బంగారు పతకాల పంట పండించింది
close
Updated : 20/04/2021 02:03 IST

బంగారు పతకాల పంట పండించింది

చదువుకోవాలన్న అమ్మ కలను తన కళ్లల్లో పెట్టుకుంది.. ఉద్యోగం సాధించాలన్న నాన్న ఆశయాన్ని తనదిగా మార్చుకుంది... ఏ ఇబ్బందులూ తన సంకల్పాన్ని దెబ్బతీయలేవంటోంది మానస. ఆ దిశగా అడుగులేస్తూ... వ్యవసాయ ఇంజినీరింగ్‌లో ఏకంగా ఏడు బంగారు పతకాలను అందుకుంది ఈ చదువుల తల్లి. ఈ సందర్భంగా వసుంధరతో ముచ్చటించింది.

మానసది ప్రకాశం జిల్లా పొదిలి దగ్గర వెలిగండ్ల. నాన్న కొండారెడ్డి, అమ్మ సుబ్బలక్ష్మి. తమ్ముడు నితిన్‌రెడ్డి. పొట్టకూటి కోసం ఇరవై ఏళ్ల క్రితమే హైదరాబాదుకు వచ్చి స్థిరపడిందా కుటుంబం. తన చదువంతా ఇక్కడే సాగింది. ‘నాన్న డిగ్రీ చదువుకున్నారు. ఉద్యోగం చేయాలనేది ఆయన కల. ఎన్ని ప్రయత్నాలు చేసినా సాధించలేకపోయారు. నగరంలోని కొత్తపేటలో టిఫిన్‌సెంటర్‌ పెట్టారు. ఇదే మాకు జీవనాధారం. తెల్లవారు జామున మొదలయ్యే పని పొద్దుపోయే దాకా సాగుతూనే ఉంటుంది. ఇంత రెక్కలు ముక్కలు చేసుకుని కష్టపడేది మా భవిష్యత్తు కోసమే అని తరచూ అమ్మ చెబుతుంటే వాళ్ల కోసం నేనేం చేయగలనా అని ఆలోచించేదాన్ని. చిన్నప్పుడు అమ్మ బాగా చదువుకోవాలనుకునేదట. కుటుంబ పరిస్థితుల దృష్ట్యా, మామయ్యను మాత్రమే చదివించగలిగారు అమ్మమ్మవాళ్లు. అమ్మ కొంతకాలం రాత్రి బడికి వెళ్లినా అదీ ఎంతో కాలం సాగలేదు. తన కోరిక అలానే మిగిలిపోయింది. ఆ ఇష్టంతోనే ఎంత కష్టపడైనా మమ్మల్ని చదివిస్తామనేది. చదువుకోవాలని ఉన్నా... ఆర్థిక పరిస్థితులు తనకు సహకరించలేదనీ, మీరైనా బాగా చదువుకోవాలని తమ్ముడికీ, నాకూ...  చెప్పేది. అమ్మ మాటలు తెలియకుండానే నాపై బలమైన ముద్రవేశాయి. దీంతో బాగా చదువుకోవాలనుకునేదాన్ని. ఆ కోరికతోనే ప్రణాళికాబద్ధంగా చదవడం ప్రారంభించా. తరగతిలో మొదటి నాలుగు స్థానాల్లో ఉండేదాన్ని. ఆరు నుంచి పదోతరగతి వరకు దిల్‌సుఖ్‌నగర్‌ పబ్లిక్‌ పాఠశాలలో చదువుకున్నా. పదోతరగతిలో 9.3 జీపీఏ సాధించాను. తర్వాత ఇంటర్‌ ఎంపీసీ తీసుకున్నాను. 95శాతం మార్కులు సాధించాను’ అని గుర్తుచేసుకుంది మానస.

మామయ్య సలహాతో...
మానస ఎంసెట్ రాశాక బీటెక్‌లో ‘అగ్రికల్చర్‌’ చేయమని వాళ్ల మామయ్య సలహా ఇచ్చారట. బాల్యం అంతా నగరంలోనే గడవడంతో వ్యవసాయం గురించి ఆమెకు పెద్దగా తెలియదు. అయినా సరే వ్యవసాయం మీద పట్టు సాధించాలనుకుంది. ప్రొఫెసర్‌ జయశంకర్‌ వ్యవసాయ విశ్వవిద్యాలయంలో సీటు లభించింది. సంగారెడ్డి జిల్లా కందిమండలంలోని కాలేజ్‌ ఆఫ్‌ అగ్రికల్చరల్‌ ఇంజినీరింగ్‌లో చేరింది. ‘మొదట అందరిలానే బీటెక్‌ చేసి ఐటీ రంగంలో స్థిరపడాలనుకున్నా. కానీ మా మామయ్య అందరూ చేసేదే నువ్వూ చేస్తే నీ ప్రత్యేకత ఏముంటుంది? అంటూ ఈ కోర్సు గురించి చెప్పారు. ఇరువైపుల తాతల కుటుంబాలు వ్యవసాయంలో ఉన్నా... నాకు సాగుపై పెద్దగా అవగాహన లేదు. ప్రారంభంలో కాస్త కష్టపడ్డా. ఓ దశలో పాఠాలు అర్థమయ్యేవి కావు. ఇటువైపు వచ్చి తప్పు చేశానా అని కూడా ఆలోచించా. కానీ వెనకడుగు వేస్తే అమ్మానాన్నల కష్టం వృథా అవుతుంది. పైగా ప్రయత్నించకుండానే చేయలేను అనకూడదని నాకు నేనే సర్ది చెప్పుకొన్నా. అధ్యాపకుల సహకారం తీసుకున్నా. క్రమంగా ఈ రంగంపై ఆసక్తి పెరిగింది. చిన్నప్పటి నుంచీ ప్రణాళిక ప్రకారం చదవడం నా అలవాటు. తెల్లవారుజామున 3 గంటలకే లేచి చదవడం మొదలుపెట్టేదాన్ని. క్రమంగా సబ్జెక్టుపై పట్టు సాధించగలిగా’ అని వివరించింది మానస. మూడు విభాగాల్లో మొదటి స్థానం సాధించి, మూడు బంగారు పతకాలు గెలుచుకుంది. మొత్తంగా అత్యధిక మార్కులు సాధించి మరో నాలుగు బంగారు పతకాల్ని సొంతం చేసుకుంది.

నాన్న కోరిక నెరవేర్చాలి..
‘చిన్నప్పటి నుంచి బాగా చదివి అమ్మ కోరికను నెరవేర్చాను. ఏడు బంగారు పతకాలు వస్తాయని నేను ఊహించలేదు. ఇప్పుడు సంతోషంగా ఉంది. ఇక ప్రభుత్వ ఉద్యోగం సాధించి నాన్న కలను సాకారం చేయాలి’ అంటోంది మానస. ప్రస్తుతం కర్ణాటక రాష్ట్రం రాయచూర్‌లోని యూనివర్సిటీ ఆఫ్‌ అగ్రికల్చరల్‌ సైన్సెస్‌లో ప్రాసెసింగ్‌ అండ్‌ ఫుడ్‌ ఇంజినీరింగ్‌లో ఎంటెక్‌ మొదటి సంవత్సరం చదువుతోంది. ప్రభుత్వ ఉద్యోగం సాధించకపోయినా పరిశోధనలు చేసి కొత్త ప్రాజెక్టుతో ఆహార సంబంధిత అంకుర పరిశ్రమను స్థాపించాలనేది తన కోరిక అని చెబుతోంది.

చదువుకోవాలని ఉన్నా... ఆర్థిక పరిస్థితులు తనకు సహకరించలేదనీ, మీరైనా బాగా చదువుకోవాలని తమ్ముడికీ, నాకూ...  అమ్మ చెప్పేది. ఆ మాటలు తెలియకుండానే నాపై బలమైన ముద్రవేశాయి.

- పి.సూర్యకిరణ్‌, న్యూస్‌టుడే, రాజేంద్రనగర్‌

మరిన్ని

అతివకు ఆరోగ్యం.. ఆమె అభిమతం!

‘సాయం చేయాలంటే కావాల్సింది డబ్బు మాత్రమే కాదు... ఇతరుల కష్టాలకు స్పందించే గుణం’ అది లేకపోతే... మనుషులుగా మనకు గుర్తింపు ఎందుకు అంటారు శ్రీదేవి. ఆమె స్వస్థలం ఆంధ్రప్రదేశ్‌లోని పశ్చిమగోదావరి జిల్లా తణుకు. భర్త వృత్తి రీత్యా ఖమ్మంలో స్థిరపడింది వారి కుటుంబం. సేవా కార్యక్రమాల్లో పాలుపంచుకోవాలనే ఆలోచన తాను ఎదుర్కొన్న ఇబ్బందుల నుంచే వచ్చిందని చెబుతారామె. ‘చీకట్లో కూర్చుని వెలుతురు లేదని బాధపడితే ఎలా? పరిష్కారం కోసం ప్రయత్నించాలి కదా...! నేనూ అదే చేస్తున్నా. కొన్నేళ్ల కిందట తీవ్రమైన గైనిక్‌ సమస్యతో బాధపడ్డా. చికిత్స కోసం తిరగని ఆసుపత్రి లేదు. అప్పుడే విద్యార్థినులు, తోటి మహిళల్లో చాలామందికి నెలసరి విషయాలపై కనీస అవగాహన లేదనే విషయం తెలుసుకున్నా.

తరువాయి

AAAS: ఈ ముగ్గురు... అంతర్జాతీయ ప్రతిభావనులు

అమెరికన్‌ అకాడెమీ ఆఫ్‌ ఆర్ట్స్‌ అండ్‌ సైన్స్‌.. పేరు చెప్పగానే ఆల్బర్ట్‌ ఐన్‌స్టీన్‌, ఛార్లెస్‌ డార్విన్‌, విన్‌స్టన్‌ చర్చిల్‌, నెల్సన్‌ మండేలా, అకిరా కురొసావా మొదలైనవారి పేర్లు వినిపిస్తాయి. 240 ఏళ్ల చరిత్ర ఉన్న ఈ ప్రతిష్ఠాత్మక సంస్థలో వీరంతా సభ్యులు మరి! ఈ సంస్థ ఏటా ప్రపంచవ్యాప్తంగా కళలు, శాస్త్ర రంగాల్లో అత్యంత ప్రతిభ చూపినవారిని సభ్యులుగా ఎంపిక చేస్తుంది. ఈ ఏడాది ఈ జాబితాలో మనదేశ మూలాలున్న ఆరుగురు చోటు దక్కించుకున్నారు. వారిలో ముగ్గురు మహిళలే! వారే.. శారదా శ్రీనివాసన్‌,    కవితా రమణన్‌, గాయత్రీ చక్రవర్తి స్పివక్‌. ఈ అంతర్జాతీయ మేధావుల స్ఫూర్తి ప్రయాణం మనమూ చూద్దాం.

తరువాయి