రోగుల బాధలు విని ఏడ్చేదాన్ని...
close
Published : 13/07/2021 02:14 IST

రోగుల బాధలు విని ఏడ్చేదాన్ని...

‘క్యాన్సర్‌’ పేరు వినగానే చనిపోతామనే భయం. నిరాశ, నిస్పృహలతో నిండిపోయేవారు కొందరైతే.. చికిత్సను తీసుకోవడానికే నిరాకరించేవారు ఇంకొందరు. ఇంకెన్ని రోజులు మిగిలున్నాయోనని రోగులూ.. ఎప్పుడు ఏం వినాల్సొస్తుందోనని కుటుంబసభ్యులు భయంతో బతికేస్తుంటారు. అలాంటివారిలో ధైర్యం నింపుతున్నారు గంగా కన్యాకుమారి. భర్తను క్యాన్సర్‌ మహమ్మారి పొట్టనపెట్టుకుంటే.. ఆ బాధను పక్కనపెట్టి, 16 ఏళ్లుగా బాధితులకు ఉచితంగా సేవలందిస్తున్నారు. ఆమె సేవా ప్రస్థానమిది!!

గంగా కన్యాకుమారిది నెల్లూరు. భర్త రామ్మూర్తి న్యాయవాది. ఆర్బిట్రేటర్‌గా పని చేసేవారు. రెండేళ్లు క్యాన్సర్‌తో పోరాడి ఆయన 2004లో మృతిచెందారు.  17 ఏళ్ల వయసులో పెళ్లి, తర్వాత బీఏ పూర్తి చేసినా గృహిణిగానే కొనసాగారామె. క్యాన్సర్‌ మరెంతో మందినీ కబళిస్తోందని తెలిసి, ఆ బాధితులకు సేవ చేయాలని నిర్ణయించుకున్నారు. తన వద్దనున్న రూ.10 లక్షలను నెల్లూరు రెడ్‌క్రాస్‌ క్యాన్సర్‌ ఆసుపత్రికి విరాళంగా అందజేశారు. అదే సమయంలో ఆ ఆసుపత్రి డైరెక్టర్‌ అరుణా చంద్రశేఖరన్‌తో పరిచయం ఏర్పడింది. ఆసుపత్రిలోని బాధితులకు సేవలు అందించాలన్న తన నిర్ణయాన్ని డైరెక్టర్‌తో చెప్పారు. ఆవిడ సంతోషించి, ముందుగా ‘పెయిన్‌ అండ్‌ పాలియేటివ్‌ కోర్సు’ చేయమని సూచించారు. 45 ఏళ్ల వయసులో కన్యాకుమారి హైదరాబాద్‌లోని ఎంఎన్‌జే క్యాన్సర్‌ ఆసుపత్రిలో మూడు నెలలు ఆ కోర్సులో శిక్షణ పొందారు. 2005 నుంచి కౌన్సెలర్‌గా రోగులకు ఉచితంగానే సేవలు అందిస్తున్నారు. తన సేవలు, చిత్తశుద్ధి గమనించి రెడ్‌క్రాస్‌ క్యాన్సర్‌ ఆసుపత్రి కమిటీ సభ్యురాలిగా తీసుకున్నారు.

అవగాహన సదస్సులు.. క్యాన్సర్‌ అనగానే చనిపోతామనే భయం ఉంటుంది. తీవ్ర నిరాశకు గురవుతారు. చికిత్స అనవసరమనే భావనకొస్తారు. అలాంటి వారితో మాట్లాడి ధైర్యం నింపడంతో పాటు చికిత్స తీసుకునేలా ప్రోత్సహిస్తున్నారీమె. ఉదయం 9 గం. నుంచి మధ్యాహ్నం 2 గం.వరకు ఆసుపత్రిలోనే గడుపుతారు. రోగులు, వారి  బంధువులతో మాట్లాడతారు. వారితో ఎలా ప్రవర్తించాలి, అందించాల్సిన ఆహారం మొదలైన అంశాలపై బంధువులు, కుటుంబ సభ్యులకు సూచనలిస్తారు. ‘బాధితులకు కావాల్సింది జాలి కాదు. ఉన్న కొద్ది సమయాన్నీ ఆనందంగా గడపడం. కాబట్టి వారితో ప్రేమగా, జాగ్రత్తగా ఉండాలి’ అంటారు 61 ఏళ్ల కన్యాకుమారి. ఆసుపత్రి తరఫున ప్రతి మంగళ, శుక్ర వారాల్లో క్యాన్సర్‌పై అవగాహన కార్యక్రమాలనీ ఆవిడ నిర్వహిస్తున్నారు. మొదట గ్రామాల్లో నిర్వహించగా పెద్దగా స్పందన లేకపోవడంతో కళాశాలలు, పాఠశాలల్లో ప్రారంభించారు. పిల్లల ద్వారా తల్లిదండ్రుల్లో అవగాహన కల్పించాలన్నది ఉద్దేశం. అలా వందల సదస్సులు నిర్వహించారు. క్యాన్సర్‌ కారకాలు, నివారణాంశాలు, ఆహారం, చికిత్స మొదలైన అంశాలపై వీటిలో అవగాహన కల్పిస్తారు. అమ్మాయిలు చేయించుకోవాల్సిన పరీక్షలు, తీసుకోవాల్సిన వ్యాక్సిన్ల గురించీ చెబుతారు. ఫేస్‌బుక్‌లో ట్రెయిన్‌మేట్స్‌ పేరిట ఉన్న ఒక గ్రూపుతో ఈమెకి పరిచయం ఏర్పడింది. వారి ఆహ్వానం మేరకు కేరళలో సదస్సు నిర్వహించారు. అది విజయం సాధించడంతో బెంగళూరు, హైదరాబాద్‌ మొదలైన చోట్ల కూడా క్యాన్సర్‌పై అవగాహన కల్పిస్తున్నారు. బ్రెస్ట్‌ క్యాన్సర్‌తో రొమ్ము కోల్పోయిన వారికి అయిదేళ్లుగా మాస్టిక్టమీ బ్రాలను అందిస్తున్నారు. మొదట కొద్దిమొత్తాన్ని తీసుకుని ఇచ్చేవారు. తర్వాత జైన్‌ ట్రస్టు, విజయలక్ష్మి లేడీస్‌ క్లబ్‌, తన అక్క పిల్లలు నడుపుతున్న ‘ఫీడ్‌ ది హంగ్రీ ఫౌండేషన్‌’ సాయానికి ముందుకొచ్చాయి. వారి ఆసరాతో ఉచితంగా ఇవ్వడం ప్రారంభించారు. నెలకు 20 నుంచి 30 మంది వరకు వీటిని అందిస్తున్నారు. కన్యాకుమారి సేవలకు మెచ్చి పలు సంస్థలు పురస్కారాలనూ ప్రదానం చేశాయి. అప్పటి గవర్నర్‌ నరసింహన్‌ చేతుల మీదుగా ప్రతిభా పురస్కారాన్ని అందుకున్నారు. రెడ్‌క్రాస్‌ నుంచి విశిష్ట సేవా పురస్కారం వంటివెన్నో అందుకున్నారు.

ఊపిరి ఉన్నంత వరకూ...: కన్యాకుమారి
నా భర్త చనిపోయాక డిప్రెషన్‌కు గురయ్యా. తోబుట్టువులు, స్నేహితుల సాయంతో దాన్నుంచి బయటపడ్డా. ఆయనకి ఈ ఊరంటే చాలా ఇష్టం. నేను పుట్టిందీ, మెట్టిందీ కూడా ఇదే. అందుకే ఇక్కడే సేవ చేయాలని నిర్ణయించుకున్నా. మొదట్లో రోగుల గాథలు విని ఏడ్చేసేదాన్ని. క్యాన్సర్‌ సోకిందని భార్యలను వదిలేసే వాళ్లు కొందరైతే.. విరక్తితో చిక్సితనూ పక్కన పడేసేవారు కొందరు. వారితో మాట్లాడి ధైర్యాన్ని నింపుతూ ఉంటా. చివరి దశలో ఉన్న వారికి మాత్రమే ప్రాణాపాయం. వారినీ ప్రేమగా ఆదరిస్తే జీవితకాలం పెంచొచ్చు. అదే బాధితుల కుటుంబాలకు చెబుతుంటా. ఈ భయం, నిరాశలను తొలగించాలని చీఫ్‌ మెడికల్‌ ఆఫీసర్‌ టి.లక్ష్మితో కలిసి అవగాహన సదస్సులు నిర్వహిస్తున్నాం. నా ఊపిరున్నంత వరకూ వీటిని కొనసాగిస్తా.

ఓసూరి మురళీకృష్ణ, నెల్లూరు


నిన్ను నువ్వు నిత్యం ఉత్సాహపరుచుకుంటూ ముందడుగు వేయాలి. ఎందుకంటే నీ కోసం ఎవరూ నడవరు.

- కాజల్‌ అగర్వాల్‌, నటి

మరిన్ని

నారీ... వ్యాయామ దారి!

ఇంట్లో పనే ఎక్సర్‌సైజు... ఒక గృహిణి అభిప్రాయం. ఆఫీసుకెళ్లొచ్చే సరికే టైం అయిపోతుంది. మళ్లీ జిమ్‌కు వెళ్లే తీరిక ఎక్కడిది? ఒక ఉద్యోగిని ఆవేదన. జిమ్‌ కెళ్లినా అక్కడ మగవాళ్లతో పాటు చేయలేం... ఇదో యువతి సమస్య... ఆరోగ్యాన్ని కాపాడుకోవాలనే ఆలోచన ఉంటే మార్గాలు బోలెడు ఉన్నాయంటున్నారు...జీరోసైజ్‌ లేదా సన్నగా, నాజూగ్గా ఉండాల్సిన అవసరం సినీతారలు, మోడల్స్‌కు మాత్రమే. మేమెందుకు నోరు కట్టేసుకోవాలి, కసరత్తులంటూ చెమటోడ్చాలి అనే భావన చాలా మంది మహిళల్లో ఉండేది. గృహిణులకు ఇంటిపనే సరిపోతుందిలే’ అనే అపోహ ఉండేది. ఇప్పుడు మహిళలకూ ఉద్యోగ, ఉపాధి అవకాశాలు పెరగటంతో జీవనశైలిలో మార్పులు వచ్చాయి.

తరువాయి

చదువుల రాణి.. పసిడి కొల్లగొట్టింది..!

సాధారణంగా చదువులో ముందున్న వారు ఆటల్లో వెనకబడతారు.. అదే ఆటల్లో ముందున్న వారు చదువులో రాణించరు.. అంటుంటారు. కానీ చదువులో, ఆటల్లో.. రెండింట్లోనూ సత్తా చాటే వారు చాలా అరుదుగానే ఉంటారు. ఆస్ట్రియా సైక్లిస్ట్‌ అన్నా కిసెనోఫర్‌ కూడా అలాంటి మహిళే! వృత్తిరీత్యా గణిత విద్యావేత్త అయిన ఆమె.. అండర్‌ డాగ్‌గా టోక్యో ఒలింపిక్స్‌ బరిలోకి దిగింది. అందరి అంచనాల్ని తలకిందులు చేస్తూ ఫైనల్‌ ఫేవరెట్‌ను చిత్తు చేసి పసిడి పతకాన్ని కొల్లగొట్టింది. ఫలితంగా 125 ఏళ్లలో సైక్లింగ్‌ విభాగంలో ఒలింపిక్స్‌ పతకం గెలుచుకున్న తొలి ఆస్ట్రియా అథ్లెట్‌గా చరిత్ర సృష్టించింది. దీంతో ఆమె పేరు ప్రపంచమంతా మార్మోగిపోతోంది.

తరువాయి

సైకిల్‌ తొక్కితే రాళ్లు విసిరారు.. చంపేస్తామన్నారు!

అఫ్గానిస్థాన్‌కు చెందిన ఆమె చిన్నతనంలోనే సైకిల్‌ నేర్చుకుంది. అందులోనే జీవితాన్ని వెతుక్కోవాలనుకుంది. కానీ అక్కడి తాలిబన్లు, మత ఛాందసవాదులు ‘ఆడపిల్లలు సైకిల్‌ తొక్కడమేంటి?’ అంటూ ఆమె ఆశయానికి అడ్డుపడ్డారు. ధైర్యం చేసి సైకిల్‌తో రోడ్డుపై కొస్తే రాళ్లు విసిరారు. చంపేస్తామని బెదిరించారు. అందుకే ఉన్న వూరును విడిచిపెట్టి ప్రాణాలు అరచేతిలో పెట్టుకుని ఫ్రాన్స్‌కు వలస వెళ్లిపోయింది. అక్కడే తన సైక్లింగ్‌ లక్ష్యానికి మెరుగులు దిద్దుకుంది. ప్రతిష్ఠాత్మక ఒలింపిక్స్‌లో శరణార్థుల జట్టు తరఫున పాల్గొనే సువర్ణావకాశం సొంతం చేసుకుంది. ఆమే 24 ఏళ్ల మసోమా అలీ జాదా.

తరువాయి

సృజనాత్మక పరిష్కారానికి అరుదైన పురస్కారం!

యూరోపియన్‌ ఇన్వెంటర్‌ అవార్డ్‌.. వివిధ రంగాల్లో ఆవిష్కరణలు చేసి ఓ సరికొత్త ట్రెండ్‌ క్రియేట్‌ చేసిన వారికి ఏటా అందించే ప్రతిష్ఠాత్మక పురస్కారమిది! ఐరోపాతో పాటు ఇతర దేశాల వారు చేసిన అద్భుత ఆవిష్కరణల్ని గుర్తించి.. వాటి సృష్టికర్తలకు బహూకరించే ఈ పురస్కారం ఈసారి భారత సంతతికి చెందిన రసాయన శాస్త్రవేత్త సుమితా మిత్రాను వరించింది. ‘నాన్‌ యూరోపియన్‌ పేటెంట్‌ ఆఫీస్‌ కంట్రీస్‌’ విభాగం కింద యూరోపియన్‌ పేటెంట్‌ ఆఫీస్‌ (EPO) ఆమెకు ఇటీవలే ఈ అవార్డు అందించింది. దంత వైద్యంలో భాగంగా ఆమె చేసిన ఓ అసాధారణ ఆవిష్కరణతో ఎంతోమంది దంత సమస్యలకు పరిష్కారం దొరికినట్లయింది. ఈ నేపథ్యంలోనే ఈ అరుదైన అవార్డు అందుకున్న సందర్భంగా ఈ ఇండో-అమెరికన్‌ గురించి కొన్ని విశేషాలు మీకోసం..

తరువాయి

బ్యూటీ & ఫ్యాషన్

మరిన్ని

ఆరోగ్యమస్తు

మరిన్ని

అనుబంధం

మరిన్ని

యూత్‌ కార్నర్

మరిన్ని

మంచిమాట


'స్వీట్' హోం

మరిన్ని

వర్క్‌ & లైఫ్

మరిన్ని