ఆ పిలుపు కోసమే.. ఉద్యోగం వదిలేశా!  
close
Updated : 16/06/2021 05:48 IST
Facebook Share Twitter Share WhatsApp Share Telegram Share Link Share

ఆ పిలుపు కోసమే.. ఉద్యోగం వదిలేశా!  

అధికారం కోసం అన్నీ వదులుకునే వాళ్లని చూస్తుంటాం!
కానీ అనాథలతో ‘అమ్మా’ అని పిలిపించుకోవడం కోసం అధికారాన్నే వదులుకున్న వాళ్ల గురించి విన్నారా?
గ్రూప్‌-1 ఉద్యోగాన్ని కాదనుకుని... జట్టు సేవాశ్రమాన్ని నిర్వహిస్తూ, అనాథలకు కొండంత అండగా నిలుస్తోన్న మానవతామూర్తి వెలిగండ్ల పద్మజ సేవాప్రస్థానం ఇది...

సౌజన్య అనాథ. బంధువులున్నా.. ఆమెని భారంగానే భావించారు. ఊహ తెలిసిననాటి నుంచీ ‘జట్టు ఆశ్రమమే’ ఆమె సొంతిల్లు. తొమ్మిదో తరగతి చదువుతున్న ఆ అమ్మాయికి అమ్మయినా, నాన్నయినా పద్మజే. కరుణకి అయినవాళ్లు ఎవరూ లేరు. ఆశ్రమమే ఆమెకు పుట్టినిల్లు. ఆమె రెండు కాన్పులూ అక్కడే. వీళ్లకి మాత్రమే కాదు... ఎందరో అభాగ్యులకు అండగా నిలుస్తున్నారు. ఆశ్రయం కోరి వచ్చిన అనాథ పిల్లలు తమ కాళ్లపై తాము నిలబడేలా విద్యాబుద్ధులతోపాటు జీవన నైపుణ్యాలను అందించి వారిలో ఆత్మవిశ్వాసం నింపుతున్నారు. ఇందుకోసం ప్రత్యేకంగా... కర్రసాము, కత్తిసాము వయోలిన్‌, వీణ, గాత్రం, నృత్యం, వ్యవసాయం మొదలుకుని మరెన్నో విద్యల్లో ఆరితేరేట్టు చేస్తున్నారు. చదువయ్యాక ఉద్యోగాలు దొరక్కపోయినా, ఏదో ఒక జీవనోపాధిని వెతుక్కునేలా వాళ్లకు  నైపుణ్యాలు అందించడమే ఈ ఆశ్రమం ప్రత్యేకత. పద్మజ లాలనలో పెరుగుతున్న వారిలో ఆరో తరగతి నుంచి డిగ్రీ విద్యార్థుల వరకూ ఉన్నారు. పదేళ్ల క్రితమే ఈ ఆశ్రమాన్ని ఓ కుటుంబంగా భావించిన పద్మజ వీరి కోసం వ్యవసాయంలో అడుగుపెట్టారు. ఇందుకోసం తాను చేస్తున్న ఎంపీడీవో ఉద్యోగాన్ని కూడా వదులుకున్నారు. సేంద్రియ ఎరువులు మాత్రమే వాడుతూ పంటలు పండిస్తున్నారు. ఆశ్రమం విద్యార్థులే స్వయంగా పొలం పనులు చూసుకుంటారు. ఆశ్రమ నిర్వహణకు పోనూ మిగిలిన పంటను తక్కువ ధరకే అమ్ముతున్నారు. అంతేకాదు ఆశ్రమం తరఫున సేంద్రియ పచ్చళ్ల యూనిట్‌ను స్థాపించారు. కేవలం సేంద్రియ ఉత్పత్తులు, కూరగాయలు, ఆకుకూరలతో తయారైన పచ్చళ్లను ఇతర ప్రాంతాలకు ఎగుమతి చేస్తూ ఆదాయం ఆర్జిస్తున్నారు. ఇవన్నీ సాధించడం అంత తేలిగ్గా అయిపోలేదంటారు పద్మజ. ‘హాయిగా ప్రభుత్వోద్యోగం చేసుకోక ఈ కష్టాలన్నీ నీకెందుకు అన్నవాళ్లే ఎక్కువ. సంపాదన, అధికారం ఇవ్వలేని ఆనందం ఈ పనిలో నాకు దొరికింది. ఆశ్రమంలో పిల్లలు ‘అమ్మా’ అని పిలుస్తుంటే కలిగే సంతోషం ముందు నాకేవీ ఎక్కువ అనిపించ లేదు. మా నాన్న పేరు భీమేశ్వరరావు. అమ్మ లలిత. నాన్న కర్ణాటకలో ఉద్యోగం చేసేవారు. బాల్యమంతా ప్రకాశం జిల్లా ఒమ్మెవరంలో గడిచింది. నర్సరావుపేటలో బీఎస్సీ చదివాను. కర్ణాటకలోని భార్వాడ విశ్వవిద్యాలయంలో ఎమ్మెస్సీ చేసి 1998లో గ్రూప్‌-1 పరీక్షల్లో ఉత్తీర్ణత పొందాను. ప్రకాశంజిల్లా ఉలవపాడు ఎంపీడీవోగా ఉద్యోగంలో చేరాను. కొంతకాలం బాగానే నడిచిపోయింది. తర్వాత్తర్వాత అధికారంలో ఆనందం లేదనిపించింది. ఒత్తిళ్లు, రాజకీయాలతో సమాజ సేవ చేయలేననిపించింది. దీంతో దీర్ఘకాలిక సెలవు పెట్టాను. కొన్నాళ్లు అయ్యాక ఉన్నతాధికారుల సలహాతో 2004లో సింగరాయకొండ ఎంపీడీవోగా చేరాను. కొన్నాళ్లు గడిచాక... ఇక పూర్తిగా సేవలోనే కొనసాగాలని నిర్ణయించుకున్నా. ఉద్యోగానికి రాజీనామా చేశాను. ఆ సమయంలోనే విజయనగరం జిల్లాలోని పార్వతీపురంలో ఉన్న జట్టు ఆశ్రమం గురించి తెలిసింది. అప్పటికే పారినాయుడు లాంటి పెద్దలు ఆశ్రమాభివృద్ధికి ఎంతో కృషి చేశారు. ఇదే నాకు తగిన స్థలమనిపించింది. ఆ క్షణం నుంచీ ఇక్కడ నిస్సహాయులైన చిన్నారులే నా కుటుంబ సభ్యులయ్యారు. ఇంతవరకూ ఇక్కడ నూటయాభైమందికి పైగా అనాథలు ఆశ్రయం పొందారు. మనుషులు ఇష్టంతో చేసే పని కష్టమైనా స్వీకరిస్తారని తత్వశాస్త్రం చెబుతోంది. నా భావాలకు దగ్గరగా ఉండే... జీవితాన్ని గడిపే హక్కు నాకు ఉందనే అనిపిస్తుంది. సంపాదన, అధికారం ఇవ్వలేని ఆనందాన్ని నాకీ ఆశ్రమం, వ్యక్తిత్వం ఇచ్చాయి. ఆశ్రమంలో పిల్లలు అమ్మా అని పిలుస్తుంటే కలిగే సంతోషం ముందు ఏ అవార్డులూ సాటిరావు’ అంటారు పద్మజ.

- ఓబులేశు, ఈటీవీ, జి.రామకృష్ణ, పార్వతీపురం


మంచిమాట

మహిళలకు తాము తక్కువనే న్యూనతాభావం ఎంతమాత్రం ఉండకూడదు. ఎవరికీ తీసిపోమనే ధైర్యం, ధీమా ఉండాలి.

- క్యాథరిన్‌ జాన్‌సన్‌, గణిత శాస్త్రవేత్త, నాసా మాజీ ఉద్యోగి


మరిన్ని

చదువుల రాణి.. పసిడి కొల్లగొట్టింది..!

సాధారణంగా చదువులో ముందున్న వారు ఆటల్లో వెనకబడతారు.. అదే ఆటల్లో ముందున్న వారు చదువులో రాణించరు.. అంటుంటారు. కానీ చదువులో, ఆటల్లో.. రెండింట్లోనూ సత్తా చాటే వారు చాలా అరుదుగానే ఉంటారు. ఆస్ట్రియా సైక్లిస్ట్‌ అన్నా కిసెనోఫర్‌ కూడా అలాంటి మహిళే! వృత్తిరీత్యా గణిత విద్యావేత్త అయిన ఆమె.. అండర్‌ డాగ్‌గా టోక్యో ఒలింపిక్స్‌ బరిలోకి దిగింది. అందరి అంచనాల్ని తలకిందులు చేస్తూ ఫైనల్‌ ఫేవరెట్‌ను చిత్తు చేసి పసిడి పతకాన్ని కొల్లగొట్టింది. ఫలితంగా 125 ఏళ్లలో సైక్లింగ్‌ విభాగంలో ఒలింపిక్స్‌ పతకం గెలుచుకున్న తొలి ఆస్ట్రియా అథ్లెట్‌గా చరిత్ర సృష్టించింది. దీంతో ఆమె పేరు ప్రపంచమంతా మార్మోగిపోతోంది.

సైకిల్‌ తొక్కితే రాళ్లు విసిరారు.. చంపేస్తామన్నారు!

అఫ్గానిస్థాన్‌కు చెందిన ఆమె చిన్నతనంలోనే సైకిల్‌ నేర్చుకుంది. అందులోనే జీవితాన్ని వెతుక్కోవాలనుకుంది. కానీ అక్కడి తాలిబన్లు, మత ఛాందసవాదులు ‘ఆడపిల్లలు సైకిల్‌ తొక్కడమేంటి?’ అంటూ ఆమె ఆశయానికి అడ్డుపడ్డారు. ధైర్యం చేసి సైకిల్‌తో రోడ్డుపై కొస్తే రాళ్లు విసిరారు. చంపేస్తామని బెదిరించారు. అందుకే ఉన్న వూరును విడిచిపెట్టి ప్రాణాలు అరచేతిలో పెట్టుకుని ఫ్రాన్స్‌కు వలస వెళ్లిపోయింది. అక్కడే తన సైక్లింగ్‌ లక్ష్యానికి మెరుగులు దిద్దుకుంది. ప్రతిష్ఠాత్మక ఒలింపిక్స్‌లో శరణార్థుల జట్టు తరఫున పాల్గొనే సువర్ణావకాశం సొంతం చేసుకుంది. ఆమే 24 ఏళ్ల మసోమా అలీ జాదా.

సృజనాత్మక పరిష్కారానికి అరుదైన పురస్కారం!

యూరోపియన్‌ ఇన్వెంటర్‌ అవార్డ్‌.. వివిధ రంగాల్లో ఆవిష్కరణలు చేసి ఓ సరికొత్త ట్రెండ్‌ క్రియేట్‌ చేసిన వారికి ఏటా అందించే ప్రతిష్ఠాత్మక పురస్కారమిది! ఐరోపాతో పాటు ఇతర దేశాల వారు చేసిన అద్భుత ఆవిష్కరణల్ని గుర్తించి.. వాటి సృష్టికర్తలకు బహూకరించే ఈ పురస్కారం ఈసారి భారత సంతతికి చెందిన రసాయన శాస్త్రవేత్త సుమితా మిత్రాను వరించింది. ‘నాన్‌ యూరోపియన్‌ పేటెంట్‌ ఆఫీస్‌ కంట్రీస్‌’ విభాగం కింద యూరోపియన్‌ పేటెంట్‌ ఆఫీస్‌ (EPO) ఆమెకు ఇటీవలే ఈ అవార్డు అందించింది. దంత వైద్యంలో భాగంగా ఆమె చేసిన ఓ అసాధారణ ఆవిష్కరణతో ఎంతోమంది దంత సమస్యలకు పరిష్కారం దొరికినట్లయింది. ఈ నేపథ్యంలోనే ఈ అరుదైన అవార్డు అందుకున్న సందర్భంగా ఈ ఇండో-అమెరికన్‌ గురించి కొన్ని విశేషాలు మీకోసం..

ఆరోగ్యమస్తు

మరిన్ని

అనుబంధం

మరిన్ని

యూత్ కార్నర్

మరిన్ని

'స్వీట్' హోం

మరిన్ని

వర్క్ & లైఫ్

మరిన్ని

బ్యూటీ & ఫ్యాషన్

మరిన్ని