నేను చేస్తోంది అల్లా పనే
close
Updated : 10/07/2021 06:31 IST

నేను చేస్తోంది అల్లా పనే

సేవ చేయాలనే కోరిక ఆమెతోపాటు పెరుగుతూ వచ్చింది. చదువుకుంటూనే హెచ్‌ఐవీ బాధితులకు చేయూతనందించింది. సేవే జీవితంగా మారి సాగుతున్న వేళ కరోనా విరుచుకుపడింది. ఆమెలోని అమ్మ ఆగలేకపోయింది. బాధితుల సాయానికి నడుం బిగించింది. ఆమె చిత్తశుద్ధి చూసి మరికొందరు తోడయ్యారు. వదాన్యులూ ఆ అమ్మకు అండగా నిలుస్తున్నారు. వారందరి తోడ్పాటుతో వేల మంది ఆకలి తీర్చింది. వందల మందికి సాంత్వన చేకూరుస్తోంది.... ఆమే రాజమహేంద్రవరానికి చెందిన అక్సా పాషా! తనతో వసుంధర సంభాషించింది...
‘స్కూల్లో టీచర్‌ పెద్దయ్యాక ఏం చేస్తావ్‌ అంటే.. తడుముకోకుండా సేవ చేస్తానని చెప్పా. అప్పుడు సేవ అంటే ఏంటో తెలియదు. ఇంటికి వెళ్లి ఏంటని అమ్మానాన్నలను అడిగా. పదిమంది ఆనందం కోసం నువ్వు ఏ కష్టానికైనా సిద్ధపడటమే సేవ అన్నారు. అప్పుడే నిర్ణయించుకొన్నా.. నా జీవితం సమాజం కోసమే’ అని గుర్తుచేసుకుంది అక్సా. వాళ్లది పిఠాపురం. దిగువ మధ్యతరగతి కుటుంబం. నాన్న నాటకాల్లో మేకప్‌ మ్యాన్‌, అమ్మ గృహిణి. అక్సా డిగ్రీ రెండో సంవత్సరం చదువుతుండగా ఊళ్లో ‘స్వరాజ్య అభ్యుదయ సేవా సమితి’ అనే సంస్థను ఏర్పాటు చేశారు. ఈ సంస్థ హెచ్‌ఐవీ/ ఎయిడ్స్‌ బాధితులకు చేయూతనిస్తుంది. ఎయిడ్స్‌ రోగులకు సేవ చేయాలనే తలంపుతో 2004లో ఆ సంస్థలో వలంటీర్‌గా చేరింది అక్సా. చదువుకుంటూనే సెలవులు, ఖాళీ సమయాల్లో హెచ్‌ఐవీ బాధితులకు కౌన్సెలింగ్‌ ఇచ్చేది. రోగులను ఆసుపత్రులకు తీసుకెళ్లడం, ఆర్థిక సాయం అందించడం వంటివి చేసేది. అదే సంస్థలో పని చేసే అమీర్‌పాషాతో మనసు కలిసింది. పెద్దల అంగీకారంతో ఇద్దరి జీవితాలూ ఒకటయ్యాయి.  ఇద్దరూ రాజమహేంద్రవరానికి చేరారు. అమీర్‌ పండ్ల వ్యాపారం చేస్తారు. తీరికవేళ్లలో ‘పారా’ స్వచ్ఛంద సంస్థతో కలిసి పని చేస్తున్నారు. వీరికి ఇద్దరు కూతుళ్లు. చిన్న కుమార్తె దివ్యాంగురాలు. హెచ్‌.ఐ.వి.పై ప్రచారం చేయడం, బాధితులకు అవగాహన కల్పించడం అక్సా కార్యక్రమాలు. మొదట్లో వారంతా ఇంటి దగ్గరకు వస్తుంటే ఇరుగూ పొరుగూ అభ్యంతరపెట్టేవారు. అయితే అక్సా వారికీ నచ్చచెప్పి తన దారికి తెచ్చుకుంది.

కరోనా కాలంలో.... గతేడాది లాక్‌డౌన్‌ నుంచి అక్సా సేవలు విస్తృతమయ్యాయి. ఉపాధి కోల్పోయిన వారు, సొంత వారు కాదంటే రోడ్డున పడ్డవారు, కొవిడ్‌ వచ్చిందని.. వెలివేసిన బంధువులు, అంతిమ సంస్కారం చేసేవారు లేని కొవిడ్‌ మృతదేహాలు.. ఇలా ఎందరివో వెతలు ఆమెను కదిలించాయి. వీటికేదైనా పరిష్కార మార్గం కావాలనుకుంది. ఆమె ఆలోచనలకు భర్త అమీర్‌పాషా సహకారం తోడయ్యింది. ఇద్దరూ కలిసి కరోనా మొదటి దశలో.. హోం ఐసోలేషన్‌లో ఉంటూ భోజనం కోసం ఇబ్బంది పడుతున్న వారు, వలస కూలీలు, యాచకులు, షెల్టర్‌ హోమ్స్‌లోని వారికి ఇంట్లోనే వండుకుని తీసుకువెళ్లి ఆహారాన్ని అందించారు. రెడ్‌జోన్‌లో ఉన్నవారికి కావాల్సిన మందులు, సరకులు అందజేశారు. అలా సుమారు ఎనిమిది నుంచి తొమ్మిది వేల మందికి భోజనం అందించారు. దాతలు, స్వచ్ఛంద సంస్థల సహకారంతో రాజమహేంద్రవరం చుట్టుపక్కల గ్రామాల్లో పేదలకు నెలకు సరిపడా బియ్యం, కందిపప్పు, నూనె, చింతపండు తదితర నిత్యావసరాలను పంచారు. ఏదైనా ఇబ్బంది ఉంటే తెలియజేయమంటూ ఫోన్‌ నంబరును ఫేస్‌బుక్‌, వాట్సప్‌ ద్వారా పది మందికీ తెలియజేశారు. ఒంటరి వృద్ధులకు మందులు అందించడం, వైద్య పరీక్షలకు తీసుకెళ్లడం చేసేవారు. కరోనా సెకండ్‌ వేవ్‌లో కూడా అక్సా సేవలు కొనసాగుతున్నాయి. ఆరు ఆక్సిజన్‌ సిలెండర్లు కొనుగోలు చేసి.. ప్రభుత్వాసుపత్రిలో  బెడ్లు దొరక్క విషమ పరిస్థితిలో ఉన్న రోగులకు అందజేశారు. అక్సా సేవా కార్యక్రమాలను చూసి స్నేహితులు, బంధువులు, తెలిసిన వారు ఆర్థిక సహకారం అందిస్తున్నారు. తన స్ఫూర్తితో కొందరు స్వచ్ఛంద సేవకులుగానూ మారారు. స్థానిక స్వచ్ఛంద సంస్థలూ వీరికి అండగా నిలుస్తున్నాయి. దృష్టికి వచ్చిన సమస్యలను నమోదు చేసుకోవడం, పరిష్కారమయ్యేలా వలంటీర్లను పురమాయించడం ఆమె పనిగా మారింది. ఆమె బృందంలో ప్రస్తుతం 20 మంది వలంటీర్లు సేవలందిస్తున్నారు.
అంతిమయాత్రలో తోడుగా..  అక్సాతోపాటు ఆమె భర్త ఆమిర్‌ కూడా అదే స్థాయిలో సేవల్లో పాల్గొంటున్నారు. కరోనాతో మరణించిన వందల మందికి ఆయన తన బృందంతో కలిసి అంత్యక్రియలు నిర్వహించారు. ‘ఇట్లా వెనకాముందూ చూసుకోకుండా చేస్తున్నారు, నీకు, నీ భర్తకు ఏమైనా అయితే కుటుంబం పరిస్థితి ఏంటి’? అని బంధువులు ప్రశ్నిస్తుంటారు... ‘నేను చేస్తోంది అల్లా పని.. ఆయనే మా  యోగక్షేమాలు చూసుకుంటాడు..’ అని చిరునవ్వుతో సమాధానమిస్తుంది అక్సా.

- అమ్ముల మోహిత్‌ నాగప్రసాద్‌, రాజమహేంద్రవరం     


                                                                                                                    
స్వేచ్ఛ ఒకరిచ్చేది కాదు, మనమే సాధించుకోవాలి. ఏ విషయంలోనయినా పరాధీనత లేకుండా స్వీయ నిర్ణయాలు తీసుకోవాలి.
- టోనీ మొరిసన్‌, రచయిత్రి, సంపాదకురాలు

మరిన్ని

నారీ... వ్యాయామ దారి!

ఇంట్లో పనే ఎక్సర్‌సైజు... ఒక గృహిణి అభిప్రాయం. ఆఫీసుకెళ్లొచ్చే సరికే టైం అయిపోతుంది. మళ్లీ జిమ్‌కు వెళ్లే తీరిక ఎక్కడిది? ఒక ఉద్యోగిని ఆవేదన. జిమ్‌ కెళ్లినా అక్కడ మగవాళ్లతో పాటు చేయలేం... ఇదో యువతి సమస్య... ఆరోగ్యాన్ని కాపాడుకోవాలనే ఆలోచన ఉంటే మార్గాలు బోలెడు ఉన్నాయంటున్నారు...జీరోసైజ్‌ లేదా సన్నగా, నాజూగ్గా ఉండాల్సిన అవసరం సినీతారలు, మోడల్స్‌కు మాత్రమే. మేమెందుకు నోరు కట్టేసుకోవాలి, కసరత్తులంటూ చెమటోడ్చాలి అనే భావన చాలా మంది మహిళల్లో ఉండేది. గృహిణులకు ఇంటిపనే సరిపోతుందిలే’ అనే అపోహ ఉండేది. ఇప్పుడు మహిళలకూ ఉద్యోగ, ఉపాధి అవకాశాలు పెరగటంతో జీవనశైలిలో మార్పులు వచ్చాయి.

తరువాయి

చదువుల రాణి.. పసిడి కొల్లగొట్టింది..!

సాధారణంగా చదువులో ముందున్న వారు ఆటల్లో వెనకబడతారు.. అదే ఆటల్లో ముందున్న వారు చదువులో రాణించరు.. అంటుంటారు. కానీ చదువులో, ఆటల్లో.. రెండింట్లోనూ సత్తా చాటే వారు చాలా అరుదుగానే ఉంటారు. ఆస్ట్రియా సైక్లిస్ట్‌ అన్నా కిసెనోఫర్‌ కూడా అలాంటి మహిళే! వృత్తిరీత్యా గణిత విద్యావేత్త అయిన ఆమె.. అండర్‌ డాగ్‌గా టోక్యో ఒలింపిక్స్‌ బరిలోకి దిగింది. అందరి అంచనాల్ని తలకిందులు చేస్తూ ఫైనల్‌ ఫేవరెట్‌ను చిత్తు చేసి పసిడి పతకాన్ని కొల్లగొట్టింది. ఫలితంగా 125 ఏళ్లలో సైక్లింగ్‌ విభాగంలో ఒలింపిక్స్‌ పతకం గెలుచుకున్న తొలి ఆస్ట్రియా అథ్లెట్‌గా చరిత్ర సృష్టించింది. దీంతో ఆమె పేరు ప్రపంచమంతా మార్మోగిపోతోంది.

తరువాయి

సైకిల్‌ తొక్కితే రాళ్లు విసిరారు.. చంపేస్తామన్నారు!

అఫ్గానిస్థాన్‌కు చెందిన ఆమె చిన్నతనంలోనే సైకిల్‌ నేర్చుకుంది. అందులోనే జీవితాన్ని వెతుక్కోవాలనుకుంది. కానీ అక్కడి తాలిబన్లు, మత ఛాందసవాదులు ‘ఆడపిల్లలు సైకిల్‌ తొక్కడమేంటి?’ అంటూ ఆమె ఆశయానికి అడ్డుపడ్డారు. ధైర్యం చేసి సైకిల్‌తో రోడ్డుపై కొస్తే రాళ్లు విసిరారు. చంపేస్తామని బెదిరించారు. అందుకే ఉన్న వూరును విడిచిపెట్టి ప్రాణాలు అరచేతిలో పెట్టుకుని ఫ్రాన్స్‌కు వలస వెళ్లిపోయింది. అక్కడే తన సైక్లింగ్‌ లక్ష్యానికి మెరుగులు దిద్దుకుంది. ప్రతిష్ఠాత్మక ఒలింపిక్స్‌లో శరణార్థుల జట్టు తరఫున పాల్గొనే సువర్ణావకాశం సొంతం చేసుకుంది. ఆమే 24 ఏళ్ల మసోమా అలీ జాదా.

తరువాయి

సృజనాత్మక పరిష్కారానికి అరుదైన పురస్కారం!

యూరోపియన్‌ ఇన్వెంటర్‌ అవార్డ్‌.. వివిధ రంగాల్లో ఆవిష్కరణలు చేసి ఓ సరికొత్త ట్రెండ్‌ క్రియేట్‌ చేసిన వారికి ఏటా అందించే ప్రతిష్ఠాత్మక పురస్కారమిది! ఐరోపాతో పాటు ఇతర దేశాల వారు చేసిన అద్భుత ఆవిష్కరణల్ని గుర్తించి.. వాటి సృష్టికర్తలకు బహూకరించే ఈ పురస్కారం ఈసారి భారత సంతతికి చెందిన రసాయన శాస్త్రవేత్త సుమితా మిత్రాను వరించింది. ‘నాన్‌ యూరోపియన్‌ పేటెంట్‌ ఆఫీస్‌ కంట్రీస్‌’ విభాగం కింద యూరోపియన్‌ పేటెంట్‌ ఆఫీస్‌ (EPO) ఆమెకు ఇటీవలే ఈ అవార్డు అందించింది. దంత వైద్యంలో భాగంగా ఆమె చేసిన ఓ అసాధారణ ఆవిష్కరణతో ఎంతోమంది దంత సమస్యలకు పరిష్కారం దొరికినట్లయింది. ఈ నేపథ్యంలోనే ఈ అరుదైన అవార్డు అందుకున్న సందర్భంగా ఈ ఇండో-అమెరికన్‌ గురించి కొన్ని విశేషాలు మీకోసం..

తరువాయి

బ్యూటీ & ఫ్యాషన్

మరిన్ని

ఆరోగ్యమస్తు

మరిన్ని

అనుబంధం

మరిన్ని

యూత్‌ కార్నర్

మరిన్ని

మంచిమాట


'స్వీట్' హోం

మరిన్ని

వర్క్‌ & లైఫ్

మరిన్ని