకుంటే ఏదైనా సాధిస్తారు... వారికి కావల్సిందల్లా కాసింత ప్రోత్సాహం. ఎవరి సహకారం ఉన్నా, లేకున్నా తల్లిదండ్రులు, తోడబుట్టిన వారి సహకారం మాత్రం ఉంటే చాలు... అమ్మాయిలకు అసలు తిరుగుండదు. అన్నింటా విజయాలే సాధిస్తారు. పలువురికి ఆదర్శంగా నిలుస్తారు. అందుకు తాజా ఉదాహరణే 24 ఏళ్ల మావ్యా సూదన్‌. జమ్మూకశ్మీర్‌లోని ఓ మారుమూల గ్రామానికి చెందిన ఈ యువతి ఇటీవల ఇండియన్‌ ఎయిర్‌ ఫోర్స్‌ ఫైటర్‌ పైలట్‌గా నియమితురాలైంది. ఈ నేపథ్యంలో దేశం మొత్తంమీద ఈ అవకాశం దక్కించుకున్న 12 వ మహిళగా, మొదటి కశ్మీరీ మహిళగా గుర్తింపు పొందిందీ యంగ్‌ సెన్సేషన్.

ఆరోగ్యమస్తు

మరిన్ని

అనుబంధం

మరిన్ని

'స్వీట్' హోం

మరిన్ని

వర్క్ & లైఫ్

మరిన్ని

సూపర్ విమెన్

మరిన్ని

బ్యూటీ & ఫ్యాషన్

మరిన్ని