గిరిజనులకు ఆమే చుక్కాని
close
Published : 18/05/2021 00:16 IST

గిరిజనులకు ఆమే చుక్కాని

ఆవిడ పని చేసేది ఏజెన్సీలో. అక్కడ వైద్యానికి ఆమే చుక్కాని. కరోనానూ లెక్కచేయక రోజూ విధులకు హాజరువుతోంది. చాలా మంది చేస్తున్నారు కదా అంటారా? ఆమె దివ్యాంగురాలు. పైగా ఇప్పుడు నిండు చూలాలు! అయినా వెరవకుండా వైద్యచికిత్సలు అందిస్తోన్న డాక్టర్‌ సరోజ సేవా ప్రస్థానమిది.
మహబూబాబాద్‌ జిల్లా కేంద్రానికి 70 కిలోమీటర్ల దూరంలో ఉంటుంది కొత్తగూడ మండలం. పూర్తిగా ఏజెన్సీ ప్రాంతం.  సరిగా లేని రోడ్లు.. పల్లెలన్నీ మండల కేంద్రానికి దూరదూరంగా ఉంటాయి. 24 గంటలూ పని చేసే ఈ ఆరోగ్య కేంద్రంలో డాక్టర్‌ సరోజ విధులు నిర్వహిస్తున్నారు. ఈ దవాఖానా పరిధిలోని జనాభా సుమారు 21,500 మంది. ఈ మండలంలో కొవిడ్‌ ఉద్ధృతి ఎక్కువగానే ఉంది. చాలామంది మృతి చెందుతున్నారు. డాక్టర్‌ సరోజ రోజూ కొవిడ్‌ పరీక్షలు చేయడం, టీకాలు ఇవ్వడం, వచ్చిన వారికి వైద్యంతోపాటు ప్రస్తుతం ఇంటింటా ఆరోగ్య సర్వే చేసి ఆ నివేదికలను సిబ్బంది సాయంతో ఉన్నతాధికారులను పంపించడాన్ని పర్యవేక్షిస్తున్నారు. డాక్టర్‌ సరోజ తన పరిస్థితి వివరించి ఉన్నతాధికారులను అడిగితే సెలవులు మంజూరు చేస్తారు. అయినా రోజూ తన మూడు చక్రాల వాహనంపై ఆసుపత్రికి వస్తున్నారు. తర్వాత ఆసుపత్రి వాహనంలో మారుమూల పల్లెలు, తండాల్లో తిరుగుతూ కొవిడ్‌ను అరికట్టేందుకు యంత్రాంగంతో కలిసి కృషి చేస్తున్నారు. బాబు ఆలనా పాలనా భార్యాభర్తలిద్దరూ కలిసి చూసుకుంటారు.

పేద కుటుంబం.. కష్టపడి చదివి..
డాక్టర్‌ సరోజది వరంగల్‌ గ్రామీణ జిల్లా, పర్వతగిరి మండలం కొంకపాక. పేద గిరిజన కుటుంబం. తల్లిదండ్రులు భూక్య సేవ్య, మంగ్లీ. నలుగురు సంతానంలో ఇద్దరు అమ్మాయిలు, ఇద్దరు అబ్బాయిలు. జీవితంలో పైకి రావాలని చాలా కష్టపడి చదివారు. తన చదువంతా ప్రభుత్వ పాఠశాలల్లోనే. వరంగల్‌ కాకతీయ వైద్య కళాశాలలో 2015లో ఎంబీబీఎస్‌ చేశారు. 2017లో కొత్తగూడలోని పీహెచ్‌సీలో వైద్యురాలిగా చేరారు. అప్పటి నుంచి గిరిజనులతో మమేకమైపోయారు. గతేడాది కొవిడ్‌లోనూ ప్రతి పల్లెకూ వెళ్లి చికిత్సలు అందించారు. అవగాహన కార్యక్రమాలు నిర్వహించారు. ఈ సమయంలో సరోజ కొవిడ్‌ బారిన పడింది. ఆమె ద్వారా భర్తకూ సోకింది. ‘అప్పుడు మా బాబుకు ఏడాదిన్నర. వాడిని తెలిసిన వారింట్లో పెట్టి మేం హోం క్వారంటైన్‌లో ఉన్నాం. చికిత్స తీసుకుని కోలుకున్నాక మళ్లీ ఆసుపత్రికి వచ్చా. ఇప్పుడు నాకు ఎనిమిదో నెల. ఇప్పుడున్న సెకండ్‌ వేవ్‌ పరిస్థితుల్లో నేను విధులకు రాకపోతే ఆటంకం కలుగుతుంది. ఏజెన్సీలో నా సేవలు ఎంతో అవసరం. మండలంలో కొవిడ్‌ను అరికట్టడమే నా లక్ష్యం’ అని ధీమాగా చెబుతున్నారు సరోజ.

- బూర వెంకటేశ్వర్లు, కొత్తగూడ

Tags :

మరిన్ని

అతివకు ఆరోగ్యం.. ఆమె అభిమతం!

‘సాయం చేయాలంటే కావాల్సింది డబ్బు మాత్రమే కాదు... ఇతరుల కష్టాలకు స్పందించే గుణం’ అది లేకపోతే... మనుషులుగా మనకు గుర్తింపు ఎందుకు అంటారు శ్రీదేవి. ఆమె స్వస్థలం ఆంధ్రప్రదేశ్‌లోని పశ్చిమగోదావరి జిల్లా తణుకు. భర్త వృత్తి రీత్యా ఖమ్మంలో స్థిరపడింది వారి కుటుంబం. సేవా కార్యక్రమాల్లో పాలుపంచుకోవాలనే ఆలోచన తాను ఎదుర్కొన్న ఇబ్బందుల నుంచే వచ్చిందని చెబుతారామె. ‘చీకట్లో కూర్చుని వెలుతురు లేదని బాధపడితే ఎలా? పరిష్కారం కోసం ప్రయత్నించాలి కదా...! నేనూ అదే చేస్తున్నా. కొన్నేళ్ల కిందట తీవ్రమైన గైనిక్‌ సమస్యతో బాధపడ్డా. చికిత్స కోసం తిరగని ఆసుపత్రి లేదు. అప్పుడే విద్యార్థినులు, తోటి మహిళల్లో చాలామందికి నెలసరి విషయాలపై కనీస అవగాహన లేదనే విషయం తెలుసుకున్నా.

తరువాయి

AAAS: ఈ ముగ్గురు... అంతర్జాతీయ ప్రతిభావనులు

అమెరికన్‌ అకాడెమీ ఆఫ్‌ ఆర్ట్స్‌ అండ్‌ సైన్స్‌.. పేరు చెప్పగానే ఆల్బర్ట్‌ ఐన్‌స్టీన్‌, ఛార్లెస్‌ డార్విన్‌, విన్‌స్టన్‌ చర్చిల్‌, నెల్సన్‌ మండేలా, అకిరా కురొసావా మొదలైనవారి పేర్లు వినిపిస్తాయి. 240 ఏళ్ల చరిత్ర ఉన్న ఈ ప్రతిష్ఠాత్మక సంస్థలో వీరంతా సభ్యులు మరి! ఈ సంస్థ ఏటా ప్రపంచవ్యాప్తంగా కళలు, శాస్త్ర రంగాల్లో అత్యంత ప్రతిభ చూపినవారిని సభ్యులుగా ఎంపిక చేస్తుంది. ఈ ఏడాది ఈ జాబితాలో మనదేశ మూలాలున్న ఆరుగురు చోటు దక్కించుకున్నారు. వారిలో ముగ్గురు మహిళలే! వారే.. శారదా శ్రీనివాసన్‌,    కవితా రమణన్‌, గాయత్రీ చక్రవర్తి స్పివక్‌. ఈ అంతర్జాతీయ మేధావుల స్ఫూర్తి ప్రయాణం మనమూ చూద్దాం.

తరువాయి