AP News: రూపాయికే పిల్లలకు వైద్యం
close
Updated : 08/06/2021 08:46 IST

AP News: రూపాయికే పిల్లలకు వైద్యం

కొవిడ్‌ వ్యాప్తి, ఆంక్షల కారణంగా చిన్నారులకు సకాలంలో వైద్యసేవలు అందకపోవడం చూసి ఆమె చలించిపోయారు. ఈ సమస్య పరిష్కారానికి ఏదైనా చేయాలనుకున్నారు. కేవలం ఒక్క రూపాయికే ఆన్‌లైన్‌ ద్వారా చిన్నారులకు వైద్యసేవలు అందిస్తున్నారు. ఆమే డాక్టర్‌ మర్రి పృథ్వి.

ల్గొండ పట్టణానికి చెందిన పృథ్వి కరీంనగర్‌లో ఎంబీబీఎస్‌ చదివారు. తర్వాత డీసీహెచ్‌ (డిప్లొమా ఇన్‌ చైల్డ్‌ హెల్త్‌), డీఎన్‌బీ (డిప్లొమెట్‌ ఆఫ్‌ నేషనల్‌ బోర్డు) లను పూర్తిచేశారు. బ్రిటన్‌లోని రాయల్‌ కాలేజ్‌ ఆఫ్‌ పీడియాట్రిక్స్‌, చైల్డ్‌ హెల్త్‌(ఆర్‌సీపీసీహెచ్‌) నిర్వహించిన పరీక్షలో ఉత్తీర్ణత సాధించారు. ఆమె భర్త సాయికాంత్‌వర్మ ఐఏఎస్‌ అధికారి. ప్రస్తుతం కడప జిల్లా సంయుక్త పాలనాధికారి. కొవిడ్‌ మొదటి దశ వ్యాప్తి సమయంలో కడప ప్రభుత్వ సర్వజన ఆసుపత్రిలో పృథ్వి ఒప్పంద ప్రాతిపదికన విధులు నిర్వహించారు. రెండో దశలోనూ అవకాశం వచ్చినా అనారోగ్య కారణాల రీత్యా చేరలేదు. కానీ ఆన్‌లైన్‌లో ఉచిత వైద్యసేవలు అందిస్తున్నారు.

ఇటీవల.. ఒక నాలుగేళ్ల చిన్నారి అనారోగ్యం బారినపడ్డాడు. అతని తల్లి తెలిసినవారి సూచన మేరకు ఆన్‌లైన్‌లో పృథ్విని సంప్రదించింది. అప్పటికే ఆరు రోజులుగా ఆ బాబు జ్వరంతో బాధపడుతున్నాడు. ఇన్ని రోజులు ఎందుకు ఆలస్యం చేశారంటే లాక్‌డౌన్‌ కారణంగా ఓపీలు మూసేశారని, ఆన్‌లైన్‌ వైద్యసేవల గురించి తనకు తెలియదని సమాధానమిచ్చింది. ఇది ఆ డాక్టర్‌ని కదిలించింది. ‘స్కూళ్లు, ఆఫీసుల మాదిరిగానే వైద్యులూ ప్రస్తుతం చాలావరకు ఆన్‌లైన్‌ కన్సల్టేషన్లు నిర్వహిస్తున్నారు. కానీ అవగాహన లేక చాలామంది ఈ అవకాశాన్ని వినియోగించుకోలేకపోతున్నారు. దాదాపు ప్రతి కుటుంబంలో ఒక స్మార్ట్‌ఫోన్‌ ఉంటోంది. ఎన్నో యాప్‌లనూ సులువుగా ఉపయోగిస్తున్నారు. కాబట్టి, ఈ మార్గంలోనే వైద్య సహాయాన్ని అందిస్తే చాలామందికి సకాలంలో మేలు జరుగుతుంది’ అనే ఉద్దేశంతో ఈ కార్యక్రమానికి శ్రీకారం చుట్టానంటున్నారు పృథ్వి.

ఆదివారం తప్ప మిగతా అన్ని రోజుల్లో సాయంత్రం 4 నుంచి 5 గంటల వరకు 18 ఏళ్ల లోపువారికి వైద్య సహాయాన్ని అందిస్తున్నారు. రోజూ ఆరు నుంచి పదిమంది చిన్నారులకు చికిత్స అందిస్తున్నారు. అవసరమైనవారు తన instagram: @dr_pruthvi_pediatrician, Facebook:@dr pruthvi_pediatrician ఇన్‌స్టాగ్రామ్‌,ఫేస్‌బుక్‌ పేజీల ద్వారా అపాయింట్‌మెంట్‌ పొందవచ్చని చెబుతున్నారామె. ‘ప్రస్తుతం ఒక్కదాన్నే కన్సల్టేషన్‌ చేస్తున్నా.  అందరికీ అందుబాటులో వైద్యం అందించేందుకు భవిష్యత్తులోనూ రూపాయి ఫీజే తీసుకుంటా. త్వరలోనే స్నేహితుల సహకారంతో 24 గంటలూ ఈ సేవలు అందించాలనుకున్నా’ అని అంటున్నారు పృథ్వి.

- పత్తెం కిరణ్‌ కుమార్‌, కడప

మరిన్ని

అతివకు ఆరోగ్యం.. ఆమె అభిమతం!

‘సాయం చేయాలంటే కావాల్సింది డబ్బు మాత్రమే కాదు... ఇతరుల కష్టాలకు స్పందించే గుణం’ అది లేకపోతే... మనుషులుగా మనకు గుర్తింపు ఎందుకు అంటారు శ్రీదేవి. ఆమె స్వస్థలం ఆంధ్రప్రదేశ్‌లోని పశ్చిమగోదావరి జిల్లా తణుకు. భర్త వృత్తి రీత్యా ఖమ్మంలో స్థిరపడింది వారి కుటుంబం. సేవా కార్యక్రమాల్లో పాలుపంచుకోవాలనే ఆలోచన తాను ఎదుర్కొన్న ఇబ్బందుల నుంచే వచ్చిందని చెబుతారామె. ‘చీకట్లో కూర్చుని వెలుతురు లేదని బాధపడితే ఎలా? పరిష్కారం కోసం ప్రయత్నించాలి కదా...! నేనూ అదే చేస్తున్నా. కొన్నేళ్ల కిందట తీవ్రమైన గైనిక్‌ సమస్యతో బాధపడ్డా. చికిత్స కోసం తిరగని ఆసుపత్రి లేదు. అప్పుడే విద్యార్థినులు, తోటి మహిళల్లో చాలామందికి నెలసరి విషయాలపై కనీస అవగాహన లేదనే విషయం తెలుసుకున్నా.

తరువాయి

AAAS: ఈ ముగ్గురు... అంతర్జాతీయ ప్రతిభావనులు

అమెరికన్‌ అకాడెమీ ఆఫ్‌ ఆర్ట్స్‌ అండ్‌ సైన్స్‌.. పేరు చెప్పగానే ఆల్బర్ట్‌ ఐన్‌స్టీన్‌, ఛార్లెస్‌ డార్విన్‌, విన్‌స్టన్‌ చర్చిల్‌, నెల్సన్‌ మండేలా, అకిరా కురొసావా మొదలైనవారి పేర్లు వినిపిస్తాయి. 240 ఏళ్ల చరిత్ర ఉన్న ఈ ప్రతిష్ఠాత్మక సంస్థలో వీరంతా సభ్యులు మరి! ఈ సంస్థ ఏటా ప్రపంచవ్యాప్తంగా కళలు, శాస్త్ర రంగాల్లో అత్యంత ప్రతిభ చూపినవారిని సభ్యులుగా ఎంపిక చేస్తుంది. ఈ ఏడాది ఈ జాబితాలో మనదేశ మూలాలున్న ఆరుగురు చోటు దక్కించుకున్నారు. వారిలో ముగ్గురు మహిళలే! వారే.. శారదా శ్రీనివాసన్‌,    కవితా రమణన్‌, గాయత్రీ చక్రవర్తి స్పివక్‌. ఈ అంతర్జాతీయ మేధావుల స్ఫూర్తి ప్రయాణం మనమూ చూద్దాం.

తరువాయి