పాఠాలు మానేసి పోలీసయ్యింది!
close
Updated : 20/06/2021 01:40 IST
Facebook Share Twitter Share WhatsApp Share Telegram Share Link Share

పాఠాలు మానేసి పోలీసయ్యింది!

ఇంటి బాధ్యతలను నిర్వహిస్తూనే ఉద్యోగాన్ని చేస్తున్న మహిళలెందరో. అమృతా దుహాన్‌ కూడా అంతే. వైద్య విద్యార్థులకు ప్రొఫెసర్‌గా సేవలందిస్తూనే తన ఐదేళ్ల కొడుకునీ చూసుకునేది. అంతటితో ఆగలేదామె. లక్ష్యాన్ని పెంచుకుని సివిల్స్‌ సాధించింది. అదీ మొదటి ప్రయత్నంలోనే! ప్రస్తుతం ఐపీఎస్‌ ఆఫీసర్‌గా సేవలూ అందిస్తోంది.

అమృతా దుహాన్‌ ఎంబీబీఎస్‌ చదివింది. పాథాలజీలో ఎండీ పూర్తిచేసి, మహిళా వైద్య కళాశాలలో అసిస్టెంట్‌ ప్రొఫెసర్‌గా చేరింది. ఈ సమయంలోనే తనకు పెళ్లైంది. ఒక బాబు కూడా. నిలకడైన ఉద్యోగం, ఆనంద భరితమైన కుటుంబ జీవితం పెద్ద కలలను ఏర్పరచుకోవడంలో అడ్డంకి కాలేదంటుందామె. ఈమెది హరియాణలోని రోహ్‌తక్‌. తన తమ్ముడు ఐపీఎస్‌కు ఎంపికయ్యాడు. అది ఆమెలో ఆసక్తిని కలిగించింది. తనూ రాద్దామనుకుని, సన్నద్ధత ప్రారంభించింది.

వారాంతాలను పూర్తిగా బాబుకి కేటాయించేది. మిగిలిన రోజుల్లో ఎక్కువ సమయం ఉద్యోగానికీ, సన్నద్ధతకీ ప్రాధాన్యమిచ్చింది. 2016లో కోచింగ్‌ తీసుకోకుండానే సివిల్‌ సర్వీసెస్‌ పరీక్ష రాసి మొదటి ప్రయత్నంలోనే విజయం సాధించింది. అసోసియేట్‌ మెడికల్‌ ప్రొఫెసర్‌గా పదోన్నతినీ సాధించింది. దాన్ని పక్కనపెట్టి ఐపీఎస్‌ శిక్షణకు వెళ్లింది. నేషనల్‌ పోలీస్‌ అకాడమీలో శిక్షణ సమయానికి అమృతకు 33 ఏళ్లు. అప్పటిదాకా ఎలాంటి శారీరక శ్రమా లేదు. పైగా ఆమె కేడర్‌లో తనొక్కతే అమ్మాయి. అందరితో సమానంగా నిలవడానికి అదనంగా శిక్షణకు సమయం కేటాయించేది. గాయాలపాలైనా నొప్పిని పంటి బిగువన భరించి సాధన సాగించింది. ఫలితం... శిక్షణ పూర్తయ్యేనాటికి మూడు పతకాలను సాధించడమే కాకుండా ఆల్‌ రౌండ్‌ లేడీ ఐపీఎస్‌ ప్రొబేషనర్‌గానూ నిలిచింది.

శిక్షణ తర్వాత 2017లో దిల్లీలో మొదట ఐపీఎస్‌ అధికారిగా బాధ్యతలను నిర్వహించింది. మెడికల్‌ పరిజ్ఞానంతో ఫోరెన్సిక్‌ సంబంధిత క్లిష్టమైన, క్రిమినల్‌ కేసులను పరిష్కరించి, ప్రజల నమ్మకాన్ని చూరగొంది. ప్రస్తుతం రాజస్థాన్‌లోని జయపురలో డిప్యూటీ కమిషనర్‌ ఆఫ్‌ పోలీస్‌ (డీసీపీ)గా బాధ్యతలను నిర్వర్తిస్తోంది. ఇదంతా సాఫీగా ఏమీ సాగలేదంటుందామె. అవరోధాలూ ఎదురయ్యాయి. కానీ తన కలలను సాకారం చేసుకోవాలన్న తపన ముందు అవేమీ నిలవలేదంటుంది అమృత. అందుకే అమ్మగా, వైద్యురాలిగా, పోలీసు ఆఫీసర్‌గా బాధ్యతలను విజయవంతంగా నిర్వర్తిస్తూ ముందుకు సాగగలుగుతోంది. అంతేకాదు.. వ్యక్తిగత, వృత్తిగత జీవితాలను సమన్వయం చేసుకోలేక ఇబ్బంది పడుతున్నవారికి ఆదర్శంగా నిలవడంతోపాటు సివిల్స్‌ లక్ష్యమున్న అమ్మాయిల్లో స్ఫూర్తినీ నింపుతోంది.


మరిన్ని

చదువుల రాణి.. పసిడి కొల్లగొట్టింది..!

సాధారణంగా చదువులో ముందున్న వారు ఆటల్లో వెనకబడతారు.. అదే ఆటల్లో ముందున్న వారు చదువులో రాణించరు.. అంటుంటారు. కానీ చదువులో, ఆటల్లో.. రెండింట్లోనూ సత్తా చాటే వారు చాలా అరుదుగానే ఉంటారు. ఆస్ట్రియా సైక్లిస్ట్‌ అన్నా కిసెనోఫర్‌ కూడా అలాంటి మహిళే! వృత్తిరీత్యా గణిత విద్యావేత్త అయిన ఆమె.. అండర్‌ డాగ్‌గా టోక్యో ఒలింపిక్స్‌ బరిలోకి దిగింది. అందరి అంచనాల్ని తలకిందులు చేస్తూ ఫైనల్‌ ఫేవరెట్‌ను చిత్తు చేసి పసిడి పతకాన్ని కొల్లగొట్టింది. ఫలితంగా 125 ఏళ్లలో సైక్లింగ్‌ విభాగంలో ఒలింపిక్స్‌ పతకం గెలుచుకున్న తొలి ఆస్ట్రియా అథ్లెట్‌గా చరిత్ర సృష్టించింది. దీంతో ఆమె పేరు ప్రపంచమంతా మార్మోగిపోతోంది.

సైకిల్‌ తొక్కితే రాళ్లు విసిరారు.. చంపేస్తామన్నారు!

అఫ్గానిస్థాన్‌కు చెందిన ఆమె చిన్నతనంలోనే సైకిల్‌ నేర్చుకుంది. అందులోనే జీవితాన్ని వెతుక్కోవాలనుకుంది. కానీ అక్కడి తాలిబన్లు, మత ఛాందసవాదులు ‘ఆడపిల్లలు సైకిల్‌ తొక్కడమేంటి?’ అంటూ ఆమె ఆశయానికి అడ్డుపడ్డారు. ధైర్యం చేసి సైకిల్‌తో రోడ్డుపై కొస్తే రాళ్లు విసిరారు. చంపేస్తామని బెదిరించారు. అందుకే ఉన్న వూరును విడిచిపెట్టి ప్రాణాలు అరచేతిలో పెట్టుకుని ఫ్రాన్స్‌కు వలస వెళ్లిపోయింది. అక్కడే తన సైక్లింగ్‌ లక్ష్యానికి మెరుగులు దిద్దుకుంది. ప్రతిష్ఠాత్మక ఒలింపిక్స్‌లో శరణార్థుల జట్టు తరఫున పాల్గొనే సువర్ణావకాశం సొంతం చేసుకుంది. ఆమే 24 ఏళ్ల మసోమా అలీ జాదా.

సృజనాత్మక పరిష్కారానికి అరుదైన పురస్కారం!

యూరోపియన్‌ ఇన్వెంటర్‌ అవార్డ్‌.. వివిధ రంగాల్లో ఆవిష్కరణలు చేసి ఓ సరికొత్త ట్రెండ్‌ క్రియేట్‌ చేసిన వారికి ఏటా అందించే ప్రతిష్ఠాత్మక పురస్కారమిది! ఐరోపాతో పాటు ఇతర దేశాల వారు చేసిన అద్భుత ఆవిష్కరణల్ని గుర్తించి.. వాటి సృష్టికర్తలకు బహూకరించే ఈ పురస్కారం ఈసారి భారత సంతతికి చెందిన రసాయన శాస్త్రవేత్త సుమితా మిత్రాను వరించింది. ‘నాన్‌ యూరోపియన్‌ పేటెంట్‌ ఆఫీస్‌ కంట్రీస్‌’ విభాగం కింద యూరోపియన్‌ పేటెంట్‌ ఆఫీస్‌ (EPO) ఆమెకు ఇటీవలే ఈ అవార్డు అందించింది. దంత వైద్యంలో భాగంగా ఆమె చేసిన ఓ అసాధారణ ఆవిష్కరణతో ఎంతోమంది దంత సమస్యలకు పరిష్కారం దొరికినట్లయింది. ఈ నేపథ్యంలోనే ఈ అరుదైన అవార్డు అందుకున్న సందర్భంగా ఈ ఇండో-అమెరికన్‌ గురించి కొన్ని విశేషాలు మీకోసం..

ఆరోగ్యమస్తు

మరిన్ని

అనుబంధం

మరిన్ని

యూత్ కార్నర్

మరిన్ని

'స్వీట్' హోం

మరిన్ని

వర్క్ & లైఫ్

మరిన్ని

బ్యూటీ & ఫ్యాషన్

మరిన్ని