ప్రతి శుక్రవారం... పర్యావరణ మంత్రం!
close
Updated : 03/04/2021 03:39 IST

ప్రతి శుక్రవారం... పర్యావరణ మంత్రం!

రేపటి తరం కోసం ఈ క్షణం నుంచే ఆలోచిద్దాం.. అంటున్నారు ఫ్రైడేస్‌ ఫర్‌ ఫ్యూచర్‌(ఎఫ్‌ఎఫ్‌ఎఫ్‌)సంస్థకు చెందిన విశాఖపట్నం సభ్యులు. ఓపక్క చదువుకుంటూనే మరోపక్క ప్రజల్లో మార్పును తెచ్చేందుకు ప్రయత్నిస్తున్నారీ అమ్మాయిలు..  స్వీడన్‌ పర్యావరణవేత్త గ్రెటాథంబర్గ్‌ పిలుపుని అందుకుని పర్యావరణ పరిరక్షణ కోసం తమ వంతుగా అడుగులు వేస్తున్నారు నవీన వంగర, దీపశ్రీ... ఓయింద్రిలా భట్టాచార్య..
ప్రతి శుక్రవారం.. మహావిశాఖ నగరపాలక సంస్థ (జీవీఎంసీ) కార్యాలయం గేటు ముందు నిల్చుని పెరుగుతున్న కాలుష్యంపై నిరసన వ్యక్తం చేస్తోంది దీపశ్రీ. ఇలా ఒక వారం.. రెండు వారాలు కాదు ఏకంగా 71 వారాలుగా ప్రజల్లో చైతన్యం తీసుకురావడానికి ప్రయత్నిస్తోందా అమ్మాయి. ‘భావితరాలకు స్వచ్ఛమైన విశాఖపట్నాన్ని అందించాలనేది నాకల. అందుకే పనిదినమైనా శుక్రవారాన్నే ఎంచుకున్నా’ అనే దీప... జంతువులు విడుదల చేసే వ్యర్థాలు కూడా భూతాపానికి కారణమవుతాయి. అందుకే ఆహారంలో మాంసం, పాలు, పాల  ఉత్పత్తులకు బదులుగా కొబ్బరిపాలు, సోయాబీన్‌ పనీర్‌, పనసకాయతో చేసిన ఉత్పత్తులను ప్రత్యామ్నాయంగా వాడుకోవచ్చని సలహా ఇస్తోంది. ‘గార్డియన్స్‌ ఆఫ్‌ గాయా (భూసంరక్షకులు)’ అనే ప్రత్యేక బృందాన్ని ఏర్పరిచి ప్రజల్లోకి ఈ విషయాలను తీసుకెళ్తోంది.


ఓయింద్రిలా భట్టాచార్య.. ఉండేది విశాఖ కలెక్టరేట్‌ పక్కనే ఉన్న అఫీషియల్‌ కాలనీలో. 200 కుటుంబాలున్న కాలనీని ఎంతో ఆదర్శవంతంగా తీర్చిదిద్దింది ఓయింద్రిలా. ఆమె ఆధ్వర్యంలో ఆ కాలనీ ప్రజలంతా కొన్ని నియమాలు తప్పకుండా పాటిస్తున్నారు. అంతా వస్త్రంతో చేసిన బ్యాగులనే వాడుతున్నారు. ప్లాస్టిక్‌ని నిషేధించారు. కాలనీ వాళ్లందరూ ఓ సొసైటీగా ఏర్పడి ఏకంగా పార్కునే ఏర్పాటు చేసుకున్నారు.  ‘గతంలో మా కాలనీలో చెట్లు ఉండేవే కావు. ఇప్పుడు ప్రతీ ఇంటికీ ఓ చెట్టుంది. మా కాలనీని ఓ ఆదర్శ కాలనీగా తీర్చిదిద్దాలనుకున్నాం. చెట్లని తొలగించాల్సి వస్తే వాటిని వేరే చోట్ల పెంచేందుకు జీవీఎంసీ అధికారులతో మాట్లాడాం’ అంటోంది ఓయింద్రిలా.


నవీన వంగర.. ప్రస్తుతం గుజరాత్‌లోని వడోదరలో ‘ది మహారాజా సయాజీరావు యూనివర్సిటీ ఆఫ్‌ బరోడా’లో ఎన్విరాన్‌మెంట్‌ స్టడీస్‌ చదువుతోంది. ‘ఫ్రైడ్‌ ఫర్‌ ఫ్యూచర్‌’ సంస్థలో సుమారు వెయ్యిమంది వలంటీర్లకి ఆన్‌లైన్‌ శిక్షణ అందించింది నవీన. ‘పర్యావరణాన్ని రక్షించుకునే విధంగా ప్రజలకు చక్కని పరిష్కారాలని చూపించాలనేది మా లక్ష్యం. నెలరోజుల ముందే మా ప్రణాళిక ఉంటుంది. ఆంధ్రప్రదేశ్‌లో తీరప్రాంతమెక్కువ. కానీ సముద్రజీవులు ప్లాస్టిక్‌ కాలుష్యానికి బలవుతున్నాయి. అందుకే ప్లాస్టిక్‌ని ఎలా వాడాలి, ఎలా భద్రపరచాలి... ఇందులో ప్రజలు, అధికారుల పాత్రపై అవగాహన కల్పిస్తున్నాం అంటోంది’ నవీన.


- హిదాయతుల్లా బిజాపూర్‌, విశాఖపట్నం

మరిన్ని

అతివకు ఆరోగ్యం.. ఆమె అభిమతం!

‘సాయం చేయాలంటే కావాల్సింది డబ్బు మాత్రమే కాదు... ఇతరుల కష్టాలకు స్పందించే గుణం’ అది లేకపోతే... మనుషులుగా మనకు గుర్తింపు ఎందుకు అంటారు శ్రీదేవి. ఆమె స్వస్థలం ఆంధ్రప్రదేశ్‌లోని పశ్చిమగోదావరి జిల్లా తణుకు. భర్త వృత్తి రీత్యా ఖమ్మంలో స్థిరపడింది వారి కుటుంబం. సేవా కార్యక్రమాల్లో పాలుపంచుకోవాలనే ఆలోచన తాను ఎదుర్కొన్న ఇబ్బందుల నుంచే వచ్చిందని చెబుతారామె. ‘చీకట్లో కూర్చుని వెలుతురు లేదని బాధపడితే ఎలా? పరిష్కారం కోసం ప్రయత్నించాలి కదా...! నేనూ అదే చేస్తున్నా. కొన్నేళ్ల కిందట తీవ్రమైన గైనిక్‌ సమస్యతో బాధపడ్డా. చికిత్స కోసం తిరగని ఆసుపత్రి లేదు. అప్పుడే విద్యార్థినులు, తోటి మహిళల్లో చాలామందికి నెలసరి విషయాలపై కనీస అవగాహన లేదనే విషయం తెలుసుకున్నా.

తరువాయి

AAAS: ఈ ముగ్గురు... అంతర్జాతీయ ప్రతిభావనులు

అమెరికన్‌ అకాడెమీ ఆఫ్‌ ఆర్ట్స్‌ అండ్‌ సైన్స్‌.. పేరు చెప్పగానే ఆల్బర్ట్‌ ఐన్‌స్టీన్‌, ఛార్లెస్‌ డార్విన్‌, విన్‌స్టన్‌ చర్చిల్‌, నెల్సన్‌ మండేలా, అకిరా కురొసావా మొదలైనవారి పేర్లు వినిపిస్తాయి. 240 ఏళ్ల చరిత్ర ఉన్న ఈ ప్రతిష్ఠాత్మక సంస్థలో వీరంతా సభ్యులు మరి! ఈ సంస్థ ఏటా ప్రపంచవ్యాప్తంగా కళలు, శాస్త్ర రంగాల్లో అత్యంత ప్రతిభ చూపినవారిని సభ్యులుగా ఎంపిక చేస్తుంది. ఈ ఏడాది ఈ జాబితాలో మనదేశ మూలాలున్న ఆరుగురు చోటు దక్కించుకున్నారు. వారిలో ముగ్గురు మహిళలే! వారే.. శారదా శ్రీనివాసన్‌,    కవితా రమణన్‌, గాయత్రీ చక్రవర్తి స్పివక్‌. ఈ అంతర్జాతీయ మేధావుల స్ఫూర్తి ప్రయాణం మనమూ చూద్దాం.

తరువాయి