పాటతోతోడు!
close
Published : 12/05/2021 00:16 IST

పాటతోతోడు!

అదొక ఆసుపత్రి. కొవిడ్‌ రోగులను ఉంచిన ఐసీయూకు బయట నుంచొని ఉందొక నర్సు. తనతోపాటు తెచ్చిన గిటార్‌ను సవరించి, నెమ్మదిగా పాడటం మొదలుపెట్టింది. తీవ్ర అనారోగ్యంతో బాధపడుతున్న అక్కడి రోగులకు సాంత్వన కలిగిస్తూ.. వారిలో ధైర్యాన్ని నింపేలా సాగిన ఆ పాట వారందరికీ ఉపశమనాన్ని అందించింది. గిటార్‌పై మృదువుగా సంగీతాన్ని పలికించిన ఆమె వీడియో సామాజిక మాధ్యమాల్లో  చూసి లక్షలాదిమంది అభినందనలు అందించారు. ఇంతకీ ఆమె ఎవరంటే... కెనడాలోని ఒటావా ఆసుపత్రిలో నర్సు ఎమీ లిన్‌. ఈమె తనకిష్టమైన సంగీతాన్ని వినిపించి ఇలా అందరి హృదయాలనూ గెలుచుకుంది.

ఒంటరివి కాదు... అంటూ

ఈ ప్రపంచంలో ఎవరూ ఒంటరి కాదు, అందరికీ అందరూ ఒకరికొకరు తోడు అంటూ పాట ద్వారా రోగుల్లో ధైర్యాన్ని నింపడానికి ప్రయత్నించా అంటుంది ఎమీలిన్‌. ఒటావో ఆసుపత్రిలో ఎండోస్కోపీ నర్సుగా పనిచేసేదీమె. ఇటీవల ఐసీయూ విభాగంలో నియమితురాలైంది. దీంతో రోజూ అక్కడ చికిత్సపొందుతున్న వారి వేదనను అతి దగ్గర నుంచి చూసిందీమె. అనారోగ్యంతో కొందరు కుటుంబసభ్యులకు దూరంగా ఉంటే, మరికొందరు ఒంటరిగా జీవితాలను ముగిస్తున్నారు. ఈ సంఘటనలన్నీ వారిలో ఒంటరితనాన్ని నింపుతున్నాయని చెబుతుందీమె. ‘ఎంతో వేదనకు గురవుతున్న వీరిలో ఒంటరివాళ్లు కాదనే భావన తీసుకురావాలనుకున్నా. వారిలో నా పాటతో మనోధైర్యాన్ని నింపాలనుకున్నా. చికిత్స, మేమిచ్చే కౌన్సిలింగ్‌, ఓదార్పుతోపాటు నేను పాడిన పాట ఇప్పుడు అందరికీ కాస్తంతైనా ఆహ్లాదాన్ని ఇచ్చింది. కాసేపైనా వారిలో వేదన దూరమైంది. నర్సు అంటే మందులు అందించడం, చికిత్సల్లో పాలు పంచుకోవడమే అనే భావం నుంచి బయటపడ్డా. చిన్నప్పటి నుంచి నేను నేర్చుకున్న సంగీతాన్ని నా వృత్తిలో భాగం చేసుకోగలిగినందుకు చాలా తృప్తిగా ఉంది. అందరూ ఇప్పుడు నన్ను ‘సింగింగ్‌ నర్సు’గా పిలుస్తుంటే చాలా సంతోషంగా ఉంది’ అని అంటున్న ఈ గిటార్‌ నర్సు ఎమీ సంగీత కళాకారిణే కాదు, గీత రచయిత్రి కూడా.

Tags :

మరిన్ని

అతివకు ఆరోగ్యం.. ఆమె అభిమతం!

‘సాయం చేయాలంటే కావాల్సింది డబ్బు మాత్రమే కాదు... ఇతరుల కష్టాలకు స్పందించే గుణం’ అది లేకపోతే... మనుషులుగా మనకు గుర్తింపు ఎందుకు అంటారు శ్రీదేవి. ఆమె స్వస్థలం ఆంధ్రప్రదేశ్‌లోని పశ్చిమగోదావరి జిల్లా తణుకు. భర్త వృత్తి రీత్యా ఖమ్మంలో స్థిరపడింది వారి కుటుంబం. సేవా కార్యక్రమాల్లో పాలుపంచుకోవాలనే ఆలోచన తాను ఎదుర్కొన్న ఇబ్బందుల నుంచే వచ్చిందని చెబుతారామె. ‘చీకట్లో కూర్చుని వెలుతురు లేదని బాధపడితే ఎలా? పరిష్కారం కోసం ప్రయత్నించాలి కదా...! నేనూ అదే చేస్తున్నా. కొన్నేళ్ల కిందట తీవ్రమైన గైనిక్‌ సమస్యతో బాధపడ్డా. చికిత్స కోసం తిరగని ఆసుపత్రి లేదు. అప్పుడే విద్యార్థినులు, తోటి మహిళల్లో చాలామందికి నెలసరి విషయాలపై కనీస అవగాహన లేదనే విషయం తెలుసుకున్నా.

తరువాయి

AAAS: ఈ ముగ్గురు... అంతర్జాతీయ ప్రతిభావనులు

అమెరికన్‌ అకాడెమీ ఆఫ్‌ ఆర్ట్స్‌ అండ్‌ సైన్స్‌.. పేరు చెప్పగానే ఆల్బర్ట్‌ ఐన్‌స్టీన్‌, ఛార్లెస్‌ డార్విన్‌, విన్‌స్టన్‌ చర్చిల్‌, నెల్సన్‌ మండేలా, అకిరా కురొసావా మొదలైనవారి పేర్లు వినిపిస్తాయి. 240 ఏళ్ల చరిత్ర ఉన్న ఈ ప్రతిష్ఠాత్మక సంస్థలో వీరంతా సభ్యులు మరి! ఈ సంస్థ ఏటా ప్రపంచవ్యాప్తంగా కళలు, శాస్త్ర రంగాల్లో అత్యంత ప్రతిభ చూపినవారిని సభ్యులుగా ఎంపిక చేస్తుంది. ఈ ఏడాది ఈ జాబితాలో మనదేశ మూలాలున్న ఆరుగురు చోటు దక్కించుకున్నారు. వారిలో ముగ్గురు మహిళలే! వారే.. శారదా శ్రీనివాసన్‌,    కవితా రమణన్‌, గాయత్రీ చక్రవర్తి స్పివక్‌. ఈ అంతర్జాతీయ మేధావుల స్ఫూర్తి ప్రయాణం మనమూ చూద్దాం.

తరువాయి