వజ్రాల కోసం... విమానం ఎక్కేదాన్ని కాదు!
close
Published : 15/07/2021 00:45 IST

వజ్రాల కోసం... విమానం ఎక్కేదాన్ని కాదు!

ఓ చిన్న బంగారు గొలుసు వేసుకుని రోడ్డు మీద నడిచి వెళ్లాలన్నా భయంగా ఉంటుంది. కానీ ఆమె... విలువైన వజ్రాలను వెంట పెట్టుకుని రాష్ట్రాలు చుట్టేశారు.  ఎందుకంటే ఆవిడది డైమండ్‌ వ్యాపారం. అప్పటికి ఈ రంగంలో మహిళల సంఖ్య తక్కువే... ఏ మాత్రం తేడా వచ్చినా... కోలుకోలేని నష్టం... మహిళగా నీకు మరింత కష్టం... అన్న మాటల్ని సవాల్‌గా తీసుకుని తన సత్తా నిరూపించుకున్నారు. కస్టమైజ్డ్‌ వజ్రాల నగల తయారీలో తనదైన ముద్ర వేశారు రాధిక మన్నె. ఆ వివరాలు వసుంధరతో పంచుకున్నారు.

ష్టనష్టాలకు, అడ్డంకులకు భయపడి వెనకడుగు వేస్తే జీవితాన్ని నచ్చినట్లు డిజైన్‌ చేసుకోలేం. అలానే నగల డిజైనర్‌గా ప్రత్యేకతను, గుర్తింపుని తెచ్చుకోవడం కూడా ఒక్కరోజులో జరిగిపోలేదు. ముందు నుంచీ అనుకుని ఈ రంగంలోకి రాలేదు. మాది గుడివాడ. నా ఎనిమిదేళ్ల వయసులో మా అమ్మ చనిపోయింది. దాంతో గుంటూరులో అమ్మమ్మ, తాతయ్యల దగ్గరే పెరిగా. డిగ్రీ అవ్వగానే పెళ్లయ్యింది. మా వారితో కలిసి బెంగళూరు వెళ్లిపోయా. అక్కడ ఆయన రియల్‌ ఎస్టేట్‌ చేసే వారు. ఖాళీగా ఉండకుండా ఏదైనా సొంతగా చేయాలనుకున్నా. అది పది మందికీ ఉపాధి కూడా చూపించేదై ఉండాలని అనుకున్నా. అప్పుడే అమెరికాలో డాక్టర్‌గా పని చేసే మా బావగారు ఆ దేశంలో నర్సుల కొరత గురించి, విదేశాల నుంచి రప్పించుకుంటోన్న విధానం గురించి చెప్పారు. ఆ ఉద్యోగానికి అవసరమైన అర్హత పరీక్ష మన దేశంలో రాసే వీలు లేక... శ్రీలంక వంటి దేశాలకు వెళ్లి రాయాల్సి వచ్చేది. సరిగ్గా అదే సమయంలో మన దేశంలో ఆ అవకాశం కల్పిస్తున్నారని తెలిసింది. దాంతో బెంగళూరులో నర్సింగ్‌ మాన్‌పవర్‌ కన్సల్టెన్సీ ఏర్పాటు చేశా. కొచ్చి, చెన్నై, దిల్లీ, హైదరాబాద్‌, బెంగళూరుల్లో శిక్షణ కేంద్రాలు ప్రారంభించాం. అన్ని వ్యవహారాలూ పూర్తి చేసి అమెరికాలో ఉద్యోగాలు ఇప్పించే వాళ్లం. ఈ పనుల మీద తరచూ అమెరికా వెళ్లొచ్చే దాన్ని. అంతా బాగుందనుకుంటే ఒబామా ప్రభుత్వం వచ్చింది. స్థానికులకే ఉద్యోగావకాశాలు అంటూ చట్టం చేశారు. నా కన్సల్టెన్సీ ఆగిపోయింది. అప్పటికే భారీగా పెట్టుబడి పెట్టా. ఇక నష్టపోయినట్లే అని అర్థమయ్యాక డిప్రెషన్‌లోకి వెళ్లా. కానీ పగలు, రాత్రి ఒకదాని వెనకే మరొకటి ఉన్నట్లు జీవితం కూడా అంతే అని సర్ది చెప్పుకున్నా.

కోటి రూపాయలకు గుప్పెడు డైమండ్లు...

ఆ ఆలోచనల నుంచి బయటపడాలంటే... కొత్తదారి వెతుక్కోవాలి. అంతకు కొన్నేళ్ల ముందే వజ్రాలు, నగల పట్ల నా ఆసక్తిని చూసిన వజ్రాల వ్యాపారి ఒకరు జెమాలజీ కోర్సు చేయమని సలహా ఇచ్చారు. నేను ఆసక్తి చూపించలేదు. మళ్లీ ఆయనే ‘మీకు చక్కటి అభిరుచి ఉంది... ఈ రంగంలోనూ మంచి పేరు సంపాదించగలరు. ప్రయత్నించండి’ అని చెప్పారు. సరేనని బెంగళూరులోనే జెమాలజీ కోర్సు చేశా. అప్పటికి నా వయసు 34. ఈ కోర్సు భిన్నమైంది. మ్యాథ్స్‌, సైన్స్‌ అర్థమయ్యేవి కావు. రాత్రింబవళ్లూ చదివితే కానీ పట్టు చిక్కలేదు. తర్వాత రెండేళ్లు ఆయనతో పని చేసి డైమండ్‌ గ్రేడింగ్‌, మాన్యుఫాక్చరింగ్‌, డిజైనింగ్‌.. అన్నింట్లోనూ పట్టు సాధించా.

వజ్రాల వ్యాపారం అంటే భారీగా పెట్టుబడి పెట్టాలి. కోటి రూపాయలకు గుప్పెడు వజ్రాలు కూడా రావు. అయినా సరే! ఉన్నదంతా పెట్టి మరో సాహసం చేశా. నా మెంటార్‌తోనే కలిసి హోల్‌సేల్‌ వ్యాపారం చేశా. ఇలా చేసిన మొదటి దక్షిణాది మహిళను బహుశా నేనే! మగ వాళ్లే రిస్క్‌ అనుకునే ఈ బిజినెస్‌ని ఒంటరిగానే చేస్తున్నా. నాలుగైదు కోట్ల రూపాయల వజ్రాల నగలు వెంట పెట్టుకుని రాష్ట్రాలు తిరిగే దాన్ని. ఎయిర్‌పోర్టుల్లో కస్టమ్స్‌ సమస్యలతో బస్సుల్లోనే వెళ్లాల్సి వచ్చేది. భద్రత దృష్ట్యా ఎక్కడికి వెళ్లేదీ మా వారికీ చెప్పేదాన్ని కాదు. ఒక్కోసారి ప్రయాణంలో రాత్రంతా వాష్‌రూమ్‌కి కూడా వెళ్లలేక పోయేదాన్ని. ఆ రోజులు చాలా కష్టంగా ఉండేవి. ఇలానే ఏడేళ్లు దక్షిణాది అంతా తిరిగేశా.

సెలబ్రిటీలకు నగలు చేసిస్తా...

వ్యాపారం నిమిత్తం తరచూ హైదరాబాద్‌కి వచ్చేదాన్ని. ఇక్కడ వందల ఏళ్ల నాటి షాపులెన్నో ఉన్నాయి. కొత్తవాళ్లు, అందునా స్త్రీలు నిలదొక్కుకోవాలంటే చాలా కష్టం. సాధారణంగా బంగారు, వజ్రాల నగల వ్యాపారంలో నమ్మకం, స్థిరత్వం ప్రధానం. ఖాతాదారుకి డిజైన్‌ ఎంతగా నచ్చినా సంస్థ ఎన్నేళ్లుగా ఉందనే చూస్తారు. కొత్త కావడంతో ఖాతాదారులను ఆకట్టుకోవడానికి మొదట్లో చాలా కష్టపడ్డా. నాణ్యమైన వజ్రాలను అందించడమే నన్ను నిలబెట్టింది. దక్షిణాదిలో ఆడంబరాన్ని కోరుకునేది తెలుగు ప్రజలే. అందుకే హైదరాబాద్‌ కేంద్రంగా ‘రాధిక డైమండ్స్‌’ పేరుతో కస్టమైజ్డ్‌ జ్యూయలరీ దుకాణాన్ని ప్రారంభించా.

ఇప్పుడు ప్రత్యేకంగా చేసిచ్చే బొటిక్‌ జ్యూయలరీకి ఆదరణ పెరిగింది. దాంతో ఫ్యాషన్‌ డిజైనర్‌ శశి వంగపల్లితో కలిసి మరో వన్‌స్టాప్‌ సొల్యూషన్‌ని ఏర్పాటు చేశాం. కొద్ది కాలంలోనే సినీ, క్రీడా, రాజకీయ, వ్యాపార ప్రముఖులు ఎందరికో డిజైనర్‌ నగలు చేసిచ్చే అవకాశం దొరికింది. వజ్రాల నగలు తరతరాలకూ ఉంటాయి. వాటితో పాటే నా పేరు కూడా...! ముప్పైమందికి ఉపాధీ కల్పించగలిగా. ఇంతకన్నా సంతృప్తి ఏముంటుంది చెప్పండి.

 


మంచిమాట

జీవితంలో సాధించే విజయాలన్నీ మన ప్రతిభ, కృషి మీదే ఆధారపడి ఉంటాయని గుర్తించండి.

- దీపికా పదుకొణె, బాలీవుడ్‌నటి

మరిన్ని

నారీ... వ్యాయామ దారి!

ఇంట్లో పనే ఎక్సర్‌సైజు... ఒక గృహిణి అభిప్రాయం. ఆఫీసుకెళ్లొచ్చే సరికే టైం అయిపోతుంది. మళ్లీ జిమ్‌కు వెళ్లే తీరిక ఎక్కడిది? ఒక ఉద్యోగిని ఆవేదన. జిమ్‌ కెళ్లినా అక్కడ మగవాళ్లతో పాటు చేయలేం... ఇదో యువతి సమస్య... ఆరోగ్యాన్ని కాపాడుకోవాలనే ఆలోచన ఉంటే మార్గాలు బోలెడు ఉన్నాయంటున్నారు...జీరోసైజ్‌ లేదా సన్నగా, నాజూగ్గా ఉండాల్సిన అవసరం సినీతారలు, మోడల్స్‌కు మాత్రమే. మేమెందుకు నోరు కట్టేసుకోవాలి, కసరత్తులంటూ చెమటోడ్చాలి అనే భావన చాలా మంది మహిళల్లో ఉండేది. గృహిణులకు ఇంటిపనే సరిపోతుందిలే’ అనే అపోహ ఉండేది. ఇప్పుడు మహిళలకూ ఉద్యోగ, ఉపాధి అవకాశాలు పెరగటంతో జీవనశైలిలో మార్పులు వచ్చాయి.

తరువాయి

చదువుల రాణి.. పసిడి కొల్లగొట్టింది..!

సాధారణంగా చదువులో ముందున్న వారు ఆటల్లో వెనకబడతారు.. అదే ఆటల్లో ముందున్న వారు చదువులో రాణించరు.. అంటుంటారు. కానీ చదువులో, ఆటల్లో.. రెండింట్లోనూ సత్తా చాటే వారు చాలా అరుదుగానే ఉంటారు. ఆస్ట్రియా సైక్లిస్ట్‌ అన్నా కిసెనోఫర్‌ కూడా అలాంటి మహిళే! వృత్తిరీత్యా గణిత విద్యావేత్త అయిన ఆమె.. అండర్‌ డాగ్‌గా టోక్యో ఒలింపిక్స్‌ బరిలోకి దిగింది. అందరి అంచనాల్ని తలకిందులు చేస్తూ ఫైనల్‌ ఫేవరెట్‌ను చిత్తు చేసి పసిడి పతకాన్ని కొల్లగొట్టింది. ఫలితంగా 125 ఏళ్లలో సైక్లింగ్‌ విభాగంలో ఒలింపిక్స్‌ పతకం గెలుచుకున్న తొలి ఆస్ట్రియా అథ్లెట్‌గా చరిత్ర సృష్టించింది. దీంతో ఆమె పేరు ప్రపంచమంతా మార్మోగిపోతోంది.

తరువాయి

సైకిల్‌ తొక్కితే రాళ్లు విసిరారు.. చంపేస్తామన్నారు!

అఫ్గానిస్థాన్‌కు చెందిన ఆమె చిన్నతనంలోనే సైకిల్‌ నేర్చుకుంది. అందులోనే జీవితాన్ని వెతుక్కోవాలనుకుంది. కానీ అక్కడి తాలిబన్లు, మత ఛాందసవాదులు ‘ఆడపిల్లలు సైకిల్‌ తొక్కడమేంటి?’ అంటూ ఆమె ఆశయానికి అడ్డుపడ్డారు. ధైర్యం చేసి సైకిల్‌తో రోడ్డుపై కొస్తే రాళ్లు విసిరారు. చంపేస్తామని బెదిరించారు. అందుకే ఉన్న వూరును విడిచిపెట్టి ప్రాణాలు అరచేతిలో పెట్టుకుని ఫ్రాన్స్‌కు వలస వెళ్లిపోయింది. అక్కడే తన సైక్లింగ్‌ లక్ష్యానికి మెరుగులు దిద్దుకుంది. ప్రతిష్ఠాత్మక ఒలింపిక్స్‌లో శరణార్థుల జట్టు తరఫున పాల్గొనే సువర్ణావకాశం సొంతం చేసుకుంది. ఆమే 24 ఏళ్ల మసోమా అలీ జాదా.

తరువాయి

సృజనాత్మక పరిష్కారానికి అరుదైన పురస్కారం!

యూరోపియన్‌ ఇన్వెంటర్‌ అవార్డ్‌.. వివిధ రంగాల్లో ఆవిష్కరణలు చేసి ఓ సరికొత్త ట్రెండ్‌ క్రియేట్‌ చేసిన వారికి ఏటా అందించే ప్రతిష్ఠాత్మక పురస్కారమిది! ఐరోపాతో పాటు ఇతర దేశాల వారు చేసిన అద్భుత ఆవిష్కరణల్ని గుర్తించి.. వాటి సృష్టికర్తలకు బహూకరించే ఈ పురస్కారం ఈసారి భారత సంతతికి చెందిన రసాయన శాస్త్రవేత్త సుమితా మిత్రాను వరించింది. ‘నాన్‌ యూరోపియన్‌ పేటెంట్‌ ఆఫీస్‌ కంట్రీస్‌’ విభాగం కింద యూరోపియన్‌ పేటెంట్‌ ఆఫీస్‌ (EPO) ఆమెకు ఇటీవలే ఈ అవార్డు అందించింది. దంత వైద్యంలో భాగంగా ఆమె చేసిన ఓ అసాధారణ ఆవిష్కరణతో ఎంతోమంది దంత సమస్యలకు పరిష్కారం దొరికినట్లయింది. ఈ నేపథ్యంలోనే ఈ అరుదైన అవార్డు అందుకున్న సందర్భంగా ఈ ఇండో-అమెరికన్‌ గురించి కొన్ని విశేషాలు మీకోసం..

తరువాయి

బ్యూటీ & ఫ్యాషన్

మరిన్ని

ఆరోగ్యమస్తు

మరిన్ని

అనుబంధం

మరిన్ని

యూత్‌ కార్నర్

మరిన్ని

మంచిమాట


'స్వీట్' హోం

మరిన్ని

వర్క్‌ & లైఫ్

మరిన్ని