ఇంట్లో గొడవలతో చిరాకొస్తోంది
close
Published : 23/06/2021 01:23 IST

ఇంట్లో గొడవలతో చిరాకొస్తోంది

ఇంటర్‌ చదువుతున్నాను. నాన్న ఇంటి నుంచి పనిచేస్తున్నారు. అమ్మానాన్నా మాటిమాటికీ గొడవ పడుతున్నారు. నాన్న అన్నింటికీ అమ్మను విమర్శిస్తుంటే బాధగా ఉంది. మనసు పెట్టి చదవలేకపోతున్నాను. పరిస్థితి మెరుగవ్వాలంటే ఏం చేయాలి?

- మానస, హైదరాబాద్‌

ఇంతకుముందు ఎవరి పనులు వాళ్లు చేసుకుంటూ దూరదూరంగా ఉండటం వల్ల ఒకరి గురించి ఒకరు అంతగా పట్టించుకునేవాళ్లు కాదు. ఇప్పుడు రోజంతా కలిసుండటంవల్ల ఒకళ్ల పని ఒకళ్లకి నచ్చనందున ఇలా జరుగుతోంది. నాన్న అమ్మ చేసే ప్రతి పనినీ చూస్తూ ఏదైనా నచ్చకో, శబ్దాల వల్ల ఆఫీసు పనికి ఇబ్బంది కలిగో కోపం చూపిస్తుండవచ్చు. అందరికీ అన్నీ అమర్చుతూ పనులు తెమలకో, అలసటతోనో అమ్మకి చిరాకు ఎక్కువై ఉండొచ్చు. అలా వాళ్లు పిల్లల్ని అనలేక ఒకర్నొకరు తప్పుపట్టడం, గొడవపడటం జరుగుతోంది. మొదట్నుంచీ గొడవలుంటే అవిప్పుడు తీవ్రమై ఉండొచ్చు. గమనించాల్సింది ఏమంటే నువ్వు పుట్టకముందు కూడా వాళ్లకేవో సమస్యలుండొచ్చు. వాటిని సమర్థించుకుంటూ ఇన్నేళ్లూ కలిసున్నారు. కనుక వాళ్ల విషయం, నాకు సంబంధించింది కాదనుకుని దూరంగా వెళ్లు. నీ బాధ్యత చదువు. ఇంటర్‌ కీలకం కనుక చదువుమీదే ధ్యాసపెట్టు. మంచి మార్కులు రావాలనే ధ్యేయం పెట్టుకో. నాన్నెందుకు విసుక్కుంటున్నదీ గమనించి, అమ్మతో చర్చించు. పరిస్థితిలో మార్పు వచ్చేలా చూడు. అమ్మమీద జాలి చూపనవసరంలేదు. తన సమస్యను తాను పరిష్కరించుకోగలదు. కుటుంబ సమస్యలతో చదువు మీద శ్రద్ధ పెట్టలేకపోతున్నానని వాళ్లు అర్థం చేసుకునేలా విడివిడిగా మెల్లగా, విశదంగా చెప్పు. వీలైతే గొడవపడే అవకాశం రాకుండా చూడు. కానీ నీ ధ్యాసంతా చదువుమీదే ఉండాలి.

మరిన్ని

అతివకు ఆరోగ్యం.. ఆమె అభిమతం!

‘సాయం చేయాలంటే కావాల్సింది డబ్బు మాత్రమే కాదు... ఇతరుల కష్టాలకు స్పందించే గుణం’ అది లేకపోతే... మనుషులుగా మనకు గుర్తింపు ఎందుకు అంటారు శ్రీదేవి. ఆమె స్వస్థలం ఆంధ్రప్రదేశ్‌లోని పశ్చిమగోదావరి జిల్లా తణుకు. భర్త వృత్తి రీత్యా ఖమ్మంలో స్థిరపడింది వారి కుటుంబం. సేవా కార్యక్రమాల్లో పాలుపంచుకోవాలనే ఆలోచన తాను ఎదుర్కొన్న ఇబ్బందుల నుంచే వచ్చిందని చెబుతారామె. ‘చీకట్లో కూర్చుని వెలుతురు లేదని బాధపడితే ఎలా? పరిష్కారం కోసం ప్రయత్నించాలి కదా...! నేనూ అదే చేస్తున్నా. కొన్నేళ్ల కిందట తీవ్రమైన గైనిక్‌ సమస్యతో బాధపడ్డా. చికిత్స కోసం తిరగని ఆసుపత్రి లేదు. అప్పుడే విద్యార్థినులు, తోటి మహిళల్లో చాలామందికి నెలసరి విషయాలపై కనీస అవగాహన లేదనే విషయం తెలుసుకున్నా.

తరువాయి

AAAS: ఈ ముగ్గురు... అంతర్జాతీయ ప్రతిభావనులు

అమెరికన్‌ అకాడెమీ ఆఫ్‌ ఆర్ట్స్‌ అండ్‌ సైన్స్‌.. పేరు చెప్పగానే ఆల్బర్ట్‌ ఐన్‌స్టీన్‌, ఛార్లెస్‌ డార్విన్‌, విన్‌స్టన్‌ చర్చిల్‌, నెల్సన్‌ మండేలా, అకిరా కురొసావా మొదలైనవారి పేర్లు వినిపిస్తాయి. 240 ఏళ్ల చరిత్ర ఉన్న ఈ ప్రతిష్ఠాత్మక సంస్థలో వీరంతా సభ్యులు మరి! ఈ సంస్థ ఏటా ప్రపంచవ్యాప్తంగా కళలు, శాస్త్ర రంగాల్లో అత్యంత ప్రతిభ చూపినవారిని సభ్యులుగా ఎంపిక చేస్తుంది. ఈ ఏడాది ఈ జాబితాలో మనదేశ మూలాలున్న ఆరుగురు చోటు దక్కించుకున్నారు. వారిలో ముగ్గురు మహిళలే! వారే.. శారదా శ్రీనివాసన్‌,    కవితా రమణన్‌, గాయత్రీ చక్రవర్తి స్పివక్‌. ఈ అంతర్జాతీయ మేధావుల స్ఫూర్తి ప్రయాణం మనమూ చూద్దాం.

తరువాయి