నీళ్లే కాదు.. కొబ్బరీ మంచిదే! - health benefits of coconut pulp
close
Updated : 22/07/2021 20:36 IST
Facebook Share Twitter Share WhatsApp Share Telegram Share Link Share

నీళ్లే కాదు.. కొబ్బరీ మంచిదే!

డీహైడ్రేషన్‌ సమస్యలను అధిగమించాలన్నా, అందాన్ని మెరుగుపరచుకోవాలన్నా కొబ్బరి నీళ్లకు మించింది మరొకటి లేదు. శరీరంలో రోగ నిరోధక శక్తిని పెంచడంలో కూడా కీలక పాత్ర పోషిస్తుందీ న్యాచురల్‌ డ్రింక్‌. అందుకే కరోనా మొదలయ్యాక కొబ్బరి నీళ్లకు కూడా డిమాండ్ బాగా పెరిగిపోయింది. ఇమ్యూనిటీ కోసమైనా చాలామంది దీనిని డైట్‌లో భాగం చేసుకుంటున్నారు.

కొబ్బరిని అలాగే వదిలేస్తున్నారా?

కొబ్బరి బోండంలో స్వచ్ఛమైన, రుచికరమైన నీళ్లతో పాటు అడుగు భాగాన కొబ్బరి ఉంటుంది. దీన్ని ‘నారియల్‌ మలాయ్’, ‘కోకొనట్‌ క్రీమ్‌’, ‘కొబ్బరి పల్ప్’, ‘కోకొనట్‌ మీట్‌’ అని వివిధ పేర్లతో పిలుస్తుంటారు. అయితే చాలామంది కొబ్బరి బోండంలో నీళ్లు మాత్రమే తాగుతారు. అందులోని కొబ్బరిని ఏ మాత్రం పట్టించుకోరు. ఇందులోని పోషకాల గురించి అవగాహన లేకనో... ఈ కొబ్బరిని తింటే బరువెక్కుతామన్న అపోహతోనో ఇలా చేస్తుంటారు.

ఇమ్యూనిటీ కోసం కొబ్బరి మలాయ్!

అయితే కొబ్బరి నీళ్లతో పాటు అడుగున ఉండే కొబ్బరిలోనూ ఎన్నో అద్భుత గుణాలు ఉన్నాయంటున్నారు నిపుణులు. రోగనిరోధక శక్తితో పాటు పలు ఆరోగ్య ప్రయోజనాలు ఈ కొబ్బరితో ముడిపడి ఉన్నాయని వారు చెబుతున్నారు. మరి అవేంటో మనమూ తెలుసుకుందాం రండి.

గుండె ఆరోగ్యానికి మంచిది!

ఈ కొబ్బరి మలాయ్‌లో కొవ్వులు అధికంగా ఉండే మాట నిజమే. అయితే అవి శరీరానికి మేలు చేసే కొవ్వులు. శరీరంలోని చెడు కొలెస్ట్రాల్‌ను తగ్గించడంలోనూ, అదేవిధంగా మంచి కొలెస్ట్రాల్‌ స్థాయులను పెంచడంలోనూ ఇవి బాగా తోడ్పడతాయి. ఈ క్రమంలో గుండెకు సంబంధించిన సమస్యల నుంచి రక్షణ పొందాలంటే దీనిని డైట్‌లో చేర్చుకోవాల్సిందే.

బరువు తగ్గాలంటే..

ఈ కొబ్బరిలో పీచుపదార్థం అధికంగా ఉంటుంది. ఇది శరీరంలోని కొవ్వును కరిగిస్తుంది. అంతేకాదు ఈ కొబ్బరిని తీసుకోవడం వల్ల ఎక్కువసేపు కడుపు నిండుగా ఉన్న భావన కలుగుతుంది. దీంతో ఆకలి కోరికలు కూడా అదుపులో ఉంటాయి. కాబట్టి అధిక బరువును తగ్గించుకోవాలనుకునే వారికి ఇది మంచి ఆహారం.

ఆ సమస్యలు దూరం!

కొబ్బరి మలాయ్‌లో ఫైబర్‌ పుష్కలంగా ఉంటుంది. ఇది ఆహారం సులభంగా జీర్ణమవ్వడంలో బాగా తోడ్పడుతుంది. ఫలితంగా జీర్ణక్రియ రేటు మెరుగుపడడమే కాకుండా కడుపులో మంట, అజీర్తి, ఉబ్బరం, మలబద్ధకం లాంటి జీర్ణ సంబంధ సమస్యలు కూడా దూరమవుతాయి.

తక్షణ శక్తి కోసం..

డీహైడ్రేషన్‌ లాంటి సమస్యల నుంచి ఉపశమనం పొందడంలో కొబ్బరి నీళ్లు ఎంత సమర్థంగా పని చేస్తాయో అందరికీ తెలుసు. అయితే కొబ్బరి నీళ్లతో పాటు కొబ్బరి మలాయ్‌ను కూడా తీసుకుంటే శరీరంలో నీటి స్థాయులను మరింతగా పెంచుకోవచ్చంటున్నారు నిపుణులు. ఫలితంగా శరీరానికి తక్షణ శక్తి లభించి రోజంతా ఉత్సాహంగా ఉండవచ్చని వారు చెబుతున్నారు.

రక్తపోటు సమస్యలు దూరం

కొబ్బరి మలాయ్‌ను తరచుగా తీసుకోవడం వల్ల రక్తపోటు సమస్యల నుంచి రక్షణ పొందవచ్చు. ఇందులోని సి-విటమిన్‌, పొటాషియం, మెగ్నీషియం, ఇతర పోషకాలు రక్తపోటులోని హెచ్చుతగ్గులను నివారించడంలో బాగా సహాయపడతాయి.

రోగ నిరోధక శక్తి

శరీరంలో రోగ నిరోధక శక్తిని పెంచి వివిధ ఇన్ఫెక్షన్ల బారి నుంచి రక్షణ కల్పించడంలో యాంటీ ఆక్సిడెంట్లు ఎంతో కీలకం. వీటితో పాటు యాంటీ ఇన్‌ఫ్లమేటరీ గుణాలు కొబ్బరి మలాయ్‌లో సమృద్ధిగా ఉంటాయి. కాబట్టి ప్రస్తుత కరోనా పరిస్థితుల్లో ఇమ్యూనిటీని పెంచుకోవాలనుకునేవారికి ఇది మంచి ఆహారమని చెప్పవచ్చు.

చర్మ సంరక్షణ కోసం..

చర్మ సంరక్షణకు ఉపకరించే అద్భుత గుణాలు కూడా ఈ కొబ్బరిలో ఉన్నాయి. ఇందులో విరివిగా ఉండే యాంటీ ఆక్సిడెంట్లు వివిధ చర్మ సమస్యలను చాలా వరకు దూరం చేస్తాయి.

ఇతర ఆరోగ్య ప్రయోజనాలు

* కొబ్బరి మలాయ్‌లో ఎ, బి, సి-విటమిన్లు, థయమిన్‌, రైబోఫ్లావిన్‌ పుష్కలంగా ఉంటాయి.

* ఇందులోని క్యాల్షియం ఎముకలను బలంగా మార్చడంలో సహాయపడుతుంది. ఆస్టియోపొరోసిస్ లాంటి వ్యాధుల నుంచి రక్షణ కల్పిస్తుంది.

* చిగుళ్ల వాపు, నొప్పి, రక్తం కారడం లాంటి సమస్యలను దూరం చేస్తుంది.

* మూత్రపిండాలకు సంబంధించిన వ్యాధులతో బాధపడేవారికి ఇది మంచి ఆహారం.

చూశారుగా.. కొబ్బరి బోండంలో ఉండే కొబ్బరితో ఎన్ని ప్రయోజనాలున్నాయో! కాబట్టి ఇక నుంచీ కొబ్బరి బోండం కొన్నప్పుడు కొబ్బరి నీళ్లతో పాటు మలాయ్‌ను కూడా తీసుకోండి.


మరిన్ని

ఇంట్లో పదే పదే తాకే వాటిని ఇలా శుభ్రం చేయాల్సిందే!

ప్రస్తుత ప్రతికూల పరిస్థితుల్లో రోజూ మనం ఇంట్లో ఉన్నా, బయటికి వెళ్లొచ్చినా వ్యక్తిగత శుభ్రత పాటించడం, మనతో పాటు తెచ్చిన వస్తువుల్ని శానిటైజ్‌ చేయడం.. వంటివి కచ్చితంగా పాటిస్తున్నాం.. మరి, మనం ఇంట్లో పదే పదే తాకే వస్తువుల సంగతేంటి? మనం బయటికెళ్లినా అవి ఇంట్లోనే ఉంటున్నాయి కదా.. అంటారా? అయినా సరే.. వాటిని రోజూ శుభ్రం చేయాల్సిందే అంటున్నారు నిపుణులు. తద్వారా వాటిపై చేరే వైరస్‌, బ్యాక్టీరియా, క్రిములు ఒకరి నుంచి మరొకరికి అంటుకోకుండా జాగ్రత్తపడచ్చు. ఇంతకీ మనం ఇంట్లో తరచూ తాకే ప్రదేశాలు, వస్తువులేంటి? వాటిని ఎలా శానిటైజ్‌ చేయాలి? రండి తెలుసుకుందాం..!

అందుకే టవల్స్ విషయంలోనూ శుభ్రంగా ఉండాల్సిందే!

ఉదయం నిద్ర లేచింది మొదలు.. రాత్రి నిద్రపోయే వరకు రోజులో ఎన్నోసార్లు ముఖాన్ని, చేతుల్ని కడుక్కుంటూ ఉంటాం. ఇలా కడిగిన ప్రతిసారీ కచ్చితంగా టవల్‌తో తుడుచుకోవాల్సిందే. ఇలా మనకు తెలియకుండానే రోజులో చాలాసార్లు టవల్‌ను వాడుతూనే ఉంటాం. మరి, మీరు నిత్యం ఉపయోగించే ఈ టవళ్లు బ్యాక్టీరియాలకు మంచి ఆవాసాలనే విషయం మీకు తెలుసా? కరోనా విలయ తాండవం చేస్తున్న నేపథ్యంలో - ప్రతి రోజూ మీరు ఉపయోగించే టవల్ విషయంలో ఎంతవరకు జాగ్రత్త వహిస్తున్నారు? ఇంతకీ టవళ్లను ఎప్పటికప్పుడు శుభ్రం చేసుకోకపోతే కలిగే నష్టాలేంటి..? వీటిని అధిగమించడానికి ఎలాంటి జాగ్రత్తలు తీసుకోవాలి?.. రండి తెలుసుకుందాం..

మాడ్యులర్ కిచెన్ ఎలా ఉండాలంటే..

కొత్త ట్రెండ్స్ కేవలం ఫ్యాషన్‌కు మాత్రమే పరిమితం అనుకుంటే పొరపాటే. మనం కొత్తగా సిద్ధమవ్వడమే కాదు.. మన ఇంటినీ కొంగొత్త ఇంటీరియర్స్‌తో సరికొత్తగా మార్చేయవచ్చు. అందులోనూ.. ప్రస్తుతం మహిళలందరూ మారుతున్న ట్రెండ్స్‌కు అనుగుణంగా తమ ఇంటిని ట్రెండీగా, స్త్టెలిష్‌గా తీర్చిదిద్దుకోవాలని భావిస్తున్నారు కూడా.. ఈ నేపథ్యంలో చాలామంది మాడ్యులర్ కిచెన్స్‌కు ఓటేస్తున్నారు. అయితే వీటి నిర్మాణ క్రమంలో కొన్ని ముఖ్యమైన అంశాలు దృష్టిలో పెట్టుకుంటేనే వంటగది సౌకర్యవంతంగా నిర్మించుకోవడానికి అవకాశం ఉంటుందంటున్నారు ఇంటీరియర్ నిపుణులు. మరి, ఆ అంశాలేంటో మనమూ తెలుసుకుందాం రండి..

కరోనా వేళ నగల్ని కూడా ఇలా శానిటైజ్ చేయాల్సిందేనట!

కరోనా కేసులు క్రమంగా తగ్గుతున్నంత మాత్రాన వైరస్‌ పీడ విరగడైంది అనుకోవడానికి లేదు.. ఎందుకంటే ఈ మాయదారి మహమ్మారి ఎప్పుడెలా విరుచుకుపడుతుందో ఎవరికీ అంతు చిక్కట్లేదు. అందుకే కొవిడ్‌ తగ్గుముఖం పట్టినా, టీకా వేసుకున్నా కనీస జాగ్రత్తలు పాటించాల్సిందే అని నిపుణులు పదే పదే చెబుతున్నారు. ఇక బయటి నుంచి తెచ్చిన ప్రతి వస్తువునూ శానిటైజ్‌ చేయాల్సిందే అంటున్నారు. మనం రోజూ ధరించే వివిధ రకాల ఆభరణాలూ ఇందుకు మినహాయింపు కాదంటున్నారు. ఎందుకంటే కరోనా వైరస్‌ లోహాలపై మూడు గంటల నుంచి మూడు రోజుల దాకా జీవించి ఉంటుందని సెంటర్స్‌ ఫర్‌ డిసీజ్‌ కంట్రోల్‌ అండ్‌ ప్రివెన్షన్‌ (సీడీసీ) సంస్థ చెబుతోంది. ఈ నేపథ్యంలో మనం రోజూ ధరించే ఆభరణాలను ఎలా శానిటైజ్‌ చేయాలో తెలుసుకుందాం రండి..

ఆరోగ్యమస్తు

మరిన్ని

అనుబంధం

మరిన్ని

యూత్ కార్నర్

మరిన్ని

వర్క్ & లైఫ్

మరిన్ని

సూపర్ విమెన్

మరిన్ని

బ్యూటీ & ఫ్యాషన్

మరిన్ని